ಹರಿಯಾಣ ವಿಧಾನಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್ ಏಕಾಂಗಿ ಸ್ಪರ್ಧೆ: ಕುಮಾರಿ ಸೆಲ್ಜಾ

ಪಿಟಿಐ ಸುದ್ದಿಸಂಸ್ಥೆಯ ಸಂಪಾದಕರ ಜೊತೆ ಶನಿವಾರ ಸಂವಾದ ನಡೆಸಿದ ಅವರು, 90 ಸದಸ್ಯ ಬಲವನ್ನು ಹೊಂದಿರುವ ವಿಧಾನಸಭೆ ಚುನಾವಣೆಯಲ್ಲಿ ಪಕ್ಷವು ‘ಜಯಭೇರಿ’ ಬಾರಿಸಲಿದೆ, ಅತಂತ್ರ ವಿಧಾನಸಭೆ ಸೃಷ್ಟಿಯಾಗುವ ಸಾಧ್ಯತೆಯೇ ಇಲ್ಲ ಎಂದು ತಿಳಿಸಿದರು.

‘ತಳಮಟ್ಟದಲ್ಲಿ ಜನನಾಯಕ್‌ ಜನತಾ ಪಕ್ಷ( ಜೆಜೆಪಿ) ಸಂಪೂರ್ಣವಾಗಿ ನೆಲೆ ಕಳೆದುಕೊಂಡಿದ್ದು, ಮುಂದಿನ ಚುನಾವಣೆಯಲ್ಲಿ ಆ ಪಕ್ಷವು ಮತ ವಿಭಜಿಸುವ ಸಾಧ್ಯತೆಯಿಲ್ಲ’ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.

‘ಕಳೆದ ಚುನಾವಣೆಯಲ್ಲಿ ಕಾಂಗ್ರೆಸ್‌ನಿಂದ ಹಲವು ಮುಖಂಡರು ಜೆಜೆಪಿಗೆ ಹೋಗಿ ಗೆದ್ದಿದ್ದರು. ಆದರೆ, ಈಗಾಗಲೇ ಜೆಜೆಪಿ ವಿಭಜನೆಯಾಗಿದೆ. ಅಲ್ಲಿದ್ದ ಹಲವು ಶಾಸಕರು ಬೇರೆ ಕಡೆಗೆ ತೆರಳಿದ್ದಾರೆ. ಹೀಗಾಗಿ, ಜೆಜೆಪಿಯು ಈ ಸಲ ದೊಡ್ಡ ಪ್ರಮಾಣದಲ್ಲಿ ಪರಿಣಾಮ ಬೀರುವುದಿಲ್ಲ’ ಎಂದರು.

‘ಐಎನ್‌ಎಲ್‌ಡಿ– ಬಿಎಸ್ಪಿ ಮೈತ್ರಿಕೂಟವು ಕಾಂಗ್ರೆಸ್‌ ಮತಬುಟ್ಟಿಗೆ ಕೈ ಹಾಕಲು ಸಾಧ್ಯವಿಲ್ಲ. ಇತ್ತೀಚಿನ ಲೋಕಸಭಾ ಚುನಾವಣೆಯಲ್ಲಿ ಐಎನ್‌ಎಲ್‌ಡಿ ಹೀನಾಯವಾಗಿ ಸೋತಿದೆ. ಬಿಎಸ್ಪಿಯು ರಾಜ್ಯದಲ್ಲಿ ಸಂಪೂರ್ಣವಾಗಿ ನೆಲೆ ಕಳೆದುಕೊಂಡಿದೆ. ಹೀಗಾಗಿ ಯಾವುದೇ ಪರಿಣಾಮ ಬೀರಲ್ಲ’ ಎಂದು ಸೆಲ್ಜಾ ತಿಳಿಸಿದರು.