ತಿರುವನಂತಪುರ: ಸಚಿವರು, ಶಾಸಕರು, ಸಭಾಧ್ಯಕ್ಷ, ಉಪಾಧ್ಯಕ್ಷ, ವಿರೋಧ ಪಕ್ಷದ ನಾಯಕರು ಹಾಗೂ ಮುಖ್ಯ ಸಚೇತಕರ ವೇತನ ಮತ್ತು ಭತ್ಯೆಯನ್ನು ಹೆಚ್ಚಿಸುವ ಮಸೂದೆಗೆ ಕೇರಳ ವಿಧಾನಸಭೆ ಬುಧವಾರ ಅನುಮೋದನೆ ನೀಡಿದೆ.
ಏಪ್ರಿಲ್ 1ರಿಂದ ವೇತನ ಪರಿಷ್ಕರಣೆ ಜಾರಿಗೆ ಬರಲಿದ್ದು, ಶಾಸಕರ ವೇತನ ₹39,500ರಿಂದ ₹70ಸಾವಿರಕ್ಕೆ ಹೆಚ್ಚಲಿದೆ. ಸಚಿವರು ಮತ್ತು ಇತರರ ವೇತನ ₹55 ಸಾವಿರದಿಂದ ₹90 ಸಾವಿರಕ್ಕೆ ಹೆಚ್ಚಲಿದೆ.
ನಿವೃತ್ತ ನ್ಯಾಯಮೂರ್ತಿ ಜೆ.ಎಂ.ಜೇಮ್ಸ್‌ ಆಯೋಗದ ಶಿಫಾರಸುಗಳ ಅನ್ವಯ ವೇತನ ಪರಿಷ್ಕರಣೆಯ ಮಸೂದೆಯನ್ನು ರೂಪಿಸಲಾಗಿತ್ತು. ಈ ಹಿಂದೆ 2012ರಲ್ಲಿ ವೇತನ ಪರಿಷ್ಕರಣೆ ಮಾಡಲಾಗಿತ್ತು.
ಸಚಿವರ ಕ್ಷೇತ್ರ ಭತ್ಯೆಯನ್ನು ₹12 ಸಾವಿರದಿಂದ ₹40 ಸಾವಿರಕ್ಕೆ ಹಾಗೂ ಶಾಸಕರ ಕ್ಷೇತ್ರ ಭತ್ಯೆಯನ್ನು ₹12ಸಾವಿರ ದಿಂದ ₹25ಸಾವಿರಕ್ಕೆ ಹೆಚ್ಚಿಸಲಾಗಿದೆ.
ಜತೆಗೆ ರಾಜ್ಯ ಮತ್ತು ಹೊರರಾಜ್ಯದಲ್ಲಿನ ವಿಧಾನಸಭೆ ಸಮಿತಿ ಸಭೆಯಲ್ಲಿ ಪಾಲ್ಗೊಳ್ಳಲು ವಿಮಾನ ಪ್ರವಾಸಕ್ಕೆ ಶಾಸಕರಿಗೆ ಅವಕಾಶ ಕಲ್ಪಿಸಲಾಗಿದೆ. ಇದಕ್ಕಾಗಿ ಪ್ರತಿ ವರ್ಷ ₹50 ಸಾವಿರದವರೆಗೆ ಖರ್ಚು ಮಾಡಬಹುದು. ವೇತನ ಪರಿಷ್ಕರಣೆಯಿಂದ ರಾಜ್ಯದ ಬೊಕ್ಕಸಕ್ಕೆ ಪ್ರತಿ ವರ್ಷ ₹5.25 ಕೋಟಿ ಹೊರೆಯಾಗಲಿದೆ.
ಹಾಗೆಯೇ ಮಾಜಿ ಶಾಸಕರ ಪಿಂಚಣಿಯನ್ನು ₹1ಸಾವಿರ ಹೆಚ್ಚಿಸಲು ಅನುಮೋದನೆ ನೀಡಲಾಯಿತು. ಇದರಿಂದ ಗರಿಷ್ಠ ಪಿಂಚಣಿಯನ್ನು ಪ್ರತಿ ತಿಂಗಳಿಗೆ ಈಗಿರುವ ₹35ಸಾವಿರದಿಂದ ₹50 ಸಾವಿರಕ್ಕೆ ಹೆಚ್ಚಿಸಲಾಗಿದೆ.
