ಜನಮನ್ನಣೆ ಗಳಿಸಿದ ಹೊಳಲೂರು ಆಸ್ಪತ್ರೆ

7
ರಾಜ್ಯದ ಮೂರನೇ ಅತ್ಯುತ್ತಮ ಆರೋಗ್ಯ ಕೇಂದ್ರದ ಹಿರಿಮೆ, 100ಕ್ಕೂ ಹೆಚ್ಚು ಹಳ್ಳಿಗಳಿಗೆ ಆರೋಗ್ಯ ಸೇವೆ

ಜನಮನ್ನಣೆ ಗಳಿಸಿದ ಹೊಳಲೂರು ಆಸ್ಪತ್ರೆ

Published:
Updated:
ಜನಮನ್ನಣೆ ಗಳಿಸಿದ ಹೊಳಲೂರು ಆಸ್ಪತ್ರೆ

ಶಿವಮೊಗ್ಗ: ಹೊಳಲೂರಿನ ಸಮುದಾಯ ಆರೋಗ್ಯ ಕೇಂದ್ರ ರಾಜ್ಯದ ಮೂರನೇ ಅತ್ಯುತ್ತಮ ಆರೋಗ್ಯ ಕೇಂದ್ರ ಎಂಬ ಶ್ರೇಯಕ್ಕೆ ಪಾತ್ರವಾಗಿದೆ.

ಕೇವಲ 30 ಹಾಸಿಗೆಗಳ ಈ ಪುಟ್ಟ ಆಸ್ಪತ್ರೆ ಅತ್ಯಲ್ಪ ಸೌಲಭ್ಯಗಳನ್ನು ಸಮರ್ಪಕವಾಗಿ ಬಳಸಿಕೊಂಡು ಹೊಳಲೂರು ಸುತ್ತಮುತ್ತಲ 100ಕ್ಕೂ ಹೆಚ್ಚು ಹಳ್ಳಿಗಳಿಗೆ ಆರೋಗ್ಯ ಸೇವೆ ಒದಗಿಸುತ್ತಿದೆ.

ಕಡಿಮೆ ವೈದ್ಯರು ಮತ್ತು ಸಿಬ್ಬಂದಿ ಇದ್ದರೂ ಅತಿ ಹೆಚ್ಚು ರೋಗಿಗಳ ತಪಾಸಣೆ, ಉತ್ತಮ ಗುಣಮಟ್ಟದ ವೈದ್ಯಕೀಯ ಚಿಕಿತ್ಸೆ, ಸ್ವಚ್ಛತೆ, ಸುಂದರ ಪರಿಸರ, ಉತ್ತಮ ನಡವಳಿಕೆ ಮತ್ತಿತರ ಅಂಶಗಳ ಆಧಾರದ ಮೇಲೆ ರಾಜ್ಯ ಸರ್ಕಾರ ಕಾಯಕಲ್ಪ ಕಾರ್ಯಕ್ರಮದ ಪಟ್ಟಿಯಲ್ಲಿ ಹೊಳಲೂರು ಸಮುದಾಯ ಆರೋಗ್ಯ ಕೇಂದ್ರಕ್ಕೆ ರಾಜ್ಯದ 3ನೇ ಉತ್ತಮ ಆಸ್ಪತ್ರೆ ಸ್ಥಾನ ನೀಡಿ ಗೌರವಿಸಿದೆ.

ಎಲ್ಲ ವೈದ್ಯರು ನಗರದತ್ತ ಮುಖ ಮಾಡುತ್ತಿರುವ ಈ ದಿನಗಳಲ್ಲಿ ಆಸ್ಪತ್ರೆಯ ಮಕ್ಕಳ ತಜ್ಞ ಡಾ. ವೇಣುಗೋಪಾಲ್, ಪ್ರಸೂತಿ ತಜ್ಞೆ ಡಾ. ಲಕ್ಷ್ಮಿ, ಶಸ್ತ್ರಚಿಕಿತ್ಸಕ ಡಾ. ಯಶವಂತ್, ದಂತ ವೈದ್ಯೆ ಡಾ. ಗಿರಿಜಾ ಹಾಗೂ ಸಿಬ್ಬಂದಿಯ ನಿರಂತರ ಪರಿಶ್ರಮ ಶ್ರಮ, ತ್ಯಾಗ, ಸೇವೆ ಈ ಸ್ಥಾನಕ್ಕೆ ಅರ್ಹತೆ ಪಡೆಯಲು ಪ್ರಮುಖ ಕಾರಣ.

1963ರಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರದ ಸ್ಥಾನ ಪಡೆದಿದ್ದ ಈ ಆಸ್ಪತ್ರೆ 2007ರಲ್ಲಿ ಸಮುದಾಯ ಆರೋಗ್ಯ ಕೇಂದ್ರವಾಗಿ ಬಡ್ತಿ ಪಡೆದಿತ್ತು. 2010ರಲ್ಲಿ ಆರಂಭವಾದ ನೂತನ ಕಟ್ಟಡದ ಕಾಮಗಾರಿ 2015ರಲ್ಲಿ ಪೂರ್ಣಗೊಂಡು 30 ಹಾಸಿಗೆಗಳ ಆಸ್ಪತ್ರೆಯಾಗಿದೆ.

‘ಮಕ್ಕಳ ಚಕಿತ್ಸಾ ವಿಭಾಗ, ಪ್ರಸೂತಿ ಕೇಂದ್ರ, ಶಸ್ತ್ರಚಿಕಿತ್ಸಾ ವಿಭಾಗ, ದಂತ ಚಿಕಿತ್ಸಾ ಕೇಂದ್ರಗಳಿಗೆ ಪ್ರತ್ಯೇಕ ವ್ಯವಸ್ಥೆ ಇದೆ. ವರ್ಷಕ್ಕೆ ಸರಾಸರಿ 250ರಿಂದ 300 ಹೆರಿಗೆ ಮಾಡಿಸಲಾಗುತ್ತದೆ. ಅರಿವಳಿಕೆ ತಜ್ಞರು ಇಲ್ಲದ ಕಾರಣ ಸಿಸೇರಿಯನ್‌ ಸೌಲಭ್ಯ ನೀಡಲು ಸಾಧ್ಯವಾಗಿಲ್ಲ. ಈ ಸೌಲಭ್ಯ ಆರಂಭವಾದರೆ ಹೆರಿಗೆಗೆ ಬರುವವರ ಸಂಖ್ಯೆ ದುಪ್ಪಟ್ಟಾಗುತ್ತದೆ’ ಎನ್ನುವುದು ಆಸ್ಪತ್ರೆಯ ಪ್ರಸೂತಿ ತಜ್ಞೆ ಅವರ ಅನಿಸಿಕೆ. ಕೇವಲ ಹೆರಿಗೆಗಷ್ಟೇ ಅಲ್ಲ ಇತರೆ ದೊಡ್ಡ ಶಸ್ತ್ರಚಿಕಿತ್ಸೆಗಳನ್ನು ಕೈಗೆತ್ತಿಕೊಳ್ಳಲೂ ಅರಿವಳಿಕೆ ತಜ್ಞರ ಕೊರತೆ ಎದುರಾಗಿದೆ.

ತುರ್ತು ಅಪಘಾತ ಚಿಕಿತ್ಸಾ ಕೇಂದ್ರ ಬೇಕಿದೆ: ಈ ಆಸ್ಪತ್ರೆ ಹೊನ್ನಾಳಿ–ಶಿವಮೊಗ್ಗ ರಾಜ್ಯ ಹೆದ್ದಾರಿ ಮಾರ್ಗದಲ್ಲೇ ಬರುತ್ತದೆ. ಹಾಗಾಗಿ, ಅಪಘಾತ ಪ್ರಕರಣಗಳು ಹೆಚ್ಚು ಸಂಭವಿಸುತ್ತವೆ. ಇರುವ ವೈದ್ಯರು ಮತ್ತು ಸಿಬ್ಬಂದಿ ಇಂತಹ ಸಮಯದಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.

‘ತಿಂಗಳಿಗೆ ಕನಿಷ್ಠ 50 ಅಪಘಾತ ಪ್ರಕರಣ ನಡೆಯುತ್ತವೆ. ಇದಕ್ಕಾಗಿಯೇ ಪ್ರತ್ಯೇಕ ವಿಭಾಗ ತೆರೆದರೆ ಜನರಿಗೆ ಅನುಕೂಲವಾಗುತ್ತದೆ. ಪ್ರತ್ಯೇಕ ರಕ್ತನಿಧಿ ಆರಂಭಿಸಬೇಕು’ ಎಂದು ಒತ್ತಾಯಿಸುತ್ತಾರೆ ಹೊಳಲೂರು ಮಂಡಲ ಪಂಚಾಯಿತಿ ಮಾಜಿ ಪ್ರಧಾನ ಕೆ.ಜಿ. ನಿಂಗಪ್ಪ.

ಹೊರ ರೋಗಿಗಳ ಸಂಖ್ಯೆ ಹೆಚ್ಚಳ: ಹೊಳಲೂರು, ಆಲದಹಳ್ಳಿ, ಕೊಮ್ಮನಾಳ್, ಹರಮಘಟ್ಟ, ಹಾಡೋನಹಳ್ಳಿ, ಮಡಕೆಚೀಲೂರು, ಗೋಪಗೊಂಡನಹಳ್ಳಿ, ಚೀಲೂರು, ಸೂಗೂರು, ಹೊಳೆಹಟ್ಟಿ, ಬೇಡರಹೊಸಳ್ಳಿ, ಬುಳ್ಳಾಪುರ ಮತ್ತಿತರ ಗ್ರಾಮಗಳ ಜನರು ಬರುತ್ತಿದ್ದರು. ಪ್ರತಿದಿನ ಸರಾಸರಿ 300ರಿಂದ 500 ಹೊರ ರೋಗಿಗಳು ಆಸ್ಪತ್ರೆಗೆ ಭೇಟಿ ನೀಡುತ್ತಾರೆ. ನಗರ ಪಾಲಿಕೆ ವ್ಯಾಪ್ತಿಯ ರಾಗಿಗುಡ್ಡ, ಶಾಂತಿನಗರ, ಚನ್ನಮುಂಬಾಪುರ ಗ್ರಾಮಗಳಿಂದಲೂ ಜನರು ಆರೋಗ್ಯ ಬರುತ್ತಿರುವುದು ಇಲ್ಲಿನ ವೈದ್ಯರು ಮತ್ತು ಸಿಬ್ಬಂದಿ ಸೇವಾ ಮನೋಭಾವಕ್ಕೆ ಸಾಕ್ಷಿ.

‘ಆಸ್ಪತ್ರೆಗೆ ಸೌಲಭ್ಯ ದೊರೆಯಲು ಆರೋಗ್ಯ ಇಲಾಖೆ ಅಂದಿನ ಆಯುಕ್ತ ಶ್ರೀನಿವಾಸಾಚಾರಿ, ಕಾರ್ಯದರ್ಶಿ ಸರೋಜಮ್ಮ, ಮುಖ್ಯಮಂತ್ರಿ ಅಧೀನ ಕಾರ್ಯದರ್ಶಿ ವೀರಣ್ಣ ಸಹಕಾರ ನೀಡಿದ್ದರು. ಹಾಗಾಗಿ, ₹2.52 ಕೋಟಿ ವೆಚ್ಚದಲ್ಲಿ ಹೊಸ ಕಟ್ಟಡ ನಿರ್ಮಾಣ ಸಾಧ್ಯವಾಯಿತು. ಸುತ್ತೂರು ಶ್ರೀಗಳು ಸರ್ಕಾರಕ್ಕೆ ಶಿಫಾರಸು ಮಾಡಿದ್ದರು. ಈಗ ಹೊಸ ಸೇತುವೆ ನಿರ್ಮಾಣದ ನಂತರ ರೋಗಿಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗುತ್ತಿದೆ’ ಎನ್ನುತ್ತಾರೆ ಆಸ್ಪತ್ರೆಯ ಉನ್ನತೀಕರಣಕ್ಕೆ ನಿರಂತರವಾಗಿ ಶ್ರಮಿಸುತ್ತಾ ಬಂದಿರುವ ಕೆ.ಜಿ. ನಿಂಗಪ್ಪ.

ಪ್ರತಿ ತಿಂಗಳೂ ಆರೋಗ್ಯ ಶಿಬಿರ: ಆಸ್ಪತ್ರೆಯಲ್ಲಿ ಪ್ರತ್ಯೇಕ ಅಂಬುಲೆನ್ಸ್ ಸೇವೆಯೂ ಲಭ್ಯವಿದೆ. ಜತೆಗೆ, ನಗರ ಪ್ರದೇಶದ ಖ್ಯಾತ ವೈದ್ಯರನ್ನು ಕರೆಯಿಸಿ ತಿಂಗಳಿಗೆ ಒಮ್ಮೆ ವಿಶೇಷ ಆರೋಗ್ಯ ತಪಾಸಣಾ ಶಿಬಿರ ಆಯೋಜಿಸಲಾಗುತ್ತಿದೆ.

‘ಆಸ್ಪತ್ರೆಯಲ್ಲಿ ಇಬ್ಬರು ವೈದ್ಯರು, 22 ಸಿಬ್ಬಂದಿ ಹುದ್ದೆಗಳು ಖಾಲಿ ಇವೆ. ಕೊರತೆಗಳ ನಡುವೆಯೂ ಎಲ್ಲ ಸಹೋದ್ಯೋಗಿಗಳು, ಸಿಬ್ಬಂದಿ ಪ್ರೀತಿಯಿಂದ ರೋಗಿಗಳ ಆರೈಕೆಯಲ್ಲಿ ತೊಡಗಿದ್ದಾರೆ’ ಎಂದು ಸಂತಸ ವ್ಯಕ್ತಪಡಿಸುತ್ತಾರೆ ಆಸ್ಪತ್ರೆಯ ಆಡಳಿತ ವೈದ್ಯಾಧಿಕಾರಿ ಡಾ. ವೇಣುಗೋಪಾಲ್.

‌ಇರುವುದು ಒಂದೇ ವಸತಿಗೃಹ

ಆಸ್ಪತ್ರೆಯಲ್ಲಿ ನಾಲ್ವರು ವೈದ್ಯರು, 52 ಸಿಬ್ಬಂದಿ ಇದ್ದರೂ, ಇರುವುದು ಒಂದೇ ವಸತಿ ಗೃಹ. ಅದು ಆಡಳಿತ ವೈದ್ಯಾಧಿಕಾರಿಗೆ ಮಾತ್ರ. ಹೊಳಲೂರು ಇನ್ನೂ ಗ್ರಾಮೀಣ ವಾತಾವರಣದಲ್ಲೇ ಇರುವ ಕಾರಣ ಅಲ್ಲಿ ಬಾಡಿಗೆಗೆ ಮನೆಯೂ ಸಿಗುವುದಿಲ್ಲ. ಹಾಗಾಗಿ, ಉಳಿದ ಎಲ್ಲ ವೈದ್ಯರು ಹಾಗೂ ಸಿಬ್ಬಂದಿ ನಿತ್ಯವೂ ಶಿವಮೊಗ್ಗದಿಂದ ಬಂದು ಹೋಗಬೇಕಿದೆ. ಆಸ್ಪತ್ರೆ 2.24 ಎಕರೆ ವಿಸ್ತೀರ್ಣದಲ್ಲಿ ಇದ್ದು, ಹಿಂಭಾಗದಲ್ಲಿ ಸಾಕಷ್ಟು ಜಾಗ ಖಾಲಿ ಇದೆ. ಅಲ್ಲಿ ಬಹುಮಹಡಿ ಸುಸಜ್ಜಿತ ವಸತಿಗೃಹ ನಿರ್ಮಿಸಿದರೆ ಎಲ್ಲರಿಗೂ ಅನುಕೂಲವಾಗುತ್ತದೆ ಎನ್ನುತ್ತಾರೆ ಅಲ್ಲಿನ ಸಿಬ್ಬಂದಿ.

ಹಿರಿಯ ತಜ್ಞ ವೈದ್ಯರು, ಹಿರಿಯ ವೈದ್ಯಾಧಿಕಾರಿ, ಕ್ಷ ಕಿರಣ ನಿರ್ವಾಹಕರು, ಹೆಚ್ಚುವರಿ ಯೋಗಾಲಯ ಸಿಬ್ಬಂದಿ, 12ಕ್ಕೂ ಹೆಚ್ಚು ‘ಡಿ’ ಗ್ರೂಪ್ ಸಿಬ್ಬಂದಿ ಭರ್ತಿ ಮಾಡಿಕೊಳ್ಳುವ ಅಗತ್ಯವಿದೆ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 1

    Sad
  • 0

    Frustrated
  • 0

    Angry