ಬೆಳಿಗ್ಗೆ ಚುಮು ಚುಮು ಬಿಸಿಲಲ್ಲಿ ಕೆರೆ ಅಂಚಿನ ಮಾವಿನ ತೋಟಗಳ ಕಡೆ ಹೆಜ್ಜೆಹಾಕಿದ್ದ ಗ್ರಾಮಸ್ಥರನ್ನು ಬಣ್ಣದ ಚಿಟ್ಟೆಗಳು ಸ್ವಾಗತಿಸಿದವು. ಇಷ್ಟೊಂದು ಚಿಟ್ಟೆಗಳು ಎಲ್ಲಿಂದ ಬಂದವು ಎಂಬ ಪ್ರಶ್ನೆ ನೋಡುಗರನ್ನು ಕಾಡುತ್ತಿತ್ತು. ಮಾವಿನ ತೋಟಗಳಿಂದ ಹೊರಗೆ ಹಾರಿಬರುತ್ತಿದ್ದ ಚಿಟ್ಟೆಗಳು ಕೆರೆಯಲ್ಲಿ ಬೆಳೆದಿದ್ದ ಉತ್ತರಾಣಿ ಮತ್ತಿತರ ಗಿಡಗಳ ಮೇಲೆ ಗುಂಪು ಗುಂಪಾಗಿ ಕುಳಿತುಕೊಳ್ಳುತ್ತಿದ್ದವು. ಹೂಗಳನ್ನು ಜೀಕುತ್ತ, ಎಲೆಗಳನ್ನು ತಾಕುತ್ತ ಆಟವಾಡುತ್ತಿದ್ದವು. ಹಿರಿಯರ ಹಿಂದೆ ಹೆಜ್ಜೆ ಹಾಕಿದ್ದ ಮಕ್ಕಳಂತೂ ಚಿಟ್ಟೆಗಳನ್ನು ಕಂಡು ಖುಷಿ ಪಟ್ಟರು. ಕೆಲವರು ಅವುಗಳನ್ನು ಹಿಡಿಯುವ ವಿಫಲ ಯತ್ನ ನಡೆಸುತ್ತಿದ್ದರು.