ಇಸ್ಲಾಮಾಬಾದ್: ನಿಗದಿತ ಅವಧಿಯ ನಂತರ ಪಕ್ಷೇತರ ಸಂಸದರು ಯಾವುದೇ ಪಕ್ಷಕ್ಕೆ ಸೇರ್ಪಡೆಯಾಗದಂತೆ ನಿರ್ಬಂಧಿಸುವ ಮಸೂದೆಯನ್ನು ಪಾಕಿಸ್ತಾನ ನ್ಯಾಷನಲ್ ಅಸೆಂಬ್ಲಿಯು ಮಂಗಳವಾರ ಅಂಗೀಕರಿಸಿದೆ.
ಚುನಾವಣಾ ಕಾಯ್ದೆ ತಿದ್ದುಪಡಿ–2024 ಅನ್ನು ಆಡಳಿತರೂಢ ಪಾಕಿಸ್ತಾನ ಮುಸ್ಲಿಂ ಲೀಗ್– ನವಾಜ್ ಪಕ್ಷದ ಸಂಸದರಾದ ಬಿಲಾಲ್ ಕಯಾನಿ, ಜೆಫ್ ಜಫಾರ್ ಅವರು ಅಸೆಂಬ್ಲಿಯಲ್ಲಿ ಮಂಡಿಸಿದರು. ಪಾಕಿಸ್ತಾನ ತೆಹ್ರೀಕ್–ಇ–ಇನ್ಸಾಫ್ (ಪಿಟಿಐ) ಪಕ್ಷದ ಸಂಸದರ ತೀವ್ರ ವಿರೋಧದ ನಡುವೆಯೂ ಮಸೂದೆಯನ್ನು ಅಂಗೀಕರಿಸಲಾಯಿತು.
ಚುನಾವಣಾ ಕಾಯ್ದೆಯ 66 ಹಾಗೂ 104 ಸೆಕ್ಷನ್ಗೆ ತಿದ್ದುಪಡಿ ತರಲಾಗಿದ್ದು, ಇದರಿಂದ ಪಕ್ಷೇತರ ಸಂಸದರು ನಿಗದಿತ ಅವಧಿ ಮುಗಿದ ಬಳಿಕ ಯಾವುದೇ ಪಕ್ಷಗಳಿಗೆ ಸೇರ್ಪಡೆಯಾಗುವುದನ್ನು ನಿರ್ಬಂಧಿಸಲಾಗಿದೆ.
‘81 ಮಂದಿ ಸಂಸದರು ಸುನ್ನಿ ಇತ್ತೆಹಾದ್ ಕಾನ್ಸಿಲ್ನ ಸಂಸದರಾಗಿ ಪ್ರಮಾಣವಚನ ಸ್ವೀಕರಿಸಿದ್ದರು. ಈಗ ನಾವು ಪಾಕಿಸ್ತಾನ ತೆಹ್ರೀಕ್–ಇ–ಇನ್ಸಾಫ್ ಪಕ್ಷಕ್ಕೆ ಸೇರಿದವರು ಎಂದು ಹೇಳುತ್ತಿದ್ದಾರೆ. ಈ ವಿಚಾರದಲ್ಲಿ ಗೊಂದಲ ನಿವಾರಿಸುವ ನಿಟ್ಟಿನಲ್ಲಿ ಮಸೂದೆಗೆ ತಿದ್ದುಪಡಿ ತರಲಾಗಿದೆ’ ಎಂದು ಕಾನೂನು ಸಚಿವ ತರಾರ್ ಸ್ಪಷ್ಟಪಡಿಸಿದರು.
