ಕೊಹ್ಲಿ, ಸ್ಮೃತಿಗೆ ಬಿಸಿಸಿಐ ಪ್ರಶಸ್ತಿ

7
ಮಯಂಕ್‌ಗೆ ಮಾಧವರಾವ್ ಸಿಂಧಿಯಾ ಪ್ರಶಸ್ತಿ

ಕೊಹ್ಲಿ, ಸ್ಮೃತಿಗೆ ಬಿಸಿಸಿಐ ಪ್ರಶಸ್ತಿ

Published:
Updated:
ಕೊಹ್ಲಿ, ಸ್ಮೃತಿಗೆ ಬಿಸಿಸಿಐ ಪ್ರಶಸ್ತಿ

ನವದೆಹಲಿ: ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಅವರನ್ನು ಪಾಲಿ ಉಮ್ರಿಗರ್ ಸ್ಮಾರಕ ‘ವರ್ಷದ ಕ್ರಿಕೆಟಿಗ ‍ಪ್ರಶಸ್ತಿ’ಗೆ ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಆಯ್ಕೆ ಮಾಡಿದೆ. 2016–17 ಮತ್ತು 2017–18ನೇ ಸಾಲಿನ ಪ್ರಶಸ್ತಿಗಳು ಅವರಿಗೆ ಸಂದಿವೆ.

ಮಹಿಳೆಯರ ವಿಶ್ವಕಪ್‌ನಲ್ಲಿ ಉತ್ತಮ ಸಾಧನೆ ಮಾಡಿದ ಹರ್ಮನ್‌ ಪ್ರೀತ್ ಕೌರ್‌ ಮತ್ತು ಸ್ಮೃತಿ ಮಂದಾನ ಅವರನ್ನು ಕ್ರಮವಾಗಿ 2016–17 ಮತ್ತು 2017–18ನೇ ಸಾಲಿನ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ. ಮಹಿಳಾ ವಿಭಾಗದಲ್ಲಿ ಪ್ರಶಸ್ತಿಯನ್ನು ಇದೇ ಮೊದಲ ಬಾರಿ ನೀಡಲಾಗುತ್ತಿದೆ. ಪ್ರಶಸ್ತಿ ಪ್ರದಾನ ಸಮಾರಂಭ ಇದೇ 12ರಂದು ಬೆಂಗಳೂರಿನಲ್ಲಿ ನಡೆಯಲಿದೆ ಎಂದು ಬಿಸಿಸಿಐ ಪ್ರಕಟಣೆ ತಿಳಿಸಿದೆ.

2016–17ನೇ ಸಾಲಿನಲ್ಲಿ ವಿರಾಟ್ ಕೊಹ್ಲಿ 13 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು 74ರ ಸರಾಸರಿಯಲ್ಲಿ 1332 ರನ್‌ ಗಳಿಸಿದ್ದಾರೆ. 27 ಏಕದಿನ ಪಂದ್ಯಗಳಲ್ಲಿ 84.22ರ ಸರಾಸರಿಯಲ್ಲಿ 1516 ರನ್‌ ಕಲೆ ಹಾಕಿದ್ದಾರೆ. 2017–18ನೇ ಸಾಲಿನಲ್ಲಿ ಆರು ಟೆಸ್ಟ್‌ ಪಂದ್ಯಗಳಲ್ಲಿ 89.6ರ ಸರಾಸರಿಯಲ್ಲಿ ರನ್‌ ಗಳಿಸಿದ್ದು  ಏಕದಿನ ಪಂದ್ಯಗಳಲ್ಲಿ ಅವರ ರನ್ ಸರಾಸರಿ 75.50 ಆಗಿದೆ. ಎರಡೂ ವರ್ಷಗಳ ಪ್ರಶಸ್ತಿಯೊಂದಿಗೆ ಅವರು ತಲಾ ₹ 15 ಲಕ್ಷ ಪಡೆಯಲಿದ್ದಾರೆ.

ಬಿಸಿಸಿಐ ಅಧ್ಯಕ್ಷರಾಗಿದ್ದ ಜಗ ಮೋಹನ್ ದಾಲ್ಮಿಯ ಅವರ ಹೆಸರಿನಲ್ಲಿ ನಾಲ್ಕು ಪ್ರಶಸ್ತಿಗಳನ್ನು ಸ್ಥಾಪಿಸಲಾಗಿದ್ದು ಇವುಗಳನ್ನು ವಿಜಯ್‌ ಮರ್ಚಂಟ್ ಟ್ರೋಫಿ ಟೂರ್ನಿಯಲ್ಲಿ ಹೆಚ್ಚು ರನ್‌ ಗಳಿಸಿದ ಮತ್ತು ಹೆಚ್ಚು ವಿಕೆಟ್ ಪಡೆದ ಆಟಗಾರರು ಹಾಗೂ ಮಹಿಳಾ ವಿಭಾಗದ ಉತ್ತಮ ಜೂನಿಯರ್ ಹಾಗೂ ಸೀನಿಯರ್ ಆಟಗಾರ್ತಿಯರಿಗೆ ನೀಡಲಾಗುವುದು.

ಒಂಬತ್ತು ವಿಭಾಗಗಳಲ್ಲಿ ನೀಡುವ ಪ್ರಶಸ್ತಿ ಮೊತ್ತವನ್ನು ₹ 1 ಲಕ್ಷದಿಂದ ₹ 1.5 ಲಕ್ಷಕ್ಕೆ ಏರಿಸಲಾಗಿದ್ದು ಕರ್ನಲ್‌ ಸಿ.ಕೆ.ನಾಯ್ಡು ಪ್ರಶಸ್ತಿಯನ್ನು ಪಂಕಜ್ ರಾಯ್ ಅವರಿಗೆ ಮರಣೋತ್ತರವಾಗಿ ನೀಡಲು ನಿರ್ಧರಿಸಲಾಗಿದೆ. ಸಿಒಎ ಸದಸ್ಯೆ ಡಯಾನ ಎಡುಲ್ಜಿ ಅವರಿಗೆ ಜೀವಮಾನ ಸಾಧಕಿ ಪ್ರಶಸ್ತಿ ಸಲ್ಲಲಿದೆ.

ಬಂಗಾಳ, ದೆಹಲಿ ಸಂಸ್ಥೆಗಳಿಗೆ ಪ್ರಶಸ್ತಿ: ಉತ್ತಮ ಕ್ರಿಕೆಟ್ ಸಂಸ್ಥೆಗಳಿಗೆ ನೀಡುವ ಪ್ರಶಸ್ತಿಗಳಿಗೆ ಬಂಗಾಳ ಕ್ರಿಕೆಟ್ ಸಂಸ್ಥೆ ಮತ್ತು ದೆಹಲಿ ಕ್ರಿಕೆಟ್ ಸಂಸ್ಥೆಗಳನ್ನು ಆಯ್ಕೆ ಮಾಡಲಾಗಿದೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry