ತೆಲುಗು ಚಿತ್ರರಂಗದಲ್ಲಿ ‘ಪ್ರಿನ್ಸ್‌’ ಎಂದು ಖ್ಯಾತರಾದವರು ನಟ ಮಹೇಶ್‌ ಬಾಬು. ತೆಲುಗಿನ ಸೂಪರ್‌ಸ್ಟಾರ್‌ ನಟನಾಗಿರುವ ‘ಪ್ರಿನ್ಸ್‌’ 1979ರಲ್ಲಿ ‘ನೀಡ’ ಚಿತ್ರದ ಮೂಲಕ ಬಾಲನಟನಾಗಿ ಚಿತ್ರರಂಗ ಪ್ರವೇಶಿಸಿದರು. ನಾಯಕನಟನಾಗಿ ನಟಿಸಿದ ಮೊದಲ ಚಿತ್ರಕ್ಕೆ (ರಾಜಕುಮಾರುಡು, 1999) ‘ಅತ್ಯುತ್ತಮ ಆರಂಭಿಕ ನಟ ರಾಜ್ಯ ನಂದಿ ಪ್ರಶಸ್ತಿ’ ಪಡೆದ ಹೆಮ್ಮೆ ಅವರದು. ಮುರಾರಿ, ಒಕ್ಕಡು, ಅಥಡು, ಪೋಕಿರಿ, ದೂಕುಡು, ಬುಸಿನೆಸ್‌ ಮ್ಯಾನ್‌, ಶ್ರೀಮಂಥುಡು ಮೊದಲಾದವು ಮಹೇಶ್‌ ಅವರಿಗೆ ಹೆಸರು ತಂದುಕೊಟ್ಟವು.
ಮಹೇಶ್‌ ಬಾಬು ಡ್ರಾಮಾ, ಆ್ಯಕ್ಷನ್‌, ರೊಮ್ಯಾಂಟಿಕ್‌ ಎಲ್ಲಾ ಬಗೆಯ ಚಿತ್ರಗಳಲ್ಲೂ ನಟಿಸಿದ್ದಾರೆ. ಕಟ್ಟುಮಸ್ತಾದ ದೇಹಸಿರಿಯನ್ನು ಹೊಂದಿರುವ ಪ್ರಿನ್ಸ್‌ ತೆರೆಯ ಮೇಲೆ ಆ್ಯಕ್ಷನ್‌ ದೃಶ್ಯಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದರೆ ಅವರ ಅಭಿಮಾನಿಗಳ ಖುಷಿ ಹೇಳತೀರದು. ವಯಸ್ಸು 42 ಆದರೂ ಆಕರ್ಷಕ ದೇಹಸಿರಿ ಹೊಂದಿರುವ ಪ್ರಿನ್ಸ್‌ ದೇಹ ಹುರಿಗೊಳಿಸಿಕೊಳ್ಳಲು ಸಾಕಷ್ಟು ಕಸರತ್ತು ಮಾಡುತ್ತಾರೆ.
ಕೆಲ ನಟರು ಸಿನಿಮಾಗಳ ಪಾತ್ರಕ್ಕಾಗಿ ತೂಕ ಹೆಚ್ಚು, ಕಡಿಮೆ ಮಾಡಿಕೊಳ್ಳಲು ವರ್ಕೌಟ್‌ ಮಾಡುತ್ತಾರೆ. ಆದರೆ ಪ್ರಿನ್ಸ್‌ ವರ್ಷದ 365 ದಿನವೂ ಕಠಿಣವಾಗಿ ವರ್ಕೌಟ್‌ ಮಾಡುತ್ತಾರೆ. ಸ್ನಾಯುಗಳನ್ನು ಗಟ್ಟಿಯಾಗಿಸಲು ಅವರು ಹೆಚ್ಚು ಗಮನ ಕೊಡುತ್ತಾರೆ. ದೇಹದ ಪ್ರತಿಯೊಂದು ಅಂಗದ ಮೇಲೆಯೂ ಅವರು ವರ್ಕೌಟ್‌ ಮಾಡುತ್ತಾರೆ. ನಿತ್ಯ ಸುಮಾರು ಒಂದು ಗಂಟೆ ಕಠಿಣ ವ್ಯಾಯಾಮ ಮಾಡುವ ಅವರು ಆಹಾರ ಸೇವನೆಯಲ್ಲೂ ಕಟ್ಟುನಿಟ್ಟು.
ಪ್ರಿನ್ಸ್‌ ಸಮತೋಲಿತ ಡಯೆಟ್‌ ಆಹಾರವನ್ನೇ ಸೇವಿಸುತ್ತಾರೆ. ಬಾಯಿರುಚಿಗೆ ಫಿಟ್‌ನೆಸ್‌ ಮರೆಯುವರು ಅವರಲ್ಲ. ಇವರ ಆಹಾರದಲ್ಲಿ ಪ್ರೋಟೀನ್‌, ಕಾರ್ಬೊಹೈಡ್ರೇಟ್ಸ್‌ ಅಂಶವಿರುವ ಆಹಾರಗಳು ಇರುತ್ತವೆ. ಇವರು ದಿನದಲ್ಲಿ ಐದರಿಂದ ಆರು ಬಾರಿ ಆಹಾರ ಸೇವಿಸುತ್ತಾರೆ. ಇದರಲ್ಲಿ ಎರಡು ಬಾರಿ ಬರೀ ದ್ರವಾಹಾರ ಅಷ್ಟೇ. ಪ್ರಿನ್ಸ್‌ನ ಆಹಾರ ಸೇವನೆ ಕ್ರಮ ಹೀಗಿದೆ:
* ಬೆಳಿಗ್ಗೆ: ಓಟ್ಸ್‌ನಿಂದ ಮಾಡಿದ ತಿಂಡಿ, 4 ಮೊಟ್ಟೆ, ಹಸಿ ಮತ್ತು ಒಣಹಣ್ಣುಗಳು
* ವರ್ಕೌಟ್‌ಗಿಂತ ಮೊದಲು: ಯಾವುದಾದರೂ ಹಣ್ಣಿನ ಜ್ಯೂಸ್‌
* ಮಧ್ಯಾಹ್ನದ ಊಟ: ಚಿಕನ್‌, ಮೀನು ಅಥವಾ ಕುರಿ ಮಾಂಸ ಅಡುಗೆ ಜೊತೆ ಬ್ರೌನ್‌ ರೈಸ್‌
* ರಾತ್ರಿಯೂಟ: ಪ್ರೋಟೀನ್‌ ಆಹಾರ, ಗೋಧಿ ಬ್ರೆಡ್‌, ಮೊಟ್ಟೆಗಳು ಅಥವಾ ಚಿಕನ್‌ ಐಟಂ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.