ಶ್ರೀಲಂಕಾದಲ್ಲಿ ಭೀಕರ ಸ್ಫೋಟ ಉಗ್ರರ ದಮನಕ್ಕೆ ಜಗವೇ ಒಂದಾಗಲಿ

ಸುಮಾರು ಮೂರೂವರೆ ದಶಕಗಳ ಕಾಲ ಬಹುಸಂಖ್ಯಾತ ಸಿಂಹಳೀಯರು ಮತ್ತು ಅಲ್ಪಸಂಖ್ಯಾತ ತಮಿಳರ ನಡುವಣ ಅಂತರ್ಯುದ್ಧವನ್ನು ಎದುರಿಸಿಯೂ ತನ್ನ ವಿಶಿಷ್ಟ ಸಂಸ್ಕೃತಿ ಮತ್ತು ಅಂತಃಸ್ಸತ್ವವನ್ನು ಉಳಿಸಿಕೊಂಡ ದೇಶ ಶ್ರೀಲಂಕಾ. ಈ ಅಂತರ್ಯುದ್ಧದ ಅವಧಿಯಲ್ಲಿ ಹಲವು ರಕ್ತಸಿಕ್ತ ಘಟನೆಗಳು ಅಲ್ಲಿ ನಡೆದುಹೋಗಿವೆ. ಆದರೆ ಕಳೆದ ಹತ್ತು ವರ್ಷಗಳಿಂದ ದೇಶದಲ್ಲಿ ಶಾಂತಿ ನೆಲೆಸಿದ್ದು, ತಕ್ಕಮಟ್ಟಿಗೆ ಆರ್ಥಿಕ ಪ್ರಗತಿಯನ್ನೂ ಸಾಧಿಸಲಾಗಿದೆ. ಸಿಂಹಳೀಯರು ಮತ್ತು ತಮಿಳರು ಪರಸ್ಪರ ವೈರತ್ವವನ್ನು ಮರೆತು ಮತ್ತೆ ದೇಶ ಕಟ್ಟುವ ಕೆಲಸದಲ್ಲಿ ಒಂದಾಗಿದ್ದರು. ಇತ್ತೀಚೆಗೆ ಬಹುಸಂಖ್ಯಾತ ಬೌದ್ಧಧರ್ಮೀಯರು ಮತ್ತು ಮುಸ್ಲಿಮರ ಮಧ್ಯೆ ಕೆಲವು ಘರ್ಷಣೆಗಳು ವರದಿಯಾಗಿದ್ದರೂ, ಪರಿಸ್ಥಿತಿ ನಿಯಂತ್ರಣದಲ್ಲೇ ಇತ್ತು. ಈಗ ನಡೆದಿರುವ ಸರಣಿ ಬಾಂಬ್‌ ಸ್ಫೋಟದಿಂದಾಗಿ ದೇಶ ಮತ್ತೆ ಅಂತರ್ಯುದ್ಧದತ್ತ ವಾಲದಂತೆ ನೋಡಿಕೊಳ್ಳುವ ಜವಾಬ್ದಾರಿ ಅಲ್ಲಿನ ಎಲ್ಲ ಅಧಿಕಾರಸ್ಥರ ಮೇಲಿದೆ. ಬಾಂಬ್‌ ಸ್ಫೋಟಕ್ಕೆ ಯಾವುದೇ ಉಗ್ರಸಂಘಟನೆ ಹೊಣೆ ಹೊತ್ತುಕೊಂಡಿಲ್ಲವಾದರೂ ಒಂದು ವರ್ಷದಿಂದ ಕೆಲವು ಹಿಂಸಾಚಾರದ ಘಟನೆಗಳಲ್ಲಿ ಒಳಗೊಂಡಿರುವ ನ್ಯಾಷನಲ್‌ ತಬ್ಲೀಗ್‌ ಜಮಾತ್‌ನ ಕೈವಾಡ ಈ ಸ್ಫೋಟಗಳ ಹಿಂದೆ ಇರಬಹುದೆಂದು ಶಂಕಿಸಲಾಗಿದೆ. ಪೊಲೀಸರು 24 ಜನರನ್ನು ಸಂಶಯದ ಮೇಲೆ ಬಂಧಿಸಿದ್ದು, ತನಿಖೆಯನ್ನು ಚುರುಕುಗೊಳಿಸಿದ್ದಾರೆ. ಈ ಮಾರಣಹೋಮಕ್ಕೆ ಯಾರೇ ಕಾರಣರಾಗಿದ್ದರೂ ಅವರ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮಗಳನ್ನು ಕೈಗೊಳ್ಳುವ ಮೂಲಕ ದೇಶದ ಜನರಲ್ಲಿ ಸುರಕ್ಷೆಯ ಭಾವ ತುಂಬುವ ಕೆಲಸ ಶೀಘ್ರ ಆಗಬೇಕಿದೆ. ದೇಶದ ಚರ್ಚ್‌ಗಳ ಮೇಲೆ ಬಾಂಬ್‌ ದಾಳಿ ನಡೆಯುವ ಸಂಭವವಿದೆ ಎಂದು ಹತ್ತು ದಿನಗಳ ಹಿಂದೆಯೇ ಗುಪ್ತಚರ ಇಲಾಖೆ ವರದಿ ನೀಡಿದ್ದರೂ ಅಧಿಕಾರಿಗಳು ತುರ್ತುಕ್ರಮಗಳನ್ನು ಏಕೆ ಕೈಗೊಂಡಿಲ್ಲ ಎನ್ನುವ ಪ್ರಶ್ನೆಯೂ ಇಲ್ಲಿದೆ. ಈ ಕುರಿತು ಸೂಕ್ತ ತನಿಖೆ ನಡೆಸುವುದಾಗಿ ಪ್ರಧಾನಿ ರನಿಲ್‌ ವಿಕ್ರಮಸಿಂಘೆ ಹೇಳಿದ್ದಾರೆ. ಒಂದು ವರ್ಷದಿಂದ ಶ್ರೀಲಂಕಾದಲ್ಲಿ ರಾಜಕೀಯ ಪಕ್ಷಗಳ ಮಧ್ಯೆ ನಡೆಯುತ್ತಿರುವ ಆಂತರಿಕ ಸಂಘರ್ಷವೂ ಗುಪ್ತಚರ ವರದಿಯ ನಿರ್ಲಕ್ಷ್ಯಕ್ಕೆ ಕಾರಣವಿರಬಹುದು ಎನ್ನಲಾಗುತ್ತಿದೆ. ಏನೇ ಇದ್ದರೂ ಭಯೋತ್ಪಾದನೆಯನ್ನು ಮಟ್ಟ ಹಾಕುವ ಪ್ರಕ್ರಿಯೆಯಲ್ಲಿ ಶ್ರೀಲಂಕಾದ ಜೊತೆಗೆ ಅಂತರರಾಷ್ಟ್ರೀಯ ಸಮುದಾಯ ಹೆಗಲು ಕೊಡಬೇಕಿದೆ. ಭಯೋತ್ಪಾದನೆ ಎನ್ನುವುದು ಇಡೀ ಜಗತ್ತನ್ನೇ ನುಂಗಿ ನೊಣೆಯುವ ಪೆಡಂಭೂತ ಎನ್ನುವುದನ್ನು ಯಾರೂ ಮರೆಯಬಾರದು.