‘ಗ್ರಾಮೀಣ ಕ್ರೀಡೆ ನಶಿಸದಿರಲಿ’

7
ರಾಷ್ಟ್ರ ಮಟ್ಟದ ಎತ್ತಿನ ಗಾಡಿ ಓಟದ ಸ್ಪರ್ಧೆಗೆ ಚಾಲನೆ

‘ಗ್ರಾಮೀಣ ಕ್ರೀಡೆ ನಶಿಸದಿರಲಿ’

Published:
Updated:

ವಿಜಯಪುರ: ಗ್ರಾಮೀಣ ಕ್ರೀಡೆಗಳು ನಶಿಸಿ ಹೋಗದಂತೆ ಸರ್ಕಾರ ಮತ್ತು ಸಂಘ–ಸಂಸ್ಥೆಗಳು ಗಮನ ಹರಿಸಬೇಕು ಎಂದು ರಾಷ್ಟ್ರ ಪ್ರಶಸ್ತಿ ಪುರಸ್ಕೃತರ ಫೆಡರೇಶನ್‌ ರಾಷ್ಟ್ರೀಯ ಅಧ್ಯಕ್ಷ ಡಾ.ಜಾವಿದ ಜಮಾದಾರ ಹೇಳಿದರು.

ಭಾನುವಾರ ಹಜರತ್ ಖಾಜಾ ಅಮೀನ ದರ್ಗಾದ ಉತ್ಸವ ಅಂಗವಾಗಿ ಹಮ್ಮಿಕೊಂಡಿದ್ದ ರಾಷ್ಟ್ರಮಟ್ಟದ ಎತ್ತಿನ ಗಾಡಿ ಓಟದ ಸ್ಪರ್ಧೆಗೆ ಚಾಲನೆ ನೀಡಿ ಮಾತನಾಡಿದ ಅವರು, ದೇಶದ ಸಂಸ್ಕೃತಿ ಬಿಂಬಿಸುವ ಗ್ರಾಮೀಣ ಕ್ರೀಡೆಗಳನ್ನು ಉಳಿಸಿ, ಬೆಳೆಸುವುದು ಪ್ರತಿಯೊಬ್ಬರ ಕರ್ತವ್ಯವಾಗಬೇಕು ಎಂದರು.

ರೈತರಿಗೆ ಎತ್ತುಗಳು ಜೀವಾಳ. ಗ್ರಾಮೀಣ ಪ್ರದೇಶದಲ್ಲಿ ಕಾರ ಹುಣ್ಣಿಮೆಯ ದಿವಸ ತಮ್ಮ ತಮ್ಮ ಗ್ರಾಮಗಳಲ್ಲಿ ಎತ್ತುಗಳನ್ನು ಓಡಿಸುವುದು ಪರಂಪರೆಯಾಗಿದೆ. ಇಂತಹ ಸ್ಪರ್ಧೆಗಳಲ್ಲಿ ರೈತರು ಭಾಗವಹಿಸಿ ಸಂತೋಷವನ್ನು ಅನುಭವಿಸುತ್ತಾರೆ. ಹಜರತ್ ಖಾಜಾ ಅಮೀನ ದರ್ಗಾದ ಉತ್ಸವ ಅಂಗವಾಗಿ ನಡೆಯುವ ಎತ್ತಿನ ಬಂಡೆಯ ಸ್ಪರ್ಧೆ ದೇಶಕ್ಕೆ ಮಾದರಿಯಾಗಿದೆ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಮುಖಂಡ ಹಾಸಿಂಪೀರ ವಾಲಿಕಾರ, ರೈತರು ಹಗಲಿರುಳು ಜಾನುವಾರುಗಳೊಂದಿಗೆ ಭಾವನಾತ್ಮಕ ಸಂಬಂಧ ಇಟ್ಟುಕೊಂಡಿ ರುತ್ತಾರೆ. ಬಹು ಜೋಪಾನವಾಗಿ ಬೆಳೆಸಿ ಸ್ಪರ್ಧೆಗಳಿಗೆ ಸಿದ್ದಗೊಳಿಸಿರುತ್ತಾರೆ. ಇದರಿಂದ ರೈತರಿಗೆ ಸಂಬಂಧಪಟ್ಟ ಕ್ರೀಡೆಗಳು ಜನಮೆಚ್ಚುಗೆಯಾಗಿವೆ. ರೈತರು ಕೃಷಿ ಚಟುವಟಿಕೆಯ ಜತೆಗೆ ಇಂತಹ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಗ್ರಾಮೀಣ ಭಾರತೀಯ ಸಂಸ್ಕೃತಿ, ಸಂಪ್ರದಾಯ ಉಳಿಸುವ ಮತ್ತು ಬೆಳೆಸುವ ಜವಾಬ್ದಾರಿ ಹೊತ್ತುಕೊಂಡಿದ್ದಾರೆ ಎಂದು ಹೇಳಿದರು.

ವಿಜೇತರಿಗೆ ಬಹುಮಾನ: ಕುದುರೆ ಮತ್ತು ಎತ್ತಿನ ಜೋಡಿ ಗಾಡಿ ಸ್ಪರ್ಧೆಯಲ್ಲಿ ಚಿಕ್ಕೋಡಿಯ ಪಾಪಟ ಸಿಂಧೆ ಪ್ರಥಮ (₹1 ಲಕ್ಷ), ನಿಪ್ಪಾಣಿಯ ಹೇಮಂತ ಹರಿರಾ ಗಾಡಿ ದ್ವಿತೀಯ (₹50 ಸಾವಿರ), ಕೊಲ್ಹಾರದ ಬಂದಾ ಕಿಲಾರಿ ತೃತೀಯ (₹25 ಸಾವಿರ), ಮಧ್ಯ ವಯಸ್ಸಿನ ಜೊಡಿ ಎತ್ತಿನ ಗಾಡಿ ಸ್ಪರ್ಧೆಯಲ್ಲಿ ಶಂಕರ ಜೊಗನಿ ಪ್ರಥಮ (₹2 ಲಕ್ಷ), ರಾಮದುರ್ಗದ ತಿಪ್ಪಣ್ಣ ಹುದ್ದಾರ ದ್ವೀತಿಯ (₹1 ಲಕ್ಷ), ಕೊಲ್ಹಾರದ ಮುಸಾ ಮುಜಾವರ ತೃತೀಯ (₹50 ಸಾವಿರ), ಎರಡು ಮತ್ತು ನಾಲ್ಕು ಹಲ್ಲು ಹಚ್ಚಿದ ಎತ್ತುಗಳ ಓಟದಲ್ಲಿ ಮಿರಜನ ಬಂಡಾ ಸಿದ್ದೇವಾಡಿ ಪ್ರಥಮ (₹5 ಲಕ್ಷ), ಕೊಲ್ಹಾಪುರದ ಸಾದಿಕ ಅಜರಾ ದ್ವಿತೀಯ (₹2.5 ಲಕ್ಷ), ಸಾಂಗ್ಲಿಯ ಅಪ್ಪಗೌಡ ಪಾಟೀಲ ತೃತೀಯ (₹1.5 ಲಕ್ಷ) ಬಹುಮಾನ ಪಡೆದುಕೊಂಡರು.

ಮಾಜಿ ನಗರಸಭಾ ಸದಸ್ಯ ನಬಿಲಾಲ ಕರಜಗಿ, ಮುಖಂಡರಾದ ಜಹಾಂಗಿರ ಮಮದಾಪುರ, ಮಹಿಬೂಬ ಮಮದಾಪುರ, ಅಪ್ಪುಗೌಡ ಪಾಟೀಲ, ಮುಜೀಬ ನಿಂಬಾಳ, ಖಾಜಾ ಮಮದಾಪೂರ, ನಾಗರಾಜ ಹೊಸಳ್ಳಿ, ಅಬ್ದುಲರಜಾಕ ಲೋಣಿ, ಕವಾಲ ಹವಾಲ್ದಾರ, ಅಕ್ಬರ ವಾಲಿಕಾರ, ಗಫೂರ ಹವಾಲ್ದಾರ, ಕಾಂತು ಹದನೂರ, ಬಸಪ್ಪ ಶೆಟಗಾರ, ಮಸ್ತಾನ ಯಾದಗಿರ ಇದ್ದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry