ದಾವಣಗೆರೆಯ ದುರಂತ ನೋಡಾ..! ಅನುರಣನ ಅಂಕಣದಲ್ಲಿ ನಾರಾಯಣ.ಎ ಅವರ ವಿಶ್ಲೇಷಣೆ

ದಾವಣಗೆರೆ ಉಪಚುನಾವಣೆ ದೇಶದ ರಾಜಕೀಯ ಕ್ಷೇತ್ರದಲ್ಲಿನ ಎರಡು ಅನೈತಿಕ ಸಂಗತಿಗಳನ್ನು ಸ್ಪಷ್ಟಪಡಿಸುವಂತಿದೆ. ಒಂದು, ನ್ಯಾಯವಾಗಿ ಸಲ್ಲಬೇಕಾದ ರಾಜಕೀಯ ಪ್ರಾತಿನಿಧ್ಯದಿಂದ ಮುಸ್ಲಿಮರು ವಂಚಿತಆಗುತ್ತಿರುವುದು. ಇನ್ನೊಂದು, ದೇಶದ ರಾಜಕಾರಣವನ್ನು ಆವರಿಸಿಕೊಂಡಿರುವ ಪ್ರಭಾವಿ ಕುಟುಂಬಗಳು ಜನತಂತ್ರದ ಆಶಯಗಳನ್ನೇ ಅಣಕಿಸುತ್ತಿರುವುದು! . ಉಪಚುನಾವಣೆಗಳೇ ಹಾಗೆ. ಅವು ಸಾರ್ವತ್ರಿಕ ಚುನಾವಣೆಗಳಿಗಿಂತ ಹೆಚ್ಚಿಗೆ ರಾಜಕೀಯದ ಹುಳುಕು ಕೊಳಕುಗಳತ್ತ ಬೆಳಕು ಚೆಲ್ಲುತ್ತವೆ. ದಾವಣಗೆರೆ (ದಕ್ಷಿಣ) ಕ್ಷೇತ್ರದ ಪ್ರಸ್ತುತ ಉಪಚುನಾವಣೆಯಲ್ಲಿ ಕಾಂಗ್ರೆಸ್ ಅನುಸರಿಸುತ್ತಿರುವ ರಾಜಕೀಯದ ಮಾದರಿ ನೋಡಿ:

. ಆ ಕ್ಷೇತ್ರದಲ್ಲಿ ದೊಡ್ಡ ಸಂಖ್ಯೆಯಲ್ಲಿರುವ ಮುಸ್ಲಿಂ ಸಮುದಾಯ ಈ ಬಾರಿಯಾದರೂ ಕಾಂಗ್ರೆಸ್ನಿಂದ ಸ್ಪರ್ಧಿಸುವ ಅವಕಾಶ ನಮಗೆ ಕೊಡಿ ಎಂದು ಆಗ್ರಹಿಸಿತ್ತು. ಸಂಖ್ಯೆ ಹೆಚ್ಚಿದೆ ಎನ್ನುವುದರ ಆಚೆಗೆ ಅವರ ಬೇಡಿಕೆ ಇನ್ನೂ ಹಲವು ರೀತಿಯಲ್ಲಿ ನೈತಿಕವಾಗಿ ಸರಿಯಾಗಿತ್ತು. ಮೊದಲನೆಯದಾಗಿ, ರಾಜ್ಯ ವಿಧಾನಸಭೆಯಲ್ಲಿ ಮುಸ್ಲಿಮರ ಪ್ರಾತಿನಿಧ್ಯ ಅವರ ಜನಸಂಖ್ಯೆಗೆ ಹೋಲಿಸಿದರೆ ತೀರಾ ಕಡಿಮೆ ಇದೆ. ಎರಡನೆಯದಾಗಿ, ಬಹಳ ಕಾಲದಿಂದೀಚೆಗೆ ಮುಸ್ಲಿಂ ಸಮುದಾಯದವರು ರಾಜ್ಯದಲ್ಲಿ ಕಾಂಗ್ರೆಸ್ಗೆ ಬೆಂಬಲ ನೀಡುತ್ತಾ ಬಂದಿದ್ದಾರೆ. ಮೂರನೆಯದಾಗಿ, ನಿರ್ದಿಷ್ಟವಾಗಿ ದಾವಣಗೆರೆಯಲ್ಲಿ ಅವರ ಈ ಬೇಡಿಕೆ ಬಹಳ ಹಳೆಯದು. ಈ ಬಾರಿಯಾದರೂ, ಇಲ್ಲಿಯೂ ಅವಕಾಶ ನೀಡದೆ ಹೋದರೆ ಇನ್ನೆಲ್ಲಿ, ಇನ್ನು ಯಾವಾಗ ಎನ್ನುವ ಅವರ ಬೇಡಿಕೆ ಕಾಂಗ್ರೆಸ್ ಮೇಲೊಂದು ನೈತಿಕ ಒತ್ತಡವನ್ನು ಹೇರಬೇಕಿತ್ತು. ಹಾಗಾಗಲಿಲ್ಲ. ಬೇಡಿಕೆಯನ್ನು ಕಾಂಗ್ರೆಸ್ ತಿರಸ್ಕರಿಸಿತು. ವರದಿಗಳ ಪ್ರಕಾರ, ಹೀಗೆ ತಿರಸ್ಕರಿಸುವಲ್ಲಿ ನಯನಾಜೂಕುಗಳೇನೂ ಇರಲಿಲ್ಲವಂತೆ. ಕಾಂಗ್ರೆಸ್ನ ಓರ್ವ ನಾಯಕ ಆಗಾಗ ಬಳಸುವ ನುಡಿಗಟ್ಟುಗಳನ್ನೇ ಬಳಸಿ ಹೇಳಬೇಕೆಂದಾದರೆ, ದಾವಣಗೆರೆಯಲ್ಲಿ ಕಾಂಗ್ರೆಸ್ ಮುಸ್ಲಿಮರ ಮನವಿಯನ್ನು ‘ಒದ್ದು ಹೊಸಕಿ’ ಹಾಕಿತು. ಶಾಮನೂರು ಶಿವಶಂಕರಪ್ಪ ಅವರ ನಿಧನದಿಂದ ತೆರವಾದ ಸ್ಥಾನಕ್ಕೆ ಅವರ ಮೊಮ್ಮಗನನ್ನೇ ಅಭ್ಯರ್ಥಿಯನ್ನಾಗಿ ಮಾಡಿತು.

. ಮೃತ ಶಾಸಕರ ಕುಟುಂಬದವರಿಗೆ ಟಿಕೆಟ್ ನೀಡುವುದು ಕಾಂಗ್ರೆಸ್ನ ಸಂಪ್ರದಾಯವಂತೆ. ಸಾಧಾರಣ ಸಂದರ್ಭದಲ್ಲಾದರೆ ಈ ವಾದವನ್ನು ಒಪ್ಪದೇ ಹೋದರೂ ಸ್ವೀಕರಿಸಬಹುದಿತ್ತೋ ಏನೋ. ಆದರೆ, ಈ ಅಭ್ಯರ್ಥಿಯ ತಂದೆ ರಾಜ್ಯದಲ್ಲಿ ಮಂತ್ರಿ. ತಾಯಿ ಲೋಕಸಭಾ ಸದಸ್ಯೆ. ಹೆಚ್ಚೂಕಡಿಮೆ ಇಡೀ ಜಿಲ್ಲೆಯ ರಾಜಕೀಯ ಅಧಿಕಾರಕ್ಕೆ ಅವರ ಕುಟುಂಬವೇ ಕೇಂದ್ರಬಿಂದು. ಇಷ್ಟೆಲ್ಲ ಇರುವಾಗಲೂ ಸಂಪ್ರದಾಯ ಪಾಲಿಸಬೇಕಿತ್ತೇ? ಮುಸ್ಲಿಂ ಸಮುದಾಯದಿಂದ ಅಷ್ಟೊಂದು ದೊಡ್ಡ ನೈತಿಕ ಒತ್ತಾಯ ಇರುವಾಗಲೂ ಮುರಿಯಬಾರದ, ಮುರಿಯಲಾಗದ ಸಂಪ್ರದಾಯವೇ ಅದು? ವಾಸ್ತವದಲ್ಲಿ ಕುಟುಂಬದ ಕುಡಿಗೇ ಕಾಂಗ್ರೆಸ್ ಟಿಕೆಟ್ ನೀಡಿದ್ದು ಸಂಪ್ರದಾಯಕ್ಕೆ ಶರಣು ಬಿದ್ದಲ್ಲ. ಆ ಕುಟುಂಬದ ಒತ್ತಾಯಕ್ಕೆ ಮಣಿದು. ಕಾಂಗ್ರೆಸ್ ದಾವಣಗೆರೆಯಲ್ಲಿ ಎದುರಿಸಿದ್ದು ಒಂದು ಇಡೀ ಸಮುದಾಯವು ಸಂವಿಧಾನಾತ್ಮಕ ರಾಜಕೀಯ ಪ್ರಾತಿನಿಧ್ಯ ಆಗ್ರಹಿಸಿ ಮುಂದಿಟ್ಟ ನೈತಿಕ ಒತ್ತಾಯ, ಬಲಾಢ್ಯ ಪಾಳೇಗಾರಿಕೆ ಮನೋವೃತ್ತಿಯ ಕುಟುಂಬದ ಅಧಿಕಾರದಾಹದ ನಡುವಣ ಸಂಘರ್ಷವನ್ನು. ಕಾಂಗ್ರೆಸ್ ಪಾಳೇಗಾರಿಕೆಗೆ ಮಣಿಯಿತು.

. ಅಲ್ಲಿನ ಮುಸ್ಲಿಂ ಸಮುದಾಯ ಮುನಿಸಿಕೊಂಡಿದೆ. ಶಾಸಕರ ಕುಟುಂಬದ ಬೇಡಿಕೆಯನ್ನು ತಳ್ಳಿಹಾಕಿದ್ದರೆ ಆ ಕುಟುಂಬ ಮುನಿಸಿಕೊಳ್ಳುತ್ತಿತ್ತು. ಒಂದು ಇಡೀ ಸಮುದಾಯವೇ ಮುನಿಸಿಕೊಂಡರೂ ಪರವಾಗಿಲ್ಲ, ಒಂದು ಕುಟುಂಬದ ಅವಕೃಪೆಗೆ ಒಳಗಾಗಬಾರದು ಎನ್ನುವುದು ದಾವಣಗೆರೆಯಲ್ಲಿ ಕಾಂಗ್ರೆಸ್ ತೋರಿದ ಧೋರಣೆ. ಇನ್ನೊಂದು ರೀತಿಯಲ್ಲಿ ನೋಡುವುದಾದರೆ, ಒಂದು ಇಡೀ ಸಮುದಾಯದ ಮುನಿಸನ್ನು ನಿಭಾಯಿಸಬಹುದು; ಆದರೆ, ಹಣಬಲ ಮತ್ತು ಜಾತಿಬಲ ಇರುವ ಒಂದು ಕುಟುಂಬದ ಅಸಮಾಧಾನವನ್ನು ನಿಭಾಯಿಸುವುದು ಕಷ್ಟ ಎಂಬ ನಿರ್ಧಾರಕ್ಕೆ ಕಾಂಗ್ರೆಸ್ ಬಂದಿರಬೇಕು. ಇದು ದಾವಣಗೆರೆಯ ದುರಂತ ಮಾತ್ರವಲ್ಲ. ಇಡೀ ದೇಶದ ಪರಿಸ್ಥಿತಿ ಇದಕ್ಕಿಂತ ಭಿನ್ನವಾಗಿಲ್ಲ. ಭಾರತದ ಪ್ರಜಾತಾಂತ್ರಿಕ ಗಣರಾಜ್ಯ ಬರಬರುತ್ತಾ ಬಲಾಢ್ಯ ಕುಟುಂಬಗಳ ಗಣರಾಜ್ಯವಾಗುತ್ತಿದೆ (ರಿಪಬ್ಲಿಕ್ ಆಫ್ ಪವರ್ಫುಲ್ ಫ್ಯಾಮಿಲೀಸ್). ‘ಅತ್ತ ಆ ಕಡೆ ನೋಡಲಾ ಅಲ್ಲಿ ಆ ಕುಟುಂಬದ ನಾಡಲಾ, ಇತ್ತ ಈ ಕಡೆ ನೋಡಲಾ ಇಲ್ಲಿ ಈ ಕುಟುಂಬದ ಬೀಡಲಾ’ ಎನ್ನುವ ಪರಿಸ್ಥಿತಿ.

. ಕಾಂಗ್ರೆಸ್ ಆಗಲಿ, ಬಿಜೆಪಿಯಾಗಲಿ, ಇನ್ನಾವುದೇ ಪಕ್ಷವಾಗಲಿ, ಇವತ್ತು ಪಕ್ಷಗಳು ಎನ್ನುವುದು ಹೆಸರಿಗಷ್ಟೇ. ಅವು ಚುನಾವಣೆ ಗೆಲ್ಲಬಲ್ಲ ಸಾಮರ್ಥ್ಯ ಇರುವ ಕುಟುಂಬಗಳ ಮತ್ತು ವ್ಯಕ್ತಿಗಳ ಮೇಲೆ ಅವಲಂಬಿತವಾಗಿರುವ ಸಂಘಟನೆಗಳಷ್ಟೇ. ಹದಿನೈದುವರ್ಷಗಳ ಹಿಂದೆ ಈ ಕುರಿತು ಪ್ಯಾಟ್ರಿಕ್ ಫ್ರೆಂಚ್ ಎಂಬ ರಾಜಕೀಯ ಶಾಸ್ತ್ರಜ್ಞ ‘ಇಂಡಿಯಾ: ಎ ಪೋಟ್ರೈಟ್: ಆನ್ ಇಂಟಿಮೇಟ್ ಬಯಾಗ್ರಫಿ ಆಫ್ ಎ ಬಿಲಿಯನ್ ಪೀಪಲ್’ ಎನ್ನುವ ಪುಸ್ತಕ ಬರೆದಿದ್ದರು. ಆಗ ಇದ್ದ ಲೋಕಸಭಾ ಸದಸ್ಯರ ಹಿನ್ನೆಲೆಯನ್ನು ಅಧ್ಯಯನ ಮಾಡಿ ಅವರು ಕಂಡುಕೊಂಡದ್ದೇನೆಂದರೆ, ಹೊಸದಾಗಿ ಸಂಸತ್ತು ಪ್ರವೇಶಿಸುವ ಮೂರನೇ ಎರಡರಷ್ಟು ಸದಸ್ಯರು ರಾಜಕೀಯ ಕುಟುಂಬಗಳಿಂದ ಬಂದವರು. ಎಲ್ಲಾ ಪಕ್ಷಗಳಿಗೂ ಅನ್ವಯ ಆಗುವ ಸತ್ಯವಿದು. ಇಲ್ಲ, ನಾವು ಸಾಮಾನ್ಯ ಕಾರ್ಯಕರ್ತರನ್ನು ನಿಲ್ಲಿಸಿ ಗೆಲ್ಲಿಸಬಲ್ಲೆವು ಎಂದು ಕೆಲವೆಡೆ ಹೇಳಿಕೊಳ್ಳಬಹುದು. ಆದರೆ, ಬಿಜೆಪಿಗೆ ಅದು ಸಾಧ್ಯವಾಗುವುದು ಇಡೀ ದೊಡ್ಡ ಸಂಖ್ಯೆಯ ಮತದಾರರ ತಲೆಗೆ ಧರ್ಮದ ಅಮಲೇರಿಸುವ ಮೂಲಕ. ಈ ಧರ್ಮದ ಅಮಲು ಮತ್ತು ಪ್ರಬಲ ಕುಟುಂಬಗಳ ಮೇಲಿನ ದುಂಬಾಲು – ಇವೆರಡರ ಮಧ್ಯೆ ಒಂದನ್ನು ಆರಿಸಿಕೊಳ್ಳಬೇಕಾದ ದಯನೀಯ ಸ್ಥಿತಿಯನ್ನಿಂದು ಬಹುತೇಕ ರಾಜ್ಯಗಳ ರಾಜಕೀಯ ಪ್ರವೇಶಿಸಿ ಆಗಿದೆ.

. ಮತ್ತೆ ದಾವಣಗೆರೆಯ ಕತೆಗೆ ಮರಳುವುದಾದರೆ, ಅಲ್ಲಿ ಬಲಾಢ್ಯ ಕುಟುಂಬದ ಒತ್ತಡವನ್ನು ಲೆಕ್ಕಿಸದೆ ಕಾಂಗ್ರೆಸ್ ಒಂದು ವೇಳೆ ಮುಸ್ಲಿಂ ಅಭ್ಯರ್ಥಿಯೊಬ್ಬರಿಗೆ ಟಿಕೆಟ್ ನೀಡಿದ್ದರೆ ಏನಾಗುತ್ತಿತ್ತು? ಬಿಜೆಪಿಯು ಕಾಂಗ್ರೆಸ್ ಅನ್ನು ಮುಸ್ಲಿಂ ಪರವಾಗಿರುವ ಹಿಂದೂ ವಿರೋಧಿ ಪಕ್ಷ ಎಂದು ಡಂಗುರ ಹೊಡೆದು ಹಿಂದೂ ಮತಗಳನ್ನು ತನ್ನತ್ತ ಧ್ರುವೀಕರಿಸಿಕೊಂಡು ಬಿಡುತ್ತಿತ್ತು. ಟಿಕೆಟ್ ಪಡೆದುಕೊಂಡ ಕುಟುಂಬದ ಸಮರ್ಥನೆ ಇದಾಗಿತ್ತಂತೆ. ನಿಜಕ್ಕೂ ಹೀಗಾಗಿ ಬಿಡುತ್ತಿತ್ತೇ? ಹಿಂದೆ ಶಿಗ್ಗಾವಿಯಲ್ಲಿ ಉಪಚುನಾವಣೆ ನಡೆದಾಗ, ಕಾಂಗ್ರೆಸ್ ಮುಸ್ಲಿಂ ಅಭ್ಯರ್ಥಿಯೊಬ್ಬರನ್ನು ಕಣಕ್ಕಿಳಿಸಿ ಗೆಲ್ಲಿಸಿತ್ತು. ಶಿಗ್ಗಾವಿಯ ಬಿಜೆಪಿ ಅಭ್ಯರ್ಥಿ ಹಿಂದುತ್ವದ ನವೋಗ್ರ ಪ್ರತಿಪಾದಕ ಮಾಜಿ ಮುಖ್ಯಮಂತ್ರಿಯ ಮಗನೇ ಆಗಿದ್ದರೂ ಅಲ್ಲಿನ ಹಿಂದೂ ಮತದಾರರೆಲ್ಲಾ ಒಂದಾಗಿ ಮುಸ್ಲಿಂ ಅಭ್ಯರ್ಥಿಯನ್ನೇನೂ ಸೋಲಿಸಲಿಲ್ಲ. ದಾವಣಗೆರೆಯ ಪರಿಸರ– ಪರಿಸ್ಥಿತಿ ಬೇರೆಯೇ ಇರಬಹುದು. ಹಾಗೆಂದುಕೊಂಡರೂ, ಕಾಂಗ್ರೆಸ್ ಅಭ್ಯರ್ಥಿ ಮುಸ್ಲಿಂ ಎಂದಾಕ್ಷಣ ಮುನಿಸಿಕೊಂಡು ಕಾಂಗ್ರೆಸ್ ಅನ್ನು ಕೈಬಿಡುವಷ್ಟರ ಮಟ್ಟಿಗೆ ಈ ರಾಜ್ಯದ ಹಿಂದೂ ಮತದಾರರು ಬಹುತೇಕ ಕ್ಷೇತ್ರಗಳಲ್ಲಿ ಇನ್ನೂ ಕೋಮುವಾದಿಗಳಾಗಿಲ್ಲ.

. ಒಂದು ವೇಳೆ ತರ್ಕಕ್ಕಾಗಿ ದಾವಣಗೆರೆಯಲ್ಲಿ ಮುಸ್ಲಿಂ ಅಭ್ಯರ್ಥಿಯ ವಿರುದ್ಧ ಹಿಂದೂ ಮತಗಳ ಧ್ರುವೀಕರಣ ಆಗಿಯೇ ತೀರುತ್ತಿತ್ತು ಎಂದು ಕೊಂಡರೂ, ಧ್ರುವೀಕರಣಗೊಳ್ಳುವ ಈ ಹಿಂದೂ ಮತದಾರರಾದರೂ ಯಾರು? ಅವರಲ್ಲಿ ಬಹುತೇಕರು ಅಹಿಂದ ಸಮೂಹಕ್ಕೆ ಸೇರಿದ ಹಿಂದುಳಿದ ಮತ್ತು ದಲಿತ ಮತದಾರರು ತಾನೆ? ಈ ವರ್ಗದ ಮತದಾರರಾದರೂ ಮುಸ್ಲಿಮರ ವಿರುದ್ಧ ಧ್ರುವೀಕರಣಗೊಳ್ಳದಂತೆ ತಡೆಯುವ ಸಾಮರ್ಥ್ಯ ಕಾಂಗ್ರೆಸ್ಗೆ ಇಲ್ಲದೆ ಹೋದರೆ, ಆ ಪಕ್ಷವು ದೇಶದಾದ್ಯಂತ ಸಂಚಯನಗೊಳ್ಳುತ್ತಿರುವ ದೈತ್ಯ ಶಕ್ತಿಗಳನ್ನು ಮಣಿಸಿ ಸಂವಿಧಾನವನ್ನು ಉಳಿಸೀತು ಎಂದು ಭರವಸೆ ಇರಿಸಿಕೊಳ್ಳುವುದಾದರೂ ಹೇಗೆ?

. ಮುಸ್ಲಿಮರನ್ನು ಹೊರಗಿಟ್ಟೇ ತನ್ನ ರಾಜಕೀಯ ಎನ್ನುವುದು ಬಿಜೆಪಿಯ ಅಧಿಕೃತ ನಿಲುವು. ಹಿಂದೂಗಳ ಧ್ರುವೀಕರಣದ ಭಯದಿಂದ ಕಾಂಗ್ರೆಸ್ ಮತ್ತು ಬಹುತೇಕ ಇತರ ಪಕ್ಷಗಳು ಕೂಡಾ ಮುಸ್ಲಿಮರನ್ನು ಎಷ್ಟು ಸಾಧ್ಯವೋ ಅಷ್ಟು ಅಧಿಕಾರ ರಾಜಕೀಯದ ಹೊರಗಿಡುವುದಕ್ಕೆ ಪ್ರಯತ್ನಿಸುತ್ತಿವೆ. ಈ ಧರ್ಮ ಸೋಂಕಿತ ರಾಜಕೀಯ ಹೀಗೆ ಮುಂದುವರಿದಷ್ಟು ಕಾಲ ಮುಸ್ಲಿಮರಿಗೆ ಈ ದೇಶದಲ್ಲಿ ಅವರ ಜನಸಂಖ್ಯೆಗೆ ಅನುಗುಣವಾಗಿ ಪ್ರಾತಿನಿಧ್ಯ ಎನ್ನುವುದು ಶಾಶ್ವತ ಮರೀಚಿಕೆ.

. ಇನ್ನು ಚುನಾವಣೆಯಲ್ಲಿ ಗೆಲ್ಲುವ ಸಾಮರ್ಥ್ಯ ರೂಢಿಸಿಕೊಂಡಿರುವ ಕುಟುಂಬಗಳಿಗೆ ಮಣೆಹಾಕುವ ಸರ್ವಪಕ್ಷಗಳ ಸಾರ್ವತ್ರಿಕ ಪ್ರವೃತ್ತಿಯಿಂದಾಗಿ ಮುಸ್ಲಿಮರ ಜತೆಗೆ ಹಿಂದುಳಿದ ಜಾತಿಗಳೂ ರಾಜಕೀಯವಾಗಿ ಬಡವಾಗಿವೆ. ಮುಸ್ಲಿಮರಿಗೆ ಇರುವಷ್ಟು ಪ್ರಾತಿನಿಧ್ಯವೂ ಹಿಂದುಳಿದ ಜಾತಿಗಳಿಗೆ ಲಭಿಸುವುದಿಲ್ಲ. ಹೆಚ್ಚುಕಡಿಮೆ ಶೇ 40ರಷ್ಟಿರುವ ಹಿಂದುಳಿದಜಾತಿಗಳಿಗೆ ರಾಜ್ಯ ವಿಧಾನಸಭೆಯಲ್ಲಿ ಶೇ 20ರಷ್ಟು ಪ್ರಾತಿನಿಧ್ಯ ಸಿಕ್ಕರೆ ದೊಡ್ಡದು. ಲೋಕಸಭಾ ಚುನಾವಣೆಯಲ್ಲಿ ಹಿಂದುಳಿದ ಜಾತಿಗಳಿಗೆ 28 ಸ್ಥಾನಗಳ ಪೈಕಿ ಕೆಲವೊಮ್ಮೆ (ಉದಾಹರಣೆಗೆ 2019ರಲ್ಲಿ) ಒಂದೇ ಒಂದು ಸ್ಥಾನ ದೊರೆತದ್ದೂ ಉಂಟು. ಈ ವಂಚನೆಯ ಸುಳಿಯಿಂದ ತಪ್ಪಿಸಿಕೊಂಡದ್ದು ಪರಿಶಿಷ್ಟ ಜಾತಿಗಳು ಮತ್ತು ಪಂಗಡಗಳು ಮಾತ್ರ. ಅದಕ್ಕೆ ಕಾರಣ, ಅವರಿಗೆ ಸಾಂವಿಧಾನಿಕವಾಗಿ ದೊರೆತ ರಾಜಕೀಯ ಮೀಸಲಾತಿ.

. ಈಗ ಮುಸ್ಲಿಮರಿಗೂ, ಹಿಂದುಳಿದವರಿಗೂ ರಾಜಕೀಯ ಪ್ರಾತಿನಿಧ್ಯ ಪಡೆಯಲು ಇರುವ ಏಕೈಕ ಮಾರ್ಗ ಅದೊಂದೇ. ಹೇಗೂ ಕ್ಷೇತ್ರ ಪುನರ್ ವಿಂಗಡಣೆಯ ಹೆಸರಲ್ಲಿ ರಾಜ್ಯ ವಿಧಾನಮಂಡಲಗಳ ಮತ್ತು ಸಂಸತ್ತಿನ ಸ್ಥಾನಗಳ ಸಂಖ್ಯೆಯನ್ನು ಗಣನೀಯವಾಗಿ ಹೆಚ್ಚಿಸುವ ತಯಾರಿ ನಡೆಸುತ್ತಿದೆ. ಸಂಖ್ಯೆ ಹೆಚ್ಚಿಸುವಾಗ ನಮಗೆ ಪ್ರಾತಿನಿಧ್ಯವೂ ಸಾಂವಿಧಾನಿಕವಾಗಿ ಖಾತರಿಯಾಗಬೇಕು ಎಂಬ ಹಕ್ಕೊತ್ತಾಯದೊಂದಿಗೆ ಬೀದಿಗಿಳಿಯುವುದೊಂದೇ ಉಳಿದಿರುವ ದಾರಿ. ಇದು ದಾವಣಗೆರೆಯ ಉಪಚುನಾವಣೆಯ ಅಘೋಷಿತ ಸಂದೇಶ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ದಾವಣಗೆರೆಯ ದುರಂತ ನೋಡಾ..! ಅನುರಣನ ಅಂಕಣದಲ್ಲಿ ನಾರಾಯಣ.ಎ ಅವರ ವಿಶ್ಲೇಷಣೆ

ಚಿನಕುರುಳಿ ಕಾರ್ಟೂನು: ಮಂಗಳವಾರ, 14 ಏಪ್ರಿಲ್ 2026

ಗುಂಡಣ್ಣ ಕಾರ್ಟೂನು: ಮಂಗಳವಾರ 14 ಏ‍ಪ್ರಿಲ್ 2026

ಯಾವುದೇ ರಾಷ್ಟ್ರಕ್ಕೆ ತೈಲ ಮಾರಾಟ ಮಾಡಲು ಸಿದ್ಧ: ಭಾರತಕ್ಕೆ ಇರಾನ್

ಸುದ್ದಿ ಗುದ್ದು | ತಿಂಗಳೇಶ: ಮಂಗಳವಾರ, 14 ಏಪ್ರಿಲ್ 2026

ಐಪಿಎಲ್: ಜಯದ ಓಟದತ್ತ ಆರ್‌ಸಿಬಿ ನೋಟ

ಸನ್‌ರೈಸರ್ಸ್‌ಗೆ ಕಾರ್ಸ್‌ ಬದಲು ಮಧುಶಂಕ

ಫೈನಲ್‌ಗೆ ರಾಜ್ಯ ಬಾಲಕಿಯರ ತಂಡ

ಯಾರ್ಕರ್‌ಗಳು ನನ್ನ ಅಸ್ತ್ರ: ಪ್ರಫುಲ್‌

ಒಳನೋಟ: ಗಿಗ್‌ ಕಾರ್ಮಿಕರದ್ದು ಬಗೆದಷ್ಟೂ ಬವಣೆ

ಒಳನೋಟ: ಬದುಕು ನುಂಗಿದ ಕೊಪ್ಪಳದ ಕರಿದೂಳು– ಇದು ವಾಯುಮಾಲಿನ್ಯದ ಆಘಾತಕಾರಿ ಅವಾಂತರ!

ಒಳನೋಟ: ಕುದುರೆಮುಖ ರಾಷ್ಟ್ರೀಯ ಉದ್ಯಾನದ ಕಾಡಂಚಿನ ಜನರ ನಿತ್ಯ ರೋದನ

ಒಳನೋಟ: ಸಾಯುತ್ತಿರುವ ಜೀವ ನದಿಗಳು!

ಚಿನಕುರುಳಿ ಕಾರ್ಟೂನು: ಮಂಗಳವಾರ, 14 ಏಪ್ರಿಲ್ 2026

ಗುಂಡಣ್ಣ ಕಾರ್ಟೂನು: ಮಂಗಳವಾರ 14 ಏ‍ಪ್ರಿಲ್ 2026

ಯಾವುದೇ ರಾಷ್ಟ್ರಕ್ಕೆ ತೈಲ ಮಾರಾಟ ಮಾಡಲು ಸಿದ್ಧ: ಭಾರತಕ್ಕೆ ಇರಾನ್

ಸುದ್ದಿ ಗುದ್ದು | ತಿಂಗಳೇಶ: ಮಂಗಳವಾರ, 14 ಏಪ್ರಿಲ್ 2026