ವಿಕಾಸ್‌ ಆರ್‌. ಮೌರ್ಯ ಅವರ ವಿಶ್ಲೇಷಣೆ | ತೈಲದ ಉರಿ: ತೆರಿಗೆಯ ದರಿ

ಪೆಟ್ರೋಲ್, ಡೀಸೆಲ್ ಬೆಲೆ ಏರಿಕೆಯನ್ನು ದೇಶದ ಹಿತಾಸಕ್ತಿಯ ರೂಪದಲ್ಲಿ ಬಿಂಬಿಸಲಾಗುತ್ತಿದೆ. ದೇಶ ಸಂಕಷ್ಟದಲ್ಲಿರುವ ಸಂದರ್ಭದಲ್ಲಿ ಜನಸಾಮಾನ್ಯರನ್ನು ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕಿಸುವುದು ಜನಪರ ನಿರ್ಧಾರವಲ್ಲ. ದೇಶದ ಅತಿಶ್ರೀಮಂತರು, ಉದ್ಯಮಿಗಳು ಹಾಗೂ ರಾಜಕಾರಣಿಗಳು ‘ದೇಶಭಕ್ತಿ’ ಪ್ರದರ್ಶಿಸಬೇಕಾದ ಸಮಯವಿದು. . ಮನಮೋಹನ್ ಸಿಂಗ್ ಅವರು ಪ್ರಧಾನಿ ಆಗಿದ್ದಾಗ, ಆಗಿನ ಯುಪಿಎ ಸರ್ಕಾರ ರಾಜ್ಯಸಭೆ ಚುನಾವಣೆಯ ನಂತರ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯನ್ನು ಕ್ರಮವಾಗಿ ₹73 ಮತ್ತು ₹64ಕ್ಕೆ ಏರಿಸಿತ್ತು. ಅದಕ್ಕೆ ನೀಡಿದ ಕಾರಣ, ಮುಕ್ತ ಮಾರುಕಟ್ಟೆಯಲ್ಲಿ ಕಚ್ಚಾತೈಲದ ದರ ಬ್ಯಾರಲ್ಲಿಗೆ 113 ಡಾಲರ್ ಆಗಿದೆ ಎನ್ನುವುದಾಗಿತ್ತು. ಆಗ ಬೆಲೆ ಏರಿಕೆ ವಿರುದ್ಧ ಬಿಜೆಪಿ, ಎಡ ಪಕ್ಷಗಳು ಮತ್ತು ಸಾಮಾನ್ಯ ಜನರು ಬೀದಿಗಿಳಿದು ಹೋರಾಡಿದರು. 2012ರಲ್ಲಿ ನಡೆದ ಆ ತೈಲ ಬೆಲೆ ಏರಿಕೆಯನ್ನು ಮಾಧ್ಯಮಗಳು ‘ದೇಶವಿರೋಧಿ ಕೃತ್ಯ’ ಎಂದು ಕರೆದು ಸರ್ಕಾರಕ್ಕೆ ಬಿಸಿ ಮುಟ್ಟಿಸಿದ್ದವು.

. ಕಳೆದ ಶುಕ್ರವಾರದಿಂದ (ಮೇ 15) ನರೇಂದ್ರ ಮೋದಿ ನೇತೃತ್ವದ ಎನ್ಡಿಎ ಸರ್ಕಾರ, ಹಲವು ರಾಜ್ಯಗಳ ಚುನಾವಣೆಯ ನಂತರ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯನ್ನು ಲೀಟರ್ಗೆ ತಲಾ 3 ರೂಪಾಯಿ ಏರಿಸಿದೆ. ಇದಕ್ಕೆ ನೀಡಿರುವ ಕಾರಣ, ಯುದ್ಧದ ಪ್ರಭಾವದಿಂದಾಗಿ ಕಚ್ಚಾತೈಲ ಬೆಲೆ ಬ್ಯಾರಲ್ಲಿಗೆ 109 ಡಾಲರ್ ಆಗಿದೆ ಎನ್ನುವುದು. ಈ ಬೆಲೆ ಏರಿಕೆ ವಿರುದ್ಧ ಕಾಂಗ್ರೆಸ್, ಎಡ ಪಕ್ಷಗಳು ಮತ್ತು ಜನಸಾಮಾನ್ಯರು ಪ್ರತಿಭಟಿಸುತ್ತಿದ್ದಾರೆ. ಆದರೆ ಈಗ ದೇಶವಿರೋಧದ ಸೊಲ್ಲು ಕೇಳಿಸುತ್ತಿಲ್ಲ. ಬದಲಿಗೆ, ಕೆಲವರು ‘ದೇಶಭಕ್ತಿ’ ಎಂದು ಸರ್ಕಾರದ ಜೊತೆ ನಿಂತಿದ್ದಾರೆ.

. ಮೇಲಿನ ಸಂದರ್ಭಗಳಲ್ಲಿ ನಾವು ಗಮನಿಸಬೇಕಿರುವ ಅಂಶಗಳಿವೆ. ಯುಪಿಎ ಸರ್ಕಾರ ಕಚ್ಚಾತೈಲ ದರ 113 ಡಾಲರ್ ಇದ್ದಾಗ ಪೆಟ್ರೋಲನ್ನು ₹73ಕ್ಕೆ ಹೇಗೆ ನೀಡುತ್ತಿತ್ತು ಹಾಗೂ ಕಚ್ಚಾತೈಲ ದರ 109 ಡಾಲರ್ ಇರುವಾಗ ಎನ್ಡಿಎ ಸರ್ಕಾರ ಯಾಕೆ ಪೆಟ್ರೋಲನ್ನು ₹103ಕ್ಕೆ ನೀಡುತ್ತಿದೆ ಎನ್ನುವುದರ ಬಗ್ಗೆ ಯೋಚಿಸಬೇಕಾಗಿದೆ. ಈ ವ್ಯತ್ಯಾಸಕ್ಕೆ ಸ್ಪಷ್ಟವಾದ ಉತ್ತರ ತೆರಿಗೆ. ಒಂದು ಸರಳ ಲೆಕ್ಕಾಚಾರದ ಮೂಲಕ ಇದನ್ನು ಅರ್ಥ ಮಾಡಿಕೊಳ್ಳಬಹುದು.

. ಫೆಬ್ರುವರಿ 2020ರಂದು ಕಚ್ಚಾತೈಲ ದರ ಬ್ಯಾರಲ್ಲಿಗೆ 67 ಡಾಲರ್ ಇತ್ತು. ಅಂದರೆ ₹6,365. ಒಂದು ಬ್ಯಾರಲ್ನಲ್ಲಿ ಸುಮಾರು 159 ಲೀಟರ್ ತೈಲ ಇರುತ್ತದೆ. ಅಲ್ಲಿಗೆ ಒಂದು ಲೀಟರ್ ಕಚ್ಚಾತೈಲದ ಬೆಲೆ ₹40 ಆಗುತ್ತದೆ. ಈ ಕಚ್ಚಾತೈಲದಿಂದ ಪೆಟ್ರೋಲನ್ನು ಸಂಸ್ಕರಿಸಲು ಪ್ರತಿ ಲೀಟರಿಗೆ ₹5.66 ಮತ್ತು ಡೀಸೆಲ್ಗೆ ₹6.42 ತಗಲುತ್ತದೆ. ಸರಬರಾಜು ಮತ್ತು ವಿತರಣೆಗಾಗಿ ಪೆಟ್ರೋಲ್ ಮತ್ತು ಡೀಸೆಲ್ಗೆ ತಲಾ ₹4 ತಗಲುತ್ತದೆ ಎಂದಿಟ್ಟುಕೊಳ್ಳೋಣ. ಇವೆಲ್ಲವನ್ನೂ ಸೇರಿಸಿದ ನಂತರ ತೆರಿಗೆ ರಹಿತ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಕ್ರಮವಾಗಿ ಅಂದಾಜು ₹50 ಮತ್ತು ₹51 ಆಗುತ್ತದೆ. ಈ ಬೆಲೆಗೆ ಒಕ್ಕೂಟ ಸರ್ಕಾರ ಅಬಕಾರಿ ಸುಂಕವನ್ನಾಗಿ ಪ್ರತಿ ಲೀಟರ್ ಪೆಟ್ರೋಲಿಗೆ ₹13 ಮತ್ತು ಡೀಸೆಲ್ಗೆ ₹10 ಸೇರಿಸುತ್ತದೆ. ರಾಜ್ಯ ಸರ್ಕಾರಗಳು ವ್ಯಾಟ್ ತೆರಿಗೆಯನ್ನೂ (ಇದು ಪ್ರತಿ ರಾಜ್ಯಕ್ಕೂ ವಿಭಿನ್ನ), ಬಂಕ್ಗಳು ಕಮಿಷನ್ ಸೇರಿಸಿ ಫೆಬ್ರುವರಿಯಲ್ಲಿ ಪ್ರತಿ ಲೀಟರ್ ಪೆಟ್ರೋಲ್ ಮತ್ತು ಡೀಸೆಲ್ ಕ್ರಮವಾಗಿ ₹103 ಮತ್ತು ₹91 ಆಗಿತ್ತು. ಇದರರ್ಥ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಪ್ರತಿ ಲೀಟರ್ ಪೆಟ್ರೋಲ್ ಮೇಲೆ ₹53 ಮತ್ತು ಡೀಸೆಲ್ ಮೇಲೆ ₹52 ರಷ್ಟು ತೆರಿಗೆಯನ್ನು ವಸೂಲಿ ಮಾಡುತ್ತಿವೆ.

. ಶೇ 82ರಷ್ಟು ಆಮದು ಮಾಡಿಕೊಳ್ಳುವ ತೈಲದ ಮೇಲೆ ಅವಲಂಬಿತವಾಗಿರುವ ಭಾರತ ಸರ್ಕಾರವು ಪಶ್ಚಿಮ ಏಷ್ಯಾದಲ್ಲಿನ ಯುದ್ಧದ ಪರಿಣಾಮ ಮಾರ್ಚ್ ತಿಂಗಳಿಂದ ಇಂಧನಕ್ಕೆ ವಿಧಿಸುವ ಹೆಚ್ಚುವರಿ ಅಬಕಾರಿ ಸುಂಕದಲ್ಲಿ ₹10 ಕಡಿಮೆ ಮಾಡಿತು. ಇದು ಗ್ರಾಹಕರ ಮೇಲಿನ ಹೊರೆಯನ್ನು ಕಡಿಮೆ ಮಾಡಿತಾದರೂ, ಪ್ರಸಕ್ತ ಆಪತ್ಕಾಲದಲ್ಲಿ ಇಂಧನದ ಬೆಲೆಯನ್ನು ₹3 ಏರಿಕೆ ಮಾಡಿದೆ. ಇದಕ್ಕೆ ಕಾರಣ, ತೈಲ ಕಂಪನಿಗಳಿಗೆ ಆಗಿರುವ 1 ಲಕ್ಷ ಕೋಟಿ ರೂಪಾಯಿ ನಷ್ಟವೆಂದು ಹೇಳಿದೆ. ಆದರೆ, ತೈಲ ಕಂಪನಿಗಳ ಲಾಭ–ನಷ್ಟ ಹಾಗೂ ಇಂಧನ ತೆರಿಗೆ ನೀತಿ ಪರಿಶೀಲಿಸಿ ನೋಡಿದಾಗ, ಭಾರತೀಯರನ್ನು ತೈಲ ಮತ್ತು ತೆರಿಗೆಗಳು ಹೇಗೆ ಸುಡುತ್ತಿವೆ ಎಂಬುದು ತಿಳಿಯುತ್ತದೆ.

. ಏಪ್ರಿಲ್ 2025ರವರೆಗೆ ಒಕ್ಕೂಟ ಸರ್ಕಾರ ಪೆಟ್ರೋಲ್ ಮತ್ತು ಡೀಸೆಲ್ ಮೇಲೆ ವಿಧಿಸಿದ್ದ ಅಬಕಾರಿ ಸುಂಕ ₹20 ಮತ್ತು ₹16 ಆಗಿತ್ತು. ಇದು ನವೆಂಬರ್ 2021ರಲ್ಲಿ ₹28 ಮತ್ತು ₹22 ಇತ್ತು. ಜೂನ್ 2020ರಲ್ಲಿ ಗರಿಷ್ಠ ₹33 ಮತ್ತು ₹32 ಮುಟ್ಟಿತ್ತು.

. ಹೀಗೆ 2014–15ನೇ ಸಾಲಿನಲ್ಲಿ ಒಕ್ಕೂಟ ಸರ್ಕಾರ ಇಂಧನದ ಮೇಲಿನ ಅಬಕಾರಿ ಸುಂಕದಲ್ಲಿ ಸಂಗ್ರಹಿಸಿದ್ದು ₹99,068 ಕೋಟಿ; 2024–25ನೇ ಸಾಲಿನಲ್ಲಿ ಸಂಗ್ರಹಿಸಿದ್ದು ₹2.76 ಲಕ್ಷ ಕೋಟಿ. ದುರಂತವೆಂದರೆ, ಭಾರತೀಯರು ಸಾವು–ಬದುಕಿನ ನಡುವೆ ನರಳುತ್ತಿದ್ದ ಕೋವಿಡ್ ಸಮಯದಲ್ಲಿ ಸಂಗ್ರಹಿಸಿದ್ದು ಬರೋಬ್ಬರಿ ₹3.72 ಲಕ್ಷ ಕೋಟಿ.

. ಮತ್ತಷ್ಟು ಅಚ್ಚರಿಯ ಸಂಗತಿಯೆಂದರೆ, ಮಾರುಕಟ್ಟೆ ಕಚ್ಚಾತೈಲ ದರ 2016ರಲ್ಲಿ ಪ್ರತಿ ಲೀಟರ್ಗೆ ₹14ಕ್ಕೆ ಕುಸಿದಾಗ ಭಾರತೀಯರಿಗೆ ಪೆಟ್ರೋಲನ್ನು ₹64ಕ್ಕೆ ಮಾರಾಟ ಮಾಡಲಾಗಿತ್ತು. 2020ರಲ್ಲಿ ₹21ಕ್ಕೆ ಕುಸಿದಾಗ ಭಾರತೀಯರಿಗೆ ಪೆಟ್ರೋಲನ್ನು ₹80ಕ್ಕೆ ಮಾರಾಟ ಮಾಡಲಾಗಿತ್ತು. ಅದೇ ವರ್ಷ ಏಪ್ರಿಲ್ ತಿಂಗಳಲ್ಲಿ ಕಚ್ಚಾತೈಲ ದರ ಸಾರ್ವಕಾಲಿಕ ಪ್ರತಿ ಲೀಟರ್ಗೆ ₹9ಕ್ಕೆ ಇಳಿದಿತ್ತು. 2025ರಲ್ಲಿ ₹41ಕ್ಕೆ ಕುಸಿದಾಗ, ಭಾರತೀಯರಿಗೆ ₹95ಕ್ಕೆ ಮಾರಾಟ ಮಾಡಲಾಯಿತು. ಹೀಗೆ ಒಕ್ಕೂಟ ಸರ್ಕಾರ 2014–15ರಿಂದ 2024–25ರವರೆಗೆ ಸಂಗ್ರಹಿಸಿರುವ ಅಬಕಾರಿ ಸುಂಕ ₹27.61 ಲಕ್ಷ ಕೋಟಿ. ರಾಜ್ಯಗಳು ಇದಕ್ಕಿಂತ ತುಸು ಕಡಿಮೆ ಸಂಗ್ರಹಿಸಿರಬಹುದು.

. ರಾಜ್ಯಸಭೆಯಲ್ಲಿ ಅಶೋಕ್ಕುಮಾರ್ ಮಿತ್ತಲ್ ಅವರು ಇಂಧನದಿಂದ ಸಂಗ್ರಹಿಸಿರುವ ತೆರಿಗೆ ಹಣದ ಮಾಹಿತಿಯನ್ನು ತಿಳಿಸಬೇಕೆಂದು ಕೇಳಿರುವ ಚುಕ್ಕೆರಹಿತ ಪ್ರಶ್ನೆಗೆ, ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಇಲಾಖೆಯ ರಾಜ್ಯ ಸಚಿವರಾದ ಸುರೇಶ್ ಗೋಪಿಯವರು ಲಿಖಿತ ಉತ್ತರ ನೀಡಿದ್ದಾರೆ. ಅವರ ಉತ್ತರದ ಪ್ರಕಾರ, 2024–25ರಲ್ಲಿ ಇಂಧನದ ಮೇಲೆ ತೆರಿಗೆ ವಿಧಿಸಿ ಭಾರತೀಯರಿಂದ ಒಕ್ಕೂಟ ಹಾಗೂ ರಾಜ್ಯ ಸರ್ಕಾರಗಳು ವಸೂಲಿ ಮಾಡಿರುವ ಮೊತ್ತ ₹7.4 ಲಕ್ಷ ಕೋಟಿ.

. ಇದು ಇಂಧನ ಬೆಲೆಯ ನೈಜ ಕಥೆ. ಕಳೆದ 12 ವರ್ಷಗಳಿಂದ ಭಾರತೀಯರು ಖರೀದಿಸುವ ಇಂಧನದ ಮೇಲೆ ಇಷ್ಟೊಂದು ತೆರಿಗೆ ವಿಧಿಸಿ, ಈಗ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಹುಚ್ಚಾಟದಿಂದ ಆರಂಭವಾದ ಯುದ್ಧದಿಂದಾಗಿ ಕಚ್ಚಾತೈಲ ದರ ಬರೀ ಮೂರು ತಿಂಗಳಿಂದ ಹೆಚ್ಚಾಗಿರುವುದಕ್ಕೆ ತೈಲ ಕಂಪನಿಗಳಿಗೆ ಒಂದು ಲಕ್ಷ ಕೋಟಿ ರೂಪಾಯಿ ನಷ್ಟವಾಯಿತೆಂದು ಮತ್ತೆ ಬೆಲೆಯೇರಿಸುವುದು ಅಮಾನವೀಯವಲ್ಲವೆ? ನಷ್ಟವನ್ನ ಭರಿಸುವುದು ಅನಿವಾರ್ಯವೇ ಆದಲ್ಲಿ, ಅದನ್ನು ಜನಸಾಮಾನ್ಯರ ಮೇಲೆ ಹೇರುವುದರ ಬದಲು ಪರ್ಯಾಯಗಳನ್ನು ಗಮನಿಸಬಹುದು.

. 2015ರಲ್ಲಿ ರದ್ದುಗೊಳಿಸಿದ ಅತಿಶ್ರೀಮಂತರ ಮೇಲಿನ ‘ಸಂಪತ್ತು ತೆರಿಗೆ’ಯನ್ನು ಮತ್ತೆ ಜಾರಿಗೊಳಿಸಬಹುದು. 2019ರಲ್ಲಿ ಕಾರ್ಪೊರೇಟ್ ಕಂಪನಿಗಳ ತೆರಿಗೆಯನ್ನು ಶೇ 30ರಿಂದ ಶೇ 22ಕ್ಕೆ ಹಾಗೂ ನೂತನ ಉತ್ಪಾದನಾ ಕಂಪನಿಗಳ ಕಾರ್ಪೊರೇಟ್ ತೆರಿಗೆಯನ್ನು ಶೇ 25ರಿಂದ ಶೇ 15ಕ್ಕೆ ಇಳಿಸಿದ್ದನ್ನು ಮತ್ತೆ ಏರಿಸಬಹುದು. ನಮ್ಮ ದೇಶದ ಮೊದಲ ಹತ್ತು ಅತಿಶ್ರೀಮಂತರ ಸಂಪತ್ತು ₹34 ಲಕ್ಷ ಕೋಟಿಯಷ್ಟಿದೆ. ಇವರು ಗಳಿಸುವ ಲಾಭದ ಮೇಲೆ ಬರೀ ಶೇ 1ರಷ್ಟು ‘ದೇಶಭಕ್ತಿ’ ತೆರಿಗೆ ವಿಧಿಸಿದರೂ ದೇಶದ ಆರ್ಥಿಕತೆಗೆ ಅನುಕೂಲವಾಗುತ್ತದೆ. ಪ್ರತಿ ಗಂಟೆಗೆ ಕೋಟಿ ಲೆಕ್ಕದಲ್ಲಿ ಆದಾಯ ಗಳಿಸುವ ಉದ್ಯಮಿಗಳಿಂದ ಸಂಕಷ್ಟ ಕಾಲದಲ್ಲಿ ಹೆಚ್ಚುವರಿ ತೆರಿಗೆ ವಸೂಲಿ ಮಾಡುವುದು ಹಾಗೂ ಅವರು ಹೆಚ್ಚಿನ ತೆರಿಗೆ ನೀಡುವುದು ‘ದೇಶಪ್ರೇಮ’ದ ನಡೆಯಾಗುತ್ತದೆ. ಇದಕ್ಕೆ ತದ್ವಿರುದ್ಧವಾಗಿ ಜನಸಾಮಾನ್ಯರ ಉಳಿತಾಯದ ಹುಂಡಿಗೆ ಕೈ ಹಾಕಿ 3 ರೂಪಾಯಿ ಚಿಲ್ಲರೆ ಕಾಸು ಎಗರಿಸುವುದು ಅನ್ಯಾಯವಾಗುತ್ತದೆ.

. ಪೆಟ್ರೋಲ್–ಡೀಸೆಲ್ ಬೆಲೆ ಏರಿಕೆಯನ್ನು ತೈಲ ಮಾರಾಟ ಕಂಪನಿಗಳ ತೀರ್ಮಾನ ಎಂದು ಬಿಂಬಿಸಲಾಗುತ್ತಿದೆ. ಆದರೆ, ಜನಸಮೂಹದ ಮೇಲೆ ಪರಿಣಾಮ ಬೀರುವ ನಿರ್ಧಾರಗಳನ್ನು ಕಂಪನಿಗಳು ತೆಗೆದುಕೊಳ್ಳದಂತೆ ನೋಡಿಕೊಳ್ಳುವ ಹೊಣೆಗಾರಿಕೆ ಸರ್ಕಾರದ್ದೇ ಆಗಿದೆ. ಚುನಾವಣೆ ಮುಗಿಯುವವರೆಗೂ ಬೆಲೆ ಏರಿಕೆಯನ್ನು ತಡೆಯುವ ಅಧಿಕಾರ ಸರ್ಕಾರಕ್ಕೆ ಇರುವಾಗ, ಚುನಾವಣಾ ನಂತರವೂ ಆ ಅಧಿಕಾರವನ್ನು ಬಳಸಬೇಕಾಗುತ್ತದೆ. ದೇಶದಲ್ಲಿ ಆರ್ಥಿಕ ತುರ್ತು ಪರಿಸ್ಥಿತಿ ಇರುವುದನ್ನು ಸರ್ಕಾರ ಪರೋಕ್ಷವಾಗಿ ಒಪ್ಪಿಕೊಂಡಿದೆ. ಇಂಥ ಸಂದರ್ಭದಲ್ಲಿ ಜನಸಾಮಾನ್ಯರನ್ನು ಮತ್ತಷ್ಟು ಆರ್ಥಿಕ ಸಂಕಷ್ಟಕ್ಕೆ ಸರ್ಕಾರ ಸಿಲುಕಿಸಬಾರದು.

. ದೇಶಕ್ಕಿಂತ ದೊಡ್ಡವರು ಯಾರೂ ಇಲ್ಲ. ದೇಶವೆಂದರೆ ಮಣ್ಣಲ್ಲ, ಜನರು ಎನ್ನುತ್ತಾರೆ ತೆಲುಗು ಕವಿ ಗುರುಜಾಡ ಅಪ್ಪಾರಾವ್. ಇಂಧನ ಬೆಲೆ ಹೆಚ್ಚಾದರೆ ಆಹಾರ ಪದಾರ್ಥದಿಂದ ಹಿಡಿದು ಸಾರಿಗೆ, ಔಷಧಿ, ಬಟ್ಟೆ, ಪೆನ್ನು, ಪುಸ್ತಕ ಎಲ್ಲವುದರ ಬೆಲೆ ಹೆಚ್ಚಾಗುತ್ತದೆ. ಬೀದಿಬದಿಯ ವ್ಯಾಪಾರ, ಅಸಂಘಟಿತ ಕಾರ್ಮಿಕರ ಬದುಕು, ಗರ್ಭಿಣಿಯರ ಆಹಾರ, ಹಸುಳೆಗಳಿಗೆ ತಾಯಂದಿರ ಎದೆಹಾಲು ಕೊರತೆಯಾಗುತ್ತದೆ.

. ಈ ವರ್ಷ ಎಲ್ ನಿನೊ ವಿದ್ಯಮಾನ ಭಾರತವನ್ನೇ ಬರಡಾಗಿಸಲು ಹವಣಿಸುತ್ತಿರುವ ಸಂದರ್ಭದಲ್ಲಿ, ಬಡ ಹಾಗೂ ಮಧ್ಯಮವರ್ಗದ ಭಾರತೀಯರ ತೂತು ಬಿದ್ದ ಜೇಬಿನಿಂದ ತೆರಿಗೆ ವಸೂಲಿ ಮಾಡುವ ಬದಲು, ಉಳ್ಳವರಿಂದ ಹೆಚ್ಚಿನ ಪಾಲು ಪಡೆಯುವುದು ಜನಪರ ನಿಲುವಾಗುತ್ತದೆ. ಯಾವಾಗಲೂ ಬಡವರು ಹಾಗೂ ಜನಸಾಮಾನ್ಯರೇ ದೇಶಪ್ರೇಮ ಸಾಬೀತುಪಡಿಸಬೇಕೆ? ದೇಶಪ್ರೇಮವನ್ನು ವ್ಯಕ್ತ ಪಡಿಸುವ ಅವಕಾಶವನ್ನು ಶ್ರೀಮಂತ ಉದ್ಯಮಿಗಳು ಈ ಬಾರಿ ಬಿಟ್ಟುಕೊಡದಿರಲಿ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ವಿಕಾಸ್‌ ಆರ್‌. ಮೌರ್ಯ ಅವರ ವಿಶ್ಲೇಷಣೆ | ತೈಲದ ಉರಿ: ತೆರಿಗೆಯ ದರಿ

ಚಿನಕುರುಳಿ ಕಾರ್ಟೂನು: ಶುಕ್ರವಾರ, ಜೂನ್ 12, 2026

ಚುರುಮುರಿ: ಹೊಸ ಸುದ್ದಿ!

ಗುಂಡಣ್ಣ ಕಾರ್ಟೂನು: ಶುಕ್ರವಾರ, ಜೂನ್ 12, 2026

‘ಭಾರ್ಗವಿ LLB’ ಧಾರಾವಾಹಿಯಿಂದ ಹೊರಬಿದ್ದ ಸುಜಾತ ಅಕ್ಷಯ್: ನಟಿ ಸ್ವಾತಿಗೆ ಅವಕಾಶ

ಬೆಂಗಳೂರಿನಲ್ಲಿ ಸೆ. 3ರಿಂದ ಗ್ಲೋಬಲ್ ಚೆಸ್ ಲೀಗ್

FIFA 2026: ಟಿಕೆಟ್ ದರ ಅತಿಯಾಯ್ತು ಎನ್ನುತ್ತಿವೆ ಖಾಲಿ ಕುರ್ಚಿಗಳು!

ಫಿಫಾ ವಿಶ್ವಕಪ್ 2026: ಉದ್ಘಾಟನಾ ಪಂದ್ಯದಲ್ಲೇ ಮೂರು ರೆಡ್ ಕಾರ್ಡ್!

ಮೆಸ್ಸಿ ಏಲಿಯನ್: ಅರ್ಜೆಂಟೀನಾ ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡ ಎಂದ ಮೆಹ್ತಾಬ್

ಒಳನೋಟ: ಜೈಲಿಗೆ ಬೇಕು ಸುಧಾರಣೆ

ಒಳನೋಟ| ಹಕ್ಕಿಲ್ಲದ ಹಕ್ಕಿಪಿಕ್ಕಿಗಳು: ಉತ್ತರ ಕರ್ನಾಟಕದಲ್ಲಿ ಇವರ ಸ್ಥಿತಿ ಶೋಚನೀಯ

ಒಳನೋಟ: ಪುರಾತತ್ವ ತಾಣ ಅನಾಥ, ಹಾಳು ಸುರಿಯುವ ಸ್ಮಾರಕಗಳು

ಒಳನೋಟ: ಆಮೆಗತಿಯಲ್ಲಿ ಸಾಗುವ ‘ಸರ್ವೆ’

ಚಿನಕುರುಳಿ ಕಾರ್ಟೂನು: ಶುಕ್ರವಾರ, ಜೂನ್ 12, 2026

ಚುರುಮುರಿ: ಹೊಸ ಸುದ್ದಿ!

ಗುಂಡಣ್ಣ ಕಾರ್ಟೂನು: ಶುಕ್ರವಾರ, ಜೂನ್ 12, 2026

‘ಭಾರ್ಗವಿ LLB’ ಧಾರಾವಾಹಿಯಿಂದ ಹೊರಬಿದ್ದ ಸುಜಾತ ಅಕ್ಷಯ್: ನಟಿ ಸ್ವಾತಿಗೆ ಅವಕಾಶ