ಸಂಪಾದಕೀಯ: ಪಾಕಿಸ್ತಾನದ ಹೊಸ ಸರ್ಕಾರದ ಮುಂದೆ ಸವಾಲುಗಳು ಹಲವು

ಸರ್ಕಾರ ಬದಲಾವಣೆಯ ಹಿಂದೆ ಅಮೆರಿಕದ ಕೈವಾಡವಿದೆ ಎಂದು ಇಮ್ರಾನ್‌ ಮಾಡಿರುವ ಆರೋಪವು ಅಧಿಕಾರಕ್ಕೆ ಅಂಟಿಕೊಳ್ಳುವ ತಂತ್ರವೇ ವಿನಾ ಬೇರೇನೂ ಅಲ್ಲ ಎಂಬುದು ಸ್ಪಷ್ಟವಾಗಿದೆ. ಸ್ವತಂತ್ರ ವಿದೇಶಾಂಗ ನೀತಿಯನ್ನು ಅನುಸರಿಸಿದ ಕಾರಣಕ್ಕೆ ಅಮೆರಿಕವು ತಮ್ಮ ವಿರುದ್ಧ ಸಂಚು ನಡೆಸಿದೆ ಎಂದು ಇಮ್ರಾನ್‌ ಹೇಳಿದ್ದರು. ಭಾರತವು ಸ್ವತಂತ್ರ ವಿದೇಶಾಂಗ ನೀತಿಯನ್ನು ಹೊಂದಿದೆ ಎಂದು ಇಮ್ರಾನ್‌ ಅವರು ಹೊಗಳಿದ್ದರ ಹಿಂದೆಯೂ ಅವರ ಕಾರ್ಯತಂತ್ರಕ್ಕೆ ಪೂರಕವಾದ ವಾತಾವರಣ ಸೃಷ್ಟಿಸುವ ಹುನ್ನಾರವಿತ್ತು. ಭಾರತದ ಬಗ್ಗೆ ಇಮ್ರಾನ್‌ ನೀಡಿದ ಹೇಳಿಕೆಯಲ್ಲಿ ಪ್ರಾಮಾಣಿಕತೆಯ ಕೊರತೆ ಎದ್ದು ಕಾಣುತ್ತಿದೆ. ಶಾಹಬಾಝ್‌ ಅವರ ಪಾಕಿಸ್ತಾನ್‌ ಮುಸ್ಲಿಂ ಲೀಗ್– ಎನ್‌ ಮತ್ತು ಬಿಲಾವಲ್‌ ಭುಟ್ಟೊ ಅವರ ಪಾಕಿಸ್ತಾನ್‌ ಪೀಪಲ್ಸ್ ಪಾರ್ಟಿಯ ನಡುವೆ ಅಪನಂಬಿಕೆಯ ಇತಿಹಾಸವೇ ಇದೆ. ಆದರೆ, ಈ ಎರಡು ಪಕ್ಷಗಳು ಈಗ ಒಟ್ಟಾಗಿ ಅಧಿಕಾರಕ್ಕೆ ಬಂದಿವೆ. ಇವಲ್ಲದೆ, ಕೆಲವು ಸಣ್ಣ ಪಕ್ಷಗಳ ಸಂಸದರು ಮತ್ತು ಪಕ್ಷೇತರ ಸಂಸದರು ಸರ್ಕಾರಕ್ಕೆ ಬೆಂಬಲ ನೀಡಿದ್ದಾರೆ. ಇವರೆಲ್ಲರನ್ನೂ ಒಟ್ಟಾಗಿ ಕರೆದುಕೊಂಡು ಮುಂದೆ ಸಾಗುವುದು ಸುಲಭದ ಕೆಲಸವೇನಲ್ಲ. ಜತೆಗೆ, ಹಣದುಬ್ಬರ, ಭ್ರಷ್ಟಾಚಾರದಂತಹ ಹಲವು ಸಮಸ್ಯೆಗಳನ್ನೂ ನಿಭಾಯಿಸಬೇಕಿದೆ. ಇಮ್ರಾನ್‌ ನೇತೃತ್ವದ ಪಾಕಿಸ್ತಾನ್‌ ತೆಹ್ರೀಕ್‌ ಎ ಇನ್ಸಾಫ್‌ ಪಕ್ಷದ ಸಂಸದರು ನ್ಯಾಷನಲ್ ಅಸೆಂಬ್ಲಿಗೆ ರಾಜೀನಾಮೆ ನೀಡಿದ್ದಾರೆ. ಈ ಮೂಲಕ ರಾಜಕೀಯ ಬಿಕ್ಕಟ್ಟು ಸೃಷ್ಟಿಸುವ ಪ್ರಯತ್ನ ನಡೆಸಿದ್ದಾರೆ. ಬೀದಿಗಿಳಿದು ಹೋರಾಡುವ ಸುಳಿವನ್ನೂ ಅವರು ನೀಡಿದ್ದಾರೆ. ಹಾಗಾಗಿ, ಆಡಳಿತದ ಸಮಸ್ಯೆಗಳ ಜತೆಗೆ ರಾಜಕೀಯ ತೊಡಕುಗಳನ್ನೂ ಹೊಸ ಸರ್ಕಾರವು ನಿರ್ವಹಿಸಬೇಕಿದೆ. ಇಮ್ರಾನ್‌ ಅವರು ಆಳ್ವಿಕೆಯ ಕೊನೆಯ ದಿನಗಳಲ್ಲಿ, ಅಮೆರಿಕ ಮತ್ತು ಪಾಶ್ಚಾತ್ಯ ದೇಶಗಳ ಜತೆಗಿನ ಸಂಬಂಧ ಕೆಡಿಸಿ ಕೊಂಡಿದ್ದಾರೆ. ಈ ದೇಶಗಳ ವಿಶ್ವಾಸವನ್ನು ಮರಳಿ ಗಳಿಸಬೇಕಾದ ಅನಿವಾರ್ಯವೂ ಹೊಸ ಸರ್ಕಾರಕ್ಕೆ ಇದೆ.

ಪಾಕಿಸ್ತಾನದಲ್ಲಿ ಸ್ಥಿರವಾದ ಮತ್ತು ಪ್ರಜಾಸತ್ತಾತ್ಮಕವಾದ ಸರ್ಕಾರ ಇರುವುದು ಭಾರತಕ್ಕೆ ಒಳ್ಳೆಯದು. ಇತ್ತೀಚಿನ ದಿನಗಳಲ್ಲಿ ಭಾರತ–ಪಾಕಿಸ್ತಾನ ನಡುವಣ ದ್ವಿಪಕ್ಷೀಯ ಸಂಬಂಧ ಉತ್ತಮವಾಗಿಲ್ಲ. ಮಾತುಕತೆ ಸ್ಥಗಿತವಾಗಿದೆ. ಭಾರತದ ಜತೆಗೆ ಉತ್ತಮ ಸಂಬಂಧ ಬೇಕು ಎಂದು ಹೊಸ ಪ್ರಧಾನಿ ಶಾಹಬಾಝ್‌ ಅವರು ಹೇಳಿದ್ದಾರೆ. ಆದರೆ, ‘ಕಾಶ್ಮೀರ ವಿವಾದ’ ಪರಿಹಾರವಾಗದೆ ದೀರ್ಘಕಾಲದ ಶಾಂತಿ ಸಾಧ್ಯವಿಲ್ಲ ಎಂದಿದ್ದಾರೆ. ಕಾಶ್ಮೀರದಲ್ಲಿ ಏನೇ ಸಮಸ್ಯೆ ಇದ್ದರೂ ಅದು ಭಾರತದ ಆಂತರಿಕ ವಿಚಾರ ಎಂಬುದನ್ನು ಶಾಹಬಾಝ್‌ ಅರ್ಥ ಮಾಡಿಕೊಳ್ಳಬೇಕು. ಪಾಕಿಸ್ತಾನವು ಆರ್ಥಿಕವಾಗಿ ತೀವ್ರ ಸಂಕಷ್ಟದಲ್ಲಿದೆ. ಇಂತಹ ಸನ್ನಿವೇಶದಲ್ಲಿ, ಭಾರತದ ಜತೆಗೆ ಸಂಘರ್ಷಕ್ಕೆ ನಿಲ್ಲುವ ಬದಲು ಸಹಕಾರ ಮನೋಭಾವದಿಂದ ಇರುವುದು ಆ ದೇಶಕ್ಕೆ ಅನುಕೂಲಕರ. ಶಾಹಬಾಝ್‌ ಅವರಿಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಅಭಿನಂದನೆ ಸಲ್ಲಿಸಿದ್ದಾರೆ. ಈ ಪ್ರದೇಶವು ಭಯೋತ್ಪಾದನೆ ಮುಕ್ತವಾಗಿ, ಶಾಂತಿ ಮತ್ತು ಸ್ಥಿರತೆಯಿಂದ ಇರಬೇಕು ಎಂಬುದು ತಮ್ಮ ಅಪೇಕ್ಷೆ ಎಂದೂ ಮೋದಿ ಹೇಳಿದ್ದಾರೆ. ಭಾರತದ ಈ ನಿಲುವನ್ನು ‍ಪಾಕಿಸ್ತಾನ ಅರ್ಥ ಮಾಡಿಕೊಳ್ಳಬೇಕು.