ಸಂಪಾದಕೀಯ: ಮಹಿಳೆ ಮಾಲೀಕತ್ವದ ಉದ್ಯಮ ರಕ್ಷಿಸುವ ಕೆಲಸ ತಕ್ಷಣ ಆಗಲಿ

ಉದ್ಯಮ ವಲಯದ ತಜ್ಞರ ಮಾತಿನ ಅನ್ವಯ, ಮಹಿಳೆಯರು ನಡೆಸುತ್ತಿರುವ ಉದ್ಯಮಗಳಲ್ಲಿ ಹಲವು, ಸೂಕ್ತ ಪ್ರಾಧಿಕಾರಗಳಲ್ಲಿ ಹೆಸರು ನೋಂದಾಯಿಸಿಕೊಂಡು, ಸಂಘಟಿತ ವಲಯದೊಳಕ್ಕೆ ಇನ್ನೂ ಬಂದಿಲ್ಲ. ಇಂತಹ ಉದ್ಯಮಗಳು ಎದುರಿಸುತ್ತಿರುವ ಸಮಸ್ಯೆಗಳನ್ನು ಗುರುತಿಸುವುದು ಈ ಕಾರಣಕ್ಕಾಗಿಯೇ ಕಷ್ಟವಾಗುತ್ತದೆ. ಹಾಗೆಯೇ, ಸರ್ಕಾರ ಅಥವಾ ಇನ್ಯಾವುದೇ ಸಂಸ್ಥೆಯಿಂದ ಒದಗುವ ನೆರವನ್ನು ಇಂತಹ ಉದ್ಯಮಗಳು ಪಡೆದುಕೊಳ್ಳುವುದು ಕೂಡ ಕಷ್ಟವಾಗುತ್ತದೆ. ಕೇಂದ್ರ ಸರ್ಕಾರವು ಈ ಬಿಕ್ಕಟ್ಟಿನ ಸಂದರ್ಭದಲ್ಲಿ ಉದ್ಯಮ ವಲಯಕ್ಕೆ ನೆರವಾಗುವ ಉದ್ದೇಶದಿಂದ, ತಾನೇ ಖಾತರಿಯಾಗಿ ನಿಂತು ಸಾಲ ಒದಗಿಸುವ ವ್ಯವಸ್ಥೆ ರೂಪಿಸಿದೆ. ಆದರೆ, ನೋಂದಣಿ ಆಗದ ಉದ್ಯಮಗಳು ಇಂತಹ ಸೌಲಭ್ಯಗಳನ್ನು ಪಡೆದುಕೊಳ್ಳುವುದು ಆಗದ ಮಾತು. ಈ ಸಂದರ್ಭದಲ್ಲಿ, ಇಂತಹ ಉದ್ಯಮಗಳನ್ನು ಸೂಕ್ತ ಪ್ರಾಧಿಕಾರಗಳ ಮೂಲಕ ನೋಂದಣಿ ಮಾಡಿಸಿ ಅರ್ಹ ಸವಲತ್ತುಗಳನ್ನು ಪಡೆದುಕೊಳ್ಳಲು ಸಶಕ್ತವಾಗಿಸಲು ಸಾಧ್ಯವೇ ಎಂಬ ದಿಸೆಯಲ್ಲಿ ಸರ್ಕಾರ ಆಲೋಚಿಸಬೇಕು. ಅದಕ್ಕಾಗಿ, ಅಗತ್ಯ ಕಂಡುಬಂದರೆ, ವಿಶೇಷ ಕ್ರಿಯಾಯೋಜನೆ ರೂಪಿಸಬಹುದು. ಹಾಗೆಯೇ, ಸಾಲ ಮರುಹೊಂದಾಣಿಕೆ ಮಾಡಿಕೊಳ್ಳಲು ಭಾರತೀಯ ರಿಸರ್ವ್‌ ಬ್ಯಾಂಕ್‌ (ಆರ್‌ಬಿಐ) ನೀಡಿರುವ ಅವಕಾಶವನ್ನು, ಈ ವಲಯದ ಉದ್ಯಮಿಗಳು ತಮ್ಮ ಉದ್ಯಮವನ್ನು ನೋಂದಣಿ ಮಾಡಿಸಿಕೊಳ್ಳದೇ ಇದ್ದರೂ ಬಳಸಿಕೊಳ್ಳಲು ಸಾಧ್ಯವಾಗುವಂತಹ ವಾತಾವರಣ ಸೃಷ್ಟಿಸಬಹುದೇ ಎಂಬುದನ್ನೂ ಸರ್ಕಾರ ಪರಿಶೀಲಿಸಬೇಕು. ಈ ಅವಕಾಶ ಬಳಸಿಕೊಳ್ಳಲು ಸಾಧ್ಯವಾದರೆ, ಈ ವಲಯದ ಉದ್ಯಮಗಳ ಮೇಲಿನ ಹಣಕಾಸಿನ ಒತ್ತಡ ತುಸು ಮಟ್ಟಿಗಾದರೂ ನಿವಾರಣೆ ಆಗಬಹುದು. ಮಹಿಳೆಯರು ಹೆಚ್ಚೆಚ್ಚು ಪ್ರಮಾಣದಲ್ಲಿ ಉದ್ಯಮಶೀಲತೆಯನ್ನು ಬೆಳೆಸಿಕೊಂಡು, ಉದ್ಯಮಗಳನ್ನು ಆರಂಭಿಸಿದಲ್ಲಿ 2030ರ ಒಳಗೆ ಭಾರತದಲ್ಲಿ 15 ಕೋಟಿ ಜನರಿಗೆ ಉದ್ಯೋಗ ನೀಡಬಹುದು ಎಂಬ ಅಂದಾಜು ಇದೆ. ಮಹಿಳೆಯರು ಉದ್ಯಮ ಕ್ಷೇತ್ರದಲ್ಲಿ ಹೆಚ್ಚು ತೊಡಗಿಕೊಳ್ಳಬೇಕಾದ ಅವಶ್ಯಕತೆಯನ್ನೂ ಅವರು ಈ ಕ್ಷೇತ್ರದಲ್ಲಿ ಇರುವಂತಾಗಲು ವ್ಯವಸ್ಥೆಯು ಕಾರ್ಯತತ್ಪರ ಆಗಬೇಕಿರುವುದರ ಅಗತ್ಯವನ್ನೂ ಉದ್ಯೋಗ ಸೃಷ್ಟಿಗೆ ಸಂಬಂಧಿಸಿದಈ ಸಂಖ್ಯೆಯೇ ಹೇಳುತ್ತಿದೆ. ಮಹಿಳೆಯರ ಮಾಲೀಕತ್ವದಲ್ಲಿ ಈಗಿರುವ ಉದ್ಯಮಗಳನ್ನು ರಕ್ಷಿಸುವ ಕೆಲಸ ಜರೂರಾಗಿ ಆಗಬೇಕಿದೆ.