ಪ್ರವಾಹ: ಪರಿಹಾರ ಎಲ್ಲಿ? ವಿಳಂಬ ಸುತರಾಂ ಸಲ್ಲದು

ಕೇಂದ್ರ ಮತ್ತು ರಾಜ್ಯದಲ್ಲಿ ಒಂದೇ ಪಕ್ಷದ ಸರ್ಕಾರ ಇದ್ದರೆ, ಜನರ ಬವಣೆ ನಿವಾರಣೆಗೆ ಉತ್ತಮ ಸ್ಪಂದನ ದೊರೆಯುತ್ತದೆ, ಕೇಂದ್ರದಿಂದ ರಾಜ್ಯಕ್ಕೆ ಅನುದಾನ ಹೇರಳವಾಗಿ ಹರಿದುಬರುತ್ತದೆ, ಅದರಿಂದ ಜನರ ಬದುಕು ಹಸನಾಗುತ್ತದೆ ಎಂಬರ್ಥದ ಸಂಕಥನಗಳು ಚುನಾವಣೆ ವೇಳೆ ರೆಕ್ಕೆಪುಕ್ಕ ಪಡೆಯುತ್ತವೆ. ಜನಸಾಮಾನ್ಯರ ಮನದಲ್ಲಿ ಅಂತಹದೊಂದು ಭಾವನೆಯನ್ನು ಗಟ್ಟಿಗೊಳಿಸುವ ಪ್ರಯತ್ನಗಳನ್ನು ರಾಷ್ಟ್ರೀಯ ಪಕ್ಷಗಳು ಮಾಡುತ್ತಲೇ ಬಂದಿವೆ. ಆ ಪ್ರಯತ್ನದಲ್ಲಿ ಸ್ವಲ್ಪಮಟ್ಟಿಗೆ ಯಶಸ್ಸನ್ನೂ ಸಾಧಿಸಿವೆ. ಆದರೆ, ಪ್ರವಾಹ ಪರಿಹಾರದ ವಿಷಯದಲ್ಲಿ ಕೇಂದ್ರ ಸರ್ಕಾರ ಸ್ಪಂದಿಸುತ್ತಿರುವ ಪರಿ, ಅಂತಹ ನಂಬಿಕೆಯ ಬೇರುಗಳನ್ನು ಅಲುಗಾಡಿಸಿದೆ. ಕರ್ನಾಟಕದಲ್ಲಿ ಪ್ರವಾಹ ಅಪ್ಪಳಿಸಿ ಎರಡು ತಿಂಗಳಾಗಿದೆ. ಅದರಿಂದಾಗಿ, 22 ಜಿಲ್ಲೆಗಳ ಲಕ್ಷಾಂತರ ಜನರ ಬದುಕಿನ ಬುಡ ಶಿಥಿಲಗೊಂಡಿದೆ. ವಾಸದ ಮನೆ, ದವಸ–ಧಾನ್ಯ, ದನಕರುಗಳ ಕೊಟ್ಟಿಗೆ, ಒಣಮೇವು, ಪಚ್ಚೆಪೈರಿನ ಜತೆಗೆ ಭವಿಷ್ಯದ ಕನಸುಗಳೂ ಕೊಚ್ಚಿಕೊಂಡು ಹೋಗಿವೆ. ನಷ್ಟದ ಪ್ರಮಾಣವನ್ನು ₹ 35 ಸಾವಿರ ಕೋಟಿ ಎಂದು ಅಂದಾಜಿಸಲಾಗಿದೆ. ಇಂತಹ ಕಡುಕಷ್ಟದ ಕಾಲದಲ್ಲಿ ಕೈಹಿಡಿಯಬೇಕಿದ್ದ ಕೇಂದ್ರ ಸರ್ಕಾರವು ವಿಳಂಬ ಧೋರಣೆ ಅನುಸರಿಸುತ್ತಿದೆ. ರಾಜ್ಯ ಸರ್ಕಾರ ತನ್ನ ಇತಿಮಿತಿಯಲ್ಲಿ ಪರಿಹಾರದ ಮೊತ್ತವನ್ನು ಬಿಡುಗಡೆ ಮಾಡಿದೆ. ಆದರೆ, ಆಗಿರುವ ನಷ್ಟ ಅದರ ಸಾಮರ್ಥ್ಯವನ್ನು ಮೀರಿದ್ದು. ನೆರವಿಗಾಗಿ ತಮ್ಮದೇ ಪಕ್ಷದ ನೇತೃತ್ವದ ಕೇಂದ್ರ ಸರ್ಕಾರದತ್ತ ದೈನ್ಯದಿಂದ ನೋಡುತ್ತಿದೆ. ‘ಇಗೋ ಬಂತು, ಅಗೋ ಬಂತು’ ಎಂದು ಮುಖ್ಯಮಂತ್ರಿಯಿಂದ ಹಿಡಿದು, ಆಡಳಿತಾರೂಢ ಪಕ್ಷದ ವಿವಿಧ ಹಂತದ ಮುಖಂಡರವರೆಗೂ ಹೇಳುತ್ತಿದ್ದಾರೆ. ಆದರೆ, ಕೇಂದ್ರದಿಂದ ಬಿಡಿಗಾಸು ನೆರವೂ ದೊರೆತಿಲ್ಲ. ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಹಾಗೂ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಬಂದು ವೈಮಾನಿಕ ಸಮೀಕ್ಷೆ ನಡೆಸಿದರು. ಕೇಂದ್ರದಿಂದ ತಂಡ ಬಂದು ಸಮೀಕ್ಷೆ ನಡೆಸಿ, ವರದಿ ಕೊಟ್ಟಿದೆ. ತುರ್ತು ನೆರವಿಗಾಗಿ ರಾಜ್ಯ ಸರ್ಕಾರ ಬೇಡಿಕೆ ಇಟ್ಟಿದೆ, ಮನವಿ ಮಾಡಿದೆ. ಆದರೆ, ಇವು ಕೇಂದ್ರದಿಂದ ಈವರೆಗೆ ನೆರವು ದೊರಕಿಸಿಕೊಟ್ಟಿಲ್ಲ ಎಂಬುದು ಅತ್ಯಂತ ನೋವಿನ ಸಂಗತಿ. ಪರಿಹಾರ ನೀಡುವುದಕ್ಕೆ ತಾಂತ್ರಿಕ ಅಂಶಗಳು, ಮಾರ್ಗಸೂಚಿಗಳು ಕೆಲವೊಮ್ಮೆ ತೊಡಕಾಗಿ ಪರಿಣಮಿಸುತ್ತವೆ. ಆದರೆ, ಪ್ರಕೃತಿ ವಿಕೋಪದ ಸಂದರ್ಭದಲ್ಲಿ ಅಂತಹವುಗಳನ್ನೆಲ್ಲ ಬದಿಗೆ ಸರಿಸಿ ಸ್ಪಂದಿಸಬೇಕಾದುದು ಮಾನವೀಯ ಧರ್ಮ. ಅದನ್ನು ಅರಿಯುವಲ್ಲಿ ಕೇಂದ್ರ ಸರ್ಕಾರ ಸೋತಿದೆ ಎಂಬುದು ಗೋಡೆ ಮೇಲಿನ ಬರಹದಷ್ಟೇ ಸ್ಪಷ್ಟ.ಕೇಂದ್ರದ ಈ ನಿಲುವು ಆಡಳಿತಾರೂಢ ಬಿಜೆಪಿಯ ಕೆಲವು ನಾಯಕರಲ್ಲೇ ಕಿರಿಕಿರಿ ಮೂಡಿಸಿರುವುದು ಇದನ್ನು ಮತ್ತಷ್ಟು ದೃಢಪಡಿಸುತ್ತದೆ.