ವಾಷಿಂಗ್ಟನ್‌: ಸೂರ್ಯನಿಂದ ಹೊರಹೊಮ್ಮುವ ಕಿರಣಗಳು ಮತ್ತು ಶಕ್ತಿಯ ಪ್ರಮಾಣವನ್ನು ಅಳೆಯಲು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ನಾಸಾ), ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಉಪಕರಣವೊಂದನ್ನು ಅಳವಡಿಸಿದೆ.
‘ಟೋಟಲ್‌ ಆ್ಯಂಡ್‌ ಸ್ಪೆಕ್ಟ್ರಲ್‌ ಸೋಲಾರ್‌ ಇರ್ರಾಡಿಯನ್ಸ್‌ ಸೆನ್ಸರ್‌(ಟಿಎಸ್‌ಐಎಸ್‌–1)’ ಹೆಸರಿನ ಉಪಕರಣ ಈಗ ಸಂಪೂರ್ಣವಾಗಿ ಕಾರ್ಯನಿರ್ವಹಿಸುತ್ತಿದ್ದು, ಮಾಹಿತಿಯನ್ನು ಕಲೆಹಾಕುತ್ತಿದೆ ಎಂದು ನಾಸಾ ತಿಳಿಸಿದೆ.
‘ಟಿಎಸ್‌ಐಎಸ್‌–1' ಉಪಕರಣದಿಂದ ಓಝೋನ್‌ ಪದರ, ಭೂಮಿಯ ಮೇಲಿನ ವಿಕಿರಣಗಳು, ಪರಿಸರ, ವಾತಾವರಣದಲ್ಲಿ ಬದಲಾವಣೆ ಸೇರಿದಂತೆ ಹಲವು ಮಹತ್ವದ ವಿಷಯಗಳ ಬಗ್ಗೆ ಅಧ್ಯಯನ ನಡೆಸಲು ಅನುಕೂಲವಾಗಲಿದೆ’ ಎಂದು ಈ ಯೋಜನೆಯಲ್ಲಿ ಭಾಗಿಯಾಗಿರುವ ವಿಜ್ಞಾನಿ ಡಾಂಗ್‌ ವು ತಿಳಿಸಿದ್ದಾರೆ.
ಕಳೆದ ವರ್ಷ ಡಿಸೆಂಬರ್‌ 15ರಂದು ಫ್ಲಾರಿಡಾದ ಕೇಪ್‌ ಕಾನವೀರಲ್‌ ವಾಯು ಪಡೆ ನಿಲ್ದಾಣದಿಂದ ಸ್ಪೇಸ್‌ ಎಕ್ಸ್‌ ಫಾಲ್ಕಾನ್‌ 9 ರಾಕೆಟ್‌ ಮೂಲಕ ಈ ಉಪಕರಣವನ್ನು ಉಡಾವಣೆ ಮಾಡಲಾಗಿತ್ತು.
ಎರಡು ತಿಂಗಳಿಂದ ಈ ಉಪಕರಣದ ಪರೀಕ್ಷೆಯನ್ನು ಅಮೆರಿಕದ ಕೊಲೊರಾಡೊ ವಿಶ್ವವಿದ್ಯಾಲಯದ ತಜ್ಞರ ತಂಡ ನಡೆಸುತ್ತಿತ್ತು.
ಸೂರ್ಯನ ವೀಕ್ಷಣೆಗೆ ಈ ಉಪಕರಣದ ಬಾಗಿಲುಗಳು ತೆರೆದ ಬಳಿಕ ಜನವರಿ 11ರಂದು ಪ್ರಥಮ ಬಾರಿ ಮಾಹಿತಿ ಸಂಗ್ರಹಿಸಲಾಗಿತ್ತು.
