Madhya Pradesh Election | ದತಿಯಾ ಕ್ಷೇತ್ರ: ಮಿಶ್ರಾ ಮುಂದಿದೆ ಕಠಿಣ ಹಾದಿ

ಗ್ವಾಲಿಯರ್‌ನಿಂದ ಸರಿಸುಮಾರು 76 ಕಿ.ಮೀ. ದೂರದಲ್ಲಿರುವ ದತಿಯಾ ಕ್ಷೇತ್ರದಲ್ಲಿ ಚುನಾವಣೆ ರಂಗೇರಿದೆ. ಈ ಕಣವು ದೇಶದ ಗಮನ ಸೆಳೆದಿದೆ. ಮುಖ್ಯಮಂತ್ರಿ ಸ್ಥಾನದ ಆಕಾಂಕ್ಷಿಯೂ ಆಗಿರುವ ಗೃಹ ಸಚಿವ ನರೋತ್ತಮ ಮಿಶ್ರಾ ಅವರು ಬಿಜೆಪಿ ಹುರಿಯಾಳು. ಕ್ಷೇತ್ರದಲ್ಲಿ ಹ್ಯಾಟ್ರಿಕ್‌ ಜಯ ಗಳಿಸಿರುವ ಮಿಶ್ರಾ ಅವರಿಗೆ ಈ ಸಲ ಗೆಲುವು ಸುಲಭವಲ್ಲ. ಮಿಶ್ರಾ ವಿರುದ್ಧ ‘ಹ್ಯಾಟ್ರಿಕ್‌’ ಸೋಲು ಕಂಡಿರುವ ಹಿರೀಕ ರಾಜೇಂದ್ರ ‘ಕೈ’ ಅಭ್ಯರ್ಥಿ. ಅವರು ಎರಡು ಬಾರಿ ಶಾಸಕರಾಗಿದ್ದರು. ಅವರ ಬೆನ್ನಿಗೆ ಅವಧೇಶ್‌ ನಾಯಕ್‌ ನಿಂತಿದ್ದಾರೆ. ಕಾಂಗ್ರೆಸ್‌ ಪಕ್ಷವು ಆರಂಭದಲ್ಲಿ ಅವಧೇಶ್‌ ನಾಯಕ್‌ ಅವರಿಗೆ ಟಿಕೆಟ್ ಕೊಟ್ಟಿತ್ತು. ಕಳೆದ ಸಲ ಕಡಿಮೆ ಅಂತರದಲ್ಲಿ ಸೋತ ಅಭ್ಯರ್ಥಿಯನ್ನು ಕೈಬಿಟ್ಟು ಕೆಲವೇ ತಿಂಗಳ ಹಿಂದೆ ಪಕ್ಷಕ್ಕೆ ಸೇರ್ಪಡೆಯಾದ ನಾಯಕ್‌ ಅವರಿಗೆ ಮಣೆ ಹಾಕಿದ್ದಕ್ಕೆ ಪಕ್ಷದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು. ಪಕ್ಷದ ಮುಖಂಡರು ಪ್ರತಿಭಟನೆ ನಡೆಸಿದ್ದರು. ಬಳಿಕ ಕಾಂಗ್ರೆಸ್‌ ಪಕ್ಷವು ಅಭ್ಯರ್ಥಿಯನ್ನು ಬದಲಿಸಿತ್ತು. ಈಗ ನಾಯಕ್‌ ಹಾಗೂ ಭಾರ್ತಿ ಒಗ್ಗಟ್ಟಿನಿಂದ ಪ್ರಚಾರ ನಡೆಸುತ್ತಿದ್ದಾರೆ.

ನಾಯಕ್ ಅವರು ಮೂಲತಃ ರಾಷ್ಟ್ರೀಯ ಸ್ವಯಂಸೇವಕ ಸಂಘದವರು. ಮಾಜಿ ಮುಖ್ಯಮಂತ್ರಿ ಉಮಾಭಾರತಿ ಅವರ ನೆಚ್ಚಿನ ಶಿಷ್ಯ. ಕಳೆದ ಎರಡು ಚುನಾವಣೆಗಳಲ್ಲಿ ಮಿಶ್ರಾ ಹಿಂದೆ ನಿಂತು ಗೆಲುವಿಗೆ ಕಾರ್ಯತಂತ್ರ ರೂಪಿಸಿದ್ದರು. 2018ರ ಚುನಾವಣೆಯಲ್ಲಿ ಗೆದ್ದ ನಂತರ ಮಿಶ್ರಾ ಅವಮಾನ ಮಾಡಿದ್ದಾರೆ ಎಂಬುದು ನಾಯಕ್‌ ಕೋಪಕ್ಕೆ ಕಾರಣ. ನಂತರ ಮಿಶ್ರಾ ಅವರಿಂದ ದೂರವಾದರು. 

ಕ್ಷೇತ್ರದಲ್ಲಿ ಬ್ರಾಹ್ಮಣ ಹಾಗೂ ಕುಶ್ವಾಹ ಸಮುದಾಯದವರು ಗಣನೀಯ ಸಂಖ್ಯೆಯಲ್ಲಿದ್ದಾರೆ. ಬ್ರಾಹ್ಮಣ ಮತದಾರರ ಸಂಖ್ಯೆ 30 ಸಾವಿರದಷ್ಟು ಇದೆ. ಕೈ ಹಾಗೂ ಕಮಲ ಪಾಳಯದ ಅಭ್ಯರ್ಥಿಗಳಿಬ್ಬರೂ ಬ್ರಾಹ್ಮಣ ಸಮುದಾಯದವರು. ಚುನಾವಣೆ ಘೋಷಣೆಯಾದ ಬಳಿಕ ಕೈ ಪಾಳಯದ ಹಲವು ನಾಯಕರನ್ನು ಬಿಜೆಪಿ ಸೆಳೆದುಕೊಂಡಿದೆ. 1993ರ ಬಳಿಕ ಕಾಂಗ್ರೆಸ್‌ ಇಲ್ಲಿ ಗೆದ್ದೇ ಇಲ್ಲ. ಹಿಂದು ಮತಗಳ ಮೇಲೆ ಕಣ್ಣಿಟ್ಟು ಮಿಶ್ರಾ ಅವರು ರಾಮ್‌ ಲಾಲಾ ಲೋಕ್‌ ಹಾಗೂ ದತಿಯಾದ ಪಿತಾಂಬರ ಮಂದಿರದ ಅಭಿವೃದ್ಧಿಗೆ ಅನುದಾನ ಕೊಡಿಸಿದ್ದಾರೆ. ಕ್ಷೇತ್ರದಲ್ಲಿ ಸಾಕಷ್ಟು ಅಭಿವೃದ್ಧಿ ಕಾರ್ಯಗಳಾಗಿವೆ ಎಂದು ಮತದಾರರು ಹೇಳುತ್ತಾರೆ. ಕೆಲವೊಂದು ಮತದಾರರು ‘ಈ ಸಲ ಬದಲಾವಣೆಗಾಗಿ ಮತ ಚಲಾಯಿಸುತ್ತೇವೆ’ ಎಂದೂ ತಿಳಿಸುತ್ತಾರೆ.   

ಮಾತಿಗೆ ಸಿಕ್ಕ ಅಂಗನವಾಡಿ ಕಾರ್ಯಕರ್ತೆ ಪ್ರಿಯಾಂಕಾ ಚೌರಾಸಿಯಾ, ‘ನಮಗೆ ಇಲ್ಲಿ ಅಭ್ಯರ್ಥಿ ಮುಖ್ಯವಲ್ಲ. ಪಕ್ಷ ಮುಖ್ಯ. ಮಹಿಳೆಯರ ಶ್ರೇಯೋಭಿವೃದ್ಧಿಗೆ ಬಿಜೆಪಿ ಹಲವು ಯೋಜನೆಗಳನ್ನು ಅನುಷ್ಠಾನಗೊಳಿಸಿದೆ. ಲಾಡ್ಲಿ ಬೆಹ್ನಾ ಯೋಜನೆಯಡಿ ಮಹಿಳೆಯರಿಗೆ ₹1,250 ಕೊಡುತ್ತಿರುವುದು ಉತ್ತಮ ಉಪಕ್ರಮ. ನಮಗೆ ಅದು ದೊಡ್ಡ ಮೊತ್ತ. ಅದನ್ನು ನೆನಪಿನಲ್ಲಿಟ್ಟುಕೊಂಡು ಮತ ಚಲಾಯಿಸುತ್ತೇವೆ’ ಎಂದು ಹೇಳುತ್ತಾರೆ. 

ಅವರ ಜತೆಗಿದ್ದ ಸುನಿತಾ ಕಾತ್ರೆ ಅವರು ‘ಕ್ಷೇತ್ರದಲ್ಲಿ ಸಾಕಷ್ಟು ಅಭಿವೃದ್ಧಿ ಕಾರ್ಯಗಳಾಗಿವೆ’ ಎಂದು ಹೇಳಿಕೊಂಡರು. ‘ಶಾಸಕರ ಬೆಂಬಲಿಗರ ದೌರ್ಜನ್ಯ ಮಿತಿಮೀರಿದೆ. ವರ್ಷದ ಹಿಂದೆ ಪ್ರಬಲ ಸಮುದಾಯದ ವ್ಯಕ್ತಿಯೊಬ್ಬರು ತಳ ಸಮುದಾಯದ ವ್ಯಕ್ತಿಯನ್ನು ಕೊಲೆ ಮಾಡಿದರು. ಆದರೆ, ಅವರು ಜೈಲಿನಿಂದ ಒಂದೇ ದಿನದಲ್ಲಿ ಬಿಡುಗಡೆಯಾದರು. ಗೃಹ ಸಚಿವರ ಬೆಂಬಲವಿಲ್ಲದೆ ಅವರು ಬಿಡುಗಡೆಯಾಗಲು ಸಾಧ್ಯವೇ’ ಎಂದು ಪ್ರಶ್ನಿಸುತ್ತಾರೆ. 

ರಾಷ್ಟ್ರೀಯ ಹೆದ್ದಾರಿ ಪಕ್ಕದಲ್ಲಿ ಕೃಷಿ ಕಾರ್ಯದಲ್ಲಿ ತೊಡಗಿದ್ದ ಉಮೇಶ್‌ ಕುಶ್ವಾಹ, ‘ಮಿಶ್ರಾ ಅಭಿವೃದ್ಧಿ ಕಾರ್ಯ ಮಾಡಿರುವುದು ನಿಜ. ಅವರದ್ದು ಹರಕು ಬಾಯಿ. ಅದೇ ಕಾರಣಕ್ಕೆ ಅವರನ್ನು ಸೋಲಿಸಲು ಎಲ್ಲರೂ ಒಗ್ಗಟ್ಟಾಗಿ ಹತಾರ ಹಿಡಿದುಕೊಂಡು ನಿಂತಿದ್ದಾರೆ. ಯಾರೇ ಗೆದ್ದರೂ ಒಂದೆರಡು ಸಾವಿರ ಮತಗಳ ಅಂತರದಿಂದ ಅಷ್ಟೇ’ ಎನ್ನುತ್ತಾರೆ.