ಫರ್ನಿಚರ್‌ ಅಂಗಡಿ ಮಾಲೀಕನ ಮೇಲೆ ಗುಂಡಿನ ದಾಳಿ

ಅಂಗಡಿಯ ಮಾಲೀಕ ಮಸೂದ್‌ ಅಲಿ (62) ಗುಂಡಿನ ದಾಳಿಯಲ್ಲಿ ಗಾಯಗೊಂಡಿದ್ದು, ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

‘ಅಲಿ ಅವರು ಕುಕ್‌ಟೌನ್‌ನಲ್ಲಿರುವ ಡಿಕೋಸ್ತಾ ಬಡಾವಣೆಯಲ್ಲಿರುವ ಮನೆಯಿಂದ ಸೇಂಟ್‌ ಮಾರ್ಕ್ಸ್‌ ರಸ್ತೆಯಲ್ಲಿರುವ ಅಂಗಡಿಗೆ ಹೋಗುತ್ತಿದ್ದಾಗ ಈ ಘಟನೆ ನಡೆದಿದೆ’ ಎಂದು ಪುಲಕೇಶಿನಗರದ ಪೊಲೀಸರು ತಿಳಿಸಿದ್ದಾರೆ.

‘ಅಲಿ ತಮಗೆ ಸೇರಿದ ಕಾರಿನಲ್ಲಿ ಹೊರಟಾಗ ಇನ್ನೊಂದು ಕಾರಿನಲ್ಲಿ ಅಪರಿಚಿತ ವ್ಯಕ್ತಿಗಳು ಅವರನ್ನು ಹಿಂಬಾಲಿಸಿದ್ದಾರೆ. ಸ್ವಲ್ಪ ದೂರ ಹೋದ ಬಳಿಕ ಆ ವ್ಯಕ್ತಿಗಳು ಅಲಿ ಅವರಿದ್ದ ಕಾರಿಗೆ ಹಿಂದಿನಿಂದ ಗುದ್ದಿದ್ದಾರೆ’ ಎಂದು ಅವರು ಹೇಳಿದ್ದಾರೆ.

‘ರಸ್ತೆ ಬದಿಯಲ್ಲಿ ಕಾರು ನಿಲ್ಲಿಸಿದ ಅಲಿ, ಕೆಳಗೆ ಇಳಿದು ಗುದ್ದಿರುವ ಬಗ್ಗೆ ಅಪರಿಚಿತ ವ್ಯಕ್ತಿಗಳನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಈ ಸಂದರ್ಭ ಮಾತಿನ ಚಕಮಕಿ ನಡೆದಿದೆ. ಅದು ವಿಕೋಪಕ್ಕೆ ಹೋದಾಗ ಅಪರಿಚಿತರು ರಿವಾಲ್ವರ್‌ ತೆಗೆದಿದ್ದಾರೆ. ಅದನ್ನು ನೋಡಿದ ಅಲಿ ಓಡಲು ಶುರು ಮಾಡಿದಾಗ ಅಪರಿಚಿತರು ಹಾರಿಸಿದ ಗುಂಡು ಬೆನ್ನು ಸವರಿಕೊಂಡು ಹೋಗಿದೆ’ ಎಂದು ಅವರು ಮಾಹಿತಿ ನೀಡಿದ್ದಾರೆ.