ಶಾಲೆಗಳು ಲಿಂಗತಾರತಮ್ಯದ ಪ್ರದರ್ಶನ ಕೇಂದ್ರಗಳಾಗಬಾರದು

ಹೆಣ್ಣುಮಕ್ಕಳಿಗಿಂತ ಗಂಡುಮಕ್ಕಳ ಶಿಕ್ಷಣಕ್ಕೆ ಹೆಚ್ಚಿನ ಹಣ ಖರ್ಚು ಮಾಡಲು ಪೋಷಕರು ಸಿದ್ಧವಾಗಿದ್ದಾರೆ. ಹೆಣ್ಣನ್ನು ಮದುವೆ ಮಾಡಿ ಬೇರೆಯ ಮನೆಗೆ ಕಳಿಸುವುದರಿಂದ ಅವಳ ಭವಿಷ್ಯಕ್ಕಾಗಿ ಹೆಚ್ಚಿನ ಹಣ ಖರ್ಚು ಮಾಡುವುದು ಅನಗತ್ಯ ಎನ್ನುವ ಧೋರಣೆ ಸಮಾಜದಲ್ಲಿದೆ. ಗಂಡುಮಕ್ಕಳಿಗೆ ಪೌಷ್ಟಿಕ ಆಹಾರ ಹಾಗೂ ಉತ್ತಮ ಶಿಕ್ಷಣ ಎನ್ನುವ ಗ್ರಾಮೀಣ ಭಾರತದಲ್ಲಿನ ಜನಸಾಮಾನ್ಯರ ನಂಬಿಕೆ ನಗರಪ್ರದೇಶದಲ್ಲೂ ಬೇರೂರಿದೆ. ಮಗ ಪುಸ್ತಕ ಹಿಡಿದು ಕೂರುವುದನ್ನು ಇಷ್ಟಪಡುವ ಪೋಷಕರು, ಮಗಳು ಮನೆಕೆಲಸದಲ್ಲಿ ನೆರವಾಗಬೇಕೆಂದು ಬಯಸುತ್ತಾರೆ. ವಿಪರ್ಯಾಸವೆಂದರೆ ಎಲ್ಲ ಅನುಕೂಲಗಳ ನಡುವೆಯೂ ಪರೀಕ್ಷೆಗಳ ಫಲಿತಾಂಶದಲ್ಲಿ ಬಾಲಕರು ಸದಾ ಹಿಂದುಳಿದಿದ್ದರೆ, ಅನನುಕೂಲಗಳ ನಡುವೆಯೂ ಬಾಲಕಿಯರ ಪ್ರತಿವರ್ಷದ ಸಾಧನೆ ಗಮನಸೆಳೆಯುವಂತಿರುತ್ತದೆ. ಇದಕ್ಕೆ ಅವರ ಕಠಿಣಶ್ರಮ ಹಾಗೂ ಬದ್ಧತೆಯೇ ಕಾರಣ.

ಭ್ರೂಣದಿಂದ ಸಾವಿನವರೆಗೆ ಮಹಿಳಾ ವಿರೋಧಿ ಧೋರಣೆ ಸಮಾಜದ ಎಲ್ಲ ಹಂತಗಳಲ್ಲೂ ಬೇರೂರಿರುವುದಕ್ಕೆ ಪಾಲಿಕೆಯ ಶಾಲೆಗಳು ಇನ್ನೊಂದು ಉದಾಹರಣೆಯಷ್ಟೇ. ಮಕ್ಕಳ ನಡುವೆ ಲಿಂಗತಾರತಮ್ಯ ಮಾಡದಿರುವಂತೆ ಸರ್ಕಾರ ಕೈಗೊಂಡಿರುವ ಜಾಗೃತಿ ಅಭಿಯಾನಗಳು ಯಶಸ್ಸು ಸಾಧಿಸಿರುವುದು ಅಷ್ಟಕ್ಕಷ್ಟೆ ಎನ್ನುವ ಕಹಿ ಸತ್ಯಕ್ಕೂ ಪಾಲಿಕೆಯ ವಿದ್ಯಾಸಂಸ್ಥೆಗಳಲ್ಲಿನ ದಾಖಲಾತಿ ಅಂಕಿಅಂಶಗಳು ಕನ್ನಡಿ ಹಿಡಿದಿವೆ. ಬಾಲಕಿ– ಬಾಲಕರ ನಡುವೆ ತರತಮ ಎಣಿಸದಂತೆ ಪೋಷಕರ ಮನಸ್ಸುಗಳನ್ನು ತಿಳಿಗೊಳಿಸುವ ನಿಟ್ಟಿನಲ್ಲಿ ಸರ್ಕಾರಿ ಸಂಸ್ಥೆಗಳು ಹಾಗೂ ಸ್ವಯಂ ಸೇವಾ ಸಂಸ್ಥೆಗಳು ತಮ್ಮ ಕಾರ್ಯಕ್ರಮಗಳನ್ನು ಪುನರ್‌ ವಿಮರ್ಶೆಗೆ ಒಡ್ಡುವುದು ಸದ್ಯದ ತುರ್ತು. ಈ ನಿಟ್ಟಿನಲ್ಲಿ ಜನಪ್ರಿಯ ತಾರೆಗಳು ಹಾಗೂ ವಿವಿಧ ಕ್ಷೇತ್ರಗಳ ಸಾಧಕರನ್ನು ರಾಯಭಾರಿಗಳ ರೂಪದಲ್ಲಿ ಬಳಸಿಕೊಳ್ಳಬಹುದು. ಇದೆಲ್ಲಕ್ಕೂ ಮೊದಲು ಪಾಲಿಕೆಯ ಶಾಲೆಗಳಲ್ಲಿ ಶಿಕ್ಷಣದ ಗುಣಮಟ್ಟ ಉತ್ತಮಗೊಳ್ಳಬೇಕು. ಮೂಲ ಸೌಕರ್ಯಗಳ ಕೊರತೆಯ ಜೊತೆಗೆ ಕಲಿಕೆಯ ಗುಣಮಟ್ಟವೂ ಕಳಪೆಯಾಗಿರುವ ಶಾಲೆಗಳಿಗೆ ತಮ್ಮ ಮಕ್ಕಳನ್ನು ಕಳುಹಿಸಲು ಯಾರು ತಾನೆ ಬಯಸುತ್ತಾರೆ? ವಿದ್ಯಾರ್ಥಿಗಳಿಗೆ ಉತ್ತಮ ಅವಕಾಶಗಳನ್ನು ಒದಗಿಸುವ ನಿಟ್ಟಿನಲ್ಲಿ ಶಾಲೆಗಳು ಪುನರ್‌ ರಚನೆಗೊಂಡರೆ ಪಾಲಿಕೆಯ ಶಾಲೆಗಳಲ್ಲಿನ ವಿದ್ಯಾರ್ಥಿಗಳ ಸಂಖ್ಯೆ ತಂತಾನೇ ಹೆಚ್ಚಾದೀತು. ಪೋಷಕರ ಮನೋಭಾವ ಏನೇ ಇದ್ದರೂ ಗುಣಮಟ್ಟದ ಶಿಕ್ಷಣ ನೀಡುವ ನಿಟ್ಟಿನಲ್ಲಿ ಪಾಲಿಕೆ ನೆಪಗಳನ್ನು ಹೇಳದೆ ತನ್ನ ನಿರ್ವಹಣೆಯ ಶಾಲೆಗಳಲ್ಲಿನ ಕಲಿಕೆಯ ಗುಣಮಟ್ಟ ಹೆಚ್ಚಿಸಬೇಕಾಗಿದೆ.