White House Ball Room: ಶ್ವೇತಭವನದಲ್ಲಿ ಪರಮಾಣು ದಾಳಿಗೂ ಬಗ್ಗದ ಭೂಗತ ಸಂಕೀರ್ಣ: ಏನಿದು ‘ಬಾಲ್ ರೂಮ್‘ ?

ಅದು 2025ರ ಅಕ್ಟೋಬರ್ ತಿಂಗಳು. ಅಮೆರಿಕದ ಶ್ವೇತಭವನದ ಪ್ರಮುಖ ಭಾಗವಾದ ಈಸ್ಟ್ ವಿಂಗ್ನ ಒಂದು ಭಾಗವನ್ನೇ ನಾಶ ಮಾಡಲು ಟ್ರಂಪ್ ಸರ್ಕಾರ ಆರಂಭಿಸಿತ್ತು.

ಈ ಘಟನೆಯು, ಅಮೆರಿಕ ಅಧ್ಯಕ್ಷರ ಅಧಿಕೃತ ನಿವಾಸ ಮತ್ತು ಪ್ರಾಥಮಿಕ ಕೆಲಸದ ಸ್ಥಳವಾಗಿರುವ ಶ್ವೇತಭವನದಲ್ಲಿ ಏನಾಗುತ್ತಿದೆ ಎಂದು ಅಲ್ಲಿನ ನಾಗರಿಕರು ಸೇರಿದಂತೆ ಜಗತ್ತೇ ಆ ಕಡೆ ಕುತೂಹಲದಿಂದ ನೋಡುವಂತೆ ಮಾಡಿತ್ತು.

ಈ ಘಟನೆಗೆ ಕಾರಣವಾಗಿದ್ದು ಅಮೆರಿಕ ಅಧ್ಯಕ್ಷ ಡೊನಾಲ್ಟ್ ಟ್ರಂಪ್ ಅವರ ಪ್ರಾಜೆಕ್ಟ್ ‘ಬಾಲ್ ರೂಮ್’ ಯೋಜನೆ..

. ಶ್ವೇತಭವನದ ಕುರಿತು..: 1792ರ ಸಮಯದಲ್ಲಿ ಶ್ವೇತಭವನದ ನಿರ್ಮಾಣ ಕಾರ್ಯ ಆರಂಭವಾಯಿತು. 1800ರ ಸಮಯದಲ್ಲಿ ಪೂರ್ಣಗೊಂಡಿತು. ಇದೊಂದು ಕಟ್ಟಡ ಸಂಕೀರ್ಣವಾಗಿದೆ. ಅಮೆರಿಕದ ಪ್ರಮುಖ ಸ್ಥಳಗಳಲ್ಲಿ ಒಂದಾಗಿರುವ ಇದರಲ್ಲಿ ಆರು ಹಂತದ ಕಟ್ಟಡದಲ್ಲಿ ಒಟ್ಟು 132 ಕೋಣೆಗಳು, 35 ಶೌಚಾಲಯ, 412 ಬಾಗಿಲು, 147 ಕಿಟಕಿಗಳಿವೆ.

1800ರ ಸಮಯದಲ್ಲಿ ಅಮೆರಿಕ ರಾಜಧಾನಿಯನ್ನು ಫಿಲಡೆಲ್ಫಿಯಾದಿಂದ ವಾಷಿಂಗ್ಟನ್ಗೆ ಸ್ಥಳಾಂತರಿಸಿದಾಗ, ಆಗಿನ ಅಧ್ಯಕ್ಷ ಜಾನ್ ಆಡಮ್ಸ್ ಶ್ವೇತಭವನವನ್ನು ಅಧಿಕೃತ ಕಚೇರಿಯನ್ನಾಗಿ ಮಾಡಿಕೊಂಡರು.

ಇದರ ವೆಸ್ಟ್ ವಿಂಗ್ನಲ್ಲಿ ಅಮೆರಿಕ ಅಧ್ಯಕ್ಷರ ಅಧಿಕೃತ ಕಚೇರಿಯಿದೆ. ಈ ಭಾಗದಲ್ಲೇ ಸಂಸತ್ ಸಚಿವರ ಕಚೇರಿಗಳು ಕೂಡ ಇವೆ. ಇದರ ಬ್ಲೂ ರೂಮ್ನಲ್ಲಿ ಅಮೆರಿಕ ಅಧ್ಯಕ್ಷರ ನಿವಾಸವಿದೆ. ಅವರಿಗೆ ಬೇಕಾದ ಎಲ್ಲಾ ಮೂಲಭೂತ ಸೌಕರ್ಯಗಳು ಇಲ್ಲಿ ಲಭ್ಯವಿದೆ.

1901ರಲ್ಲಿ ವೆಸ್ಟ್ ವಿಂಗ್ ಹಾಗೂ ಈಸ್ಟ್ ವಿಂಗ್ ನಿರ್ಮಾಣ ಮಾಡಲಾಗಿತ್ತು.

. ಏನಿದು ಪ್ರಾಜೆಕ್ಟ್ ‘ಬಾಲ್ ರೂಮ್’: ಶ್ವೇತಭವನದ ಈಸ್ಟ್ ವಿಂಗ್ ಅನ್ನು 1902 ರಲ್ಲಿ ಅತಿಥಿ ಪ್ರವೇಶದ್ವಾರವಾಗಿ ನಿರ್ಮಿಸಲಾಯಿತು. ಎರಡನೇ ವಿಶ್ವಯುದ್ಧದ ಸಂದರ್ಭದಲ್ಲಿ ಇದನ್ನು ನವೀಕರಿಸಲಾಯಿತು. ಆಗ ಅಲ್ಲಿ ಭೂಗತ ಬಂಕರ್, ಅಧ್ಯಕ್ಷೀಯ ತುರ್ತು ಕಾರ್ಯಾಚರಣೆ ಕೇಂದ್ರವನ್ನು ನಿರ್ಮಾಣ ಮಾಡಲಾಯಿತು.

ಎರಡನೇ ವಿಶ್ವಯುದ್ಧ ಹಾಗೂ 9/11 ದಾಳಿಯ ಸಂದರ್ಭದಲ್ಲಿ ಆಗಿನ ಅಧ್ಯಕ್ಷ ಹಾಗೂ ಪ್ರಮುಖ ಅಧಿಕಾರಿಗಳು ಈಸ್ಟ್ ವಿಂಗ್ನಲ್ಲಿದ್ದ ಭೂಗತ ಬಂಕರ್ನಲ್ಲಿ ಆಶ್ರಯ ಪಡೆದಿದ್ದರು.

2025ರ ಜುಲೈನಲ್ಲಿ, ಟ್ರಂಪ್ ಆಡಳಿತವು ಶ್ವೇತಭವನದ ಈಸ್ಟ್ ವಿಂಗ್ನಲ್ಲಿ 400 ಮಿಲಿಯನ್ ಯುಎಸ್ ಡಾಲರ್ ಮೊತ್ತದ ಪ್ರಾಜೆಕ್ಟ್ ‘ಬಾಲ್ ರೂಮ್’ ಯೋಜನೆಯನ್ನು ಘೋಷಿಸಿತು. ಅದಕ್ಕಾಗಿ 2025ರ ಅಕ್ಟೋಬರ್ನಲ್ಲಿ ಆ ಭಾಗವನ್ನು ಕೆಡವಲಾಯಿತು.

90 ಸಾವಿರ ಚದರ ಅಡಿ ವಿಸ್ತೀರ್ಣದಲ್ಲಿ ನಿರ್ಮಿಸಲಾಗುತ್ತಿರುವ ಈ ಯೋಜನೆಯನ್ನು 2026ರಲ್ಲಿ ಆರಂಭಿಸಲಾಗಿದೆ. ಈ ಕುರಿತು ಟ್ರಂಪ್, ಆಗಾಗ ಮಾಹಿತಿ ನೀಡುತ್ತಲೇ ಬಂದಿದ್ದಾರೆ. ಇದರಲ್ಲಿ ಭವ್ಯವಾದ ಬಾಲ್ರೂಮ್ ನಿರ್ಮಾಣ ಮಾಡಲಾಗಿದ್ದು, ಅದರ ನೆಲಮಹಡಿಯಲ್ಲಿ ಅತ್ಯಂತ ರಹಸ್ಯ ಭೂಗತ ಮಿಲಿಟರಿ ಸಂಕೀರ್ಣವನ್ನು ಕೂಡ ನಿರ್ಮಿಸಲಾಗುತ್ತಿದೆ.

. ಈ ಭೂಗತ ಸಂಕೀರ್ಣದ ವಿಶೇಷತೆಗಳೇನು.. * ಆಧುನಿಕ ದಾಳಿಗಳಿಂದ ರಕ್ಷಣೆ: ಈ ಹೊಸ ಭೂಗತ ಸಂಕೀರ್ಣವು ಪರಮಾಣು ದಾಳಿ, ರಾಸಾಯನಿಕ/ಜೈವಿಕ ದಾಳಿ ಹಾಗೂ ವಿದ್ಯುತ್ಕಾಂತೀಯ ಹರಿವು ಸೇರಿದಂತೆ ಆಧುನಿಕ ದಾಳಿಗಳಿಂದ ರಕ್ಷಣೆ ಪಡೆಯುವ ಸಾಮರ್ಥ್ಯವನ್ನು ಹೊಂದಿದೆ.

* ಅತ್ಯಂತ ರಹಸ್ಯ ಕೊಠಡಿ: ಇದರಲ್ಲಿ ಅತ್ಯಂತ ರಹಸ್ಯ ಕೊಠಡಿಗಳನ್ನು ನಿರ್ಮಿಸಲಾಗುತ್ತಿದೆ. ಅಧ್ಯಕ್ಷರು, ಸೇನಾಧಿಕಾರಿಗಳು ಹಾಗೂ ಶ್ವೇತಭವನದ ಪ್ರಮುಖ ಅಧಿಕಾರಿಗಳ ರಹಸ್ಯ ಮಾತುಕತೆಗೆ ಅನುಕೂಲವಾಗುವಂತೆ ಇದರ ನಿರ್ಮಾಣ ಕಾರ್ಯ ಮಾಡಲಾಗುತ್ತಿದೆ.

* ವೈಟ್ವೈಸ್ ಮುಖ್ಯ ಕಚೇರಿಯಷ್ಟೇ ದೊಡ್ಡದು: ಈ ಭೂಗತ ಸಂಕೀರ್ಣವು 90 ಸಾವಿರ ಚದರ ಅಡಿ ವಿಸ್ತೀರ್ಣವಿದ್ದು, ಶ್ವೇತಭವನದ ಮುಖ್ಯ ನಿವಾಸದಷ್ಟೇ ದೊಡ್ಡದಾಗಿದೆ. ಇದರಲ್ಲಿ 1,000 ಅತಿಥಿಗಳಿಗೆ ಆಸನ ಸಾಮರ್ಥ್ಯವಿದೆ.

* ಈ ಸಂಕೀರ್ಣದ ಗೋಡೆಗಳನ್ನು ಬುಲೆಟ್ ಫ್ರೂಪ್ ಆಗಿ ನಿರ್ಮಿಸಲಾಗುತ್ತಿದ್ದು, ಇದರ ಚಾವಡಿಯನ್ನು ಡ್ರೋನ್ ದಾಳಿಯನ್ನು ತಡೆದುಕೊಳ್ಳುವ ಸಾಮರ್ಥ್ಯವಿರುವಂತೆ ರಚಿಸಲಾಗುತ್ತಿದೆ.

. 2029ಕ್ಕೂ ಮುನ್ನ ಈ ಭೂಗತ ಸಂಕೀರ್ಣದ ನಿರ್ಮಾಣ ಕಾರ್ಯವು ಪೂರ್ಣಗೊಳ್ಳುವ ನಿರೀಕ್ಷೆಯಿದೆ. ನಿಗದಿತ ಸಮಯಕ್ಕೂ ಮುನ್ನವೇ ಇದು ಪೂರ್ಣಗೊಳ್ಳಲಿದೆ ಎಂದು ಟ್ರಂಪ್ ಇತ್ತೀಚೆಗೆ ಹೇಳಿದ್ದಾರೆ.