ಮದ್ಯ ದರ ಏರಿಕೆಯ ಹೊರತಾಗಿಯೂ ಅಬಕಾರಿ ವರಮಾನ ಶೇ 14ರಷ್ಟು ಹೆಚ್ಚಳ

ಪ್ರಸಕ್ತ ಸಾಲಿನ (2023–24) ವರೆಗಿನ ಮದ್ಯ ಮಾರಾಟವನ್ನು ವಿಶ್ಲೀಷಿಸಿದರೆ, ಮದ್ಯ ಮಾರಾಟದಲ್ಲಿ ಶೇ 4.24 ರಷ್ಟು ಹೆಚ್ಚಳವಾಗಿದ್ದು, ₹ 1,628 ಕೋಟಿ ರಾಜಸ್ವ ಸಂಗ್ರಹ ಆಗಿದೆ. ಹೀಗಾಗಿ, ಅಬಕಾರಿ ಸುಂಕ ಶೇ 20ರಷ್ಟು ಹೆಚ್ಚಿಸಿದ ಪರಿಣಾಮ ಮದ್ಯ ಮಾರಾಟ  ಕುಂಠಿತವಾಗಿದೆ ಎನ್ನುವುದು ಸರಿಯಲ್ಲ ಎಂದು ಅಬಕಾರಿ ಇಲಾಖೆ ಮೂಲಗಳು ಹೇಳಿವೆ.

ಪ್ರಸಕ್ತ ಸಾಲಿನಲ್ಲಿ ಈವರೆಗೆ (ಏಪ್ರಿಲ್‌ 1ರಿಂದ ಆಗಸ್ಟ್‌ 25 ರವರೆಗೆ)  ₹ 13,515 ಕೋಟಿ ರಾಜಸ್ವ ಸಂಗ್ರಹವಾಗಿದೆ. ಬಜೆಟ್‌ನಲ್ಲಿ ನಿಗದಿಪಡಿಸಿ ಗುರಿಗೆ (₹ 36,000 ಕೋಟಿ) ಶೇ 37.5ರಷ್ಟು ಸಾಧನೆಯಾಗಿದೆ. ಕಳೆದ ವರ್ಷ ಈ ಅವಧಿಗೆ ₹ 11,887 ಕೋಟಿ ಸಂಗ್ರಹ ಆಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ₹ 1,628 ಕೋಟಿ ಹೆಚ್ಚು ಸಂಗ್ರಹವಾಗಿದ್ದು, ಶೇ 13.7ರಷ್ಟು ಬೆಳವಣಿಗೆ ಆಗಿದೆ ಎಂದೂ ಮೂಲಗಳು ಹೇಳಿವೆ.

ಸಾಮಾನ್ಯವಾಗಿ ಮದ್ಯದ ದರವನ್ನು ಬಜೆಟ್‌ನಲ್ಲಿ ಹೆಚ್ಚಿಸಿ ಘೋಷಿಸಲಾಗುತ್ತದೆ. ಪ್ರಸಕ್ತ ವರ್ಷ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು  ಜುಲೈ 7ರಂದು ಬಜೆಟ್‌ ಮಂಡಿಸಿದ್ದು, ಹೆಚ್ಚಿಸಿದ ದರ ಜುಲೈ 20ರಂದು ಜಾರಿಗೆ ಬಂದಿದೆ. ಮದ್ಯ ಮಾರಾಟಗಾರರು ಈ ಅವಧಿಯ ನಡುವೆ ಹೆಚ್ಚು ಮದ್ಯ ಖರೀದಿಸಿ ಮುಂಗಡ ದಾಸ್ತಾನು ಇಟ್ಟುಕೊಂಡು ಹೊಸ ದರದಲ್ಲಿ ಮಾರಾಟ ಮಾಡುತ್ತಾರೆ ಎಂದೂ ಇಲಾಖೆಯ ಮೂಲಗಳು ಹೇಳಿವೆ.