ಭಾನುವಾರ, ಮಾರ್ಚ್ 7, 2021
19 °C
ಎಚ್‌.ಕೆ.ಪಾಟೀಲರಿಗೆ ಪ್ರಯಾಸದ ಗೆಲುವು

ಗದಗಿನ ಮೂರು ವಿಧಾನಸಭಾ ಕ್ಷೇತ್ರದಲ್ಲಿ ಅರಳಿದ ಕಮಲ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಗದಗಿನ ಮೂರು ವಿಧಾನಸಭಾ ಕ್ಷೇತ್ರದಲ್ಲಿ ಅರಳಿದ ಕಮಲ

ಗದಗ: ಕಾಂಗ್ರೆಸ್‌ ಭದ್ರಕೋಟೆ ಎನಿಸಿದ್ದ ಗದಗಿನ ನಾಲ್ಕೂ ವಿಧಾನಸಭಾ ಕ್ಷೇತ್ರಗಳಲ್ಲಿ ಮೂರು ಕ್ಷೇತ್ರಗಳಲ್ಲಿ ಬಿಜೆಪಿ ಜಯಭೇರಿಯಾಗಿದ್ದು. ಒಂದೇ ಒಂದು ಕ್ಷೇತ್ರದಲ್ಲಿ ಕಾಂಗ್ರೆಸ್‌ ಪ್ರಯಾಸಕರ ಗೆಲುವು ಸಾಧಿಸಿದೆ.

ಕಾಂಗ್ರೆಸ್‌ ಹಿರಿಯ ಮುಖಂಡ ಎಚ್‌.ಕೆ ಪಾಟೀಲ ಅವರ ಸ್ಪರ್ಧೆಯಿಂದಾಗಿ ಈ ಗದಗ ಕ್ಷೇತ್ರ ರಾಜ್ಯದ ಗಮನ ಸೆಳೆದಿದ್ದು, ಕೊನೆಯ ಕ್ಷಣದಲ್ಲಿ ಕಾಂಗ್ರೆಸ್‌ಗೆ ಗೆಲುವು ಒಲಿದಿದೆ. ಕೇವಲ 1,850 ಮತಗಳ ಅಂತರದಿಂದ ಅವರು  ಪ್ರಯಾಸಕರ ಗೆಲುವು ಗಳಿಸಿದ್ದಾರೆ.

ಮತ ಎಣಿಕೆಯಲ್ಲಿ ಮೊದಲ ಸುತ್ತಿನಿಂದ 12 ಸುತ್ತಿನವರೆಗೆ ಹಿನ್ನಡೆ ಅನುಭವಿಸಿದ್ದ ಕಾಂಗ್ರೆಸ್‌ ಕೊನೆಯ ಎರಡು ಸುತ್ತಿನಲ್ಲಿ ಎಚ್‌.ಕೆ. ಪಾಟೀಲ ಮುನ್ನಡೆ ಪಡೆದುಕೊಂಡಿದ್ದಾರೆ. ಗ್ರಾಮೀಣ ಪ್ರದೇಶದ ಮತಗಳು ಅವರ ಕೈಹಿಡಿದಿವೆ ಎಂದರು. ಪಾಟೀಲ್‌ ಅವರು 77,699 ಮತಗಳನ್ನು ಗಳಿಸಿದರೆ, ಅವರ ಪ್ರತಿಸ್ಪರ್ಧಿ ಬಿಜೆಪಿ ಅಭ್ಯರ್ಥಿ ಅನಿಲ್‌  ಮೆಣಸಿನಕಾಯಿ 75,849 ಮತಗಳನ್ನು ಪಡೆದು ತೀವ್ರ ಪೈಪೋಟಿ ನೀಡಿದ್ದರು.

ಶಿರಹಟ್ಟಿಯ ಮೀಸಲು ಕ್ಷೇತ್ರದಲ್ಲಿ ಮೊದಲ ಸುತ್ತಿನಿಂದಲೇ ಮುನ್ನಡೆ ಕಾಯ್ದುಕೊಂಡಿದ್ದ ಬಿಜೆಪಿ ಅಭ್ಯರ್ಥಿ ರಾಮಣ್ಣ ಲಮಾಣಿ 91,967 ಮತಗಳನ್ನು ಪಡೆದು,  29993 ಮತಗಳ ಅಂತರದಿಂದ ಕಾಂಗ್ರೆಸ್‌ ಅಭ್ಯರ್ಥಿ ರಾಮಕೃಷ್ಣ ದೊಡ್ಡಮನಿ ವಿರುದ್ಧ ನಿರಾಯಾಸವಾಗಿ ಜಯ ಸಾಧಿಸಿದ್ದಾರೆ. ಕಳೆದ ಬಾರಿ ಸೋತಿದ್ದ ಅನುಕಂಪದ ಅಲೆ ಅವರ ನೆರವಿಗೆ ಬಂತು. ರಾಮಕೃಷ್ಣ ದೊಡ್ಡಮನಿ 61972 ಮತಗಳನ್ನು ಪಡೆದರು. ಜಿಲ್ಲೆಯಲ್ಲಿ ಲಮಾಣಿ ಅವರದೇ ಗರಿಷ್ಠ ಅಂತರದ ಗೆಲುವು.

ಮೊದಲ ಸುತ್ತಿನಿಂದ ಹಾವು ಏಣಿ ಆಟದಂತೆ ಮುಂದುವರಿದಿದ್ದ ನರಗುಂದ ಮತಕ್ಷೇತ್ರದ ಫಲಿತಾಂಶ ಕೊನೆಯ ಸುತ್ತು ಪೂರ್ಣಗೊಂಡಾಗ ಬಿಜೆಪಿಗೆ ಒಲಿಯಿತು. ಇಲ್ಲಿ ಸಿ.ಸಿ ಪಾಟೀಲ 7979 ಮತಗಳ ಅಂತರದಲ್ಲಿ ಕಾಂಗ್ರೆಸ್‌ನ ಬಿ.ಆರ್‌.ಯಾವಗಲ್‌ ವಿರುದ್ಧ ಪ್ರಯಾಸಕರ ಗೆಲುವು ಸಾಧಿಸಿದರು. ಸಿ.ಸಿ ಪಾಟೀಲ 73045 ಮತಗಳನ್ನು ಪಡೆದರೆ, ಬಿ.ಆರ್‌ ಯಾವಗಲ್‌ 65, 066 ಮತಗಳನ್ನು ಪಡೆದರು.

ಜಿಲ್ಲೆಯ ದೊಡ್ಡ ಮತ ಕ್ಷೇತ್ರವಾದ ರೋಣ ಮತ ಕ್ಷೇತ್ರದಲ್ಲಿ, ಮೊದಲ ಸುತ್ತಿನಿಂದಲೇ ಮುನ್ನಡೆ ಕಾಯ್ದುಕೊಂಡಿದ್ದ ಬಿಜೆಪಿ ಅಭ್ಯರ್ಥಿ ಕಳಕಪ್ಪ ಬಂಡಿ 7334 ಮತಗಳ ಅಂತರದಲ್ಲಿ ಕಾಂಗ್ರೆಸ್‌ನ ಜಿ.ಎಸ್‌.ಪಾಟೀಲ ವಿರುದ್ಧ ಗೆಲುವು ಸಾಧಿಸಿದ್ದಾರೆ. ಬಂಡಿ 83,735 ಮತಗಳನ್ನು ಪಡೆದರೆ, ಜಿ.ಎಸ್‌. ಪಾಟೀಲ 76,401 ಮತಗಳನ್ನು ಪಡೆದರು. ಈ ಕ್ಷೇತ್ರಲ್ಲಿ  2550 ಮತ್ತು ಗದಗ ಕ್ಷೇತ್ರದಲ್ಲಿ 2671ನೋಟಾ ಚಲಾವಣೆಯಾಗಿದೆ. 

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.