ನಗುವಿನ ಬೀಜಗಳು ಮಾರಾಟಕ್ಕಿವೆ

ಮನೆಯಿಂದ ಹೊರಬಂದವರ ಸಂತಸದ ಮುಖ
ಸರದಿ ಸಾಲಿನಲ್ಲಿ ನಿಂತವರ ಮನವನ್ನು ಅರಳಿಸುತ್ತಿತ್ತು
ನೋಡಿದವರ ಮನ
ನಮಗೂ ಅವಕಾಶವಿದೆ ಅಂತ ಕುಣಿಯುತ್ತಿತ್ತು
ಮನೆ ಒಳಗೆ ಒಬ್ಬೊಬ್ಬರಿಗೆ ಒಂದೊಂದು ಸಮಯ
ತಮ್ಮ ತಮ್ಮ ಕಷ್ಟಗಳನು ಹೇಳಿಕೊಳ್ಳಲು ಒಂದಿಷ್ಟು ಅವಧಿ
ಅವರ ಬದುಕ ಕಂಡು ಆತ ಒಳಗೊಳಗೆ ನಗುತ್ತಾನೆ
ಕಣ್ಣು ಮುಚ್ಚಿ ಬಾಯಿಂದ
ಆ ನಗುವಿನ ಬೀಜಗಳನು ಉಗುಳುತ್ತಾನೆ
ನೆಲಕ್ಕೆ ಬಿದ್ದ ಬೀಜಗಳನು ಆತನೇ ಆರಿಸಿ ಒರೆಸಿ
ಅವರ ಕೈಗೆ ಇಡುತ್ತಾನೆ
ಈ ಬೀಜ ಮಾಂತ್ರಿಕನ ವರ್ತನೆಯೇ ವಿಸ್ಮಯ
ನಗುವಿನ ಬೀಜಗಳು ಅವನ ಹತ್ತಿರ ಮಾತ್ರ ಸಿಗುತ್ತವೆ
ಬಂದವರು ಬರುವವರಿಗೆ ನಗುವ ಹಬ್ಬ
ನಗುವನ್ನು ಮರೆತವರಿಗೆ ಮತ್ತೆ ನಗುತ್ತೇವೆಂಬ ಹಂಬಲ

ಕೊಟ್ಟ ಬೀಜಗಳನು ಭೂಮಿಗೆ ಸೇರಿಸುವಂತಿಲ್ಲ
ಮನೆಯ ಸುತ್ತ ಉಳುವಂತಿಲ್ಲ
ಬೀಜ ಒಡೆದು ಮನೆಯವರಿಗೆ ಹಂಚಿಕೊಡುವಂತಿಲ್ಲ
ಯಾರಿಗೂ ಮಾರುವಂತಿಲ್ಲ
ನನ್ನಲ್ಲಿ ಇದೆ ಅಂತ ಹೇಳುವಂತಿಲ್ಲ
ಕೊಟ್ಟವರ ಚಹರೆಯನು ಬಣ್ಣಿಸುವಂತಿಲ್ಲ
ಒಂದೊಂದು ಬೀಜಕ್ಕೂ
ಅವನಂದುಕೊಂಡಷ್ಟು ಶಕ್ತಿ
ನಗದವರ ಸಮಸ್ಯೆಗೆ ಅವನ ಬೀಜಮಂತ್ರ
ಇಷ್ಟು ಪಾಲಿಸಿದರೆ ನಗಬಹುದು
ಇಲ್ಲವಾದರೆ ನಗು ಮತ್ತೆಂದಿಗೂ
ಅವರನು ಕಾಡಲಾರದೆಂದಿಗೂ

ನಗುವಿನ ಬೀಜಗಳನು ಕೊಂಡು ತಂದು
ನುಂಗಿ ನೀರು ಕುಡಿದವರು ಅನೇಕರು
ನಗದವರು ನಕ್ಕರು
ಎಂದೂ ನಗದವರು ಜೋರಾಗಿ
ನಗತೊಡಗಿದರು
ನಗಬೇಕಾದ ಕಡೆ ಮಾತ್ರ ನಕ್ಕವರು
ಭೇಷ್ ಅನಿಸಿಕೊಂಡರು
ಉಳಿದವರು ಹುಚ್ಚರೆಂದು ಕರೆಸಿಕೊಂಡರು
ಜಗವ ನೋಡಿ ಕೆಲವರು ಗಹಗಹಿಸಿ ನಗುತ್ತಿದ್ದರು
ಅವರ ಅಪಹಾಸ್ಯದ ಕಾರಣನವರಿಯದೆ
ದೂರವಾದರು ಅನೇಕರು
ಗುಸು ಗುಸು ಪಿಸು ಪಿಸು ಒಳಗೊಳಗೆ

ನಗುವಿನ ಬೀಜಗಳು ಇಂದಿಗೂ ಮಾರಾಟಕ್ಕಿವೆ
ಆ ಹಳೆಯ ಬೀಜ ಮಾಂತ್ರಿಕ ಈಗ ಕಾಣುತ್ತಿಲ್ಲ
ಆತ ಎಲ್ಲಿ ಹೋದನೋ
ಯಾರು ಓಡಿಸಿದರೋ
ಬಿಟ್ಟುಹೋಗುವ ಕಾರಣವೇನಾಯಿತೋ
ಇಂದು ಬೀದಿ ಬೀದಿಗೂ ಸಂದಿ ಸಂದಿಗೂ
ನಗುವಿನ ಬೀಜಗಳು ಮಾರಾಟಕ್ಕಿವೆ
ಹೊಸ ಮಾಂತ್ರಿಕರು ಮಾರಾಟಗಾರರು
ದೂರ ದೂರ ದೇಶಗಳಿಂದ
ಬಂದಿಹರು ಬರುತಿಹರು
ಬಂದವರ ಸರದಿ ಸಾಲು ಇನ್ನೂ ನಿಂತಿಲ್ಲ
ಬಂದವರು ಬರುವವರು ಲೆಕ್ಕವಿಲ್ಲದಷ್ಟು
ಅಸಲಿ ನಕಲಿಯ ವ್ಯವಹಾರವೂ ಅಷ್ಟೇ ಜೋರು
ನಗದವರ ಸಂಖ್ಯೆ ಏರುತ್ತಲೇ ಇದೆ
ನಗಿಸುವ ಮಾಂತ್ರಿಕರ ಬೇಡಿಕೆ ಹಾಗೆಯೇ ಇದೆ
ನಗುವಿನ ಬೀಜಗಳು ಎಲ್ಲೆಲ್ಲೂ ಮಾರಾಟಕ್ಕಿವೆ!