ವಿದ್ಯುತ್‌ ಅವಘಡಕ್ಕೆ ಮುಗ್ಧರು ಬಲಿಯಾಗುವುದನ್ನು ತಪ್ಪಿಸಿ

ವಿದ್ಯುತ್‌ ಆಘಾತಕ್ಕೆ ಒಳಗಾಗಿ ಸಾವು ಸಂಭವಿಸಿದ ಪ್ರಕರಣಗಳು ರಾಜ್ಯದ ವಿವಿಧ ಭಾಗಗಳಿಂದ ನಿರಂತರವಾಗಿ ವರದಿಯಾಗುತ್ತಲೇ ಇವೆ. ಇತ್ತೀಚೆಗಷ್ಟೇ ಕೊಡಗು ಜಿಲ್ಲೆಯ ದೊಡ್ಡಪುಲಿಕೋಟು ಗ್ರಾಮದ ಕಾಫಿ ತೋಟದಲ್ಲಿ ಮರಗಳ ರೆಂಬೆ ಕತ್ತರಿಸುವಾಗ ಮೂವರು ಕಾರ್ಮಿಕರು ಸಾವಿಗೀಡಾಗಿದ್ದರು. ಅವರು ಬಳಸುತ್ತಿದ್ದ ಅಲ್ಯೂಮಿನಿಯಂ ಏಣಿ ಜಾರಿ, ತೋಟದ ನಡುವೆ ಹಾದುಹೋಗಿರುವ ವಿದ್ಯುತ್‌ ತಂತಿಗಳ ಸಂಪರ್ಕಕ್ಕೆ ಒಳಗಾಗಿತ್ತು. ಅದರ ಅರಿವಿಲ್ಲದೆ, ಏಣಿಯನ್ನು ಸರಿಪಡಿಸಲು ಹೋದ ಅಮಾಯಕರು ಜೀವ ಕಳೆದುಕೊಂಡಿದ್ದಾರೆ. ಇದೇ ಕೊಡಗಿನ ಅರ್ವತ್ತೊಕ್ಲು ಗ್ರಾಮದಲ್ಲಿ ತೆಂಗಿನಕಾಯಿ ಕೀಳಲು ಹೋದ ಮೂವರು ಕಾರ್ಮಿಕರು ವಿದ್ಯುತ್‌ ಆಘಾತದಿಂದ ಸಾವಿಗೀಡಾದ ದುರ್ಘಟನೆ ಕಳೆದ ತಿಂಗಳು ನಡೆದಿತ್ತು. ಅಲ್ಲಿ ಕೂಡ ಬಳಕೆಯಾಗಿದ್ದುದು ಅಲ್ಯೂಮಿನಿಯಂ ಏಣಿಯೇ. ಚಿಕ್ಕಮಗಳೂರು ಜಿಲ್ಲೆಯ ಸಸಿತೋಟದ ಬಳಿ ವಿದ್ಯುತ್‌ ಮಾರ್ಗ ಸರಿಪಡಿಸುವ ಸಂದರ್ಭದಲ್ಲಿ ಇದ್ದಕ್ಕಿದ್ದಂತೆ ವಿದ್ಯುತ್‌ ಪ್ರವಹಿಸಿದ ಕಾರಣದಿಂದಾಗಿ ಓರ್ವ ಲೈನ್‌ಮ್ಯಾನ್‌ ಸಾವಿಗೀಡಾದ ಘಟನೆಯಲ್ಲಿ ಅಧಿಕಾರಿಗಳ ನಿರ್ಲಕ್ಷ್ಯದ ಆರೋಪ ಕೇಳಿಬಂದಿದೆ. ಎರಡು–ಮೂರು ತಿಂಗಳ ಅವಧಿಯಲ್ಲಿ ನಡೆದಿರುವ ಇವೆಲ್ಲ ಘಟನೆಗಳು ಅಧಿಕಾರಿಗಳ ಬೇಜವಾಬ್ದಾರಿತನದ ಜೊತೆಗೆ ಸಾರ್ವಜನಿಕರ ಮೈಮರೆವಿಗೂ ನಿದರ್ಶನದಂತಿವೆ. ಅಮಾಯಕರ ಜೀವ ಅಗ್ಗವಲ್ಲ ಎನ್ನುವುದನ್ನು ಸಂಬಂಧಪಟ್ಟ ಅಧಿಕಾರಿಗಳು ಅರಿತು ಜಾಗೃತರಾಗಬೇಕು. ಮುಂಗಾರು ರಾಜ್ಯವನ್ನು ಪ್ರವೇಶಿಸುವ ಸಂದರ್ಭವಿದು. ಮಳೆಗಾಲದಲ್ಲಿ ಅಸುರಕ್ಷಿತ ವಿದ್ಯುತ್‌ ಪರಿಕರಗಳಿಂದ ಉಂಟಾಗುವ ಅಪಾಯದ ಸಾಧ್ಯತೆಗಳೂ ಹೆಚ್ಚು. ಸಾರ್ವಜನಿಕರು ಓಡಾಡುವ ಸ್ಥಳಗಳಲ್ಲಿಯೇ ಇರುವ ಅನೇಕ ಟ್ರಾನ್ಸ್‌ಫಾರ್ಮರ್‌ಗಳು ನೀರಿನ ಸಂಪರ್ಕಕ್ಕೆ ಸುಲಭವಾಗಿ ಬರುವಂತೆ ಇರುತ್ತವೆ. ರಸ್ತೆಗಳಲ್ಲಿನ ಮರಗಳ ರೆಂಬೆಕೊಂಬೆಗಳು ಅಡ್ಡಾದಿಡ್ಡಿಯಾಗಿ ಬೆಳೆದು ವಿದ್ಯುತ್‌ ತಂತಿಗಳಿಗೆ ತಾಕುವಂತೆ ಇರುತ್ತವೆ. ಇವೆಲ್ಲದರ ಬಗ್ಗೆ ಸಿಬ್ಬಂದಿ ನಿಗಾ ವಹಿಸಬೇಕು.