ಸಮಪಾಲು ಆಕೆಯ ಹಕ್ಕು ಪುರುಷ ವ್ಯವಸ್ಥೆ ಅರಿಯಲಿ

ಈ ನಡುವೆ ಸುಮಲತಾ ಮಂಡ್ಯದಗೌಡತಿ ಅಲ್ಲ,ಮಂಡ್ಯಕ್ಕೆ ಅವರ ಕೊಡುಗೆಯೇನು ಎಂದು ಅವರ ಆಂಧ್ರ ಮೂಲವನ್ನು ಕೆದಕಲಾಗಿದೆ.ರಾಜಕೀಯ ಸಮೀಕರಣಗಳು ಕೂಡಿ ಬರದೆ ವಿರೋಧ ಮಾಡಿದರೆ ಅದಕ್ಕೆ ಅರ್ಥ ಉಂಟು.ಆದರೆ, ಮಂಡ್ಯದ ಗೌಡತಿ ಅಲ್ಲ ಎಂಬ ಕಾರಣಕ್ಕಾಗಿ ಮಹಿಳೆಯೊಬ್ಬರ ರಾಜಕೀಯ ಪ್ರವೇಶಕ್ಕೆ ಅಡಚಣೆ ಒಡ್ಡುವುದು ಸ್ವಸ್ಥ ಸಮಾಜದ ಲಕ್ಷಣವಲ್ಲ.ಭಾರತೀಯ ಮೂಲದ ಕಮಲಾ ಹ್ಯಾರಿಸ್ ಅಮೆರಿಕೆಯ ರಾಷ್ಟ್ರಾಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸುವರೆಂಬ ಸುದ್ದಿಗೆ ಹೆಮ್ಮೆಯಿಂದ ಬೀಗುವುದು ಡಾಂಬಿಕತನ ಆದೀತು.ಲಾಲೂ ಪ್ರಸಾದ್ ತಮ್ಮ ಪತ್ನಿ ರಾಬ್ಡಿದೇವಿಗೆ ಮುಖ್ಯಮಂತ್ರಿ ಪಟ್ಟ ಕಟ್ಟಿದ್ದು ಅನಿವಾರ್ಯಗಳಿಗೆ ಕಟ್ಟುಬಿದ್ದು ಎಂಬುದು ನಿಜ.ಆದರೆ, ಬಿಹಾರಕ್ಕೆ ರಾಬ್ಡಿದೇವಿ ಕೊಡುಗೆಯೇನು ಎಂದು ಆಕೆಯನ್ನು ತಡೆ ಹಿಡಿದಿದ್ದರೆ ಅಡುಗೆ ಮನೆಯ ಬಂದಿಯಾಗಿದ್ದ ಮಹಿಳೆಯೊಬ್ಬರು ಬಿಹಾರ ವಿಧಾನಸಭೆಯಲ್ಲಿ ನಿಂತು ನಿತೀಶ್ ಕುಮಾರ್ ಅವರನ್ನು ತರಾಟೆಗೆ ತೆಗೆದುಕೊಳ್ಳುವುದು ಸಾಧ್ಯವಾಗುತ್ತಿರಲಿಲ್ಲ.ಆದರೆ ಲಾಲೂ-ರಾಬ್ಡಿ ಪುತ್ರ ತೇಜಸ್ವಿ ಯಾದವ್ ವಯಸ್ಸಿಗೆ ಬಂದ ನಂತರ ರಾಬ್ಡಿದೇವಿ ಎಂಬ ಮಹಿಳೆ ರಾಜಕಾರಣದಲ್ಲಿನ ತಮ್ಮ ಸ್ಥಾನವನ್ನು ಪುತ್ರನಾದರೂ ಪುರುಷನೊಬ್ಬನಿಗೆ ‘ತ್ಯಾಗ’ ಮಾಡಬೇಕಾಗಿ ಬಂದದ್ದು ಬಹುದೊಡ್ಡ ವ್ಯಂಗ್ಯ. ‘ಮಹಿಳೆ ಅರ್ಧ ಆಕಾಶದ ಒಡತಿ’ ಎಂದು ಚೀನಾ ಕ್ರಾಂತಿಯ ಹರಿಕಾರ ಮಾವೊ ತ್ಸೆ ತುಂಗ್ ಪ್ರತಿಪಾದಿಸಿದ್ದುಂಟು.ಆದರೆ, ಚೀನಾ ಸೇರಿದಂತೆ ಜಗತ್ತಿನ ಬಹುತೇಕ ರಾಜಕೀಯ ವ್ಯವಸ್ಥೆಗಳಲ್ಲಿ ಮಹಿಳೆಯನ್ನು ಅಂಚಿಗೆ ನೂಕಲಾಗಿದೆ.ಈ ಮಾತಿಗೆ ಭಾರತವೂ ಅಪವಾದ ಅಲ್ಲ.ರಾಜಕಾರಣದಲ್ಲಿ ಮಹಿಳೆಗೆ ಮೀಸಲಾತಿ ನೀಡಿದರೆ ತುಟಿ ರಂಗು ಹಚ್ಚಿದ ಮತ್ತು ಬಾಬ್ ಕಟ್ ಮಾಡಿಸಿಕೊಂಡ ವರ್ಗದ ಮಹಿಳೆಯರೇ ಅದರ ಲಾಭ ಪಡೆಯುತ್ತಾರೆ ಎಂದು ಕೆಲವು ಪ್ರಮುಖ ಪಕ್ಷಗಳ ನಾಯಕರು ಮಾಡಿದ ಟೀಕೆ ಪುರುಷಪ್ರಧಾನ ಮನಸ್ಥಿತಿಗೆ ಹಿಡಿದ ಕನ್ನಡಿ.ಹೀಗಾಗಿಯೇ ಶಾಸನಸಭೆಗಳಲ್ಲಿ100ಕ್ಕೆ 33ಸ್ಥಾನಗಳನ್ನು ಮಹಿಳೆಗೆ ಮೀಸಲಿಡಬೇಕೆಂಬ ಆಶಯ ಮಸೂದೆಯ ರೂಪ ತಳೆದರೂ ಸಂಸತ್ತಿನ ಅಂಗೀಕಾರ ಕನಸಾಗಿಯೇ ಉಳಿದು, ಕಡೆಗೆ ಅದರ ಅವಧಿ ತೀರಿ ಕೊನೆಯುಸಿರೆಳೆದದ್ದು ದುರಂತವೇ ಸರಿ.ಮಹಿಳೆಗೆ ಅರ್ಧಾಸನ ಬಿಟ್ಟುಕೊಡುವ ಇಚ್ಛಾಶಕ್ತಿ ಪ್ರಕಟಿಸುವ ಕಾಲಮಾನ ಮುಖಾಮುಖಿಯಾಗಿದೆ ಎಂಬುದು ನಿಷ್ಠುರ ಸತ್ಯ.ಪುರುಷರಿಂದಲೇ ಕಿಕ್ಕಿರಿದಿರುವ ನಮ್ಮ ರಾಜಕೀಯ ಪಕ್ಷಗಳು ಈ ಸತ್ಯವನ್ನು ಎಷ್ಟು ಬೇಗ ಅರಿತರೆ ಅಷ್ಟು ಒಳ್ಳೆಯದು.