ಬೀದಿನಾಯಿ ನಿಯಂತ್ರಣ ಇನ್ನು ಸಬೂಬು ಬೇಡ

1960ರ ಪ್ರಾಣಿ ಹಿಂಸೆ ತಡೆ ಕಾಯ್ದೆಯ ಸೆಕ್ಷನ್‌ 11 ಹಾಗೂ ಭಾರತೀಯ ದಂಡಸಂಹಿತೆಯ ಸೆಕ್ಷನ್‌ 428 ಮತ್ತು 429ರ ಅನುಸಾರ ನಾಯಿಗಳಿಗೂ ರಕ್ಷಣೆ ಇದೆ. ಸಂಖ್ಯೆ ಹೆಚ್ಚಾಯಿತೆಂದು ಅವುಗಳನ್ನು ಕೊಲ್ಲಲು ಅವಕಾಶ ಇಲ್ಲ.ಬೀದಿನಾಯಿಗಳ ಹಾವಳಿ ತಡೆಯುವುದಕ್ಕೆ ಇರುವ ಏಕೈಕ ನಿಯಮಬದ್ಧ ಪರಿಹಾರ ಮಾರ್ಗವೆಂದರೆ ಅವುಗಳ ಸಂತಾನಶಕ್ತಿಹರಣ ಶಸ್ತ್ರಚಿಕಿತ್ಸೆಯನ್ನು ಕಾಲಕಾಲಕ್ಕೆ ನಡೆಸುವುದು, ಆ ಮೂಲಕ ಅವುಗಳ ಸಂತತಿ ನಿಯಂತ್ರಣ ಮೀರಿ ಬೆಳೆಯುವುದನ್ನು ತಡೆಯುವುದು.

ಈ ಸಲುವಾಗಿಯೇ ಬಿಬಿಎಂಪಿಯು ಬಜೆಟ್‌ನಲ್ಲಿ ₹3 ಕೋಟಿಯಷ್ಟು ಮೊತ್ತವನ್ನು ತೆಗೆದಿರಿಸುತ್ತದೆ. ಒಂದು ನಾಯಿಗೆ ಸಂತಾನಶಕ್ತಿಹರಣ ಶಸ್ತ್ರಚಿಕಿತ್ಸೆ ನಡೆಸಲು ₹1,200 ವೆಚ್ಚವಾಗುತ್ತದೆ. ಆದರೆ, ಬೀದಿನಾಯಿಗಳ ಸಂತಾನ ನಿಯಂತ್ರಣ ಕಾರ್ಯಕ್ರಮಕ್ಕೆ ಬಿಡುಗಡೆಯಾದ ಹಣ ದುರುಪಯೋಗವಾಗಿರುವ ಬಗ್ಗೆಯೂ ದೂರುಗಳಿವೆ. ಶಸ್ತ್ರಚಿಕಿತ್ಸೆ ನಡೆಸಲು ಆಯ್ಕೆ ಮಾಡಲಾಗಿದ್ದ ಸಂಸ್ಥೆಗಳ ಗುತ್ತಿಗೆಯನ್ನು ಹಣ ದುರುಪಯೋಗದ ಕಾರಣಕ್ಕೆ ರದ್ದುಪಡಿಸಿದ ನಿದರ್ಶನಗಳೂ ಇವೆ. ಮುಂದೆ ಹೀಗಾಗದಂತೆ ಎಚ್ಚರ ವಹಿಸುವುದು ಅಗತ್ಯ.

ಶಸ್ತ್ರಚಿಕಿತ್ಸೆ ನಡೆಸಿದ ಬಳಿಕ ಬೀದಿನಾಯಿಗಳನ್ನು ಅವು ಮೊದಲು ಇದ್ದ ಪ್ರದೇಶದಲ್ಲೇ ಬಿಡಬೇಕು ಎಂದು ಸುಪ್ರೀಂ ಕೋರ್ಟ್‌ ನಿರ್ದೇಶಿಸಿದೆ. ಬೇರೆ ಕಡೆ ಬಿಟ್ಟರೆ, ಅವು ಅಲ್ಲಿನ ಪರಿಸರಕ್ಕೆ ಹೊಂದಿಕೊಳ್ಳದೆ ವ್ಯಗ್ರವಾಗಿ ವರ್ತಿಸುವ ಅಪಾಯ ಹೆಚ್ಚು. ಸಂತಾನ ನಿಯಂತ್ರಣ ಕಾರ್ಯಕ್ರಮದ ಗುತ್ತಿಗೆ ಪಡೆದ ಸಂಸ್ಥೆಗಳು ತಮ್ಮ ಕರ್ತವ್ಯವನ್ನು ಸರಿಯಾಗಿ ನಡೆಸುತ್ತಿಲ್ಲ ಎಂಬುದು ಪ್ರಾಣಿದಯಾ ಸಂಘಟನೆಗಳ ದೂರು. ಶಸ್ತ್ರಚಿಕಿತ್ಸೆಗೊಳಪಡಿಸಿದ ನಾಯಿಗಳು 2–3 ದಿನಗಳಲ್ಲೇ ಸತ್ತ ನಿದರ್ಶನಗಳು ಬಹಳಷ್ಟಿವೆ. ಶಸ್ತ್ರಚಿಕಿತ್ಸೆ ಬಳಿಕ ಅವುಗಳನ್ನು ಆರೈಕೆ ಮಾಡಲು ನಾಯಿಗೂಡುಗಳ ಸಂಖ್ಯೆಯೂ ಅಗತ್ಯ ಪ್ರಮಾಣದಲ್ಲಿ ಇಲ್ಲ ಎಂಬ ಆರೋಪ ಇದೆ. ಶಸ್ತ್ರಚಿಕಿತ್ಸೆಯು ಕಾಟಾಚಾರದ ಕ್ರಿಯೆ ಆಗದಂತೆ ನೋಡಿಕೊಳ್ಳುವುದು ಹಾಗೂಶಸ್ತ್ರಚಿಕಿತ್ಸೆಗೆ ಅಗತ್ಯ ಮೂಲಸೌಕರ್ಯ ಒದಗಿಸುವುದು ಬಿಬಿಎಂಪಿಯ ಕರ್ತವ್ಯ.

ಸಂತಾನ ನಿಯಂತ್ರಣ ಕಾರ್ಯಕ್ರಮವನ್ನು ನಿರಂತರವಾಗಿ ಹಾಗೂ ವ್ಯಾಪಕವಾಗಿ ನಡೆಸಿದರೆ ಮಾತ್ರ ಬೀದಿನಾಯಿಗಳ ಸಂಖ್ಯೆಯನ್ನು ಹದ್ದುಬಸ್ತಿನಲ್ಲಿ ಇಡಬಹುದು. ಇತ್ತೀಚಿನ ಐದು ವರ್ಷಗಳ ದಾಖಲೆಗಳನ್ನು ನೋಡಿದರೆ ಬಿಬಿಎಂಪಿಯು ವರ್ಷಕ್ಕೆ ಸುಮಾರು 35 ಸಾವಿರದಿಂದ 45 ಸಾವಿರ ನಾಯಿಗಳಿಗೆ ಶಸ್ತ್ರಚಿಕಿತ್ಸೆ ನಡೆಸಿರುವುದು ಕಂಡುಬಂದಿದೆ. 2016–17ರಲ್ಲಿ ಈ ಸಂಖ್ಯೆ ದಿಢೀರನೆ 8,662ಕ್ಕೆ ಕುಸಿದಿತ್ತು.ಸಂತಾನ ನಿಯಂತ್ರಣ ಕಾರ್ಯಕ್ರಮದಲ್ಲಿ ನಿರಂತರತೆ ಕಾಯ್ದುಕೊಳ್ಳದೇ ಹೋದರೆ ನಾಯಿಗಳ ಸಂಖ್ಯೆ ಭಾರಿ ಪ್ರಮಾಣದಲ್ಲಿ ಹೆಚ್ಚಳ ಕಾಣುತ್ತದೆ. ಇದಕ್ಕೆ ಬಿಬಿಎಂಪಿ ಅವಕಾಶ ನೀಡಬಾರದು. 2012ರ ಬಳಿಕ ನಗರದಲ್ಲಿ ಬೀದಿನಾಯಿಗಳು ಎಷ್ಟು ಇವೆ ಎಂಬುದನ್ನು ತಿಳಿದುಕೊಳ್ಳುವ ಪ್ರಯತ್ನವೇ ನಡೆದಿರಲಿಲ್ಲ.

ನಾಯಿಗಳ ಕುರಿತ ನಿಖರ ಮಾಹಿತಿ ಕೊರತೆಯಿಂದಸಂತಾನ ನಿಯಂತ್ರಣ ಕಾರ್ಯಕ್ರಮವನ್ನು ಸಮರ್ಪಕವಾಗಿ ನಡೆಸಲು ಸಾಧ್ಯವಾಗುತ್ತಿಲ್ಲ ಎಂದು ಅಧಿಕಾರಿಗಳು ಸಬೂಬು ಹೇಳುತ್ತಿದ್ದರು. ಇನ್ನು ಇದಕ್ಕೆ ಅವಕಾಶ ಇಲ್ಲ. ಯಾವ ವಾರ್ಡ್‌ನಲ್ಲಿ ಎಷ್ಟು ಬೀದಿನಾಯಿಗಳಿವೆ, ಅವುಗಳಲ್ಲಿ ಗಂಡೆಷ್ಟು, ಹೆಣ್ಣೆಷ್ಟು, ಎಷ್ಟು ನಾಯಿಗಳಿಗೆ ಶಸ್ತ್ರಚಿಕಿತ್ಸೆ ಬಾಕಿ ಇದೆ ಎಂಬ ನಿಖರ ಅಂಕಿ–ಅಂಶಗಳು ಬಿಬಿಎಂಪಿ ಬಳಿ ಈಗ ಇವೆ. ಈ ದತ್ತಾಂಶದ ಆಧಾರದಲ್ಲಿ ಬೀದಿನಾಯಿಗಳ ಸಂತಾನ ನಿಯಂತ್ರಣಕ್ಕೆ ಪರಿಣಾಮಕಾರಿ ಯೋಜನೆ ರೂಪಿಸಬೇಕು.