ಸಂಪಾದಕೀಯ: ಸಹಿಷ್ಣು ತಳಿಗಳ ಅಭಿವೃದ್ಧಿಯು ಆಹಾರ ಭದ್ರತೆಗೆ ಅನಿವಾರ್ಯ

ಭಾರತೀಯ ಕೃಷಿ ಸಂಶೋಧನಾ ಮಂಡಳಿ (ಐಸಿಎಆರ್‌) ಮತ್ತು ರಾಜ್ಯ ಕೃಷಿ ವಿಶ್ವವಿದ್ಯಾಲಯಗಳು ಒಟ್ಟಾಗಿ 61 ತಳಿಗಳನ್ನು ಅಭಿವೃದ್ಧಿಪಡಿಸಿವೆ. ಅವುಗಳಲ್ಲಿ 27 ತೋಟಗಾರಿಕಾ ತಳಿಗಳೂ ಸೇರಿವೆ. ಧಾನ್ಯಗಳು, ಕಿರುಧಾನ್ಯಗಳು, ಕಾಳುಗಳು, ಎಣ್ಣೆ ಬೀಜಗಳು, ಹಣ್ಣುಗಳು, ತರಕಾರಿಗಳು ಮತ್ತು ವಾಣಿಜ್ಯ ಬೆಳೆಗಳ ತಳಿಗಳು ಈ ಗುಂಪಿನಲ್ಲಿ ಇವೆ. ಕರಾವಳಿಯ ಉಪ್ಪು ನೀರಿನ ಪ್ರದೇಶಕ್ಕೆ ಹೊಂದುವ ಭತ್ತದ ಒಂದು ತಳಿಯನ್ನೂ ಅಭಿವೃದ್ಧಿಪಡಿಸಲಾಗಿದೆ. ಮುಂಗಾರು ಋತುವಿನಲ್ಲಿ ಭತ್ತ ಬೆಳೆಯುವ ಶೇ 25ರಷ್ಟು ಪ್ರದೇಶಕ್ಕೆ ಹವಾಮಾನ ವೈಪರೀತ್ಯ ಸಹಿಷ್ಣು ತಳಿಯನ್ನು ಒದಗಿಸುವ ಗುರಿಯನ್ನು ಸರ್ಕಾರ ಹೊಂದಿದೆ. ಹವಾಮಾನ ವೈಪರೀತ್ಯ ಸಹಿಷ್ಣು ಗೋಧಿ ತಳಿಯು ಹೆಚ್ಚು ಹೆಚ್ಚು ಬಳಕೆ ಆಗುತ್ತಿದೆ. ಆದರೆ, ಭತ್ತದ ತಳಿಯ ಬಳಕೆ ಇನ್ನಷ್ಟೇ ಆರಂಭವಾಗಬೇಕಿದೆ. ಹವಾಮಾನ ವೈಪರೀತ್ಯ ಸಹಿಷ್ಣು ತಳಿಯ ಬಳಕೆಯಿಂದಾಗಿಯೇ ಗೋಧಿ ಇಳುವರಿ 2023–24ರಲ್ಲಿ ಏರಿಕೆಯಾಗಿದೆ. ಹವಾಮಾನ ಬದಲಾವಣೆಯಿಂದಾಗಿ ದೇಶದಲ್ಲಿ ಭತ್ತದ ಇಳುವರಿಯು 2030ರ ಹೊತ್ತಿಗೆ ಇಂಗಾಲದ ಹೊರಸೂಸುವಿಕೆಯು ಮಧ್ಯಮ ಪ್ರಮಾಣದಲ್ಲಿಯೇ ಇದ್ದರೆ ಶೇ 3ರಿಂದ ಶೇ 5ರಷ್ಟು ಇಳಿಕೆ ಆಗಬಹುದು; ಹೊರಸೂಸುವಿಕೆ ಪ್ರಮಾಣವು ಇನ್ನೂ ಹೆಚ್ಚಾದರೆ ಶೇ 31.3ರವರೆಗೆ ಇಳುವರಿ ಕೊರತೆ ಆಗಬಹುದು ಎಂದು ಅಧ್ಯಯನಗಳಿಂದ ತಿಳಿದುಬಂದಿದೆ. 

ಬೆಳೆಯನ್ನು ವೈವಿಧ್ಯಗೊಳಿಸಬೇಕಾದ ದಿಸೆಯಲ್ಲಿಯೂ ನಾವು ಯೋಚಿಸಬೇಕಾಗಿದೆ. ಅತಿ ಹೆಚ್ಚು ನೀರು ಬೇಕಾಗಿರುವ ಭತ್ತದಂತಹ ಬೆಳೆಗಳ ಬದಲು ಕಡಿಮೆ ನೀರು ಸಾಕಾಗುವ ಮಿತವ್ಯಯಕರವಾದ ಬೆಳೆಗಳನ್ನು ಬೆಳೆಯಲು ಉತ್ತೇಜನ ನೀಡಬೇಕಾಗಿದೆ. ಹವಾಮಾನ ಬದಲಾವಣೆಯ ಪರಿಣಾಮಗಳನ್ನು ಕನಿಷ್ಠಗೊಳಿಸಲು ಬೆಳೆ ವೈವಿಧ್ಯಗೊಳಿಸುವಿಕೆ ಒಂದು ಮಹತ್ವದ ಕ್ರಮ ಎಂದು ಪರಿಗಣಿಸಲಾಗಿದೆ. ನೀರು ಉಳಿಸುವಿಕೆ, ಅರಣ್ಯ ರಕ್ಷಣೆಯಂತಹ ಹಲವು ಕಾರ್ಯಕ್ರಮಗಳನ್ನು ಸರ್ಕಾರವು ಆರಂಭಿಸಿದೆ. ಸಾವಯವ ಕೃಷಿಗೂ ಉತ್ತೇಜನ ನೀಡಲಾಗಿದೆ. ಆದರೆ, ಹವಾಮಾನ ಬದಲಾವಣೆಗೆ ಹೊಂದಿಕೊಳ್ಳುವ ಕೃಷಿ ಪದ್ಧತಿಗೆ ಸಂಬಂಧಿಸಿದ ಸಂಶೋಧನೆ ಮತ್ತು ವಿಧಾನಗಳ ಅಭಿವೃದ್ಧಿಯಲ್ಲಿ ಬೇರೆ ದೇಶಗಳಿಗೆ ಹೋಲಿಸಿದರೆ ಭಾರತವು ಹಿಂದೆ ಬಿದ್ದಿದೆ. ನಮ್ಮ ದೇಶದ ಭೌಗೋಳಿಕ ವೈವಿಧ್ಯ, ಬೆಳೆಯ ವಿಧಗಳು ಮತ್ತು ಹವಾಮಾನದಲ್ಲಿನ ವ್ಯತ್ಯಾಸದ ಕಾರಣಕ್ಕಾಗಿ ಹವಾಮಾನ ಬದಲಾವಣೆ ಮತ್ತು ಬೇಸಾಯಕ್ಕೆ ಸಂಬಂಧಿಸಿ ಹೆಚ್ಚು ಹೆಚ್ಚು ಸಂಶೋಧನೆಗಳನ್ನು ನಡೆಸುವುದು ಅನಿವಾರ್ಯವೇ ಆಗಿದೆ. ಹವಾಮಾನ ಬದಲಾವಣೆಯು ಬೇಸಾಯದ ಮೇಲೆ ಉಂಟು ಮಾಡುವ ಪರಿಣಾಮವು ಇತರ ದೇಶಗಳಿಗೆ ಹೋಲಿಸಿದರೆ ಭಾರತಕ್ಕೆ ಹೆಚ್ಚು. ಏಕೆಂದರೆ, ಭಾರತದ ಗಣನೀಯ ಪ್ರಮಾಣದ ಜನರು ಕೃಷಿಯನ್ನು ಅವಲಂಬಿಸಿದ್ದಾರೆ. ಜೊತೆಗೆ, ಇಲ್ಲಿನ ಭಾರಿ ಜನಸಂಖ್ಯೆಗೆ ಆಹಾರ ಒದಗಿಸುವುದು ಕೂಡ ದೊಡ್ಡ ಸವಾಲು.