ಸಂಪಾದಕೀಯ| ಸ್ವಚ್ಛ ಸರ್ವೇಕ್ಷಣೆಯಲ್ಲಿ ಕಳಪೆ ಸಾಧನೆ: ಆತ್ಮಾವಲೋಕನಕ್ಕೆ ಸಕಾಲ

ನಗರಗಳನ್ನು ಸ್ವಚ್ಛವಾಗಿಡುವ ಪ್ರಾಥಮಿಕ ಹೊಣೆ ಸಂಬಂಧಿಸಿದ ನಗರ ಸ್ಥಳೀಯ ಆಡಳಿತಗಳದ್ದೇ ಆಗಿದ್ದರೂ ಅವುಗಳಿಗೆ ರಾಜ್ಯ ಸರ್ಕಾರದ ಸಹಕಾರ ಹಾಗೂ ಸಮುದಾಯದ ಸಹಭಾಗಿತ್ವ ಎರಡೂ ಅಗತ್ಯ. ಈ ಎರಡೂ ವಿಷಯಗಳಲ್ಲಿ ಕರ್ನಾಟಕ ತುಂಬಾ ಹಿಂದೆ ಬಿದ್ದಿರುವ ಅಂಶದತ್ತ ಸರ್ವೇಕ್ಷಣೆ ವರದಿ ಬೊಟ್ಟು ಮಾಡಿದೆ. ಕಸ ನಿರ್ವಹಣೆ ವಿಷಯದಲ್ಲಿ ಬೆಂಗಳೂರು ಮಹಾನಗರ ಸಂಪೂರ್ಣವಾಗಿ ಮುಗ್ಗರಿಸಿದ್ದು ಈ ಹಿಂದೆ ಜಾಗತಿಕ ಮಟ್ಟದ ಸುದ್ದಿಯಾಗಿತ್ತು. ನೈರ್ಮಲ್ಯದ ದಾರಿ ಕಂಡುಕೊಳ್ಳಲು ಆಗ ಒಂದಿಷ್ಟು ಯತ್ನಗಳು ನಡೆದಂತೆ ಕಂಡುಬಂದರೂ ಬಹುತೇಕ ಯೋಜನೆಗಳು ನಿಶ್ಚಿತ ಗುರಿಯನ್ನು ತಲುಪಲಿಲ್ಲ. ಸಮಸ್ಯೆ ಬಿಗಡಾಯಿಸಿ ಹತ್ತು ವರ್ಷಗಳಾದರೂ ಪರಿಹಾರದ ಮಾರ್ಗೋಪಾಯಗಳಿಗಾಗಿ ಬೆಂಗಳೂರು ಇನ್ನೂ ತಡಕಾಡುತ್ತಲೇ ಇದೆ. ಪ್ರಶಸ್ತಿಯ ಗರಿಯನ್ನು ಮೂಡಿಸಿಕೊಂಡ ನಗರಗಳಲ್ಲಿ ನಡೆದಿರುವ ಕಸ ನಿರ್ವಹಣೆಯತ್ತ ಗಮನಹರಿಸಿದರೆ ಪರಿಹಾರ ಸೂತ್ರಗಳು ಸಿಕ್ಕೇ ಸಿಗುತ್ತವೆ. ಮನೆ ಮನೆಯಿಂದ ಕಸ ಸಂಗ್ರಹ, ಮೂಲದಲ್ಲೇ ಹಸಿ ಮತ್ತು ಒಣ ಕಸ ವಿಂಗಡಣೆ ಹಾಗೂ ವೈಜ್ಞಾನಿಕ ಸಂಸ್ಕರಣೆ ವಿಷಯಗಳಲ್ಲಿ ಆ ನಗರಗಳು ಗಣನೀಯ ಸಾಧನೆಯನ್ನು ಮಾಡಿರುವುದು ಎದ್ದು ಕಾಣುತ್ತಿರುವ ಅಂಶ. ಮೂಲದಲ್ಲೇ ಕಸ ವಿಂಗಡಣೆ ಹಾಗೂ ಮನೆ, ಮನೆ ಕಸ ಸಂಗ್ರಹದ ಕುರಿತು ನಮ್ಮ ರಾಜಧಾನಿಯಲ್ಲಿ ದಶಕದಿಂದಲೂ ಅಬ್ಬರದ ಪ್ರಚಾರ ನಡೆಯುತ್ತಲೇ ಇದೆ. ಈ ಎರಡೂ ಮಹತ್ವದ ಗುರಿಗಳನ್ನು ಶೇ 50ರಷ್ಟು ತಲುಪುವುದು ಕೂಡ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಗೆ ಸಾಧ್ಯವಾಗಿಲ್ಲ. ಸ್ವಚ್ಛ ನಗರಗಳ ಪಟ್ಟಿಯಲ್ಲಿ ಸತತವಾಗಿ ಮೊದಲ ಸ್ಥಾನವನ್ನು ಗಳಿಸುತ್ತಿರುವ ಮಧ್ಯಪ್ರದೇಶದ ಇಂದೋರ್‌ನ ಕಸ ನಿರ್ವಹಣೆ ವ್ಯವಸ್ಥೆ ಕೂಡ ಇತರ ನಗರಗಳಿಗೆ ಮಾದರಿ. ಆ ನಗರದಲ್ಲಿ ರಾತ್ರಿ ವೇಳೆಯಲ್ಲಿಯೇ ಕಸ ಸಂಗ್ರಹಿಸಿ, ವಿಲೇವಾರಿ ಮಾಡಲಾಗುತ್ತಿದೆ. ರಸ್ತೆಗಳನ್ನೂ ರಾತ್ರಿ ವೇಳೆಯೇ ಸ್ವಚ್ಛಗೊಳಿಸಲಾಗುತ್ತಿದೆ. ಕಸದಿಂದ ಗೊಬ್ಬರವನ್ನೂ ಉತ್ಪಾದಿಸಲಾಗುತ್ತಿದೆ. ಇಂತಹ ಕ್ರಮಗಳು ರಾಜ್ಯದ ನಗರಗಳಿಗೂ ಮಾದರಿಯಾಗಬೇಕು. ನೈರ್ಮಲ್ಯ ಕಾಪಾಡುವಲ್ಲಿ ನಾಗರಿಕರ ಹೊಣೆಯೂ ಇರುವುದರಿಂದ ಅವರಲ್ಲಿ ಜಾಗೃತಿಯನ್ನು ಮೂಡಿಸಬೇಕು. ಸ್ವಚ್ಛತೆಗೆ ಸಂಬಂಧಿಸಿದ ಕಾನೂನುಗಳನ್ನು ಕಟ್ಟುನಿಟ್ಟಾಗಿ ಅನುಷ್ಠಾನಕ್ಕೆ ತರಬೇಕು. ಬೆಂಗಳೂರಿನಂತಹ ನಗರಗಳಲ್ಲಿ ಬೇರೂರಿರುವ ಕಸದ ಮಾಫಿಯಾವನ್ನು ಮೂಲಸಹಿತ ಕಿತ್ತು ಎಸೆಯಬೇಕು. ನೈರ್ಮಲ್ಯ ಕಾಪಾಡಲು ಸ್ಥಳೀಯ ಆಡಳಿತಗಳಿಗೆ ಬೇಕಾದ ಸಹಕಾರ ಹಾಗೂ ಸಮನ್ವಯದ ವ್ಯವಸ್ಥೆಯನ್ನು ರಾಜ್ಯ ಸರ್ಕಾರವು ಆದ್ಯತೆಯ ಮೇಲೆ ಮಾಡಬೇಕು.