ದಳಪತಿ ವಿಜಯ್‌, ಟಿವಿಕೆಯನ್ನು ಪಟ್ಟಕ್ಕೇರಿಸಲಿವೆಯೇ ಅಭಿಮಾನಿ ಸಂಘಗಳು?

ತಮಿಳುನಾಡು ರಾಜಕಾರಣಕ್ಕೆ ನಟ ವಿಜಯ್ ಪ್ರವೇಶವು ಸಂಚಲನ ಸೃಷ್ಟಿಸಿದೆ. ಅವರ ತಮಿಳಗ ವೆಟ್ರಿ ಕಳಗಂ ಪಕ್ಷವು ದ್ರಾವಿಡ ಪಕ್ಷಗಳಿಗೆ ಪೆಟ್ಟು ನೀಡುವುದೇ? ರಾಜ್ಯ ರಾಜಕಾರಣದಲ್ಲಿ ಯಶಸ್ಸು ಸಾಧಿಸಿಲು ಅಭಿಮಾನಿಗಳು ಕೈ ಹಿಡಿಯುವರೇ ಎಂಬ ಪ್ರಶ್ನೆಗಳು ಎದ್ದಿವೆ. . ತಮಿಳುನಾಡಿನ ರಾಜಕೀಯವು ದ್ರಾವೀಡ ನೆಲೆಯ ಎರಡು ಪಕ್ಷಗಳು ಹಾಗೂ ಸಿನಿ ಪರದೆಯೊಂದಿಗೆ ನಂಟುಳ್ಳ ರಾಜಕಾರಣಿಗಳ ಸುತ್ತಲೇ ಸುತ್ತುತ್ತಾ ಬಂದಿದೆ.

ನಟ ಚಂದ್ರಶೇಖರನ್ ಜೋಸೆಫ್ ವಿಜಯ್ ಅವರ ʼತಮಿಳಗ ವೆಟ್ರಿ ಕಳಗಂʼ (ಟಿವಿಕೆ) ಪಕ್ಷವು ಈ ಬಾರಿ ವಿಧಾನಸಭಾ ಚುನಾವಣಾ ಅಖಾಡ ಪ್ರವೇಶಿಸಿರುವುದರಿಂದ, ರಾಜ್ಯ ರಾಜಕೀಯದೊಂದಿಗೆ ಬೆಸೆದುಕೊಂಡಿರುವ ಸಿನಿಮಾ ಜೊತೆಗಿನ ಸಂಬಂಧಕ್ಕೆ ಮರುಜೀವ ಬಂದಂತಾಗಿದೆ.

ಚುನಾವಣಾ ಕಣ ರಂಗೇರಿದ್ದು ಯಾವ ಪಕ್ಷ ಅಥವಾ ಮೈತ್ರಿಕೂಟಕ್ಕೆ ಅಧಿಕಾರ ನೀಡಬೇಕು ಎಂಬುದನ್ನು ಮತದಾರರು ಏಪ್ರಿಲ್ 23ರಂದು ನಿರ್ಧರಿಸಲಿದ್ದಾರೆ.

ಸೂಪರ್ ಸ್ಟಾರ್ ರಜನಿಕಾಂತ್ ಅವರು 2021ರಲ್ಲಿ ರಾಜಕೀಯ ಪ್ರವೇಶಿಸಲಿದ್ದಾರೆ ಎಂದು ಹೇಳಲಾಗಿತ್ತು. ಆದರೆ, ಸುಳ್ಳಾಯಿತು. ಹೀಗಾಗಿ, ಆ ವರ್ಷದ ವಿಧಾನಸಭಾ ಚುನಾವಣೆಯು ʼಅಖಿಲ ಭಾರತ ಅಣ್ಣಾ ದ್ರಾವಿಡ ಮುನ್ನೇತ್ರ ಕಳಗಂʼ (ಎಐಎಡಿಎಂಕೆ) ಹಾಗೂ ʼಡ್ರಾವಿಡ ಮುನ್ನೇತ್ರ ಕಳಗಂʼ (ಡಿಎಂಕೆ) ನಡುವಣ ಹೋರಾಟಕ್ಕೆ ಸೀಮಿತವಾಗಿತ್ತು. 2016 ರಲ್ಲಿ ಜೆ. ಜಯಲಲಿತಾ ಹಾಗೂ 2018ರಲ್ಲಿ ಎಂ. ಕರುಣಾನಿಧಿ ಕಾಲವಾದ ನಂತರ, ಆ ಎರಡೂ ಪಕ್ಷಗಳನ್ನು ಸಿನಿಮಾ ರಂಗದೊಂದಿಗೆ ತುಸು ದೂರವೇ ಎನ್ನಬಹುದಾದ ವ್ಯಕ್ತಿಗಳು ಮುನ್ನಡೆಸುತ್ತಿದ್ದಾರೆ. ಹೀಗಾಗಿ, ವಿಜಯ್ ಅವರ ರಾಜಕೀಯ ಪ್ರವೇಶವವು ದಕ್ಷಿಣ ರಾಜ್ಯದಲ್ಲಿ ಹೊಸ ಸಂಚಲನ ಮೂಡಿಸಿದೆ.

ಮತಗಳಾಗಬೇಕು ಜನಪ್ರಿಯತೆ!

ಸಿನಿರಂಗದಲ್ಲಿ ʼದಳಪತಿʼ (ತಲಪತಿ) ಎಂದೇ ಖ್ಯಾತರಾಗಿರುವ 51ರ ವಿಜಯ್, ತಮ್ಮ ಅಪಾರ ಅಭಿಮಾನಿಗಳ ಬೆಂʼಬಲʼದೊಂದಿಗೆ 2024ರಲ್ಲೇ ಟಿವಿಕೆ ಸ್ಥಾಪಿಸಿದರು. ಪ್ರಮುಖ ರಾಜಕೀಯ ಪಕ್ಷವೊಂದರ ಜೊತೆ ಕೈಜೋಡಿಸಲಿದೆ ಎಂಬ ಊಹಾಪೋಹಗಳು ಹರಿದಾಡುತ್ತಿವೆಯಾದರೂ, ಅವನ್ನೆಲ್ಲ ವಿಜಯ್ ಸಾರಾಸಗಟಾಗಿ ಅಲ್ಲಗಳೆದಿದ್ದಾರೆ. ಟಿವಿಕೆಗೆ ಮೊದಲ ಪರೀಕ್ಷೆ ಇನ್ನಷ್ಟೇ ಎದುರಲಾಗಲಿದೆ.

ಬಡವರಿಗಾಗಿ ಹೋರಾಡುವ, ಭ್ರಷ್ಟರನ್ನು ಹಣಿಯುವ, ನ್ಯಾಯಕ್ಕಾಗಿ ಕೆಲಸ ಮಾಡುವ ನಾಯಕನ ಪಾತ್ರಗಳಲ್ಲಿ ತೆರೆಯ ಮೇಲೆ ಮಿಂಚಿರುವ ವಿಜಯ್ಗೆ ಅವು, ಯುವಕರ ಕಣ್ಮಣಿ, ಜನನಾಯಕನ ಇಮೇಜ್ ತಂದುಕೊಟ್ಟಿವೆ. ಅದೇ ಜನಪ್ರಿಯತೆ ಮುಂದುವರಿಸುವ ತವಕದಲ್ಲಿ ವಿಜಯ್ ಇದ್ದಾರೆ. ರಾಜಕೀಯ ಕಥಾಹಂದರದ ʼಜನನಾಯಗನ್ʼ ಸಿನಿಮಾ, ಅವರು ಪೂರ್ಣ ಪ್ರಮಾಣದಲ್ಲಿ ರಾಜಕೀಯದಲ್ಲೇ ತೊಡಗಿಕೊಳ್ಳುವ ಮೊದಲೇ ತೆರೆಕಾಣಲಿದೆ ಎಂಬುದರಲ್ಲಿ ಅಚ್ಚರಿಯೇನಿಲ್ಲ. ಈ ಸಿನಿಮಾ ಇದೇ ವರ್ಷ ಜನವರಿ 9ರಂದು ಬಿಡಗಡೆಯಾಗಲಿದೆ ಎಂದು ಹೇಳಲಾಗಿತ್ತು. ಆದರೆ, ಸೆನ್ಸಾರ್ ಮಂಡಳಿ ಮತ್ತು ಚುನಾವಣಾ ಆಯೋಗದಿಂದ ಈವರೆಗೆ ಅನುಮತಿ ಸಿಕ್ಕಿಲ್ಲ.

ಇದರೊಟ್ಟಿಗೆ, ಕಳೆದ ವರ್ಷ ಸೆಪ್ಟೆಂಬರ್ 27 ರಂದು ಕರೂರಿನಲ್ಲಿ ನಡೆದ ಪಕ್ಷದ ಸಮಾವೇಶದ ವೇಳೆ ಸಂಭವಿಸಿದ ಕಾಲ್ತುಳಿತ ಪ್ರಕರಣದ ತನಿಖೆ ನಡೆಸುತ್ತಿರುವ ಸಿಬಿಐ, ಟಿವಿಕೆ ಪಕ್ಷದ ರಾಜಕೀಯ ಹಾದಿಯನ್ನೂ ಸಂಕೀರ್ಣಗೊಳಿಸುತ್ತಿದೆ.

ವಿಜಯ್ ಅವರ ಪಕ್ಷ, ಈವರೆಗೆ ಆಯೋಜಿಸಿರುವ ರ್ಯಾಲಿಗಳು, ಸಾರ್ವಜನಿಕ ಸಭೆಗಳು ಅಭೂತಪೂರ್ವ ಯಶಸ್ಸು ಸಾಧಿಸಿವೆ. ಅದರಲ್ಲೂ ಮಹಿಳೆಯರು ಮತ್ತು ಯುವಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿವೆ. ಆದರೆ, ಇವೆಲ್ಲವೂ ಮತಗಳಾಗಿ ಪರಿವರ್ತನೆಯಾಗುತ್ತವೆಯೇ, ಟಿವಿಕೆ ಪಕ್ಷಕ್ಕೆ ಫೋರ್ಟ್ ಸೇಂಟ್ ಜಾರ್ಜ್ನಲ್ಲಿ (ವಿಧಾನಸಭೆ) ಸಾಕಷ್ಟು ಸ್ಥಾನಗಳನ್ನು ಧಕ್ಕಿಸಿಕೊಡುತ್ತವೆಯೇ ಎಂಬುದನ್ನು ಕಾದು ನೋಡಬೇಕು.

ಸಿನಿಮಾ, ಅಭಿಮಾನಿಗಳು ಮತ್ತು ರಾಜಕೀಯ

ಡಿಎಂಕೆ ಪಕ್ಷದ ನಿರ್ಮಾತೃಗಳಾದ ಸಿ.ಎನ್. ಅಣ್ಣಾದೊರೈ ಹಾಗೂ ಕರುಣಾನಿಧಿ ಅವರು, ತಮಿಳು ಸಿನಿಮಾರಂಗದಲ್ಲಿ ಚಿತ್ರಕಥೆಗಾರರಾಗಿ ಖ್ಯಾತಿ ಗಳಿಸಿದವರು. ಎಂಜಿಆರ್ ಎಂದೇ ಜನಪ್ರಿಯರಾಗಿದ್ದ ಎಂ.ಜಿ. ರಾಮಚಂದ್ರನ್ ಅವರೂ 1972ರ ವರೆಗೆ ಡಿಎಂಕೆ ಪಕ್ಷದಲ್ಲೇ ಇದ್ದವರು.

ತಮ್ಮ ವಾಕ್ಚಾತುರ್ಯ, ಭಾಷೆಯ ಮೇಲಿನ ಹಿಡಿತದ ಕಾರಣದಿಂದಾಗಿ ಸಾರ್ವಜನಿಕರನ್ನು ಸೆಳೆಯುತ್ತಿದ್ದ ಅಣ್ಣಾದೊರೈ, ಜ್ವಲಂತ ಸಮಸ್ಯೆಗಳನ್ನು ಎತ್ತಿ ತೋರಿಸುತ್ತಾ ಜನರಿಗೆ ಹತ್ತಿರವಾಗಿದ್ದರು. ಇತ್ತ ಕರುಣಾನಿಧಿ ಅವರು, ಶಿವಾಜಿ ಗಣೇಶನ್, ಎಂಜಿಆರ್ ಅವರಂತಹ ನಟರನ್ನು ನಾಯಕರನ್ನಾಗಿಸುವ ಪ್ರಭಾವಶಾಲಿ ಭಾಷಣ, ಸಂಭಾಷಣೆಗಳನ್ನು ಬರೆಯುವ ಕೆಲಸ ಮಾಡಿದ್ದರು.

ಹಾಗಾಗಿ, ಡಿಎಂಕೆ ಪಕ್ಷವು ಸಿನಿಮಾ ಮಂದಿಗೆ ವೇದಿಕೆ ಕಲ್ಪಿಸುವ ಜೊತೆಜೊತೆಗೆ ತನ್ನ ಸಂಘಟನೆಯನ್ನೂ ಬಲಪಡಿಸಿಕೊಂಡಿತ್ತು. ಎಲ್ಲೆಡೆ ಇದ್ದ ನಟರ ಅಭಿಮಾನಿ ಸಂಘಗಳು ಪಕ್ಷಕ್ಕಾಗಿ ಕೆಲಸ ಮಾಡಿದವು. ಸಾಮಾಜಿಕ ಸಂದೇಶಗಳನ್ನು ಸಾರಲು, ಜಾತಿ ವಿರೋಧಿ ನಿಲುವುಗಳನ್ನು ಪ್ರಸಾರ ಮಾಡಲು, ಭಾಷಾ ಪ್ರೇಮವನ್ನು ಹರಡಲು ಧ್ವನಿಯಾದವು. ಆ ಮೂಲಕ, ಪಕ್ಷ ಹಾಗೂ ನಟರ ಪರವಾಗಿ ಮತಗಳನ್ನು ತಂದುಕೊಡಲು ಹೆಗಲಾದವು.

ಅದೇ ಕಾರಣಕ್ಕೆ ಆಗ ಸಿನಿಮಾ ಹಾಗೂ ರಾಜಕೀಯ ಕೆಲಸಗಳು ಒಟ್ಟಾಗಿ ಸಾಗಿದ್ದವು. ಅದೇ ಪ್ರವೃತ್ತಿಯು ನಟರು ರಾಜಕೀಯ ನಂಟನ್ನು ಗಾಢಗೊಳಿಸಿಕೊಳ್ಳುವಲ್ಲಿಯೂ ಪ್ರಮುಖ ಪಾತ್ರ ವಹಿಸಿತ್ತು. ಶಿವಾಜಿ ಗಣೇಶನ್ ಅವರು ಕಾಂಗ್ರೆಸ್ ಸೇರಿದ್ದರು. ಅವರನ್ನು ಸಮರ್ಥವಾಗಿ ಎದುರಿಸುವುದಕ್ಕಾಗಿ ಡಿಎಂಕೆ ಪಕ್ಷವು ಎಂಜಿಆರ್ ಅವರನ್ನು ಬಳಸಿಕೊಂಡಿತ್ತು. ಅವರು, ತೆರೆಯ ಮೇಲಿನ ಪಾತ್ರಗಳ ಮೂಲಕ, ನಿರ್ಗತಿಕರ ಪರ ಮಾತನಾಡುವ ಜನಾನುರಾಗಿ ನಾಯಕನ ಇಮೇಜ್ ಬೆಳೆಸಿಕೊಳ್ಳುವ ಪ್ರಯತ್ನವನ್ನು ಮಾಡಿದ್ದರು.

1972ರಲ್ಲಿ ಡಿಎಂಕೆ ಇಂದ ಹೊರಬಂದ ಎಂಜಿಆರ್, ಎಐಎಡಿಎಂಕೆ ಸ್ಥಾಪಿಸಿದರು. ಅವರ ನಿಧನಾನಂತರ (1987ರಲ್ಲಿ) ಜಯಲಲಿತಾ ಅವರು, ಎಐಎಡಿಎಂಕೆ ಮುನ್ನಡೆಸುವ ಹೊಣೆ ಹೊತ್ತುಕೊಂಡರು.

ಡಿಎಂಕೆಯಲ್ಲಿ ʼಉದಯʼನಿಧಿ

ಮಾಜಿ ಮುಖ್ಯಮಂತ್ರಿಗಳಾದ ಜಯಲಲಿತಾ, ಕರುಣಾನಿಧಿ ಬಳಿಕ, ಅವರ ಪಕ್ಷಗಳನ್ನು ನೇರವಾಗಿ ಸಿನಿಮಾದೊಂದಿಗೆ ನಂಟು ಹೊಂದಿಲ್ಲದವರೇ ಮುನ್ನಡೆಸುತ್ತಾ ಬಂದಿದ್ದಾರೆ. ಆ ಸಂದರ್ಭದಲ್ಲಿ ರಾಜಕೀಯಕ್ಕೆ ಧುಮುಕಲು ಆಸಕ್ತಿ ತೋರಿದ್ದ, ರಜನಿಕಾಂತ್ ನಂತರ ಹಿಂದೇಟು ಹಾಕಿದರು. ರಾಜ್ಯದಲ್ಲಿ ಪ್ರಭಾಶಾಲಿಯಾಗಲು ಕಮಲ್ ಹಾಸನ್ ಅವರ ಪಕ್ಷಕ್ಕೂ ಸಾಧ್ಯವಾಗಲಿಲ್ಲ. ಹಾಗಾಗಿ, ತಮಿಳುನಾಡಿನ ಮಟ್ಟಿಗೆ, ವಿಜಯ್ ಹಾಗೂ ಅವರ ಪಕ್ಷ, ಸಿನಿಮಾ-ರಾಜಕೀಯದ ಸಂಬಂಧವನ್ನು ಮತ್ತೆ ಮುನ್ನೆಲೆಗೆ ತಂದಿದೆ.

ಚುನಾವಣಾ ರಾಜಕೀಯಕ್ಕಿಳಿಯುವುದಾಗಿ 2024ರ ಫೆಬ್ರುವರಿಯಲ್ಲಿ ಘೋಷಿಸಿದ್ದ ವಿಜಯ್, ಅದೇ ವರ್ಷ ಆಗಸ್ಟ್ನಲ್ಲಿ ಪಕ್ಷದ ಹೆಸರು, ಧ್ವಜ ಮತ್ತು ಚಿಹ್ನೆಯನ್ನು ಪ್ರಕಟಿಸಿದ್ದರು. ಅದಾದ ಒಂದೇ ತಿಂಗಳಲ್ಲಿ (ಸೆಪ್ಟೆಂಬರ್ನಲ್ಲಿ), ಮುಖ್ಯಮಂತ್ರಿ ಹಾಗೂ ಡಿಎಂಕೆ ಮುಖ್ಯಸ್ಥ ಎಂ.ಕೆ. ಸ್ಟಾಲಿನ್ ಅವರು ತಮ್ಮ ಮಗ ಉದಯನಿಧಿ ಸ್ಟಾಲಿನ್ ಅವರನ್ನು ರಾಜ್ಯದ ಉಪ ಮುಖ್ಯಮಂತ್ರಿಯನ್ನಾಗಿ ನೇಮಿಸಿದರು.

48 ವರ್ಷದ ಉದಯನಿಧಿಗೆ ನೀಡಲಾದ ರಾಜಕೀಯ ʼಬಡ್ತಿʼಯನ್ನು, ವಿಜಯ್ ಓಟಕ್ಕೆ ತಡೆಯೊಡ್ಡುವ ಲೆಕ್ಕಾಚಾರದ ಕ್ರಮವೆಂದು ಅಂದಾಜಿಸಬಹುದು. ನಟ, ನಿರ್ಮಾಪಕ ಉದಯನಿಧಿ ಅವರ ನೇಮಕವನ್ನು ಚಿತ್ರೋದ್ಯಮದೊಂದಿಗೆ ತಮ್ಮ ಕುಟುಂಬವನ್ನು ಮತ್ತೆ ಸಂಪರ್ಕಿಸುವ ಹಾಗೂ ಕುಟುಂಬದ ಮುಂದಿನ ತಲೆಮಾರನ್ನು ಸಜ್ಜುಗೊಳಿಸುವ ಪ್ರಯತ್ನದ ಭಾಗವೆಂದೇ ನೋಡಬೇಕಾಗಿದೆ.

ಕಮಲ್ ಮಾತ್ರವಲ್ಲದೆ, ನಟರಾದ ವಿಜಯಕಾಂತ್, ಶರತ್ ಕುಮಾರ್, ಸೀಮನ್ ಅವರೂ ರಾಜಕೀಯದಲ್ಲಿ ಛಾಪು ಮೂಡಿಸಲು ಪ್ರಯತ್ನಿಸಿದ್ದರು. ಈ ಪೈಕಿ, ವಿಜಯಕಾಂತ್ ಅವರಷ್ಟೇ ಅಲ್ಪಮಟ್ಟಿನ ಯಶಸ್ಸು ಸಾಧಿಸಿದ್ದರು. ಅವರ ʼದೇಸಿಯ ಮುರ್ಪೊಕ್ಕು ದ್ರಾವಿಡ ಕಳಗಂʼ (ಡಿಎಂಡಿಕೆ), 21ನೇ ಶತಮಾನದ ಆರಂಭದಲ್ಲಿ ಅಲ್ಪ ಮಟ್ಟಿಗೆ ಯಶಸ್ಸು ಕಂಡಿತ್ತು. ಆದರೆ ಈಗ ಅವನತಿಯತ್ತ ಮುಖ ಮಾಡಿದೆ. ವಿಜಯಕಾಂತ್ ನಿಧನದ ನಂತರ (2023ರಲ್ಲಿ) ಪಕ್ಷದ ಹೊಣೆ ಹೊತ್ತುಕೊಂಡಿರುವ ಅವರ ಪತ್ನಿ ಪ್ರೇಮಲತಾ, ಡಿಎಂಕೆಗೆ ಬೆಂಬಲ ಘೋಷಿಸಿದ್ದಾರೆ.

2021ರ ವಿಧಾನಸಭಾ ಚುನಾವಣೆ ವೇಳೆ, ಕಮಲ್ ಅವರ ʼಮಕ್ಕಳ್ ನೀದಿ ಮೈಯಂʼ (ಎಂಎನ್ಎಂ), ಶರತ್ ಕುಮಾರ್ ಅವರ ʼಆಲ್ ಇಂಡಿಯಾ ಸಮತುವ ಮಕ್ಕಳ್ ಕಚ್ಚಿʼ (ಎಐಎಸ್ಎಂಕೆ) ಇತರ ಪಕ್ಷಗಳ ಜೊತೆಗೂಡಿ ಎಲ್ಲಾ 234 ಕ್ಷೇತ್ರಗಳಲ್ಲಿಯೂ ಕಣಕ್ಕಿಳಿದಿದ್ದವು. ಆದರೆ, ಕೇವಲ ಶೇ 3ರಷ್ಟು ಮತಗಳನ್ನಷ್ಟೇ ಗಿಟ್ಟಿಸಿ, ನಿರೀಕ್ಷಿತ ಫಲಿತಾಂಶ ಪಡೆಯುವಲ್ಲಿ ವಿಫಲವಾಗಿದ್ದವು. ಎಂಎನ್ಎಂ ಕೂಡ ಇದೀಗ ಡಿಎಂಕೆ ಜೊತೆ ನಿಂತಿದೆ. ಎಐಎಸ್ಎಂಕೆ, ಬಿಜೆಪಿಯಲ್ಲಿ ವಿಲೀನವಾಗಿದೆ.

ನಟ, ನಿರ್ದೇಶಕ ಸೀಮನ್ ಅವರ ʼನಾಮ್ ತಮಿಳರ್ ಕಚ್ಚಿʼಯೂ, ಕಳೆದೆರಡು ವಿಧಾನಸಭಾ ಚುನಾವಣೆಗಳಲ್ಲಿ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಿಲ್ಲ.

ಇದನ್ನೆಲ್ಲ ನೋಡಿದರೆ, ಸಿನಿಮಾ ಮಂದಿ ಹಾಗೂ ಅವರ ಅಭಿಮಾನಿ ಸಂಘಗಳು ಚುನಾವಣಾ ಫಲಿತಾಂಶದ ಮೇಲೆ ಈವರೆಗೆ ಬೀರಿರುವ ಪರಿಣಾಮಗಳ ಬಗ್ಗೆ ವಿಜಯ್ ಹಾಗೂ ಟಿವಿಕೆ ಪಕ್ಷವು ಗಮನಹರಿಸುವ ಸಾಧ್ಯತೆ ಇದೆ. ಹೀಗಾಗಿ, ತಮಿಳು ಸಿನಿಮೋದ್ಯಮವು ರಾಜ್ಯ ರಾಜಕೀಯದ ಮೇಲಿನ ಹಿಡಿತವನ್ನು ಮತ್ತೆ ವಶಪಡಿಸಿಕೊಂಡಿದೆಯೇ ಎಂಬುದನ್ನು ಮೇ 4ರಂದು ಪ್ರಕಟವಾಗಲಿರುವ ಫಲಿತಾಂಶವೇ ಹೇಳಬೇಕಿದೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ದಳಪತಿ ವಿಜಯ್‌, ಟಿವಿಕೆಯನ್ನು ಪಟ್ಟಕ್ಕೇರಿಸಲಿವೆಯೇ ಅಭಿಮಾನಿ ಸಂಘಗಳು?

ಚಿನಕುರುಳಿ ಕಾರ್ಟೂನ್: ಮೇ 17 ಭಾನುವಾರ 2026

80 ವರ್ಷ ಹಳೆಯ ಸೀರೆಗಳ ಉಡುಪು: ‘ಕಾನ್’ ಅಂಗಳದಲ್ಲಿ ಕನ್ನಡತಿ ದಿಶಾ ಮದನ್ ಜಾದೂ!

ವಾರ ಭವಿಷ್ಯ: ಈ ರಾಶಿಯವರಿಗೆ ಸಂಗಾತಿಯಿಂದ ಕೆಲವೊಮ್ಮೆ ಪ್ರತಿರೋಧ ಕಾಣಬಹುದು

ದಿನ ಭವಿಷ್ಯ: 17 ಮೇ 2026 ಭಾನುವಾರ– ಖರ್ಚಿನ ಮೇಲೆ ನಿಯಂತ್ರಣವಿರಲಿ

ಕೊಹ್ಲಿ, ವೆಂಕಿ ಅರ್ಧಶತಕ: ಪಂಜಾಬ್‌ ವಿರುದ್ಧ ಗೆದ್ದು ಪ್ಲೇ–ಆಫ್‌ಗೇರಿದ ಆರ್‌ಸಿಬಿ

IPL 2026| ರಾಜಸ್ಥಾನ ವಿರುದ್ಧ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡ ಡೆಲ್ಲಿ

ಪಂಜಾಬ್ ವಿರುದ್ಧ RCB ನಾಯಕ ಆಡದಿರಲು ಕಾರಣವೇನು? ಜಿತೇಶ್ ಕೊಟ್ರು ಸ್ಪಷ್ಟನೆ

3,000 ರನ್: IPL ಮಾತ್ರವಲ್ಲ, T20 ಕ್ರಿಕೆಟ್‌ನಲ್ಲೇ ಹೊಸ ದಾಖಲೆ ಬರೆದ ಸುದರ್ಶನ್

ಒಳನೋಟ: ಆಮೆಗತಿಯಲ್ಲಿ ಸಾಗುವ ‘ಸರ್ವೆ’

ಒಳನೋಟ: ಭೂದಾಹಕ್ಕೆ ಕೆರೆಯಂಗಳ ಆಪೋಶನ

ಒಳನೋಟ | ಗೋವಾದಂತೆ ಮಂಗಳೂರು ಬೀಚ್‌ ಪ್ರವಾಸೋದ್ಯಮಕ್ಕೂ ʼಜೀವʼ ತುಂಬಬೇಕಿದೆ..

ಒಳನೋಟ: ಬೇಕು ತಾಲ್ಲೂಕು ಆಸ್ಪತ್ರೆಗೆ ‘ಚಿಕಿತ್ಸೆ’

ಚಿನಕುರುಳಿ ಕಾರ್ಟೂನ್: ಮೇ 17 ಭಾನುವಾರ 2026

80 ವರ್ಷ ಹಳೆಯ ಸೀರೆಗಳ ಉಡುಪು: ‘ಕಾನ್’ ಅಂಗಳದಲ್ಲಿ ಕನ್ನಡತಿ ದಿಶಾ ಮದನ್ ಜಾದೂ!

ವಾರ ಭವಿಷ್ಯ: ಈ ರಾಶಿಯವರಿಗೆ ಸಂಗಾತಿಯಿಂದ ಕೆಲವೊಮ್ಮೆ ಪ್ರತಿರೋಧ ಕಾಣಬಹುದು

ದಿನ ಭವಿಷ್ಯ: 17 ಮೇ 2026 ಭಾನುವಾರ– ಖರ್ಚಿನ ಮೇಲೆ ನಿಯಂತ್ರಣವಿರಲಿ