ನವದೆಹಲಿ: ‘ಒಬ್ಬ ವ್ಯಕ್ತಿ ಕಾನೂನು ಉಲ್ಲಂಘಿಸಿದ ಮಾತ್ರಕ್ಕೆ ಕಾನೂನುಬದ್ಧವಾಗಿ ನಿರ್ಮಿಸಿದ ಆತನ ಕುಟುಂಬದ ಮನೆ ಅಥವಾ ಸ್ವತ್ತನ್ನು ಬುಲ್ಡೋಜರ್ ಬಳಸಿ ಧ್ವಂಸ ಮಾಡುವುದು ಸರಿಯಲ್ಲ. ಅಂಥ ಕ್ರಮ ಕಾನೂನುಗಳನ್ನೇ ಧ್ವಂಸ ಮಾಡುವುದಕ್ಕೆ ಸಮ’ ಎಂದು ಸುಪ್ರೀಂ ಕೋರ್ಟ್‌ ಗುರುವಾರ ಕಠಿಣವಾಗಿ ಹೇಳಿದೆ.
‘ಸರ್ಕಾರ ಕೈಗೊಳ್ಳುವ ಕ್ರಮಗಳು ಕಾನೂನು ಪ್ರಕಾರವೇ ಇರಬೇಕು. ಆರೋಪಿಯೊಬ್ಬನ ಮನೆಯನ್ನು ಬುಲ್ಡೋಜರ್ ಬಳಸಿ ಧ್ವಂಸ ಮಾಡಲಾಗುತ್ತದೆ ಎಂಬ ಬೆದರಿಕೆಗಳು ಇರುವುದು ಊಹಿಸಲು ಸಾಧ್ಯವಿಲ್ಲ’ ಎಂದೂ ಸುಪ್ರೀಂ ಕೋರ್ಟ್‌ ಹೇಳಿದೆ.
ಜಾವೇದಲಿ ಮಹೆಬೂಬ್‌ಮಿಯಾ ಸೈಯದ್ ಎಂಬುವವರು ಸಲ್ಲಿಸಿದ್ದ ಅರ್ಜಿಯ ವಿಚಾರಣೆಯನ್ನು ನ್ಯಾಯಮೂರ್ತಿಗಳಾದ ಹೃಷಿಕೇಶ್‌ ರಾಯ್, ಸುಧಾಂಶು ಧುಲಿಯಾ ಹಾಗೂ ಎಸ್.ವಿ.ಎನ್‌.ಭಟ್ಟಿ ಅವರಿದ್ದ ನ್ಯಾಯಪೀಠ ನಡೆಸಿತು.
‘ಆರೋಪಿತನ ವಿರುದ್ಧ ಕೇಳಿ ಬಂದಿರುವ ಅಪರಾಧ ಕೃತ್ಯವು ಕಾನೂನು ಪ್ರಕ್ರಿಯೆ ಮೂಲಕ ಸಾಬೀತಾಗಬೇಕು’ ಎಂದ ನ್ಯಾಯಪೀಠ, ಅರ್ಜಿದಾರನ ಆಸ್ತಿಗೆ ಸಂಬಂಧಿಸಿ ಯಥಾಸ್ಥಿತಿ ಕಾಯ್ದುಕೊಳ್ಳುವಂತೆ ನಿರ್ದೇಶನ ನೀಡಿ ವಿಚಾರಣೆಯನ್ನು ನಾಲ್ಕು ವಾರಗಳ ಕಾಲ ಮುಂದೂಡಿತು.
