ಶುಕ್ರವಾರ, ಮಾರ್ಚ್ 5, 2021
27 °C
2018ರ ಜನವರಿ–ಮಾರ್ಚ್‌ ಅವಧಿಗೆ ಡಬ್ಲ್ಯುಜಿಸಿ ವರದಿ

ದೇಶದಲ್ಲಿ ತಗ್ಗಿದ ಚಿನ್ನದ ಬೇಡಿಕೆ

ಪಿಟಿಐ Updated:

ಅಕ್ಷರ ಗಾತ್ರ : | |

ದೇಶದಲ್ಲಿ ತಗ್ಗಿದ ಚಿನ್ನದ ಬೇಡಿಕೆ

ಮುಂಬೈ: 2018ರ ಜನವರಿ–ಮಾರ್ಚ್‌ ಅವಧಿಯಲ್ಲಿ ಭಾರತದ ಚಿನ್ನದ ಬೇಡಿಕೆ ಶೇ 12 ರಷ್ಟು ಕಡಿಮೆ ಆಗಿದೆ ಎಂದು ವಿಶ್ವ ಚಿನ್ನ ಸಮಿತಿ (ಡಬ್ಲ್ಯುಜಿಸಿ) ವರದಿ ನೀಡಿದೆ.

2017ರ ಜನವರಿ–ಮಾರ್ಚ್ ಅವಧಿಯಲ್ಲಿ ಚಿನ್ನದ ಬೇಡಿಕೆ 131.2 ಟನ್‌ ಇತ್ತು. ಇದು 2018ರ ಇದೇ ಅವಧಿಯಲ್ಲಿ 115.6ಕ್ಕೆ ಇಳಿಕೆಯಾಗಿದೆ.

ಚಿನ್ನದ ಹೂಡಿಕೆ ₹ 8,390 ಕೋಟಿಗಳಿಂದ ₹ 7,660 ಕೋಟಿಗಳಿಗೆ ಇಳಿಕೆಯಾಗಿದೆ.

‘ಗರಿಷ್ಠ ಮಟ್ಟದ ಬೆಲೆ, ಚಿನ್ನದ ಮೇಲಿನ ಹೂಡಿಕೆ ಕಡಿಮೆ ಆಗುತ್ತಿರುವುದು, ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಮದುವೆ–ಸಮಾರಂಭಗಳ ಸಂಖ್ಯೆಯೂ ಕಡಿಮೆ ಇರುವುದರಿಂದ ಚಿನ್ನದ ಬೇಡಿಕೆ ತಗ್ಗುತ್ತಿದೆ’ ಎಂದು ಡಬ್ಲ್ಯುಜಿಸಿ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಪಿ.ಆರ್‌. ಸೋಮಸುಂದರಂ ತಿಳಿಸಿದ್ದಾರೆ.

‘ಚಿನ್ನದ ವಹಿವಾಟಿನ ಅಸಂಘಟಿತ ವಲಯವು ಜಿಎಸ್‌ಟಿ ವ್ಯವಸ್ಥೆಗೆ ಬಂದಿರುವುದರಿಂದ ಸಹ ಬೇಡಿಕೆ ಕಡಿಮೆ ಆಗಲು ಕಾರಣವಾಗಿದೆ’ ಎಂದು ಅವರು ಹೇಳಿದ್ದಾರೆ.

‘ಮೊದಲ ಮೂರು ತಿಂಗಳ ಆಧಾರದ ಮೇಲೆ ಚಿನ್ನದ ಬೇಡಿಕೆ ನಿರ್ಧರಿಸಲು ಆಗುವುದಿಲ್ಲ. ಏಕೆಂದರೆ ತೆರಿಗೆ ಉಳಿತಾಯದ ಉದ್ದೇಶಕ್ಕಾಗಿ ಜನರು ಕೆಲವು ಹಣಕಾಸಿನ ಬದ್ಧತೆಗಳ ಬಗ್ಗೆ ಹೆಚ್ಚು ಗಮನ ನೀಡುತ್ತಾರೆ. ಬೇಡಿಕೆ ಹೆಚ್ಚಲು ಸುಂಕದಲ್ಲಿ ಕಡಿತವೂ ಆಗಿಲ್ಲ’ ಎಂದೂ ಅವರು ವಿಶ್ಲೇಷಣೆ ಮಾಡಿದ್ದಾರೆ.

ಚಿನ್ನ ಬೇಡಿಕೆ ಕಳೆದುಕೊಳ್ಳುತ್ತಿರುವುದರಿಂದ ಆಮದು ಪ್ರಮಾಣವು 260 ಟನ್‌ಗಳಿಂದ 153 ಟನ್‌ಗಳಿಗೆ ಶೇ 50 ರಷ್ಟು ಇಳಿಕೆಯಾಗಿದೆ.

**

ಜಾಗತಿಕ ಮಟ್ಟದಲ್ಲಿ ಶೇ 7 ರಷ್ಟು ಇಳಿಕೆ

ಜಾಗತಿಕ ಚಿನ್ನದ ಬೇಡಿಕೆಯೂ ಶೇ 7 ರಷ್ಟು ಕಡಿಮೆ ಆಗಿದ್ದು ಒಟ್ಟು 973 ಟನ್‌ಗಳಷ್ಟು ಮಾರಾಟವಾಗಿದೆ. ಇದು 2017ರಲ್ಲಿ 1,047 ಟನ್‌ ಗಳಷ್ಟಿತ್ತು ಎಂದು ಸಮಿತಿ ತಿಳಿಸಿದೆ. ಚಿನ್ನದ ಗಟ್ಟಿ, ಚಿನ್ನದ ವಿನಿಮಯ ವಹಿವಾಟು ನಿಧಿ (ಇಟಿಎಫ್‌)ಗಳಲ್ಲಿ ಹೂಡಿಕೆ ಪ್ರಮಾಣ ಕಡಿಮೆ ಆಗುತ್ತಿರುವುದರಿಂದ ಬೇಡಿಕೆ ಕಡಿಮೆಯಾಗುತ್ತಿದೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.