ಸಂಪಾದಕೀಯ | ರಾಜ್ಯದ ಅಪಾಯಕಾರಿ ರಸ್ತೆಗಳು; ಸಿಎಜಿ ವರದಿ ಕಣ್ತೆರೆದು ನೋಡಿ

ರಸ್ತೆ ವಿನ್ಯಾಸದಲ್ಲಿನ ದೋಷಗಳು, ಕಣ್ಣಿಗೆ ರಾಚುವ ಫಲಕಗಳು ಮತ್ತು ಎಲ್ಲೆಂದರಲ್ಲಿ ಅಳವಡಿಸಿರುವ ವೇಗ ನಿಯಂತ್ರಕಗಳು ರಾಜ್ಯದ ವಿವಿಧ ರಸ್ತೆಗಳಲ್ಲಿ ಅಪಘಾತಕ್ಕೆ ಕಾರಣವಾಗುತ್ತಿವೆ. ಗುಂಡಿ ಗಳ ಸೃಷ್ಟಿ ಮತ್ತು ಅವ್ಯವಸ್ಥೆಯಿಂದ ಕೂಡಿರುವ ಪಾದಚಾರಿ ಮಾರ್ಗ, ಅಸಮರ್ಪಕ ಒಳಚರಂಡಿ ವ್ಯವಸ್ಥೆ– ಇವು ರಸ್ತೆಗಳ ದುಃಸ್ಥಿತಿಗೆ ಕಾರಣವಾಗಿವೆ ಎಂದೂ ಸಿಎಜಿ ವರದಿ ಹೇಳಿದೆ. ಬೆಂಗಳೂರಿನಲ್ಲಿ 1,400 ಕಿ.ಮೀ. ಉದ್ದದ ಮುಖ್ಯ ರಸ್ತೆಗಳಿದ್ದು, ಅದರಲ್ಲಿ ಶೇ 43ರಷ್ಟು ರಸ್ತೆಗಳಲ್ಲಿ ಸರಿಯಾದ ಪಾದಚಾರಿ ಮಾರ್ಗಗಳೇ ಇಲ್ಲ ಎನ್ನುವುದರತ್ತಲೂ ವರದಿ ಬೊಟ್ಟುಮಾಡಿ ತೋರಿದೆ. ಈ ಪಾದಚಾರಿ ಮಾರ್ಗಗಳನ್ನು ಅಂಗಡಿಗಳು, ಹೋಟೆಲ್‌ಗಳು, ಪಾರ್ಕಿಂಗ್‌ ತಾಣಗಳು, ತ್ಯಾಜ್ಯ ಸಂಗ್ರಹ ತೊಟ್ಟಿಗಳು ಹಾಗೂ ವಿದ್ಯುತ್‌ ಪರಿವರ್ತಕಗಳ ಕಂಬಗಳು ಆಕ್ರಮಿಸಿರುವು ದನ್ನು ಪತ್ತೆ ಮಾಡಲು ಯಾವ ದುರ್ಬೀನೂ ಬೇಕಾಗಿಲ್ಲ. ಅವುಗಳನ್ನು ತೆರವುಗೊಳಿಸಿ, ಪಾದಚಾರಿ ಮಾರ್ಗಗಳನ್ನು ಅಡೆತಡೆ ಮುಕ್ತವಾಗಿಸಲು ಅಧಿಕಾರಿಗಳಿಗೆ ಮನಸ್ಸಿಲ್ಲ ಅಷ್ಟೆ.

ಕಡತಗಳಲ್ಲಿ ಮಾತ್ರ ರಸ್ತೆ ‘ಸುಧಾರಣೆ’ಯಾದ ಹಲವು ಹಗರಣಗಳನ್ನು ಲೋಕಾಯುಕ್ತ ತನಿಖೆಗಳು, ಸಿಎಜಿ ವರದಿಗಳು ಈ ಹಿಂದೆ ಹಲವು ಬಾರಿ ಬಯಲು ಮಾಡಿವೆ. ಬೆಂಗಳೂರಿನ ರಸ್ತೆಗಳಿಗೆ ಕಳೆದ ಹತ್ತು ವರ್ಷಗಳಲ್ಲಿ ಮಾಡಿರುವ ಖರ್ಚಿನ ಲೆಕ್ಕ ನೋಡಿದರೆ ಅವುಗಳ ಮೇಲ್ಮೈ ನುಣ್ಣಗಾಗಿ ಫಳಫಳ ಹೊಳೆಯಬೇಕಿತ್ತು. ಆದರೆ, ಅವು ಗುಂಡಿಮಯವಾಗಿರುವುದು ಎಲ್ಲ ಕಥೆಯನ್ನು ಹೇಳುತ್ತವೆ. ಗುತ್ತಿಗೆ ನಿರ್ವಹಣೆ ಅವಧಿಯಲ್ಲಿ ಮತ್ತೆ ಗುಂಡಿ ಕಾಣಿಸಿಕೊಂಡರೆ ಗುತ್ತಿಗೆದಾರರಿಂದಲೇ ಅದನ್ನು ದುರಸ್ತಿ ಮಾಡಿಸಬೇಕು. ಆದರೆ, ಗುತ್ತಿಗೆದಾರರ ಜತೆ ಎಂಜಿನಿಯರ್‌ಗಳದ್ದು ಎಂತಹ ‘ಮೈತ್ರಿ’ ಎಂದರೆ, ಗುಂಡಿ ಬಿದ್ದಾಗ ಅವರಿಂದ ದುರಸ್ತಿ ಮಾಡಿಸುವ ಗೋಜಿಗೇ ಹೋಗುವುದಿಲ್ಲ. ಸಾರ್ವಜನಿಕ ಒತ್ತಡ ತೀರಾ ಹೆಚ್ಚಾದಾಗ ಸರ್ಕಾರವೇ ಬಿಡುಗಡೆ ಮಾಡುವ ದುಡ್ಡಿನಿಂದ ದುರಸ್ತಿ ಕೆಲಸ ನಡೆಯುತ್ತದೆ. ಗುತ್ತಿಗೆದಾರರು ಹೊಣೆಯಿಂದ ನುಣುಚಿಕೊಳ್ಳಲು ಇದರಿಂದ ಆಸ್ಪದ ಮಾಡಿಕೊಟ್ಟಂತಾಗುತ್ತದೆ. ರಸ್ತೆಗಳ ಅವ್ಯವಸ್ಥೆಗೆ ಸಂಬಂಧಿಸಿದಂತೆ ಶಾಶ್ವತವಾದ ಪರಿಹಾರ ಕಂಡುಕೊಳ್ಳಲು ‘ರಸ್ತೆ ಇತಿಹಾಸ’ ನಿರ್ವಹಣೆ ವ್ಯವಸ್ಥೆಯೊಂದನ್ನು ಈ ಹಿಂದೆ ರೂಪಿಸಲಾಗಿತ್ತು. ಆದರೆ, ಕಾರ್ಪೊರೇಟರ್‌ಗಳು ಅದನ್ನು ಜಾರಿಗೊಳಿಸಲು ಬಿಟ್ಟಿರಲಿಲ್ಲ. ಮುಂದೆ ಜಾರಿಗೆ ಬಂತಾದರೂ ಅದು ಸಮರ್ಪಕವಾಗಿರಲಿಲ್ಲ. ‘ರಸ್ತೆ ಇತಿಹಾಸ’ ನಿರ್ವಹಣೆ ವ್ಯವಸ್ಥೆ ಸರಿಯಾಗಿ ಅನುಷ್ಠಾನಕ್ಕೆ ಬಂದಿದ್ದರೆ ಯಾವ ರಸ್ತೆ ಯಾವಾಗ ದುರಸ್ತಿಯಾಗಿದೆ, ಅದನ್ನು ನಿರ್ವಹಣೆ ಮಾಡಬೇಕಾದವರು ಯಾರು, ಗುಂಡಿಗಳು ಎಷ್ಟಿವೆ, ಅವುಗಳನ್ನು ಯಾವಾಗ ಮುಚ್ಚಲಾಗಿದೆ, ಯಾವ ಎಂಜಿನಿಯರ್‌ ಆ ರಸ್ತೆಯ ಉಸ್ತುವಾರಿಯಲ್ಲಿದ್ದಾರೆ ಎಂಬೆಲ್ಲ ವಿವರಗಳು ಭೌಗೋಳಿಕ ಮಾಹಿತಿ ವ್ಯವಸ್ಥೆಯ (ಜಿಐಎಸ್‌) ಮೂಲಕ ದಾಖಲಾಗುತ್ತಿದ್ದವು. ಆಗ ಹೊಣೆಯಿಂದ ನುಣುಚಿಕೊಳ್ಳಲು ಯಾರಿಗೂ ಅವಕಾಶವೇ ಇರುತ್ತಿರಲಿಲ್ಲ. ಪ್ರತಿಯೊಂದು ರಸ್ತೆಯ ಇತಿಹಾಸವನ್ನೂ ನಿರ್ವಹಣೆ ಮಾಡು ವಂತೆ‌ ನೋಡಿಕೊಳ್ಳುವುದು ಮುಖ್ಯಮಂತ್ರಿಯವರ ಹೊಣೆ. ಬೆಂಗಳೂರು ನಗರದ ರಸ್ತೆಗಳು ಮಾತ್ರ ವಲ್ಲದೆ ರಾಜ್ಯದ ಎಲ್ಲ ರಸ್ತೆಗಳು ಸದಾ ಸುಸ್ಥಿತಿಯಲ್ಲಿ ಇರುವಂತೆ ಎಚ್ಚರವನ್ನೂ ವಹಿಸಬೇಕು. ಪ್ರತೀ ರಸ್ತೆಯ ದುಃಸ್ಥಿತಿಗೆ ಸಂಬಂಧಿಸಿದಂತೆ ನಿರ್ದಿಷ್ಟ ಅಧಿಕಾರಿಯನ್ನು ಹೊಣೆಯಾಗಿಸಬೇಕು. ಗುತ್ತಿಗೆ ಅವಧಿ ಯಲ್ಲಿ ರಸ್ತೆಯನ್ನು ಸರಿಯಾಗಿ ನಿರ್ವಹಿಸದ ಗುತ್ತಿಗೆದಾರರ ವಿರುದ್ಧ ಕ್ರಮ ಕೈಗೊಂಡು, ಠೇವಣಿಯನ್ನು ಮುಟ್ಟುಗೋಲು ಹಾಕಿಕೊಳ್ಳಬೇಕು. ಇಂತಹ ಕಠಿಣ ಕ್ರಮಗಳಿಗೆ ಮುಂದಾಗದಿದ್ದರೆ ರಸ್ತೆಗುಂಡಿಗಳಿಂದ ಆಗುವ ಅನಾಹುತಗಳಿಗೆ ಕೊನೆ ಎಂಬುದೇ ಇರುವುದಿಲ್ಲ.