ಸಂಪಾದಕೀಯ: ಪಟಾಕಿ ಸಿಡಿಸುವುದಕ್ಕೆ ನಿರ್ಬಂಧ ಸರ್ಕಾರ ಉಲ್ಟಾ ಹೊಡೆದಿದ್ದೇಕೆ?

ದೇಶದಲ್ಲಿ ಮಹಾರಾಷ್ಟ್ರ ಹೊರತುಪಡಿಸಿದರೆ ಅತ್ಯಧಿಕ ಕೋವಿಡ್‌ ಪೀಡಿತರನ್ನು ಹೊಂದಿರುವ ರಾಜ್ಯ ಕರ್ನಾಟಕ. ಅದರಲ್ಲೂ ಬೆಂಗಳೂರು ಈಗಲೂ ದೇಶದ ಹಾಟ್‌ಸ್ಪಾಟ್‌ಗಳಲ್ಲಿ ಒಂದೆನಿಸಿದೆ. ಇಂತಹ ಸನ್ನಿವೇಶದಲ್ಲಿ ವೈರಾಣು ನಿಯಂತ್ರಣಕ್ಕಾಗಿ ಕೈಗೊಳ್ಳುವ ಕಟ್ಟುನಿಟ್ಟಿನ ಕ್ರಮಗಳಲ್ಲಿ ಯಾವ ಸಡಿಲಿಕೆಗೂ ಆಸ್ಪದ ನೀಡುವ ಅಗತ್ಯವಿಲ್ಲ. ಚಳಿಗಾಲ ಶುರುವಾಗುತ್ತಿರುವ ಈ ಸಂದರ್ಭದಲ್ಲಿ ವೈರಾಣು ಹರಡುವಿಕೆಯ ತೀವ್ರತೆ ಹೆಚ್ಚು ಎಂದು ತಜ್ಞರು ಹೇಳುತ್ತಿದ್ದಾರೆ. ಅದರೊಟ್ಟಿಗೆ ಪಟಾಕಿ ಸಿಡಿತದಿಂದ ಉಂಟಾದ ಮಾಲಿನ್ಯವೂ ಸೇರಿಕೊಂಡರೆ ಸಮಸ್ಯೆ ಮತ್ತಷ್ಟು ಬಿಗಡಾಯಿಸುತ್ತದೆ. ‘ಹಸಿರು ಪಟಾಕಿ’ಗೆ ಮಾತ್ರ ಅನುಮತಿ ಎಂದು ಸರ್ಕಾರ ಹೇಳುತ್ತಿದೆ. ಆದರೆ, ಪಟಾಕಿ ಸಿಡಿಸುವವರ ಮೇಲೆ ನಿಗಾ ಇಡುವವರು, ಕಡಿಮೆ ಸದ್ದು ಹೊರಡಿಸುವ, ಹೆಚ್ಚು ಮಾಲಿನ್ಯಕಾರಕವಲ್ಲದ ಪಟಾಕಿಗಳನ್ನು ಮಾತ್ರ ಸಿಡಿಸಲಾಗಿದೆ ಎಂದು ಖಚಿತಪಡಿಸುವವರು ಯಾರು? ಸಾರ್ವಜನಿಕ ಆರೋಗ್ಯವನ್ನು ಸಂಕಷ್ಟಕ್ಕೆ ತಳ್ಳಿದರೂ ಪರವಾಗಿಲ್ಲ, ಪಟಾಕಿಯನ್ನು ಸಿಡಿಸಿಯೇ ಸಿದ್ಧ ಎನ್ನುವ ಹಟವಾದರೂ ಏಕೆ? ಪಟಾಕಿ ಹೊಡೆಯುವವರು, ಆ ಖಯಾಲಿಗಾಗಿ ತಮ್ಮ ಆರೋಗ್ಯವನ್ನಲ್ಲದೆ ಸಮುದಾಯದ ಸ್ವಾಸ್ಥ್ಯವನ್ನೇ ಪಣಕ್ಕೆ ಇಡುತ್ತಿರುವುದನ್ನು ಮರೆಯಬಾರದು. ವಾಯು ಗುಣಮಟ್ಟದ ಯಾವುದೇ ಸಮೀಕ್ಷೆಗಳ ಮೇಲೊಮ್ಮೆ ಕಣ್ಣಾಡಿಸಿ ನೋಡಿದರೆ ಬೆಂಗಳೂರು ಮಾತ್ರವಲ್ಲದೆ, ಹುಬ್ಬಳ್ಳಿ–ಧಾರವಾಡ, ಕಲಬುರ್ಗಿ ಮತ್ತು ದಾವಣಗೆರೆ ನಗರಗಳು ಪರಿಶುದ್ಧ ಗಾಳಿಯ ಕೊರತೆ ಅನುಭವಿಸುತ್ತಿರುವುದು ಎದ್ದು ಕಾಣುತ್ತದೆ. ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿ (ಎನ್‌ಜಿಟಿ) ಸಿದ್ಧಪಡಿಸಿದ ವಾಯು ಗುಣಮಟ್ಟ ಕುಸಿತ ಕಂಡ ನಗರಗಳ ಪಟ್ಟಿಯಲ್ಲೂ ಇವುಗಳ ಹೆಸರಿದೆ. ಈ ಸಂಬಂಧ ರಾಜ್ಯ ಸರ್ಕಾರಕ್ಕೆ ಎನ್‌ಜಿಟಿ ನೋಟಿಸ್ ಕೂಡ ನೀಡಿದೆ. ಶ್ವಾಸಕೋಶ ಸಂಬಂಧಿ ಕಾಯಿಲೆಗಳಿಂದ ಬಳಲುವವರಿಗೆ ಬೆಂಗಳೂರು ಉತ್ತಮ ಸ್ಥಳವಲ್ಲ ಎಂಬ ಮಾತು ವೈದ್ಯರಿಂದಲೇ ಕೇಳಿಬಂದಿದೆ. ಪರಿಸ್ಥಿತಿ ಹೀಗಿರುವಾಗ ಸರ್ಕಾರ ತಾನು ಕೈಗೊಂಡ ಸರಿಯಾದ ನಿರ್ಧಾರದಿಂದ ಹಿಂದೆ ಸರಿದಿದ್ದಾದರೂ ಏಕೆ? ಹಬ್ಬವನ್ನು ಮನೆಯಲ್ಲೇ ಸಡಗರದಿಂದ ಆಚರಿಸೋಣ. ಆದರೆ, ಆರೋಗ್ಯದ ಕುರಿತು ನಿರ್ಲಕ್ಷ್ಯ ಸಲ್ಲದು. ಪಟಾಕಿ ನಿಷೇಧದ ವಿಚಾರದಲ್ಲಿ ರಾಜ್ಯ ಸರ್ಕಾರವು ಹೆಜ್ಜೆ ಹಿಂದಿಡುವಲ್ಲಿ ಯಾವುದಾದರೂ ಲಾಬಿ ಕೆಲಸ ಮಾಡಿದ್ದು ನಿಜವೇ ಆಗಿದ್ದರೆ, ಆಡಳಿತದ ಹೊಣೆ ಹೊತ್ತವರು ಜನರ ಆರೋಗ್ಯವನ್ನು ಕಡೆಗಣಿಸಿದ್ದಾರೆಂದೇ ಅರ್ಥ.