ಸುಮಾರು 30 ವರ್ಷಗಳ ಹಿಂದೆ ಅಸ್ತಿತ್ವಕ್ಕೆ ಬಂದಿರುವ ಮಖಬೂಲಿಯಾ ನಗರವು ಬಹುತೇಕ ಮುಸ್ಲಿಂ ಜನರು ಇರುವ ಸುಮಾರು 150 ಮನೆಗಳನ್ನು ಹೊಂದಿದ್ದು, ಮೂಲ ಸೌಲಭ್ಯಗಳು ಇಲ್ಲಿ ಮರಿಚಿಕೆ, ಒಂದು ಓಣಿಯ ರಸ್ತೆ ಮಾತ್ರ ಈತನಕ ಡಾಂಬರ್ ಕಂಡಿದೆ. ಮಿಕ್ಕೆಲ್ಲವೂ ತಗ್ಗು –ಗುಂಡಿಗಳಿಂದ ಕೂಡಿವೆ, ಚರಂಡಿಗಳು ನಿರ್ಮಾಣಗೊಂಡಿವೆ, ಆದರೆ ಚರಂಡಿ ಸ್ವಚ್ಚಗೊಳಿಸಿ 6 ತಿಂಗಳು ಗತಿಸಿದೆ, ಹೀಗಾಗಿ ಹೂಳು ತುಂಬಿಕೊಂಡ ಚರಂಡಿಯಲ್ಲಿ ಈಗ ಮಳೆಯ ನೀರು ಸರಾಗವಾಗಿ ಹರಿಯದೇ ರಸ್ತೆ ಮೇಲೆ ಗಲೀಜು ಸೃಷ್ಠಿಯಾಗುತ್ತಿದೆ, ಇದು ಸೊಳ್ಳೆ ಉತ್ಪತ್ತಿಗೆ ಕಾರಣವಾಗುತ್ತಿದೆ, ಚರಂಡಿ ಗುಂಟ ಹಂದಿಗಳ ಕಾರುಬಾರು, ಸಂಜೆಯಾಗುತ್ತಲೇ ಮನೆ ತುಂಬ ಸೊಳ್ಳೆಗಳ ನೀನಾದ,..!
ಇಲ್ಲಿರುವ ಅಂಗನವಾಡಿ ಕೇಂದ್ರಕ್ಕೆ 45 ಮಕ್ಕಳು ಬರುತ್ತಾರೆ, ಅಂಗನವಾಡಿ ಮುಂದಿನ ರಸ್ತೆಯಲ್ಲಿ ಮಳೆ ನೀರು ತುಂಬಿಕೊಂಡು ಮಕ್ಕಳು ಬಿದ್ದು ಗಾಯ ಮಾಡಿಕೊಳ್ಳುತ್ತಾರೆ, ಬೈಕ್ ಸವಾರರು ಇಲ್ಲಿ ಫಜೀತಿಗೆ ಒಳಗಾಗುತ್ತಾರೆ, ಅಂಗನವಾಡಿ ಸುತ್ತಲೂ ಸ್ವಚ್ಚತೆ ಇಲ್ಲದಂತಾಗಿ ಸೊಳ್ಳೆ ಕಚ್ಚಿಸಿಕೊಳ್ಳುವ ಕಷ್ಟ ಮಕ್ಕಳದ್ದು..!