ಶನಿವಾರ, ಜೂನ್ 19, 2021
22 °C

ಚುಕ್ಕಿಗಳು

ಪ್ರೇಮಾ ಟಿ ಎಮ್ ಆರ್ Updated:

ಅಕ್ಷರ ಗಾತ್ರ : | |

ಚುಕ್ಕಿಗಳು

ಒಂದೇ ನೇರರೇಖೆಯ ಮೇಲೆ
ಕೊನೆಬಿಂದುಗಳು
ಎಳೆದಂತೆಲ್ಲ ದೂರ ನಿಲ್ಲುತ್ತೇವೆ

ಒಳಸುಳಿದು ವಕ್ರವಾಗಿ
ಒತ್ತಿಕೊಂಡು ಸುತ್ತಿಕೊಂಡು‌
ತೆಕ್ಕೆಯಾಗಿದ್ದರೆ
ಚಿತ್ರವಾಗುತ್ತಿದ್ದೆವು

ಚಿತ್ರದೊಳಗೆ ಪೀಚುಮೊಗ್ಗುಗಳು
ಮೈತಳೆದು ಹೂವರಳುತ್ತಿದ್ದವು
ಹಳಿಗಳಾಗಿ ಎದುರುಬದುರಾಗಿದ್ದರೆ
ಅದೆಷ್ಟೋ ಪಯಣಿಗರು ಗುರಿಸೇರಿ

ಕ್ಷಣವಾದರೂ ನೆನೆಸುತ್ತಿದ್ದರು
ಚುಕ್ಕಿಗಳಾಗಿ ಅಕ್ಕಪಕ್ಕ ನಿಂತಿದ್ದರೆ
ರಂಗೋಲಿಯಾಗಿ ಪಸರಿಸಿ
ರಂಗುರಂಗಾಗುತ್ತಿದ್ದೆವೇನೋ

ಭಾವಗಳಾಗಿ ಭಾಷೆಗಳಾಗಿ
ನಳನಳಿಸಿ
ಬೆನ್ನುತೋರಿ ನಡೆಯುತ್ತಲೇ ಇದ್ದೇವೆ
ಮುಖಾಮುಖಿಯಾಗದೆಯೇ

ಅರಿವೆವೆಂದರೂ ಅರಿವುದೆಂತು
ಕೊಳವಾದರೆ ಎದೆ ತಿಳಿನೀರೂ ಇದೆ
ಕೈತೊಳೆದು ಕೊಳಕ ಮಾಡಿದ್ದೇವೆ

ತಡೆದಿದ್ದರೆ ಹನಿನೀರ ಬೊಗಸೆಗೆ
ಕನ್ನಡಿಯಿಲ್ಲದೆಯೇ
ಮುಖ ನೋಡುವಷ್ಟು
ಕುಡಿಯಬಹುದಿತ್ತು
ನಾವು ಕಲ್ಲೆಸೆಯುತ್ತಲೇ ಇದ್ದೇವೆ

 

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.