ವಿಶ್ಲೇಷಣೆ: ಆರೋಗ್ಯಭಾಗ್ಯಕ್ಕೆ ‘ಎಐ’ ಆಪ್ತಮಿತ್ರ!

ಆರೋಗ್ಯದ ಸಮಸ್ಯೆಗಳನ್ನು ಅರ್ಥ ಮಾಡಿಕೊಳ್ಳಲು ಜನಸಾಮಾನ್ಯರ ಪಾಲಿಗೆ ಕೃತಕ ಬುದ್ಧಿಮತ್ತೆ ಆಪ್ತಮಿತ್ರನಂತೆ ಒದಗಿಬರುತ್ತದೆ. ಕೆಲವು ಸಂದರ್ಭಗಳಲ್ಲಿ ‘ಎಐ’ ವೈದ್ಯರಿಗೂ ಉಪಯುಕ್ತ. ‘ಸೆಕೆಂಡ್ ಒಪಿನಿಯನ್’ ರೀತಿ ವೈದ್ಯರು ಹಾಗೂ ರೋಗಿಗಳು ಬಳಸಬಹುದಾದ ‘ಎಐ’ ಆರೋಗ್ಯಕ್ಷೇತ್ರದಲ್ಲಿನ ತಜ್ಞರ ಒತ್ತಡವನ್ನು ಹಗುರಗೊಳಿಸಬಲ್ಲದು. . ಪ್ರೌ ಢಶಾಲೆಯಲ್ಲಿ ಓದುತ್ತಿದ್ದ ಆ ಬಾಲಕ ತುಂಬಾ ಚುರುಕಾಗಿದ್ದವನು. ಆಟೋಟಗಳಲ್ಲಂತೂ ಸದಾ ಮುಂದು. ಇದ್ದಕ್ಕಿದ್ದಂತೆ ಅವನಿಗೆ ವಿಪರೀತ ಸುಸ್ತು, ನಿಶ್ಶಕ್ತಿ. ತೂಕವೂ ಕಡಿಮೆ ಆದಾಗ ಹೆತ್ತವರು ಆತಂಕದಿಂದ ಹತ್ತಿರದ ವೈದ್ಯರಿಗೆ ತೋರಿಸಿದ್ದರು. ಮುಂದಿನದು, ಹೊಸ ಭರವಸೆಯನ್ನು ಹುಡುಕುತ್ತ ಆಸ್ಪತ್ರೆಯಿಂದ ಆಸ್ಪತ್ರೆಗೆ ಅಲೆಯುವ ಸ್ಥಿತಿ.

. ಹಲವು ಪರೀಕ್ಷೆಗಳಾದರೂ ಸಮಸ್ಯೆ ಏನೆಂದು ಪತ್ತೆಯಾಗಲಿಲ್ಲ. ಔಷಧೋಪಚಾರದ ನಂತರವೂ ದೇಹಸ್ಥಿತಿಯಲ್ಲಿ ಸುಧಾರಣೆಯಾಗಲಿಲ್ಲ. ಆಟವಾಡುವುದು ಹೋಗಲಿ, ಸ್ಕೂಲ್ಬ್ಯಾಗ್ ಹೊತ್ತುಕೊಂಡು ಸ್ವಲ್ಪ ದೂರ ಹೆಜ್ಜೆ ಹಾಕುವುದೂ ಆ ಹುಡುಗನಿಗೆ ಕಷ್ಟವಾಗುತ್ತಿತ್ತು. ನಂತರದಲ್ಲಿ ಪಟ್ಟಣದ ದೊಡ್ಡ ಆಸ್ಪತ್ರೆಯಲ್ಲಿ ತಜ್ಞ ವೈದ್ಯರಿಂದ ಚಿಕಿತ್ಸೆ ಮುಂದುವರಿಯಿತು. ಆರ್ಥಿಕ ಸ್ಥಿತಿ ಅಷ್ಟೇನೂ ಉತ್ತಮವಿಲ್ಲದಿದ್ದರೂ ಆ ಕುಟುಂಬ ವೈದ್ಯರು ಶಿಫಾರಸು ಮಾಡಿದ ಎಲ್ಲಾ ತಪಾಸಣೆ ಮಾಡಿಸಿದರು. ರಕ್ತದಲ್ಲಿ ಸೋಡಿಯಂ ಅಂಶ ಇಳಿಕೆಯಾಗುತ್ತಿದ್ದರಿಂದ ಮೂತ್ರಪಿಂಡಗಳ ತೊಂದರೆಯೆಂದು ಚಿಕಿತ್ಸೆ ನಡೆಯಿತು. ಉಪ್ಪನ್ನು ಹೆಚ್ಚು ಸೇವಿಸುವಂತೆ ನಿರ್ದೇಶನ ಸಿಕ್ಕಿತು. ತಜ್ಞ ವೈದ್ಯರ ಸಲಹೆಯನ್ನು ಚಾಚೂ ತಪ್ಪದೆ ಪಾಲಿಸಿದರೂ, ಬಾಲಕನ ಪರಿಸ್ಥಿತಿ ಸುಧಾರಿಸಲಿಲ್ಲ. ತರಗತಿಯಲ್ಲಿ ಕುಳಿತು ಪಾಠ ಕೇಳುವುದೂ ಕಷ್ಟವಾಯಿತು. ಈ ಮಧ್ಯೆ ಮುಖವೂ ಸೇರಿದಂತೆ ಮೈಚರ್ಮ ಕಪ್ಪಾಗತೊಡಗಿತ್ತು. ‘ಬಿಸಿಲ ಶಾಖಕ್ಕೆ ಹೀಗಾಗುತ್ತಿದೆ’ ಎಂಬುದು ವೈದ್ಯರ ಸಮಜಾಯಿಷಿ.

. ಸುಮಾರು ಆರು ತಿಂಗಳು ವೈದ್ಯರ ಭೇಟಿ, ಸಲಹೆ, ಚಿಕಿತ್ಸೆ ಮುಂದುವರಿದರೂ ಸಮಸ್ಯೆ ಬಗೆಹರಿಯಲಿಲ್ಲ. ಹುಡುಗನ ಯಾತನೆ, ಹೆತ್ತವರ ಸಂಕಟವೂ ಮುಂದುವರಿಯಿತು. ಕೃತಕ ಬುದ್ಧಿಮತ್ತೆ (ಎಐ) ಈ ವಿಚಾರದಲ್ಲಿ ಮಾರ್ಗದರ್ಶನ ಮಾಡಬಹುದಾ? ಯೋಚನೆ ಮನದೊಳಗೆ ಮೂಡುತ್ತಿದ್ದಂತೆಯೇ ಪ್ರಯತ್ನಿಸಲು ನಿರ್ಧರಿಸಿದೆ.

. ಆ ಬಾಲಕನ ವಯಸ್ಸು, ರೋಗಲಕ್ಷಣಗಳು, ವಿವಿಧ ಪರೀಕ್ಷೆಗಳ ಫಲಿತಾಂಶಗಳನ್ನು ‘ಎಐ’ ತಂತ್ರಾಂಶದಲ್ಲಿ ದಾಖಲಿಸಿದೆ. ಕೆಲವೇ ಕ್ಷಣಗಳಲ್ಲಿ ಕೃತಕ ಬುದ್ಧಿಮತ್ತೆ ಬಾಲಕನನ್ನು ಕಾಡಿಸುತ್ತಿದ್ದ ಕಾಯಿಲೆಯನ್ನು ಊಹಿಸಿತ್ತು! ‘ಅಡಿಸನ್ಸ್ ಕಾಯಿಲೆ’ ಎಂಬ ವಿರಳ ಸಮಸ್ಯೆಯದು. ಈ ವ್ಯಾಧಿಯಲ್ಲಿ ವಸಡುಗಳೂ ಕಪ್ಪಾಗುತ್ತವೆ ಎಂದು ಎಐ ಮಾಹಿತಿ ನೀಡಿತು. ಬಾಲಕನ ಬಾಯಿ ತೆರೆಸಿ ನೋಡಿದರೆ ವಸಡು, ನಾಲಿಗೆಯೂ ಚರ್ಮದಂತೆ ಕಪ್ಪಾಗಿತ್ತು. ರಸದೂತಗಳ ಮಟ್ಟ ಅಳೆಯುವ ರಕ್ತಪರೀಕ್ಷೆಯಿಂದ ಇದೇ ಕಾಯಿಲೆಯೆಂದು ಖಚಿತವಾಯಿತು.

. ಮೂತ್ರಪಿಂಡಗಳ ಮೇಲೆ ಟೊಪ್ಪಿಯಂತಿರುವ ಪುಟ್ಟ ಅಡ್ರಿನಲ್ ಗ್ರಂಥಿಗಳ ನಿಷ್ಕ್ರಿಯತೆಯಿಂದ ಬರುವ ಅತಿ ಅಪರೂಪದ ವ್ಯಾಧಿಯಿದು. ಒತ್ತಡವನ್ನು ನಿರ್ವಹಿಸುವ ಮತ್ತು ದೇಹದಲ್ಲಿ ಸೋಡಿಯಂ, ನೀರಿನ ಸಮತೋಲನ ಕಾಯ್ದುಕೊಳ್ಳುವ ಹಾರ್ಮೋನ್ಗಳು ಈ ಗ್ರಂಥಿಯ ಹೊರಮೈಯಿಂದ ಸ್ರವಿಸಲ್ಪಡುತ್ತವೆ. ಈ ರಸದೂತಗಳ ಕೊರತೆಯೇ ಅಡಿಸನ್ಸ್ ಕಾಯಿಲೆಗೆ ಕಾರಣ. ಬಾಧಿತರು ಜೀವನಪರ್ಯಂತ ಔಷಧ ಸೇವಿಸಬೇಕಾಗುತ್ತದೆ. ವರದಿಯನ್ನು ತಜ್ಞವೈದ್ಯರ ಗಮನಕ್ಕೆ ತಂದಾಗ ಮತ್ತಷ್ಟು ಪೂರಕ ಪರೀಕ್ಷೆಗಳ ನಂತರ ಮದ್ದು ನೀಡಿದರು. ದುರದೃಷ್ಟವಶಾತ್ ಅವರು ನೀಡಿದ ಔಷಧದ ಪ್ರಮಾಣ ಅಗತ್ಯಕ್ಕಿಂತಲೂ ತುಂಬಾ ಹೆಚ್ಚಾಗಿತ್ತು. ದೀರ್ಘಾವಧಿಯಲ್ಲಿ ಇದರಿಂದ ಗಂಭೀರ ಅಡ್ಡ ಪರಿಣಾಮಗಳ ಸಾಧ್ಯತೆಯಿತ್ತು. ಈ ಮಾಹಿತಿಯನ್ನು ಕೊಟ್ಟಿದ್ದೂ ಕೃತಕ ಬುದ್ಧಿಮತ್ತೆಯೇ! ವಿಷಯವನ್ನು ಅವರೊಂದಿಗೆ ಪುನಃ ಚರ್ಚಿಸ ಬೇಕಾಯ್ತು. ಕೊನೆಗೂ ಅಗತ್ಯ ಪ್ರಮಾಣದಲ್ಲಿ ಮಾತ್ರೆಗಳನ್ನು ತೆಗೆದುಕೊಳ್ಳುತ್ತಾ ಬಂದಿದ್ದರಿಂದ ಬಾಲಕ ಬೇಗನೆ ಚೇತರಿಸಿಕೊಂಡು ಈಗ ಮೊದಲಿನಂತೆ ಚುರುಕಾಗಿದ್ದಾನೆ.

. ಇದು ಆರೋಗ್ಯ ಕ್ಷೇತ್ರದಲ್ಲಿ ಎಐನಿಂದ ಆಗುವ ಪ್ರಯೋಜನದ ಒಂದು ನಿದರ್ಶನವಷ್ಟೆ. ಎಐ ಆಧಾರಿತ ಹಲವು ಸಾಧನಗಳ ಕಾರಣ ರೋಗ ತಪಾಸಣೆ, ರೋಗ ನಿರ್ಣಯ, ಚಿಕಿತ್ಸೆಗೆ ಹೆಚ್ಚು ವಿಶ್ವಾಸಾರ್ಹತೆ ದೊರೆತಿದೆ. ಸರಿಯಾದ ಚಿಕಿತ್ಸೆ ನೀಡಲು ಸರಿಯಾದ ಸಮಯಕ್ಕೆ ರೋಗ ನಿರ್ಣಯ ಅತ್ಯಂತ ಮುಖ್ಯ. ಸಾಮಾನ್ಯ ಕಾಯಿಲೆಗಳನ್ನು ತಮ್ಮ ಅನುಭವದಿಂದಲೇ ಗುರುತಿಸುವ ವೈದ್ಯರು ಪೂರಕ ಪ್ರಯೋಗಾಲಯದ ಪರೀಕ್ಷೆಗಳಿಂದ ಖಚಿತಪಡಿಸಿಕೊಂಡು ನಿರ್ದಿಷ್ಟ ಚಿಕಿತ್ಸೆ ನೀಡುತ್ತಾರೆ. ಸಮಸ್ಯೆಯಿರುವುದು ಹೊಸತಾದ, ಅಪರೂಪದ ಇಲ್ಲವೇ ವಿರಳ ಕಾಯಿಲೆಗಳನ್ನು ಗುರ್ತಿಸುವಲ್ಲಿ, ಜೊತೆಗೆ ಸಾಮಾನ್ಯ ಸಮಸ್ಯೆಗಳಿಗೆ ಹೊಸ ಪರಿಣಾಮಕಾರಿ ಚಿಕಿತ್ಸಾ ಪದ್ಧತಿಗಳನ್ನು ಅಳವಡಿಸಿಕೊಳ್ಳುವಲ್ಲಿ. ಈ ಸಂದರ್ಭದಲ್ಲಿ ವೈದ್ಯರ ನೆರವಿಗೆ ಆಪದ್ಬಾಂಧವನಂತೆ ಎಐ ಒದಗಿಬರುತ್ತದೆ.

. ಕೃತಕ ಬುದ್ಧಿಮತ್ತೆ ಎನ್ನುವುದು ವೈದ್ಯರಿಗೆ, ಅವರ ಜ್ಞಾನಕ್ಕೆ ಪರ್ಯಾಯವಲ್ಲ. ಬದಲಿಗೆ ವೈದ್ಯಕೀಯ ವೃತ್ತಿನಿರತರ ಸಾಮರ್ಥ್ಯ, ಕೌಶಲ ಹೆಚ್ಚಿಸುವ ಸಾಧನವಿದು. ಲಕ್ಷಾಂತರ ವೈದ್ಯಕೀಯ ಲೇಖನಗಳು, ದಾಖಲೆಗಳು, ರೋಗಿಗಳ ಹಳೆಯ ದತ್ತಾಂಶಗಳು, ಸಂಶೋಧನೆಗಳ ಫಲಿತಾಂಶಗಳನ್ನು ಕೆಲವೇ ಸೆಕೆಂಡ್ಗಳಲ್ಲಿ ವಿಶ್ಲೇಷಿಸಿ ರೋಗ ನಿರ್ಣಯಕ್ಕೆ ಅಗತ್ಯ ಇರುವ ಸಂಭವನೀಯ ಸಲಹೆಗಳನ್ನು ನೀಡುವ ‘ಡಿಜಿಟಲ್ ಕಣ್ಣು’ ರೂಪದಲ್ಲಿ ಇದು ಕೆಲಸ ಮಾಡುತ್ತದೆ. ಹಾಗೆಂದು, ಎಐ ಮೂಲಕ ಸಿಗುವ ಮಾಹಿತಿಗಳು, ಸಲಹೆಗಳನ್ನು ಕಣ್ಣುಮುಚ್ಚಿ ಸ್ವೀಕರಿಸುವುದು ಅಪಾಯಕಾರಿ. ಎಐ ಅಭಿಪ್ರಾಯವನ್ನು ಸುಳಿವಿನ ರೂಪದಲ್ಲಿ ತೆಗೆದುಕೊಂಡು, ಸರಿಯಾಗಿ ವಿಶ್ಲೇಷಿಸಿ ಅಂತಿಮ ನಿರ್ಧಾರ ತೆಗೆದುಕೊಳ್ಳಬೇಕಾದುದು ವೈದ್ಯರೇ. ತಜ್ಞ ವೈದ್ಯರು ತೆಗೆದುಕೊಳ್ಳಬೇಕಾದ ನಿರ್ಧಾರಗಳನ್ನು ಜನಸಾಮಾನ್ಯರು ತೆಗೆದುಕೊಳ್ಳುವುದು ಅಪಾಯಕರ. ರೋಗದ ಬಗೆಗಿನ ತಿಳಿವಳಿಕೆಯನ್ನು ಹೆಚ್ಚಿಸಿಕೊಳ್ಳುವುದಕ್ಕೆ ಹಾಗೂ ಸಮಸ್ಯೆಯ ಕುರಿತ ಗೊಂದಲಗಳನ್ನು ಬಗೆಹರಿಸಿಕೊಳ್ಳಲಿಕ್ಕೆ ಎಐ ಬಳಸಬಹುದಷ್ಟೇ.

. ಕೃತಕ ಬುದ್ಧಿಮತ್ತೆ ವೈದ್ಯರಿಗಷ್ಟೇ ಅಲ್ಲ, ಸರಿಯಾಗಿ ಬಳಸಿಕೊಳ್ಳುವ ರೋಗಿಗಳಿಗೂ ‘ಸೆಕೆಂಡ್ ಒಪಿನಿಯನ್’ (ಎರಡನೇ ಅಭಿಪ್ರಾಯ) ರೀತಿಯಲ್ಲಿ ಕೆಲಸ ಮಾಡುತ್ತದೆ. ದಿನದಿಂದ ದಿನಕ್ಕೆ ಬದಲಾಗುತ್ತಿರುವ ವೈದ್ಯಕೀಯ ಕ್ಷೇತ್ರದಲ್ಲಿ ಎಲ್ಲಾ ಸಂಶೋಧನೆಗಳ ಮಾಹಿತಿ ಇರುವುದಿಲ್ಲ. ಹಲವು ವಿಷಯಗಳನ್ನು ಮಾನವನ ಮಿತಿಯ ಕಾರಣ ನೆನಪಿಟ್ಟುಕೊಳ್ಳುವುದು ಕಷ್ಟ. ಸಂಕೀರ್ಣ ಸಮಸ್ಯೆಗಳಿದ್ದಾಗ, ಶೀಘ್ರ ರೋಗ ನಿರ್ಣಯ ಸಾಧ್ಯವಾಗದೆ ಹೋದಾಗ ರೋಗಿಯ ಯಾತನೆಯಷ್ಟೇ ಅಲ್ಲ, ವೈದ್ಯರ ಮೇಲಿನ ಒತ್ತಡವೂ ಹೆಚ್ಚುತ್ತದೆ. ಎಐ ಸಾಧನವನ್ನು ಸರಿಯಾಗಿ ಬಳಸಿಕೊಂಡಾಗ, ಮಾಹಿತಿಗಾಗಿ ಹುಡುಕಾಡುವ ಕಷ್ಟ ತಪ್ಪುವುದಲ್ಲದೆ, ಕೆಲಸದ ಹೊರೆಯೂ ಇಳಿಯುತ್ತದೆ. ಸಮಯದ ಉಳಿತಾಯವೂ ಆಗುತ್ತದೆ.

. ವೈದ್ಯರಷ್ಟೇ ಅಲ್ಲ, ಜನಸಾಮಾನ್ಯರೂ ಅಗತ್ಯ ಇರುವೆಡೆಯಲ್ಲಿ ಎಐ ಬಳಸುವ ಕೌಶಲ ಕರಗತ ಮಾಡಿಕೊಳ್ಳುವುದು ‘ಸಮಗ್ರ ಸ್ವಾಸ್ಥ್ಯ’ದ ದೃಷ್ಟಿಯಿಂದ ವಿವೇಕದ ಹೆಜ್ಜೆ. ತಮಗೆ ಬಂದಿರುವ ಕಾಯಿಲೆಯ ಬಗ್ಗೆ ಪೂರ್ಣ ಮಾಹಿತಿ, ವೈದ್ಯರು ಶಿಫಾರಸು ಮಾಡಿರುವ ಔಷಧಗಳು, ತೆಗೆದುಕೊಳ್ಳಬೇಕಾದ ರೀತಿ, ಪ್ರಮಾಣ, ಅಡ್ಡ ಪರಿಣಾಮಗಳು, ಕಾಯಿಲೆಗೆ ಕಾರಣಗಳು, ವಹಿಸಬೇಕಾದ ಎಚ್ಚರಿಕೆ, ಮುಂಜಾಗ್ರತೆಯಂತಹ ವಿವರಗಳನ್ನು ನಮ್ಮ ಇಚ್ಛೆಯ ಭಾಷೆಯಲ್ಲೇ ಕೃತಕ ಬುದ್ಧಿಮತ್ತೆ ಒದಗಿಸುತ್ತದೆ. ರೋಗದ ಕುರಿತಾದ ಸಂಪೂರ್ಣ ಅರಿವು ನೀಡುವುದರೊಂದಿಗೆ ಮಾನಸಿಕವಾಗಿ ಧೈರ್ಯ ತುಂಬುತ್ತದೆ. ಆ ಮಾಹಿತಿಯನ್ನು ಒರೆಗೆ ಹಚ್ಚಿ, ಸಂದೇಹಗಳನ್ನು ವೈದ್ಯರೊಂದಿಗೆ ಚರ್ಚಿಸಿ ಮುಂದುವರಿಯಬೇಕು. ಒಮ್ಮೊಮ್ಮೆ ಕಾರ್ಯದೊತ್ತಡ, ಸಮಯದ ಅಭಾವ, ವಿವರಿಸುವ ತಾಳ್ಮೆ ಇಲ್ಲದಿರುವುದು ಮುಂತಾದ ಕಾರಣಗಳಿಂದ ರೋಗಿಗೆ ತನ್ನ ಸ್ಥಿತಿ, ಔಷಧೋಪಚಾರ ಕುರಿತಾಗಿ ವೈದ್ಯರಿಂದ ಸರಿಯಾಗಿ ತಿಳಿವಳಿಕೆ ದೊರೆಯದಿರಬಹುದು. ಇಲ್ಲವೇ ಅನುಮಾನಗಳನ್ನು ಕೇಳುವಲ್ಲಿ ಹಿಂಜರಿಕೆ, ಮುಜುಗರದಿಂದಾಗಿಯೂ ಅಗತ್ಯ ಮಾಹಿತಿ ದೊರೆಯದಿರಬಹುದು. ವೈದ್ಯರು ಕೂಡ ತಮ್ಮ ಕಾರ್ಯಬಾಹುಳ್ಯದಿಂದಾಗಿ ರೋಗಿಯ ಎಲ್ಲ ಅನುಮಾನಗಳಿಗೆ ಉತ್ತರ ನೀಡುವುದು ಸಾಧ್ಯ ಆಗದಿರಬಹುದು. ಅಂತಹ ಹೊತ್ತಿನಲ್ಲಿ ಎಐ ಬಳಕೆ ಬಗ್ಗೆ ಅರಿವಿದ್ದರೆ ರೋಗಿಯೊಬ್ಬ ತನಗೆ ಬೇಕಾದ ವಿಷಯಗಳನ್ನೆಲ್ಲ ತಿಳಿದುಕೊಳ್ಳಬಹುದು. ಯಾವುದೇ ಕಾರಣಕ್ಕೂ ಸ್ವಯಂವೈದ್ಯೋಪಚಾರ ಮಾಡಿಕೊಳ್ಳುವುದು ಅಪಾಯಕ್ಕೆ ಆಹ್ವಾನ ನೀಡಿದಂತೆ.

. ಕಾಯಿಲೆಯ ಕುರಿತಾಗಷ್ಟೇ ಅಲ್ಲ, ನಿರ್ದಿಷ್ಟ ಔಷಧಗಳ ಕುರಿತಾಗಿಯೂ ಎಐನಿಂದ ಮಾಹಿತಿ ಪಡೆದುಕೊಳ್ಳಬಹುದು. ಮಧುಮೇಹ, ಸಂಧಿವಾತ, ಥೈರಾಯ್ಡ್, ರಕ್ತದೊತ್ತಡ, ಅಪಸ್ಮಾರ, ಹೃದಯ ಸಂಬಂಧಿ ಸಮಸ್ಯೆಗಳು, ಕುಸುಮರೋಗ, ಪಾರ್ಶ್ವವಾಯುವಿನಂತಹ ಸಮಸ್ಯೆಗಳು, ಕೆಲವು ವಿರಳ ಕಾಯಿಲೆಗಳಲ್ಲಿ ದೀರ್ಘಕಾಲದವರೆಗೆ ಔಷಧ ತೆಗೆದುಕೊಳ್ಳಬೇಕಾಗುತ್ತದೆ. ಸಮಸ್ಯೆ ತುಸು ನಿಯಂತ್ರಣಕ್ಕೆ ಬಂದಂತೆಯೇ ವೈದ್ಯರು ಇಡಿಯಾಗಿ ಶಿಫಾರಸು ಮಾಡಿದ ಮಾತ್ರೆಗಳನ್ನು ಅರ್ಧ ಮಾಡಿ ತೆಗೆದುಕೊಳ್ಳುವವರಿದ್ದಾರೆ. ಕೆಲವು ಮಾತ್ರೆಗಳು ಬಾಯಿಯಲ್ಲಿ, ಕೆಲವು ಜಠರದಲ್ಲಿ, ಮತ್ತೆ ಕೆಲವು ಕರುಳಿನಲ್ಲಿ ಕರಗುವಂತೆ ವಿನ್ಯಾಸ ಮಾಡಿರಲಾಗುತ್ತದೆ. ಕೆಲವು ಮಾತ್ರೆಗಳಲ್ಲಿನ ರಾಸಾಯನಿಕಗಳು ನಿಧಾನವಾಗಿ ಬಿಡುಗಡೆಯಾಗಬೇಕು, ಕೆಲವದರ ಪರಿಣಾಮ ದೀರ್ಘಾವಧಿ ಇರಬೇಕು. ಇನ್ನು ಕೆಲವು ಮದ್ದುಗಳು ಹೊಟ್ಟೆಯಲ್ಲಿ ಕರಗಿದರೆ ಜಠರಾಮ್ಲದಲ್ಲಿ ನಿಷ್ಕ್ರಿಯ ಆಗುತ್ತವೆ. ಹಾಗಾಗಿಯೇ ಅವುಗಳನ್ನು ಇಡಿಯಾಗಿ ತೆಗೆದುಕೊಳ್ಳಲೇಬೇಕು. ಇಂತಹ ವಿಷಯಗಳ ಅರಿವಿಲ್ಲದ ಹಲವರು ತುಂಡು ಮಾಡಿ ನುಂಗುತ್ತಾರೆ. ಹೀಗಾದಾಗ ಪರಿಣಾಮ ಬೀರದೆ ಸಮಸ್ಯೆ ಉಲ್ಬಣಿಸಬಹುದು.

. ಹೌದು, ವೈದ್ಯಕೀಯ ರಂಗದಲ್ಲಿ ಕೃತಕ ಬುದ್ಧಿಮತ್ತೆಯೆಂಬುದು ಕೇವಲ ವೈದ್ಯರಿಗಷ್ಟೇ ಅಲ್ಲ, ರೋಗಿಗಳಿಗೂ ಅಗತ್ಯವಿದೆ. ರೋಗಿಗಳು ತಮ್ಮ ಕಾಯಿಲೆಯ ವಿಚಾರದಲ್ಲಿ ಹೆಚ್ಚಿನ ಅರಿವು ಪಡೆದುಕೊಂಡಾಗ ರೋಗವೂ ಬೇಗನೆ ಉಪಶಮನವಾಗುತ್ತದೆ. ಇದರಿಂದಾಗಿ ಹಣ, ಶ್ರಮ, ಸಮಯದ ಉಳಿತಾಯವಷ್ಟೇ ಅಲ್ಲ, ಮಾನಸಿಕ ಒತ್ತಡದಿಂದಲೂ ಮುಕ್ತರಾಗಲು ಸಾಧ್ಯ. ಹಾಗಾಗಿ ಜನಸಾಮಾನ್ಯರೂ ಎಐ ಬಳಕೆಯ ವಿಧಾನ, ಅಲ್ಲಿನ ಮಾಹಿತಿಗಳನ್ನು ವಿಶ್ಲೇಷಿಸುವ, ಪರಾಂಬರಿಸಿ ನೋಡುವ, ಉಪಯೋಗಿಸಿಕೊಳ್ಳುವ ನಿಟ್ಟಿನಲ್ಲಿ ಸಾಕ್ಷರರಾಗುವ ಅನಿವಾರ್ಯತೆಯಿದೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ವಿಶ್ಲೇಷಣೆ: ಆರೋಗ್ಯಭಾಗ್ಯಕ್ಕೆ ‘ಎಐ’ ಆಪ್ತಮಿತ್ರ!

ಪೆಟ್ರೋಲ್, ಡೀಸೆಲ್ ಬೆಲೆ ಮತ್ತೆ ಹೆಚ್ಚಳ

ಬೇಲ್ ಸಿಗದಿದ್ದರೆ ಜೈಲ್‌ ಎಂದ ಶಿವಣ್ಣ

ಚಿನಕುರುಳಿ: ಮಂಗಳವಾರ, 19 ಮೇ 2026

ಪ್ರಶ್ನೆ ಸ್ವೀಕರಿಸದೇ ತೆರಳಿದ ಮೋದಿ: ನಾವೇಕೆ ನಿಮ್ಮನ್ನು ನಂಬಬೇಕು ಎಂದ ಪತ್ರಕರ್ತೆ

ಅಫ್ಗಾನಿಸ್ತಾನ ಸರಣಿಗೆ ಆಯ್ಕೆಯಾಗಿರುವ ಭಾರತ ತಂಡದಲ್ಲಿ 7 ಗುಜರಾತ್ ಆಟಗಾರರು

ಬಾಂಗ್ಲಾ ಟೆಸ್ಟ್ ಸರಣಿ ಹೀನಾಯವಾಗಿ ಸೋತ ಪಾಕ್: WTC ಟೇಬಲ್‌ನಲ್ಲಿ ಕುಸಿದ ಭಾರತ

10 ಸಿಕ್ಸರ್, 7 ಬೌಂಡರಿ ಸಹಿತ 93 ರನ್: IPLನಲ್ಲಿ ಹಲವು ದಾಖಲೆ ಸೃಷ್ಟಿಸಿದ ವೈಭವ್

ಟೆಸ್ಟ್ ಕ್ರಿಕೆಟ್‌ನಿಂದಲೇ ಗೌರವಾದರ: ಯುವ ಕ್ರಿಕೆಟಿಗರಿಗೆ ಕೊಹ್ಲಿ ಕಿವಿಮಾತು

ಒಳನೋಟ: ಆಮೆಗತಿಯಲ್ಲಿ ಸಾಗುವ ‘ಸರ್ವೆ’

ಒಳನೋಟ: ಭೂದಾಹಕ್ಕೆ ಕೆರೆಯಂಗಳ ಆಪೋಶನ

ಒಳನೋಟ | ಗೋವಾದಂತೆ ಮಂಗಳೂರು ಬೀಚ್‌ ಪ್ರವಾಸೋದ್ಯಮಕ್ಕೂ ʼಜೀವʼ ತುಂಬಬೇಕಿದೆ..

ಒಳನೋಟ: ಬೇಕು ತಾಲ್ಲೂಕು ಆಸ್ಪತ್ರೆಗೆ ‘ಚಿಕಿತ್ಸೆ’

ಪೆಟ್ರೋಲ್, ಡೀಸೆಲ್ ಬೆಲೆ ಮತ್ತೆ ಹೆಚ್ಚಳ

ಬೇಲ್ ಸಿಗದಿದ್ದರೆ ಜೈಲ್‌ ಎಂದ ಶಿವಣ್ಣ

ಚಿನಕುರುಳಿ: ಮಂಗಳವಾರ, 19 ಮೇ 2026

ಪ್ರಶ್ನೆ ಸ್ವೀಕರಿಸದೇ ತೆರಳಿದ ಮೋದಿ: ನಾವೇಕೆ ನಿಮ್ಮನ್ನು ನಂಬಬೇಕು ಎಂದ ಪತ್ರಕರ್ತೆ