7

ನಗುವನರಸಿ...

Published:
Updated:
ನಗುವನರಸಿ...

ಫೀಸಿನಿಂದ ಹೊರಡ್ತಿದೀರಾ? ಬನ್ನಿ... ನಿಮಗಾಗಿ ಸಂಜೆಯನ್ನು ತೆಗೆದಿರಿಸಿದ್ದೇವೆ. ಟಿಕೆಟ್‌ಗಳು ಗೇಟ್‌ ಬಳಿ... ಮಂಡೇ ಬ್ಲೂಸ್‌ ಇನ್ನಿಲ್ಲ, ‘ಮಂಡೇ ಫನ್ನೀಸ್’, ಹೈಫೈ ಲಾಫ್‌ ಎ ಲಾಟ್‌ ಥರ್ಸ್‌ಡೇಗಳು, ಶುಕ್ರವಾರ, ಶನಿವಾರ, ಭಾನುವಾರದ ಸಂಜೆಗಳು... ವಾರಾಂತ್ಯವಷ್ಟೇ ಅಲ್ಲದೆ ಆಗಾಗ ಪ್ರತಿ ವಾರ ಹೊಸ ಜೋಕುಗಳ ಭರವಸೆಯೊಂದಿಗೆ ನಗು ಈಗ ಬೆಂಗಳೂರಿನಲ್ಲೂ ಸಿಗುತ್ತಲಿದೆ. ಇಂತಹ ನವನಗು ಹುಡುಕಿ ಹೊರಡುವವರು ಕಾಸು ಕೊಟ್ಟಾದರೂ ಸರಿಯೇ ನಗಬೇಕು ಎನ್ನುವ ಹಾಸ್ಯಪ್ರಿಯರು.

ಸ್ಟ್ಯಾಂಡ್ ಅಪ್ ಕಾಮಿಡಿ ನೂರಾರು ಜನರೆದುರು ನಿಂತು ಅವರ ಕಣ್ಣು, ತುಟಿಗಳ ಗಮನಿಸುತ್ತಾ ಒಂದು ಗಳಿಗೆಯನ್ನೂ ವ್ಯಯಿಸದೆ ಮಾತುಗಳಲ್ಲಿ ಮೀಯಿಸುವ ಈ ಬಗೆಯ ಕಾಮಿಡಿಯನ್ನು ವಿವರಿಸುವುದು ತುಸು ತ್ರಾಸದಾಯಕ! ಇದೊಂದು ಕಾಮಿಡಿಯ ಪ್ರಕಾರ ಎಂದು ಹೇಳಿ ಮುಗಿಸಿಬಿಡಬಹುದೆ ಇದನ್ನು? ಸಿನಿಮಾಗಳಲ್ಲಿ ನಾಟಕಗಳಲ್ಲಿ ಬರುವಂತಹ ನಗೆಯಾಟವೇ!? ಅಥವಾ ವಾಟ್ಸ್‌ಆ್ಯಪ್, ಫೇಸ್‌ಬುಕ್‌ಗಳಲ್ಲಿ ಧುಮುಕುವ ನಗೆಸಾಲುಗಳೇ!? ಇವ್ಯಾವವೂ ಅಲ್ಲ! ಇದೊಂದು ನಗೆಕಾರಂಜಿ, ಅವ್ಯಕ್ತ ಲೋಕದ ಜೀವಂತ ಅನುಭೂತಿ! ನಮಗೆ ತೀರಾ ಪರಿಚಿತವಿರುವ ವಿಷಯವೊಂದು ಇಲ್ಲಿ ಭಿನ್ನವಾಗಿ ಕಾಣುತ್ತದೆ. ದಿನನಿತ್ಯದ ನಮ್ಮ ಅನುಭವಗಳೊಳಗೆ ಅಡಗಿರುವ ಹಾಸ್ಯವನ್ನೇ ಹೆಕ್ಕಿ ಅದರ ಮೊನೆಯ ಮೂಲಕ ನಮ್ಮ ಜಡ್ಡುಗಟ್ಟಿರುವ ಗ್ರಹಿಕೆಯ ಬಲೂನನ್ನು ಥಟ್ಟನೆ ಒಡೆದು ಆವಿಯಾಗುತ್ತದೆ. ಬದುಕು ಸಹ್ಯವಾಗುತ್ತಾ ಅಷ್ಟರಮಟ್ಟಿಗೆ ಕಷ್ಟದ ಗಳಿಗೆಗಳೂ ಕರಗಿ ಹೋಗುತ್ತವೆ. ಸ್ಟ್ಯಾಂಡ್ ಅಪ್ ಕಾಮಿಡಿ ಎನ್ನುವ ಈ ಹಾಸ್ಯ ಪ್ರಕಾರದ ವೈಶಿಷ್ಟ್ಯ ಇರುವುದೇ ಇಲ್ಲಿ! ಕಣ್ಣೆದುರು ಕಾಣುವ ವಸ್ತುಗಳನ್ನೂ ವಿಭಿನ್ನವಾಗಿ ತೋರಿಸಿ ಅಚ್ಚರಿ ಹುಟ್ಟಿಸುತ್ತದೆ. ಇವುಗಳೆಲ್ಲಕ್ಕಿಂತ ಮುಖ್ಯವಾಗಿ ಇದರ ವೈಶಿಷ್ಟ್ಯ ಇರುವುದು ನೇರ ನುಡಿಗಳಲ್ಲಿ! ಯಾವುದೇ ಸೆನ್ಸಾರ್‌ಶಿಪ್‌ಗಳಿಲ್ಲದೆ, ಯಾರ ಆಜ್ಞೆಗಳಿಗೂ ಸೊಪ್ಪು ಹಾಕದೆ ನೇರಾನೇರ ಮಾತುಗಳನ್ನ ಬಳಸಿ ನಮ್ಮನ್ನು ಅಚ್ಚರಿಗೊಳಿಸುವ ಪರಿಯೇ ಸ್ಟ್ಯಾಂಡ್ ಅಪ್ ಕಾಮಿಡಿ. ಎರಡೂವರೆ ಸಾವಿರ ವರ್ಷಗಳ ಹಿಂದೆಯೇ ಗ್ರೀಕ್ ಸಾಹಿತ್ಯದಲ್ಲಿ ಈ ಬಗೆಯ ಪ್ರಕಾರವನ್ನು ನೀವು ಕಾಣಬಹುದಾದರೂ ಇಂದಿನ ಆಧುನಿಕ ಯುಗದ ಸ್ಟ್ಯಾಂಡ್ ಅಪ್ ಕಾಮಿಡಿಯ ರೂಪವೇ ಬೇರೆ! ಇದೊಂದು ಅಕ್ಷರಸ್ಥರ ಹಾಸ್ಯ ಪ್ರಕಾರ ಎನ್ನುವ ಆಪಾದನೆಯಿದ್ದರೂ ಎಲ್ಲಾ ವರ್ಗಗಳಲ್ಲೂ ಈ ಬಗೆಯ ಪ್ರಕಾರ ಇದ್ದೇ ಇವೆ ಎನ್ನಬಹುದು.

ನ್ಯೂ ಜೋಕ್ಸ್, ಫ್ರೀ ಜೋಕ್ಸ್, ಫನ್ನಿ ಷೋ, ಕಾಮಿಡಿ ಲೈವ್, ಕಾಮಿಡಿ ನೈಟ್‌ಗಳ ಹೆಸರಿನಲ್ಲಿ ರಂಜಿಸಲು ಕಾದಿವೆ. ಸಾಮಾಜಿಕ ಮಾಧ್ಯಮ ಈ ‘ಟ್ರೆಂಡ್‌’ ಬೆಳವಣಿಗೆಗೆ ದೊಡ್ಡ ಕೊಡುಗೆ ನೀಡುತ್ತಿದೆ. ಕಾಮಿಡಿ ಕ್ಲಬ್‌ಗಳು, ಕೆಫೆ, ಬಾರ್‌, ಪಬ್‌, ಕಾಲೇಜು ಹಾಗೂ ಪಾರ್ಟಿ ಹಾಲ್‌ಗಳಲ್ಲಿ ಪ್ರತಿವಾರ ಇಂತಹ ಕಾರ್ಯಕ್ರಮಗಳು ನಡೆಯುತ್ತಿವೆ. ಬೆಂಗಳೂರಿನ ಕಾಮಿಡಿ ಕ್ಲಬ್‌, ಲಾಲ್‌ಬಾಗ್‌ ಮತ್ತಿತರ ಹಾಸ್ಯಕೂಟಗಳು ಕಾರ್ಯಕ್ರಮ ಆಯೋಜಿಸಿ, ಕಲಾವಿದರಿಗೆ ವೇದಿಕೆ ಒದಗಿಸುತ್ತಿವೆ. ಕೆಲವು ಯುವ ಕಲಾವಿದರು, ತಾವೇ ಕಾಲೇಜು, ಪಬ್‌ಗಳಿಗೆ ತೆರಳಿ, ಇಂಥದ್ದೊಂದು ಕಾರ್ಯಕ್ರಮ ನಡೆಸಿಕೊಡುತ್ತೇವೆ, ಅವಕಾಶ ಕೊಡಿ ಎಂದು ವಿನಂತಿಸಿಕೊಂಡು ಅವರನ್ನು ನಗಿಸಿ ಬರುತ್ತಿದ್ದಾರೆ.

ಕಾಲೇಜಿನಲ್ಲಿನ ಹುಚ್ಚಾಟಗಳು, ಹಾಸ್ಟೆಲ್‌ನಲ್ಲಿನ ಸಾಹಸಗಳು, ಪರೀಕ್ಷೆಗಳಲ್ಲಿನ ಹೋರಾಟಗಳು, ಬೆಂಗಳೂರಿನ ಟ್ರಾಫಿಕ್‌ ಜಾಮ್‌, ಐಟಿ ಕಂಪನಿಗಳಲ್ಲಿನ ಒತ್ತಡ, ಉತ್ತರ ಭಾರತೀಯರ ಎಡವಟ್ಟುಗಳ ಬಗ್ಗೆ ಈ ಕಲಾವಿದರು ಪುಂಖಾನುಪುಂಖವಾಗಿ ನಗೆಬುಗ್ಗೆ ಚಿಮ್ಮಿಸುತ್ತಿದ್ದರೆ, ಜಂಜಡಗಳನ್ನೆಲ್ಲ ಮರೆತು ನಗುತ್ತ ಅವರಿಗೆ ಜೊತೆ ನೀಡುತ್ತಾರೆ ಜನ. ದುಡ್ಡು ಕೊಟ್ಟು ಹಾಸ್ಯವನ್ನು ಪಡೆಯಬೇಕಾದ ಈ ಸಂದರ್ಭವನ್ನು ಸಮರ್ಥವಾಗಿ ಬಳಸಿಕೊಳ್ಳುತ್ತಿದೆ ಯುವ ಸಮೂಹ. ಅದರಲ್ಲಿಯೂ, ಎಂ.ಬಿ.ಎ, ಎಂಜಿನಿಯರಿಂಗ್‌ ಮಾಡಿದವರು, ಐಟಿ ಕಂಪನಿಗಳಲ್ಲಿ ತಿಂಗಳಿಗೆ ಲಕ್ಷಾಂತರ ರೂಪಾಯಿ ಎಣಿಸುತ್ತಿದ್ದವರು ಸ್ಟ್ಯಾಂಡ್‌ ಅಪ್‌ ಕಾಮಿಡಿಯನ್ನೇ ವೃತ್ತಿಯನ್ನಾಗಿಸಿಕೊಳ್ಳುತ್ತಿದ್ದಾರೆ.

ಇದು ಸುವರ್ಣಕಾಲ

ಸದ್ಯ ಸ್ಟ್ಯಾಂಡ್‌ ಅಪ್‌ ಕಾಮಿಡಿಗೆ ಇದು ಸುವರ್ಣಕಾಲ ಎಂದೇ ಹೇಳಬಹುದು. ಬಹಳಷ್ಟು ಜನ ಈ ಕಲಾಪ್ರಕಾರದೆಡೆ ಈಗ ಆಕರ್ಷಿತರಾಗುತ್ತಿದ್ದಾರೆ. ಮೊದಲು ಬ್ಯಾಂಡ್‌ಗಳನ್ನು, ಮಿಮಿಕ್ರಿ ಮಾಡುವವರನ್ನು ಆಹ್ವಾನಿಸುತ್ತಿದ್ದವರು ಈಗ ಸ್ಟ್ಯಾಂಡ್‌ ಅಪ್‌ ಕಮಿಡಿಯನ್‌ಗಳನ್ನು ಕರೆಸುತ್ತಿದ್ದಾರೆ.

ಒಬ್ಬ ಕಲಾವಿದನ ಹತ್ತು ನಿಮಿಷದ ಮಾತುಗಳನ್ನು ಯೂ ಟ್ಯೂಬ್‌ನಲ್ಲಿ ಹಾಕಿದರೆ, ಅದನ್ನು ಒಂದೇ ದಿನದಲ್ಲಿ 10 ಲಕ್ಷಕ್ಕೂ ಹೆಚ್ಚು ಜನ ವೀಕ್ಷಿಸುತ್ತಿದ್ದಾರೆ. ಇದನ್ನು ಗಮನಿಸುವ ಸಂಘಟಕರು, ಅಂತಹ ಕಲಾವಿದರನ್ನು ಕರೆಸುತ್ತಿದ್ದಾರೆ. ಅದಕ್ಕೆ ₹250, ₹500ರಿಂದ ₹1,000ದವರೆಗೆ ಟಿಕೆಟ್‌ ದರವನ್ನೂ ಇಟ್ಟಿರುತ್ತಾರೆ.

ಇನ್ನು, ಕೆಲವು ಸಂಘಟಕರು, ಕಲಾವಿದರು ಕೂಡ ಸಾಮಾಜಿಕ ಮಾಧ್ಯಮಗಳ ಮೂಲಕವೇ ಜನರನ್ನು ತಲುಪುತ್ತಿದ್ದಾರೆ. ಬೆಂಗಳೂರಿನಲ್ಲೇ ಕನ್ನಡ, ಇಂಗ್ಲಿಷ್‌, ಹಿಂದಿಯಲ್ಲಿ ಮಾತನಾಡುವ 100ಕ್ಕೂ ಹೆಚ್ಚು ಕಲಾವಿದರು ಸಿಗುತ್ತಾರೆ.

ಸಂದೀಪರಾವ್, ವಂಶೀಧರ ಭೋಗರಾಜು, ಸಂಜಯ್‌ ಮನಕ್ತಲ, ಕೃತಾರ್ಥ ಶ್ರೀನಿವಾಸನ್‌, ಪ್ರಸಾದ್‌ ಭಟ್‌, ಇಂಗ್ಲಿಷ್‌ ಸ್ಟ್ಯಾಂಡ್‌ ಅಪ್‌ ಕಮಿಡಿಯನ್‌ಗಳಲ್ಲಿ ಪ್ರಚಲಿತದಲ್ಲಿದ್ದಾರೆ. ಬೆಂಗಳೂರಲ್ಲದೆ, ಮುಂಬೈ, ಚೆನ್ನೈ, ದೆಹಲಿ, ಕೋಲ್ಕತ್ತಾಗಳಲ್ಲಿಯೂ ಇವರು ಕಾರ್ಯಕ್ರಮ ನೀಡುತ್ತಾರೆ. ಇನ್ನು, ತಮಿಳುನಾಡಿನ ಪ್ರವೀಣಕುಮಾರ್‌ ಕೂಡ ಉತ್ತಮ ಹೆಸರು ಮಾಡಿದ್ದು, ಸದ್ಯ ಬೆಂಗಳೂರಿನಲ್ಲಿಯೇ ವಾಸವಿದ್ದಾರೆ.





ಕ್ಲಬ್‌ನಲ್ಲಿ ನಗೆಗಡಲಲ್ಲಿ ತೇಲುತ್ತಿರುವ ಯುವಜನರು

ಕಾರ್ಪೊರೇಟ್‌ ವಲಯದಲ್ಲಿ ಸಂಪೂರ್ಣ ಕನ್ನಡ ಸ್ಟ್ಯಾಂಡ್‌ ಅಪ್‌ ಕಾಮಿಡಿ ಮಾಡುವವರು ಹೆಚ್ಚಿನ ಸಂಖ್ಯೆಯಲ್ಲಿಲ್ಲ. ಆದರೆ, ಅನೂಪ್‌ ಮಯ್ಯ ನೇತೃತ್ವದ ಲಾಲ್‌ಬಾಗ್‌ (Lolbagh) ತಂಡದಲ್ಲಿ ಸುದರ್ಶನ್‌ ರಂಗಪ್ರಸಾದ್, ಪವನ್‌ ವೇಣುಗೋಪಾಲ, ಕಾರ್ತಿಕ್‌ ಪತ್ತಾರ್, ಹಂಪಾ ಕುಮಾರ್ ಜನರನ್ನು ನಗಿಸುತ್ತಿದ್ದಾರೆ. ಈ ಕ್ಷೇತ್ರದಲ್ಲಿ ಮಹಿಳೆಯರೂ ಹಿಂದೆ ಬಿದ್ದಿಲ್ಲ. ಸೀಮಾ ರಾವ್, ಸ್ನೇಹಾ ಸುಹಾಸ್‌, ಶ್ರೀರೂಪಾ, ಪುಣ್ಯಾ ಅರೋರಾ ತಮ್ಮ ಛಾಪು ಮೂಡಿಸುತ್ತಿದ್ದಾರೆ.

ಅವರದು ಜೀವನ; ಇವರದು ನವಜೀವನ

ಕನ್ನಡ ಸ್ಟ್ಯಾಂಡ್‌ ಅಪ್‌ ಕಾಮಿಡಿಯಲ್ಲಿ ದೊಡ್ಡ ಹೆಸರು ಮಾಡಿರುವ ಗಂಗಾವತಿ ಪ್ರಾಣೇಶ್‌ ಅವರ ಹಾಸ್ಯ ಗ್ರಾಮೀಣ ಭಾಗದ ಜನರನ್ನು, 40–50 ವರ್ಷ ಮೇಲ್ಪಟ್ಟವರನ್ನು ಆಕರ್ಷಿಸಿದರೆ, ಈ ಯುವ ಸಮೂಹದ ಜೋಕುಗಳು ವಿದ್ಯಾರ್ಥಿ ಜೀವನ, ಐಟಿ ಕಂಪನಿಗಳಲ್ಲಿನ ಒತ್ತಡದ ಬಗ್ಗೆ ಹೆಚ್ಚು ಕೇಂದ್ರಿತವಾಗಿರುತ್ತವೆ. ಅಂದರೆ, ಇವರದು ‘ಅರ್ಬನ್‌ ಕಾಮಿಡಿ ಸ್ಟೈಲ್‌’.



ಅನೂಪ್‌ ಮಯ್ಯ

ಪ್ರಾಣೇಶ್‌ ಮತ್ತು ತಂಡ ಈಗಾಗಲೇ ಒಳ್ಳೆಯ ಹೆಸರು ಮಾಡಿರುವುದರಿಂದ ಜನರಾಗಲಿ, ಸಂಘಟಕರಾಗಲಿ ಅವರನ್ನು ಸುಲಭವಾಗಿ ಗುರುತಿಸುತ್ತಾರೆ. ಆದರೆ, ಹೊಸಬರನ್ನು ಕರೆಸುವಾಗ ಚೌಕಾಸಿ ಮಾಡುತ್ತಾರೆ. ಹೀಗಾಗಿ, ಯಾವ ಸ್ಥಳದಲ್ಲಿ, ಯಾವ ಪ್ರೇಕ್ಷಕರೆದುರು ನಾವು ಮಾತನಾಡಿದರೆ ಯಶಸ್ಸು ಸಿಗುತ್ತದೆ ಎಂದು ತಿಳಿದು, ಅಂಥ ಪಬ್‌, ಕ್ಲಬ್‌ಗಳಿಗೆ ನಾವೇ ಹೋಗಿ ವಿನಂತಿ ಮಾಡಿಕೊಳ್ಳುತ್ತೇವೆ ಎಂದು ಅನೂಪ್‌ ಮಯ್ಯ ಹೇಳುತ್ತಾರೆ.

ಸವಾಲೂ ಸಾವಿರ

ಬೇರೆಯವರನ್ನು ನಗಿಸಿ, ಅವರನ್ನು ಒತ್ತಡಮುಕ್ತರನ್ನಾಗಿ ಮಾಡುವ ಸ್ಟ್ಯಾಂಡ್‌ ಅಪ್‌ ಕಮಿಡಿಯನ್‌ಗಳಿಗೂ, ನಿತ್ಯ ಹೊಸದನ್ನು ಕೊಡಬೇಕಾದ ಒತ್ತಡ ಇದೆ. ಒಬ್ಬ ಕಮಿಡಿಯನ್‌ ಪ್ರತಿ ಬಾರಿ ಮಾತನಾಡುವಾಗಲೂ ‘ಕಂಟೆಂಟ್‌’ ಹೊಸದಾಗಿರಬೇಕು. ವಾಟ್ಸ್‌ಆ್ಯಪ್‌, ಫೇಸ್‌ಬುಕ್‌ ಯುಗದಲ್ಲಿ ಎಂಥದ್ದೇ ಜೋಕೂ ಒಂದೆರಡು ದಿನಗಳಲ್ಲಿ ಹಳತಾಗಿಬಿಡುತ್ತದೆ. ಉತ್ತಮ ಸಿನಿಮಾ, ನಾಟಕವನ್ನು ನಾಲ್ಕೈದು ಬಾರಿ ನೋಡುವವರು ಇದ್ದಾರೆ. ಆದರೆ ಒಬ್ಬ ಹಾಸ್ಯಕಲಾವಿದನ ಒಂದು ಜೋಕನ್ನು ನಾಲ್ಕೈದು ಬಾರಿ ಕೇಳಿದರೆ ಬೇಸರಗೊಳ್ಳುತ್ತಾರೆ. ಆದರೆ, ಒಬ್ಬ ಕಲಾವಿದನಿಗೆ ಒಂದು ಗಂಟೆಯ ‘ಕಂಟೆಂಟ್‌’ ರೂಪಿಸಲು ಕೆಲವೊಮ್ಮೆ ಒಂದು ವರ್ಷ ಸಮಯ ಹಿಡಿಯುತ್ತದೆ. ಮೇಲಾಗಿ ಸಿನಿಮಾಗಳ ರೀತಿ ಇದನ್ನು ‘ರಿಮೇಕ್‌’ ಮಾಡುವಂತಿಲ್ಲ!

‘ಕೇಳುಗರೂ ಕೆಲವು ಅಂಶಗಳನ್ನು ಗಮನಿಸಬೇಕಾಗುತ್ತದೆ. ಯಾವುದೇ ಒಬ್ಬ ಕಲಾವಿದ ಹೊಸ ನಗೆಚಟಾಕಿಗಳನ್ನು ಹುಡುಕಬೇಕು, ಒಂದು ತಾಸು ಹೊಸದನ್ನೇ ಹೇಳಬೇಕು ಎಂದರೆ ಸಮಯ ಬೇಕಾಗುತ್ತದೆ. ಇದು ಕಷ್ಟ. ಹೀಗಾಗಿ, ಒಬ್ಬನೇ ಹಾಸ್ಯಕಲಾವಿದನ ಕಾರ್ಯಕ್ರಮವನ್ನು ಸತತವಾಗಿ ನೋಡಲು ಹೋದರೆ, ಎಲ್ಲ ಹಳೆಯದು ಎನಿಸುತ್ತದೆ. ಹಾಗಾಗಿ, ಸ್ವಲ್ಪ ಸಮಯ ತೆಗೆದುಕೊಂಡು ಬೇರೆ ಬೇರೆ ಕಲಾವಿದರ ಕಾರ್ಯಕ್ರಮ ನೋಡಬೇಕು ನಂತರ, ಮೊದಲು ನೋಡುತ್ತಿದ್ದ ಕಲಾವಿದರ ಕಾರ್ಯಕ್ರಮ ನೋಡಿದರೆ ಹಳೆಯದು ಎನಿಸುವುದಿಲ್ಲ’ ಎಂದು ಸಲಹೆ ನೀಡುತ್ತಾರೆ ಕಲಾವಿದ ವಂಶೀಧರ ಭೋಗರಾಜು.

ತಾವು ರೂಪಿಸಿಕೊಂಡಿರುವ ಒಂದು ಗಂಟೆಯ ಕಂಟೆಂಟ್‌ ಅನ್ನು, ಹತ್ತು ಹತ್ತು ನಿಮಿಷ ವಿಭಾಗಿಸಿ, ಅದನ್ನು ಬೇರೆ ಬೇರೆ ಕಡೆ ಹೇಳುವ ಮೂಲಕವೂ ಜನರನ್ನು ಹಿಡಿದಿಡುವ ಕಲೆ ರೂಢಿಸಿಕೊಳ್ಳುತ್ತಾರೆ ಕಲಾವಿದರು. ‘ಈ ಪ್ರಕಾರ ತಿಳಿದುಕೊಂಡು ಕಾರ್ಯಕ್ರಮ ನೀಡಿದರೆ ಒಳ್ಳೆಯದು. ಇದರಲ್ಲಿ ಸದ್ಯಕ್ಕೆ ಸ್ಪರ್ಧೆ ಇಲ್ಲ. ಎಷ್ಟು ಜನ ಬಂದರೂ ಅಷ್ಟು ಒಳ್ಳೆಯದು. ಆದರೆ, ಇಲ್ಲಿಯೇ ನೆಲೆ ನಿಲ್ಲಬೇಕು ಎಂಬುವವರು ಪರಿಶ್ರಮ ಪಡಲೇಬೇಕಾಗುತ್ತದೆ’ ಎನ್ನುತ್ತಾರೆ ಭೋಗರಾಜು.



ವಂಶೀಧರ ಭೋಗರಾಜು

***

‘ಮೆಕ್ಯಾನಿಕಲ್‌ ಎಂಜಿನಿಯರ್ ಗಳು ಒಂಥರಾ ಜಾಯಿಂಟ್‌ ಫ್ಯಾಮಿಲಿ ಇದ್ದಂಗೆ. ಮೆಕ್‌ ಬಾಯ್ಸ್‌ ಆನ್ಸರ್‌ ಪೇಪರ್‌ ತುಂಬಿಸೋಕ್ಕಿಂತ ಬ್ರೋಚ್‌ ಪೇಪರ್ ತುಂಬಿಸೋದ್ರಲ್ಲೇ ನಾವು ಎಕ್ಸ್‌ಪರ್ಟ್ಸ್‌. ನಾವ್‌ ಎಂತಾ ಪಾರ್ಟನರ್ಸ್‌ ಅಂದ್ರೆ ನಮಗೆ ಮೂರು ರೀತಿಯ ಶಾರ್ಟೇಜ್‌ ಇರುತ್ತೆ. ಮೊದಲನೆಯದು ಅಟೆಂಡನ್ಸ್‌. ವಾರ ಬಿಟ್ಟು ಕ್ಲಾಸ್‌ಗೆ ಹೋದರೆ ಎಲ್ಲ ಹೊಸಮುಖಗಳೇ..! ಬ್ರೋ ಯು ಆರ್ ಮೈ ಕ್ಲಾಸ್ ಬ್ರೊ ಎಂದು ಹುಬ್ಬೇರಿಸುತ್ತೇವೆ. ಎರಡನೇಯದು ಹುಡುಗೀರ ಶಾರ್ಟೇಜ್‌. ಕ್ಲಾಸ್‌ನಲ್ಲಿ ನೂರು ಜನ ಹುಡುಗರ ಮಧ್ಯೆ ಕೂತ್ಕೊಂಡ್‌ ಕೂತ್ಕೊಂಡು, ಕ್ಯಾಂಟೀನ್‌ಗೆ ಹೋದರೆ, ಹಳ್ಳಿ ಮಂದಿ ಪ್ಯಾಟಿಗೆ ಬಂದಂಗಾಗುತ್ತೆ... ‘ಏನ್‌ ಪಸಂದಗಾವ್ಳೆ’ ಎನ್ನುತ್ತಾ ಕಣ್ಣರಳಿಸ್ತೀವಿ. ಮೂರನೇಯದು, ಮಾರ್ಕ್ಸ್‌ ಶಾರ್ಟೇಜ್‌. ಇಂಟರ್ನಲ್ಸ್‌ನಲ್ಲಿ ಮೈಕ್ರೊ ಜೆರಾಕ್ಸ್‌ ಎಂಬ ದೇವರು ಇರೋದ್ರಿಂದ ಸ್ವಲ್ಪ ತಳ್ಳಿದ್ವಿ... ಎಕ್ಸ್‌ಟರ್ನಲ್‌ನಲ್ಲಿ ಇಂಟ್ರಡಕ್ಷನ್‌, ಎಂಡಿಂಗ್‌ ನೀಟಾಗಿ ಬರೆದು, ಮಧ್ಯದಲ್ಲಿ ಸಿನಿಮಾ ಸ್ಟೋರಿ ತುಂಬಿಸಿದ್ದೇ ಆಯಿತು...’ ಹೀಗೆ, ಮಾತಿಗೆ ತಕ್ಕ ದೇಹಭಾಷೆ ಪ್ರದರ್ಶಿಸುತ್ತಾ ಲಾಲ್‌ಬಾಗ್‌ (Lolbagh) ತಂಡದ ಸುದರ್ಶನ ರಂಗಪ್ರಸಾದ್‌ ಮೆಕ್ಯಾನಿಕಲ್‌ ಎಂಜಿನಿಯರ್‌ಗಳ ಬಗ್ಗೆ ಹೇಳುತ್ತಿದ್ದರೆ, ನಗೆಯ ಅಲೆ ನಿಲ್ಲುವುದೇ ಇಲ್ಲ.

**

‘ಓಪನ್‌ ಮೈಕ್‌’ ಎಂಬ ವಿಶ್ವವಿದ್ಯಾಲಯ

ವಿದೇಶಗಳಲ್ಲಷ್ಟೇ ಅಲ್ಲದೆ, ಹಿಂದಿ– ಇಂಗ್ಲಿಷ್‌ ಭಾಷೆಯ ಕಲಾವಿದರನ್ನು ಪ್ರೋತ್ಸಾಹಿಸುವ, ವೇದಿಕೆ ಒದಗಿಸುವ ನಿಟ್ಟಿನಲ್ಲಿ ದೇಶದ ಹಲವೆಡೆ ‘ಓಪನ್‌ ಮೈಕ್‌’ ಆಯೋಜಿಸಲಾಗುತ್ತದೆ. ಹೊಸಬರು ಇಲ್ಲಿ ಬಂದು ಮಾತನಾಡಿ ತಮ್ಮ ಕಲೆ ಪ್ರದರ್ಶಿಸಬಹುದು. ಅಲ್ಲದೆ ಜನರ ಪ್ರತಿಕ್ರಿಯೆ ಹೇಗಿರುತ್ತದೆ ಎಂದು ತಿಳಿದುಕೊಳ್ಳಬಹುದು.

ಇದೇ ರೀತಿ, ಅನೂಪ್‌ ಮಯ್ಯ ಕನ್ನಡದ ಕಲಾವಿದರಿಗೆ ‘ಓಪನ್‌ ಮೈಕ್‌’ ಆಯೋಜಿಸುತ್ತಿದ್ದಾರೆ. ಇಲ್ಲಿ ದಿನಕ್ಕೆ 10ರಿಂದ 15 ಜನಕ್ಕೆ, 5ರಿಂದ 10 ನಿಮಿಷ ಸಮಯ ಕೊಡುತ್ತಾರೆ. ಅಷ್ಟರಲ್ಲಿ ಜೋಕ್‌ ಹೇಳಿ ರಂಜಿಸಬೇಕು. ನಂತರ, ಅಲ್ಲೇ ಇರುವ ಹಿರಿಯ ಕಲಾವಿದರು ಸಲಹೆ ಕೊಡುತ್ತಾರೆ. ತಪ್ಪು ತಿದ್ದುತ್ತಾರೆ. ಇಲ್ಲಿ ಚೆನ್ನಾಗಿ ಪ್ರದರ್ಶನ ನೀಡಿದವರನ್ನು ಕರೆದು ಅವಕಾಶ ಕೊಡುತ್ತಾರೆ. ದೊಡ್ಡ ಕಾರ್ಯಕ್ರಮಗಳಲ್ಲಿ ಐದು, ಹತ್ತು ನಿಮಿಷ ಸಮಯ ನೀಡಿ ಅವರಿಗೆ ತರಬೇತಿ ನೀಡಲಾಗುತ್ತಿದೆ.

ಬೇರೆ ಕಂಪನಿಗಳಲ್ಲಿ ಕೆಲಸ ಮಾಡುವವರು ಸಂಜೆ 7ರಿಂದ 9ಗಂಟೆ ಇದರಲ್ಲಿ ಪಾಲ್ಗೊಳ್ಳಬಹುದು. ಇಂದಿರಾ ನಗರ ಟೇಕ್‌ 5 ಸಂಸ್ಥೆ ಪ್ರತಿ ಸೋಮವಾರ ‘ಓಪನ್‌ ಮೈಕ್‌’ ಆಯೋಜಿಸುತ್ತಿದೆ. ಬೆಂಗಳೂರಿನ ಹಲವು ಕಡೆಗಳಲ್ಲಿ ಇಂತಹ ಕಾರ್ಯಕ್ರಮವನ್ನು ವಾರಕ್ಕೊಮ್ಮೆ ಆಯೋಜಿಸಲಾಗುತ್ತದೆ. ಒಂದೂವರೆ ಎರಡು ವರ್ಷ ಇಲ್ಲಿ ತರಬೇತಿ ಪಡೆದ ನಂತರ ವೇದಿಕೆ ಏರಬಹುದು.



ಪವನ್‌ ವೇಣುಗೋಪಾಲ್

**

ಮೊದಲು ಹವ್ಯಾಸವಾಗಲಿ

‘ಸ್ಟ್ಯಾಂಡ್‌ ಅಪ್‌ ಕಾಮಿಡಿಯನ್ನೇ ವೃತ್ತಿಯನ್ನಾಗಿಸಿಕೊಳ್ಳುವುದು ಕಷ್ಟವಾಗಬಹುದು. ಬೇರೆ ಉದ್ಯೋಗ ಮಾಡಿಕೊಂಡು ಇದನ್ನು ಮಾಡಿದರೆ ಉತ್ತಮ’ ಎಂದು ಅನೂಪ್‌ ಮಯ್ಯ ಸಲಹೆ ನೀಡುತ್ತಾರೆ.

‘ಯಾವುದೇ ಭಾಷೆಯಾದರೂ ಅದರಲ್ಲಿ ಹಿಡಿತ ಇರಬೇಕು. ನಮಗೆ ಅರ್ಥವಾಗುವ, ಹಿಡಿತ ಇರುವ ಭಾಷೆಯಲ್ಲಿ ನಾವು ಮಾತನಾಡಿದರೆ, ಅದು ಕೇಳುಗರಿಗೂ ಬೇಗ ತಲುಪುತ್ತದೆ. ಹಿಡಿತವಿಲ್ಲದ ಭಾಷೆಯಲ್ಲಿ ಭಾಷಣ ಮಾಡಬಾರದು’ ಎಂಬ ಕಿವಿಮಾತು ಭೋಗರಾಜು ಅವರದು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry