ಭಾನುವಾರ, ಮಾರ್ಚ್ 29, 2020
19 °C

ಮ್ಯಾಚಿಂಗ್ ಮಾಸ್ಕ್

ಮಣ್ಣೆ ರಾಜು Updated:

ಅಕ್ಷರ ಗಾತ್ರ : | |

Prajavani

ಕೊರೊನಾ ವೈರಸ್‌ಗೆ ಹೆದರಿ ಅಕ್ಕಪಕ್ಕದ ಮನೆ ಯವರು ಮಾಸ್ಕ್ ಹಾಕಿಕೊಂಡಿದ್ದರು. ‘ಅಮ್ಮಾ, ನಮಗೂ ಮಾಸ್ಕ್ ಬೇಕು’ ಅಂತ ಮಕ್ಕಳು ಆಸೆಪಟ್ಟವು. ಮಕ್ಕಳ ಆಸೆ ಈಡೇರಿಸಬೇಕು, ನೆರೆಹೊರೆಯವರಂತೆ ನಾವೂ ಬಾಳಬೇಕು ಎಂದು ಸುಮಿ, ಗಂಡ– ಮಕ್ಕಳ ಜೊತೆ ಮಾಸ್ಕ್ ಖರೀದಿಗೆ ಬಂದಿದ್ದಳು.

ಮಾಸ್ಕ್ ಅಂಗಡಿ ತುಂಬಾ ಜನಜಂಗುಳಿ. ‘ಲೇಟೆಸ್ಟ್ ಮಾಸ್ಕ್ ತೋರಿಸಿ’ ಅಂಗಡಿಯವನನ್ನು ಕೇಳಿದಳು ಸುಮಿ.

‘ಕಡಿಮೆ ಬೆಲೆ, ದೀರ್ಘ ಬಾಳಿಕೆಯ ಮಾಸ್ಕ್ ತೋರಿಸಿ’ ಎಂದ ಗಂಡ ಶಂಕ್ರಿ.

ಅಂಗಡಿಯವ ಒಂದಷ್ಟು ಮಾಸ್ಕ್‌ಗಳನ್ನು ತಂದು ಹಾಕಿ, ‘ಇದನ್ನು ನೋಡಿ ಮೇಡಂ, ಹೈ ಕ್ವಾಲಿಟಿ ಮಾಸ್ಕ್. ಮದುವೆ, ನಾಮಕರಣ, ಗೃಹ ಪ್ರವೇಶಕ್ಕೆ ಧರಿಸಿ ಹೋಗಬಹುದು. ರೇಷ್ಮೆ ಸೀರೆ, ಒಡವೆಗೆ ಮ್ಯಾಚ್ ಆಗುತ್ತೆ’ ಅಂದ.

‘ಬೇರೆ ಕಲರ್, ಹೊಸ ಡಿಸೈನಿನ ಮಾಸ್ಕ್ ತೋರಿಸಿ, ಗ್ರ್ಯಾಂಡ್ ಆಗಿರಲಿ, ಬಾರ್ಡರ್ ಚೆನ್ನಾಗಿರಲಿ, ಕಾಸ್ಟ್‌ಲಿ ಆದರೂ ಪರ್ವಾಗಿಲ್ಲ’.

‘ಇದನ್ನು ಕೊಂಡುಕೊಳ್ಳಿ ಮೇಡಂ, ಸೂಪರ್ ಕ್ವಾಲಿಟಿ, ಕಟ್ಟಿಕೊಳ್ಳಲು ರೇಷ್ಮೆ ದಾರ ಇದೆ, ಈ ಮಾಸ್ಕ್ ಕೊಂಡರೆ, ನೈಟಿ ಹಾಕಿದಾಗ ಹಾಕಿಕೊಳ್ಳುವ ಡೈಲಿ ಯೂಸ್ ಮಾಸ್ಕ್ ಫ್ರೀ ಆಫರ್ ಇದೆ’.

‘ಮಕ್ಕಳಿಗೆ ಶೀತ, ನೆಗಡಿ ಆದಾಗ ಬಳಸುವ ಮಾಸ್ಕ್ ಇದೆಯೇ?’ ಶಂಕ್ರಿ ಕೇಳಿದ.

‘ಇದೆ ಸಾರ್, ಶೀತ, ನೆಗಡಿಯಾದಾಗ ಮೂಗಿನಿಂದ ಏನೇ ಸೋರಿದರೂ ಹೀರಿಕೊಂಡು ಶುಷ್ಕತೆ ಕಾಪಾಡುವ ಮಾಸ್ಕ್ ಇದೆ. ನಿಮ್ಮ ಸೈಜಿಗೂ ಸಿಗುತ್ತದೆ’ ಅಂದ.

‘ಮುಖದ ಮೇಕಪ್ ಮರೆಮಾಚದಂತಹ ಮಾಸ್ಕ್‌ ಇದೆಯೇ’ ಸುಮಿ ಪ್ರಶ್ನೆ.

‘ಇದೆ ಮೇಡಂ, ಟ್ರಾನ್ಸ್‌ಪರೆಂಟ್ ಮಾಸ್ಕ್, ಇದನ್ನು ಧರಿಸಿದರೆ ಹೆಂಗಸರ ಮೇಕಪ್, ಲಿಪ್‍ಸ್ಟಿಕ್, ಗಂಡಸರ ಮೀಸೆನೂ ಕಾಣುತ್ತೆ’ ಅಂದ.

ಸುಮಿ ತನಗೂ ತಗೊಂಡು, ಗಂಡ, ಮಕ್ಕಳಿಗೂ ಮಾಸ್ಕ್ ಕೊಡಿಸಿದಳು.

‘ರೀ, ನನ್ನ ಮಾಸ್ಕ್‌ಗೆ ಮ್ಯಾಚ್ ಆಗುವ ಎರಡು ಸೀರೆ ಕೊಂಡುಕೊಳ್ತೇನೆ, ಹೇಗೂ ಯುಗಾದಿ ಹಬ್ಬಕ್ಕೆ ಸೀರೆ ಬೇಕಲ್ಲ’ ಎನ್ನುತ್ತಾ ಸೀರೆ ಅಂಗಡಿ ಹೊಕ್ಕಳು. ಪೆಚ್ಚು ಮೋರೆ ಹಾಕಿಕೊಂಡು, ಕೊರೊನಾಕ್ಕೆ ಮನಸ್ಸಿನಲ್ಲೇ ಹಿಡಿಶಾಪ ಹಾಕುತ್ತಾ ಹಿಂಬಾಲಿಸಿದ ಶಂಕ್ರಿ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು