ಸೋಮವಾರ, ಸೆಪ್ಟೆಂಬರ್ 21, 2020
22 °C

PV Web Exclusive: ಮಕ್ಕಳು ಅಡುಗೆ ಮಾಡಬಹುದೇ?

ಸುಮಾ ಬಿ. Updated:

ಅಕ್ಷರ ಗಾತ್ರ : | |

Prajavani

ಏಳು ವರ್ಷದ ನೋಯಲ್‌ಗೆ ಮ್ಯಾಗಿ ತಿನ್ನುವ ಬಯಕೆ. ಅಮ್ಮನಲ್ಲಿ ಕೋರಿಕೆ ಇಟ್ಟ. ಮನೆಯ ಹೊರಗೆ ನಲ್ಲಿಯಲ್ಲಿ ನೀರು ತುಂಬಿಸುತ್ತಿದ್ದ ತಾಯಿ ಕೆಲಸ ಮುಗಿದ ಬಳಿಕ ಮಾಡಿಕೊಡುವುದಾಗಿ ಹೇಳಿದಳು. ಆದರೆ, ನೋಯಲ್‌ಗೆ ತಕ್ಷಣಕ್ಕೇ ಮ್ಯಾಗಿ ತಿನ್ನುವ ಆಸೆಯಾಗಿತ್ತು. ಅಡುಗೆ ಕೋಣೆಗೆ ಹೋಗಿ ಲೈಟರ್‌ ಹಿಡಿದು ಗ್ಯಾಸ್‌ ಹಚ್ಚಿಯೇ ಬಿಟ್ಟ. ಬೆಂಕಿ ಧಗ್ಗನೆ ಹೊತ್ತಿಕೊಂಡಿತು. ನೋಯಲ್‌ನ ಕೈಕಾಲು, ಮುಖಕ್ಕೆ ಗಂಭೀರ ಗಾಯಗಳಾದವು. ಸತತ ಏಳು ದಿನ ಜೀವನ್ಮರಣ ಹೋರಾಟ ನಡೆಸಿದ ಪುಟಾಣಿ ಇಹಲೋಕ ತ್ಯಜಿಸಿದ...

ಸರಿಯಾಗಿ ವರ್ಷದ ಹಿಂದೆ ತುಮಕೂರಿನ ಕ್ರಿಶ್ಚಿಯನ್‌ ಸ್ಟ್ರೀಟ್‌ನಲ್ಲಿ ನಡೆದ ಮನಕಲುಕುವ ಘಟನೆ ಇದು. 12 ವರ್ಷದ ಅಣ್ಣ ಟೀ, ಮತ್ತಿತರ ಸಣ್ಣ ಪುಟ್ಟ ಕೆಲಸಕ್ಕೆ ಗ್ಯಾಸ್‌ ಹತ್ತಿಸುತ್ತಿದ್ದುದನ್ನು ಗಮನಿಸುತ್ತಿದ್ದ ನೋಯಲ್‌ ಯಾರ ಸಹಾಯವೂ ಇಲ್ಲದೇ ಲೈಟರ್‌ ಹಿಡಿದು ಗ್ಯಾಸ್‌ ಹತ್ತಿಸಲು ಮುಂದಾಗಿದ್ದ.

ಇದೊಂದು ಘಟನೆ ‘ಮಕ್ಕಳು ಅಡುಗೆ ಮಾಡುವುದು ಸುರಕ್ಷಿತವೇ?’ ಎಂಬ ಪ್ರಶ್ನೆಯನ್ನು ಹುಟ್ಟು ಹಾಕಿದೆ.

ಲಾಕ್‌ಡೌನ್‌ ಸಮಯದಲ್ಲಿ ಬಹುತೇಕ ಮಕ್ಕಳು ಈ ರೀತಿಯ ಪ್ರಯೋಗಕ್ಕೆ ತಮ್ಮನ್ನು ಒಡ್ಡಿಕೊಂಡಿದ್ದಾರೆ. ತಮಗಿಷ್ಟದ ತಿನಿಸು ತಯಾರಿಸಿ ಬೀಗಿದ್ದಾರೆ. ಪೋಷಕರು ಅದರ ವಿಡಿಯೊ ಮಾಡಿ ಫೇಸ್‌ಬುಕ್‌, ಯೂಟ್ಯೂಬ್‌, ಟ್ವಿಟರ್‌, ವಾಟ್ಸ್‌ ಆ್ಯಪ್‌ಗಳಲ್ಲಿ ಹಂಚಿಕೊಂಡಿದ್ದಾರೆ. ಈ ವಿಡಿಯೊಗಳನ್ನು ನೋಡಿದಾಗಲೆಲ್ಲ ನೋಯಲ್‌ ನೆನಪಾಗುತ್ತಾನೆ.

ಮಕ್ಕಳು ಅಡುಗೆ ಮಾಡುವುದೂ ಕಲಿಕೆಯ ಒಂದು ಭಾಗವೇ. ಚಿಕ್ಕವರಿದ್ದಾಗಿನಿಂದಲೇ ಅಡುಗೆ ಸಾಮಗ್ರಿ, ಪದಾರ್ಥಗಳ ಪರಿಚಯ ಮಕ್ಕಳಿಗಾಗುತ್ತದೆ. ಸೇವಿಸುವ ಆಹಾರದ ಬಗ್ಗೆ ಅರಿವು ಮೂಡುತ್ತದೆ. ಜಂಕ್‌ ಫುಡ್‌ಗಳ ದಾಸರಾಗುವುದನ್ನು ತಪ್ಪಿಸುತ್ತದೆ. ಮನೆ ಅಡುಗೆಯ ಬಗ್ಗೆ ಆತ್ಮವಿಶ್ವಾಸ ವೃದ್ಧಿಯಾಗುತ್ತದೆ. ತಿನಿಸಿನ ವಿಚಾರದಲ್ಲಿ ಸ್ವಯಂ ಮಾರ್ಗದರ್ಶನ, ಸ್ವಾವಲಂಬನೆ ಬೆಳೆಯುತ್ತದೆ. ಇತರ ವಿಷಯಗಳ ಸಮಸ್ಯೆ ನಿವಾರಣೆಯ ಚಾಕಚಕ್ಯತೆಯೂ ಬೆಳೆಯುತ್ತದೆ.

ತರಕಾರಿ ಕತ್ತರಿಸುವಾಗ, ಪದಾರ್ಥಗಳನ್ನು ಬೆರೆಸುವಾಗ, ಹಿಟ್ಟು ಕಲೆಸುವಾಗ ಕಣ್ಣು ಮತ್ತು ಕೈಗಳ ಹೊಂದಾಣಿಕೆಯ ಕೌಶಲ ವೃದ್ಧಿಯಾಗುತ್ತದೆ. ಮಕ್ಕಳ ಚಿಂತನಾ ಶಕ್ತಿ ಬೆಳವಣಿಗೆಗೆ, ಕ್ರಿಯಾಶೀಲತೆ ವೃದ್ಧಿಗೆ ಅಡುಗೆ ಸಹಕಾರಿಯಾಗುತ್ತದೆ. ಎಲ್ಲಕ್ಕಿಂತ ಮುಖ್ಯವಾಗಿ ಪೋಷಕರು ಮತ್ತು ಮಕ್ಕಳ ನಡುವಿನ ಬಾಂಧವ್ಯ ಗಟ್ಟಿಗೊಳ್ಳುತ್ತದೆ ಎನ್ನುತ್ತಾರೆ ಮಕ್ಕಳ ಮನೋ ವೈದ್ಯರು.

ಮಕ್ಕಳ ಪ್ರಯೋಗಶೀಲತೆಗೂ ಅಡುಗೆ ಮನೆ ವೇದಿಕೆ ಒದಗಿಸುತ್ತದೆ. ಇಷ್ಟದ ಪದಾರ್ಥಗಳನ್ನು ಬಳಸಿಕೊಂಡು ಹೊಸದೊಂದು ರೆಸಿಪಿ ತಯಾರಿಸಬಹುದು. ತಿನಿಸು ತಯಾರಿಸುವಾಗ ಅದು ರುಚಿಕಟ್ಟಾಗಿ ಬರದಿದ್ದರೆ ಮತ್ತೊಂದು ಪದಾರ್ಥ ಸೇರಿಸಿ ಇನ್ನೊಂದು ರೆಸಿಪಿ ಸಂಶೋಧನೆಗೆ ನಾಂದಿ ಹಾಡಬಹುದು. ಪ್ರತಿದಿನ ತರಗತಿ, ಪಾಠ, ಹೋಮ್‌ವರ್ಕ್‌ನಲ್ಲಿ ಮುಳುಗುವ ಮಕ್ಕಳು ಅದರಿಂದ ಹೊರಬಂದು ಅಡುಗೆ ಕಾರ್ಯದಲ್ಲಿ ತೊಡಗಿಕೊಂಡರೆ ಹೊಸ ಚೈತನ್ಯ ಬರುತ್ತದೆ ಎನ್ನುವ ಮನೋ ವೈದ್ಯರು, ಇದೆಲ್ಲವೂ ಪೋಷಕರ ನಿಗಾದಲ್ಲೇ ನಡೆಯಬೇಕು ಎಂದು ಗಟ್ಟಿಯಾಗಿ ಹೇಳುತ್ತಾರೆ.

ಎಷ್ಟನೇ ವಯಸ್ಸಿಗೆ ಅಡುಗೆ ಮಾಡಬಹದು?

ಪೋಷಕರಿಗೆ ಸಣ್ಣ ಪುಟ್ಟ ಕೆಲಸಗಳಲ್ಲಿ ಸಹಾಯ ಮಾಡುವುದು, ತರಕಾರಿ ತೊಳೆದುಕೊಡುವುದು, ಚಪಾತಿ ಲಟ್ಟಿಸುವುದು, ಮನೆಯ ಸದಸ್ಯರಿಗೆ ಊಟ ಬಡಿಸುವುದು, ಪಾತ್ರೆ ತೊಳೆಯುವುದು ಈ ಎಲ್ಲ ಪ್ರಕ್ರಿಯಗಳೂ ಕುಟುಂಬದ ಸದಸ್ಯರು ಮತ್ತು ಮಕ್ಕಳ ನಡುವೆ ಆರೋಗ್ಯಕರ ಬಾಂಧವ್ಯ ಬೆಳೆಸುತ್ತದೆ. ಆದರೆ, ಗ್ಯಾಸ್‌ ಹತ್ತಿಸುವುದು, ತರಕಾರಿ ಕತ್ತರಿವುದು ಒಳ್ಳೆಯದಲ್ಲ.

‘ತಾಯಿ ತರಕಾರಿ ಕತ್ತರಿಸುವುದನ್ನು ಮಗು ನೋಡಿರುತ್ತದೆ. ಆದರೆ ಚಾಕುವನ್ನು ಹೇಗೆ ನಿಭಾಯಿಸಬೇಕು, ಹೇಗೆ ಹಿಡಿದುಕೊಳ್ಳಬೇಕು ಎಂಬ ಬುದ್ಧಿಮತ್ತೆ ಇನ್ನೂ ವೃದ್ಧಿಯಾಗಿರುವುದಿಲ್ಲ. ತರಕಾರಿ ಕತ್ತರಿಸುವಾಗ ಬೆರಳಿಗೆ ಚಾಕು ತಾಗಿ ಸಣ್ಣ, ಪುಟ್ಟ ಅವಘಡ ಸಂಭವಿಸುವ ಸಾಧ್ಯತೆ ಹೆಚ್ಚು. ಹಾಗೆಯೇ ಲೈಟರ್‌ ಹಿಡಿದು ಗ್ಯಾಸ್‌ ಹೊತ್ತಿಸುವುದನ್ನು ಗಮನಿಸುವ ಮಗು, ಅಜಾಗರೂಕತೆಯ ಬಳಕೆಯಿಂದ ಆಗುವ ಪರಿಣಾಮವನ್ನು ನೋಡಿರುವುದಿಲ್ಲ. ಪೋಷಕರು ಆ ಬಗೆಯ ಜ್ಞಾನವನ್ನು ಮಕ್ಕಳಿಗೆ ನೀಡಬೇಕು’ ಎನ್ನುತ್ತಾರೆ ಮನೋವೈದ್ಯೆ ಡಾ.ಕೆ.ಎಸ್‌.ಪವಿತ್ರಾ.

‘ನೋಯಲ್‌ ಕೂಡ ಮ್ಯಾಗಿ ಮಾಡಿ ತಿನ್ನಬೇಕು ಎಂದು ಆ ಕ್ಷಣಕ್ಕೆ ಯೋಚಿಸಿದನೇ ಹೊರತು, ಮ್ಯಾಗಿ ಮಾಡುವಾಗ ಅವಘಡ ಸಂಭವಿಸಿದರೆ ತನಗೆ ಏನಾಗಬಹುದು ಎಂದು ಆಲೋಚಿಸಲಿಲ್ಲ. ಏಳು ವರ್ಷಕ್ಕೆ ಆ ರೀತಿಯ ಆಲೋಚನೆಯನ್ನು ಮಕ್ಕಳಿಂದ ನಿರೀಕ್ಷೆ ಮಾಡಲೂ ಆಗುವುದಿಲ್ಲ. 9ರಿಂದ 10 ವರ್ಷ ಮೇಲ್ಪಟ್ಟ ಮಕ್ಕಳು ಅಡುಗೆ ತಯಾರಿಯಲ್ಲಿ ತೊಡಗಬಹದು. 14– 15 ವರ್ಷದ ಮಕ್ಕಳು ಯಾರ ಸಹಾಯವೂ ಇಲ್ಲದೆ ಅಡುಗೆ ಮಾಡಬಹುದು. ಆದರೆ, ಅವರಿಗೆ ಧನಾತ್ಮಕ, ಋಣಾತ್ಮಕ ಅಂಶಗಳು ಗೊತ್ತಿರಬೇಕು’ ಎನ್ನುವುದು ಪವಿತ್ರಾ ಸಲಹೆ.

ಜಾಲತಾಣಕ್ಕೆ ಸೀಮಿತ ಆಗಬೇಡಿ

ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೊ, ಫೊಟೊ ಹಂಚಿಕೊಳ್ಳಲಷ್ಟೇ ಮಕ್ಕಳು ಅಡುಗೆ ತಯಾರಿಯಲ್ಲಿ ತೊಡಗಿದರೆ ಪ್ರಯೋಜನವಿಲ್ಲ. ಅದು ಸಮಾಜಕ್ಕೆ ತಪ್ಪು ಸಂದೇಶ ಕೊಡುವ ಅಪಾಯವೂ ಇದೆ. ವಿಡಿಯೊ ಮಾಡಿ ಆದ ಬಳಿಕ ಪಾತ್ರೆ ತೊಳೆಯುವುದು, ಶೆಲ್ಫ್‌ ಸ್ವಚ್ಛಗೊಳಿಸುವುದನ್ನೂ ಮಕ್ಕಳು ಮಾಡಬೇಕು. ಅಡುಗೆ ಅಂದರೆ ಅನೇಕ ಹಂತಗಳನ್ನು ಒಳಗೊಂಡಿದೆ. ತರಕಾರಿ ಹೆಚ್ಚುವುದರಿಂದ ಹಿಡಿದು ಅಡುಗೆ ಆದ ಬಳಿಕ ಕೋಣೆ ಸ್ವಚ್ಛಗೊಳಿಸುವವರೆಗೆ ಪ್ರಕ್ರಿಯೆ ಮುಂದುವರಿಯುತ್ತದೆ. ಈ ಎಲ್ಲ ಹಂತಗಳಲ್ಲೂ ಮಕ್ಕಳು ಸಕ್ರಿಯವಾಗಿ ತೊಡಗಿಕೊಳ್ಳಬೇಕು. ಆ ರೀತಿ ಒಳಗೊಳ್ಳುವಂತೆ ಪೋಷಕರು ಮಾಡಬೇಕು ಎಂದು ಪ್ರತಿಪಾದಿಸುತ್ತಾರೆ ಪವಿತ್ರಾ.

ಫೇಸ್‌ಬುಕ್‌, ಯೂಟ್ಯೂಬ್‌ನಲ್ಲಿ ಬರುವ ಸಂದೇಶಗಳು ಕೇವಲ ಒಂದು ಮುಖವನ್ನು ಮಾತ್ರ ಬಿಂಬಿಸಿರುತ್ತವೆ ಎಂಬುದನ್ನು ಮಕ್ಕಳು, ಪೋಷಕರು ಅರಿಯಬೇಕು. ಮಗು ಚಾಕು ಕೈಯಲ್ಲಿ ಹಿಡಿದಿದೆ ಎಂದರೆ ಕೇವಲ ಕೈಗೆ ಮಾತ್ರ ಸಂಬಂಧಪಟ್ಟಿದ್ದಲ್ಲ. ಅದು ಮಿದುಳಿಗೂ ಸಂಬಂಧಿಸಿರುತ್ತದೆ. ಗ್ಯಾಸ್‌ ಬಳಕೆ, ಮಿಕ್ಸಿ, ಚಾಕು ಬಳಕೆಯ ಬಗ್ಗೆ ಮಕ್ಕಳಲ್ಲಿ ಮುಂಚಿತವಾಗೇ ಜಾಗೃತಿ ಮೂಡಿಸಿರಬೇಕು. ಮಕ್ಕಳು ಅಡುಗೆಯಲ್ಲಿ ಸಹಾಯ ಮಾಡುವುದು ಬೇರೆ. ಸ್ವತಃ ಅಡುಗೆ ಮಾಡುವುದಕ್ಕೆ ಸಾಕಷ್ಟು ತಯಾರಿ, ತರಬೇತಿ ಅಗತ್ಯವಿದೆ.

ಗಂಡುಮಕ್ಕಳಿಗೇಕೆ ಅಡುಗೆ ಪಾಠವಿಲ್ಲ?

ಸಾಮಾನ್ಯವಾಗಿ ಅಡುಗೆ ಕಲಿಕೆ ಪ್ರಕ್ರಿಯೆ ಏನಿದ್ದರೂ ಹೆಣ್ಣುಮಕ್ಕಳಿಗೆ ಮಾತ್ರವೇ ಎನ್ನುವ ಭಾವವೂ ಪೋಷಕರಲ್ಲಿ ಢಾಳವಾಗೇ ಬೇರೂರಿದೆ. ಇದು ಮಕ್ಕಳಲ್ಲಿ ಲಿಂಗ ತಾರತಮ್ಯವನ್ನು ಸದ್ದಿಲ್ಲದೆ ಹುಟ್ಟುಹಾಕುತ್ತದೆ ಎಂಬುದು ನಿಸಂಶಯ. ಕೆಲ ಮನೆಯಲ್ಲಿ ಗಂಡು ಮಕ್ಕಳು ಅಡುಗೆ ಮಾಡುತ್ತಿದ್ದಾರೆ ಎಂದರೆ ಅವರನ್ನು ಓರೆಗಣ್ಣಿನಿಂದ ನೋಡುವವರೇ ಹೆಚ್ಚು. ಆದರೆ, ಅಡುಗೆ ಕಲಿಕೆ ಪ್ರಕ್ರಿಯೆಯಲ್ಲಿ ಹೆಣ್ಣು– ಗಂಡು ಇಬ್ಬರನ್ನೂ ತೊಡಗಿಸಿಕೊಳ್ಳಬೇಕು.

ಅಡುಗೆ ಕಲಿಕೆ ಪ್ರತಿಯೊಬ್ಬರಲ್ಲೂ ಸ್ವಾವಲಂಬನೆ ಬೆಳೆಸುವುದರಿಂದ ಗಂಡುಮಕ್ಕಳಿಗೂ ಈ ಶಿಕ್ಷಣ ಅತಿ ಅಗತ್ಯ. ಉನ್ನತ ವ್ಯಾಸಂಗ, ಉದ್ಯೋಗಕ್ಕಾಗಿ ಬೇರೆಡೆ ಹೋಗಬೇಕಾದ ಅನಿವಾರ್ಯತೆ ಎದುರಾದಾಗ ಮೊದಲು ಎದುರಾಗುವುದು ಊಟದ ಸಮಸ್ಯೆ. ಮನೆಯಲ್ಲೇ ಆ ಬಗೆಯ ಶಿಕ್ಷಣ ಲಭಿಸಿದ್ದರೆ ಅದೊಂದು ಸಮಸ್ಯೆಯಾಗಿ ಪರಿಣಮಿಸುವುದಿಲ್ಲ.

ಅಡುಗೆ ಕಲಿಕೆಯಲ್ಲಿ ಪೋಷಕರು ಅನುಸರಿಸಬೇಕಾದ ಸುರಕ್ಷತಾ ಕ್ರಮಗಳು

* ಮಕ್ಕಳು ಅಡುಗೆ ಮಾಡುವಾಗ ಪೋಷಕರ ನಿಗಾ ಕಡ್ಡಾಯ

* ಹಣ್ಣು, ತರಕಾರಿ ಕತ್ತರಿಸುವಾಗ ಪೇಪರ್‌ ಕಟರ್‌ ಬಳಕೆ ಇರಲಿ, ಚಾಕು ಬಳಕೆ ಬೇಡ

* ಗ್ಯಾಸ್‌, ಎಲೆಕ್ಟ್ರಾನಿಕ್‌ ಸ್ಟವ್‌, ಮಿಕ್ಸಿ, ಚಾಕುಗಳಿಂದ ಆಗುವ ಅಪಾಯದ ಬಗ್ಗೆ ಅರಿವು ಮೂಡಿಸಿ

*14ರಿಂದ 15 ವರ್ಷದವರೆಗೆ ಗ್ಯಾಸ್‌, ಮಿಕ್ಸಿಯನ್ನು ಸ್ವಂತ ಬಳಕೆಗೆ ಬಿಡಬಾರದು

* ಚಿಕ್ಕ ಮಕ್ಕಳನ್ನು ಸಾಲಡ್‌ ತಯಾರಿ, ತರಕಾರಿ ಸಿಪ್ಪೆ ಸುಲಿದುಕೊಡುವುದು ಈ ರೀತಿಯ ಸಹಾಯದಲ್ಲಿ ಬಳಸಿಕೊಳ್ಳಿ

* ಪೋಷಕರು ಎದುರಿಗೆ ಇದ್ದಾಗ ಮಾತ್ರ ತರಕಾರಿ ಕತ್ತರಿಸಿ ಎಂದು ಮಕ್ಕಳಿಗೆ ತಿಳಿ ಹೇಳಿ

* ಫೇಸ್‌ಬುಕ್‌, ಯೂಟ್ಯೂಬ್‌ ನೋಡಿ ಅಡುಗೆ ತಯಾರಿಗೆ ಪ್ರೋತ್ಸಾಹಿಸಬೇಡಿ

* ಸೂಕ್ತ ತರಬೇತಿ ನಂತರವೇ ಅಡುಗೆ ಪ್ರಕ್ರಿಯೆಯಲ್ಲಿ ತೊಡಗಿಸಿಕೊಳ್ಳಿ

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು