ನೈಜೀರಿಯಾದಲ್ಲಿ ನರಮೇಧ: 57 ಜನರನ್ನು ಗುಂಡಿಕ್ಕಿ ಕೊಂದ ಬಂದೂಕುಧಾರಿಗಳು

ಕೆಬ್ಬಿ ರಾಜ್ಯದ ಜುರು ಜಿಲ್ಲೆಯಲ್ಲಿ ಸೋಮವಾರ ನಡೆದ ನರಮೇಧವನ್ನು ಪೊಲೀಸರು ಖಚಿತಪಡಿಸಿದ್ದಾರೆ. ಆದರೆ, ಮೃತರ ನಿಖರ ಸಂಖ್ಯೆಯನ್ನು ನೀಡಿಲ್ಲ. 57 ಜನರ ಮೃತದೇಹಗಳು ಸಿಕ್ಕಿರುವುದಾಗಿ ಪೊಲೀಸರು ಹೇಳಿದ್ದಾರೆ. ಆದರೆ, 62 ಜನರು ಸಾವಿಗೀಡಾಗಿದ್ದಾರೆ ಎಂದು ಇಬ್ಬರು ಸ್ಥಳೀಯ ನಿವಾಸಿಗಳು ತಿಳಿಸಿದ್ದಾರೆ. ಈ ಬಗ್ಗೆ ಸುದ್ದಿ ಸಂಸ್ಥೆ ಎಎಫ್‌ಪಿ ವರದಿ ಮಾಡಿದೆ.

ಡಕಾಯಿತರೆಂದು ಸ್ಥಳೀಯವಾಗಿ ಎಂದು ಕರೆಯಲಾಗುವ ಭಾರೀ ಶಸ್ತ್ರಸಜ್ಜಿತ ಗುಂಪುಗಳು ವಾಯುವ್ಯ ನೈಜೀರಿಯಾದಾದ್ಯಂತ ಸಕ್ರಿಯವಾಗಿವೆ. ಹಳ್ಳಿಗಳ ಮೇಲೆ ದಾಳಿ ಮಾಡುವುದು, ಲೂಟಿ ಮಾಡುವುದು, ಸುಲಿಗೆ ಮಾಡಲೆಂದೇ ಸಾಮೂಹಿಕವಾಗಿ ನಾಗರಿಕರನ್ನು ಅಪಹರಿಸುವುದು ಈ ಗುಂಪಿನ ಕೆಲಸವಾಗಿದೆ.