ಸಂಗತ: ತಬರನೂ ಇದ್ದಾನೆ, ಜಡ ಕಚೇರಿಗಳೂ ಇವೆ!

ಅಂಚೆ ಕಚೇರಿಗೆ ಪುಸ್ತಕವೊಂದನ್ನು ‘ಗ್ಯಾನ್ ಪೋಸ್ಟ್’ ಮೂಲಕ ಕಳಿಸಲು ಹೋಗಿದ್ದೆ. ಕೌಂಟರ್ನಲ್ಲಿ ಇದ್ದವರಿಗೆ ‘ಗ್ಯಾನ್ ಪೋಸ್ಟ್’ ಎನ್ನುವ ಒಂದು ಸೇವೆ ಇರುವುದೇ ತಿಳಿದಿರಲಿಲ್ಲ. ಅದನ್ನು ಹೇಗೆ ಮಾಡಬೇಕು ಅನ್ನುವುದೂ ಗೊತ್ತಿರಲಿಲ್ಲ. ಅವರಿಗೆ ಅದನ್ನೆಲ್ಲ ಹೇಳಿ ಮಾಡಿಸಿದೆ. ಅವರು ಕೀಬೋರ್ಡ್ನ ಒಂದೊಂದೇ ಗುಂಡಿಗಳನ್ನು ಹುಡುಕಿ ಹುಡುಕಿ ಒತ್ತಿ ಪ್ರಕ್ರಿಯೆ ಮುಗಿಸಲು ಒಂದು ಗಂಟೆಯೇ ಬೇಕಾಯ್ತು. ನನ್ನ ಹಿಂದೆ ದೊಡ್ಡ ಸಾಲೂ ಇತ್ತು.

. ಇತ್ತೀಚೆಗೆ ನನ್ನ ಶಿಕ್ಷಕಮಿತ್ರರೊಬ್ಬರು ಶಿಕ್ಷಣ ಇಲಾಖೆಯಲ್ಲಿ ಮೂರು ವರ್ಷದಿಂದ ಕಾದಿದ್ದ ತಮ್ಮ ಕಡತವೊಂದಕ್ಕೆ ಮುಕ್ತಿಕಾಣಿಸಲು ಹೆಣಗಾಡಿದರು. ಎಲ್ಲಾ ಆಗಿಯೂ ಕೊನೆಗೆ ‘ತಾಂತ್ರಿಕ’ ಕಾರಣಗಳನ್ನು ಹೇಳಿ ಸತಾಯಿಸಿದ ಪರಿ ಇದೆಯಲ್ಲ, ಅದು ವ್ಯವಸ್ಥೆಯ ಬಗ್ಗೆ ಹೇಸಿಗೆ ಹುಟ್ಟಿಸಿಬಿಡುತ್ತದೆ. ನಮ್ಮ ಕಚೇರಿಗಳು ಕೆಲಸ ಮಾಡುವುದಕ್ಕಿಂತಲೂ, ಆಗಬಹುದಾದ ಕೆಲಸವನ್ನು ಮುಂದೂಡುವುದರಲ್ಲಿ ಅಥವಾ ಮಾಡದೇ ಇರುವುದರಲ್ಲಿ ವಿಶ್ವಕ್ಕೇ ಮಾದರಿ ಆಗುವಂತಿವೆ.

. ಇಂದಿಗೂ ಯಾವ ಕಾರಣವೂ ಇಲ್ಲದೆ ಕಚೇರಿಗಳಲ್ಲಿ ರಾಶಿಗಟ್ಟಲೆ ಕಡತಗಳು ವಿಲೇವಾರಿಯಾಗದೆ ಉಳಿದಿವೆ. ನಾಗರಿಕರಿಗೆ ಸಕಾಲದಲ್ಲಿ ಯಾವ ಕೆಲಸ ಆಗಬೇಕೋ ಅದುಆಗದೆ ಅಲೆದಾಡುತ್ತಾರೆ, ತೊಂದರೆ ಅನುಭವಿಸುತ್ತಾರೆ. ಕೆಲವೊಮ್ಮೆ ಕ್ಷುಲ್ಲಕ ಕಾರಣಕ್ಕಾಗಿ ಚುರುಕಾಗಿ ನಡೆಯಬೇಕಿದ್ದ ಕೆಲಸಗಳು ಚಲನೆಮರೆತು ನಿಂತಲ್ಲಿಯೇ ನಿಂತುಬಿಡುತ್ತವೆ. ಕೆಲವು ನಿಮಿಷಗಳ ಕೆಲಸಕ್ಕೆ ದಿನಗಟ್ಟಲೆ ಕಾಯುತ್ತಾ ಕೂರುವುದು, ಹಣ ಖರ್ಚು ಮಾಡಿಸುವುದು,ಅಸಹಾಯಕ ನಾಗರಿಕರು ನಷ್ಟಕ್ಕೆ ಒಳಗಾಗುವುದು...ಈ ಕ್ರಿಯೆಗಳಿಂದ ಸರ್ಕಾರದ ಆಡಳಿತಯಂತ್ರ ನಿಧಾನಗೊಳ್ಳುತ್ತದೆ ಹಾಗೂ ನಾಗರಿಕರ ಗುಣಾತ್ಮಕ ಬದುಕು ಗಾಸಿಗೊಳ್ಳುತ್ತದೆ.

. ಕಥೆಗಾರ ಪೂರ್ಣಚಂದ್ರ ತೇಜಸ್ವಿ ಅವರ ‘ತಬರನ ಕತೆ’ಯ ತಬರ ಈಗಲೂ ನಮ್ಮ ನಡುವೆ ಜೀವಂತವಾಗಿದ್ದಾನೆ. ಅವನು ಅವನದಲ್ಲದ ತಪ್ಪಿಗೆ ಇಂದಿಗೂ ಕಚೇರಿಗೆ ಅಲೆಯು ತ್ತಿದ್ದಾನೆ. ಅಂತಹ ಕಚೇರಿಗಳು ಈಗ ಹೆಚ್ಚಾಗಿವೆ, ತಬರರೂ ಹೆಚ್ಚಾಗಿದ್ದಾರೆ. ಇದಕ್ಕೆ ಕಾರಣ, ಆಡಳಿತ ವ್ಯವಸ್ಥೆಯಲ್ಲಿನ ಜಡತ್ವ ಹಾಗೂ ಆ ವ್ಯವಸ್ಥೆಯ ಭಾಗವಾದ ನೌಕರರ ದುರಾಸೆ ಜನಸಾಮಾನ್ಯರ ಬದುಕನ್ನು ಹೈರಾಣಾಗಿಸುತ್ತದೆ. ಕೆಲವು ಅಧಿಕಾರಿಗಳಿಗೆ ತಾಂತ್ರಿಕ ಜ್ಞಾನದ ಕೊರತೆಯೂ ಇದೆ. ಆದರೆ, ಆ ಕೊರತೆ ಬಹುತೇಕ ಸಂದರ್ಭಗಳಲ್ಲಿ ಸಹಜ ಆದುದ್ದಾಗಿರದೇ, ಕಲಿಕೆಗೆ ಬೆನ್ನುಹಾಕಿದ ಜಡ ಮನೋ ಧರ್ಮಕ್ಕೆ ಸಂಬಂಧಿಸಿದ್ದಾಗಿರುತ್ತದೆ.

. ನಾವೀಗ ‘ಡಿಜಿಟಲ್ ಇಂಡಿಯಾ’ದ ಭಾಗವಾಗಿದ್ದೇವೆ. ಆದರೆ, ಈ ಡಿಜಿಟಲ್ ಕ್ರಾಂತಿಯ ಲಾಭ ಕಟ್ಟಕಡೆಯ ನಾಗರಿಕ ನಿಗೆ ತಲಪಬೇಕಾದರೆ, ಆ ವ್ಯವಸ್ಥೆಯನ್ನು ನಿರ್ವಹಿಸುವ ‘ಮಾನವ ಸಂಪನ್ಮೂಲ’ ಅಷ್ಟೇ ವೇಗವಾಗಿ ಅಪ್ಡೇಟ್ ಆಗಬೇಕು. ಜನಸಾಮಾನ್ಯರ ಬದುಕನ್ನು ಹಸನುಗೊಳಿಸದೆ ಹೋದರೆ ‘ಡಿಜಿಟಲ್ ಇಂಡಿಯಾ’ ಘೋಷಣೆ ಆಕರ್ಷಕ ಶಬ್ದವಾಗಿಯಷ್ಟೇ ಉಳಿಯುತ್ತದೆ. ಹೊಸ ಯೋಜನೆಗಳು ಜಾರಿಗೆ ಬಂದಾಗ ಕಡತಗಳಲ್ಲಿ ಅವುಗಳ ಬಗ್ಗೆ ಆದೇಶಗಳು ಹೊರಬೀಳುತ್ತವೆ. ಯೋಜನೆಗಳನ್ನು ಜನರಿಗೆ ತಲಪಿಸ ಬೇಕಾದ ತಳಮಟ್ಟದ ಸಿಬ್ಬಂದಿಗೆ ತರಬೇತಿ ನೀಡಿದರೂ ಅದರ ಪರಿಣಾಮ ಯಾಕೆ ನಿರೀಕ್ಷೆಯಂತಿಲ್ಲ ಎಂಬುದು ಯಕ್ಷಪ್ರಶ್ನೆ. ಒಮ್ಮೊಮ್ಮೆ ತಂತ್ರಜ್ಞಾನವು ನಾಗರಿಕರಿಗೆ ವರದಾನವಾಗುವ ಬದಲು ಹೊಸ ರೂಪದ ತಲೆನೋವಾಗಿ ಪರಿಣಮಿಸುತ್ತದೆಯೇನೊ ಅನಿಸುತ್ತದೆ.

. ಸರ್ಕಾರಿ ಕಚೇರಿಗಳಲ್ಲಿ ಬ್ರಹ್ಮಾಸ್ತ್ರದಂತೆ ಬಳಕೆಯಾಗುವ ಕಾರಣಗಳಲ್ಲೊಂದು, ‘ಸರ್ವರ್ ಡೌನ್’. ಈ ಒಂದು ಸಬೂಬಿನ ಹಿಂದೆ ಕೆಲಸ ಮಾಡದ ಸೋಮಾರಿತನವೋ ಅಥವಾ ತಾಂತ್ರಿಕ ಅಸಹಾಯಕತೆಯೋ ಅಡಗಿರಬಹುದು. ಹಿಂದೆ ಕಚೇರಿಗಳಲ್ಲಿ ಕಾಗದದ ಕಡತಗಳು ದೂಳು ಹಿಡಿಯು ತ್ತಿದ್ದವು. ಇಂದು ಡಿಜಿಟಲ್ ಕಡತಗಳು ತಾಂತ್ರಿಕ ಕಾರಣಗಳ ಗೋಜಲಿನಲ್ಲಿ ಸಿಲುಕಿವೆ. ತಂತ್ರಜ್ಞಾನವು ನಮ್ಮ ಕೆಲಸವನ್ನು ಸುಲಭಗೊಳಿಸಬೇಕೇ ಹೊರತು ಸಂಕೀರ್ಣಗೊಳಿಸಬಾರದು, ನಾಗರಿಕರನ್ನು ಸತಾಯಿಸುವ ಅಸ್ತ್ರವಾಗಬಾರದು. ಕಂಪ್ಯೂಟರ್ ಕೀಬೋರ್ಡ್ ಮೇಲೆ ಗುಂಡಿಗಳನ್ನು ಹುಡುಕುವ ಗುಮಾಸ್ತನಿಗೆ ಆ ತಾಂತ್ರಿಕತೆಯು ಶಾಪವಾಗಿ ಕಂಡರೆ, ಆ ಸಾಲಿನಲ್ಲಿ ನಿಂತಿರುವ ನಾಗರಿಕನಿಗೆ ಅದು ಕಾಲಹರಣದಂತೆ ಕಾಣಿಸುತ್ತದೆ. ಈ ಯಾಂತ್ರಿಕ ಪ್ರಕ್ರಿಯೆಯಲ್ಲಿ ನಾಗರಿಕನ ಸಮಯ ಮತ್ತು ಹಣ ಎರಡೂ ಪೋಲಾಗುತ್ತವೆ.

. ಕೆವೈಸಿ, ಆಧಾರ್, ಒಟಿಪಿ, ಫಿಂಗರ್ ಪ್ರಿಂಟ್... ಇತ್ಯಾದಿಗಳ ಮಧ್ಯೆ ಜನಸಾಮಾನ್ಯರ ಬದುಕು ಸಿಕ್ಕಿಹಾಕಿಕೊಂಡಿದೆ. ಅವನು ಅಸಹಾಯಕನಾಗಿ ನಿಂತಿದ್ದಾನೆ. ಅಂದು ಕಾಗದದ ಕಡತಗಳಿದ್ದವು, ಇಂದು ಸ್ಕ್ರೀನ್ ಮೇಲಿನ ಡೇಟಾ ಇದೆ. ಆದರೆ, ಅಂದು ಮತ್ತು ಇಂದು ಬದಲಾಗದೇ ಉಳಿದಿರುವುದು ನಾಗರಿಕನ ಪರದಾಟ. ಕಚೇರಿಗಳ ವಿನ್ಯಾಸ ಬದಲಾಗಿದೆ, ಸಿಬ್ಬಂದಿ ಕೈಗೆ ಕಂಪ್ಯೂಟರ್ ಬಂದಿದೆ. ಜನಸಾಮಾನ್ಯರ ಕೆಲಸಗಳನ್ನು ಶೀಘ್ರವಾಗಿ ಮಾಡಿಕೊಡಬೇಕು ಎನ್ನುವ ಸಂವೇದನೆ ಇನ್ನೂ ಬರಬೇಕಿದೆ.

. ಯಂತ್ರಗಳು ಹೊಸತಾದರೆ ಸಾಲದು, ನೌಕರನು ಮತ್ತೆ ಮತ್ತೆ ಹೊಸತನ ರೂಢಿಸಿಕೊಳ್ಳಬೇಕು. ಪ್ರತಿ ಕಚೇರಿಯೂ ನಾಗರಿಕ ಸ್ನೇಹಿಯಾಗಬೇಕು. ಆಡಳಿತದಲ್ಲಿನ ವಿಳಂಬ ಧೋರಣೆ ಎಂಬುದು ನಾಗರಿಕರ ಗುಣಾತ್ಮಕ ಬದುಕನ್ನು ದುರ್ಬಲಗೊಳಿಸುತ್ತದೆ.

. ತಬರನಂತಹ ಅಸಂಖ್ಯಾತ ಜೀವಗಳು ಇಂದಿಗೂ ಸರ್ಕಾರಿ ಕಚೇರಿಯ ಮೆಟ್ಟಿಲುಗಳನ್ನು ಹತ್ತಿ ಇಳಿಯುತ್ತಿವೆ. ತಬರ ನಮ್ಮ ನಡುವೆಯಿಂದ ಕಣ್ಮರೆಯಾಗುವ ದಿನಗಳು ಬೇಗನೆ ಬರಲಿ. ಕೇಂದ್ರ ಸರ್ಕಾರದ ‘ಡಿಜಿಟಲ್ ಇಂಡಿಯಾ’ ಘೋಷಣೆಯಾಗಿಯಷ್ಟೇ ಉಳಿಯದೆ, ಜನಪರವಾಗಿ ಅನುಷ್ಠಾನಕ್ಕೆ ಬರಲಿ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಸಂಗತ: ತಬರನೂ ಇದ್ದಾನೆ, ಜಡ ಕಚೇರಿಗಳೂ ಇವೆ!

ಚಿನಕುರುಳಿ ಕಾರ್ಟೂನು: 09 ಮೇ 2026

ಚುರುಮುರಿ: ಗಮ್‌ ಗಮ್‌ ಗೋವಿಂದಂ!

ಸರ್ಕಾರ ರಚನೆಗೆ ಬೆಂಬಲ ಕೋರಿದ ಟಿವಿಕೆ: ಸ್ಟಾಲಿನ್ ಜೊತೆ ಮಿತ್ರಪಕ್ಷ ನಾಯಕರ ಚರ್ಚೆ

ಹುಷಾರಾಗಿ ಹೆಜ್ಜೆ ಇಡಿ: ವಿಜಯೇಂದ್ರಗೆ ಸಚಿವ ಸತೀಶ ಜಾರಕಿಹೊಳಿ ಸಲಹೆ

IPL 2026: ಟೈಟನ್ಸ್ ವಿರುದ್ಧ ಒಂದೇ ಓವರ್‌ನಲ್ಲಿ 11 ಎಸೆತ ಎಸೆದ ಜೋಫ್ರಾ ಆರ್ಚರ್

IPL 2026| ಗಿಲ್, ಸಾಯಿ ಅರ್ಧಶತಕ: ರಾಜಸ್ಥಾನಕ್ಕೆ 230 ರನ್ ಗುರಿ

ಐಪಿಎಲ್ ‘ಹನಿಟ್ರ್ಯಾಪ್’ ತಡೆಗೆ ಬಿಸಿಸಿಐ ನಿಯಮ

ಅಂತರರಾಷ್ಟ್ರೀಯ ಸೈಕ್ಲಿಸ್ಟ್‌ಗಳಿಗೆ ನೆರವು ಇಂದು

ಒಳನೋಟ | ಗೋವಾದಂತೆ ಮಂಗಳೂರು ಬೀಚ್‌ ಪ್ರವಾಸೋದ್ಯಮಕ್ಕೂ ʼಜೀವʼ ತುಂಬಬೇಕಿದೆ..

ಒಳನೋಟ: ಬೇಕು ತಾಲ್ಲೂಕು ಆಸ್ಪತ್ರೆಗೆ ‘ಚಿಕಿತ್ಸೆ’

ಒಳನೋಟ: ಮೃಗಾಲಯದಲ್ಲಿ ಮೂಕರೋದನ

ಒಳನೋಟ: ಗಿಗ್‌ ಕಾರ್ಮಿಕರದ್ದು ಬಗೆದಷ್ಟೂ ಬವಣೆ

ಚಿನಕುರುಳಿ ಕಾರ್ಟೂನು: 09 ಮೇ 2026

ಚುರುಮುರಿ: ಗಮ್‌ ಗಮ್‌ ಗೋವಿಂದಂ!

ಸರ್ಕಾರ ರಚನೆಗೆ ಬೆಂಬಲ ಕೋರಿದ ಟಿವಿಕೆ: ಸ್ಟಾಲಿನ್ ಜೊತೆ ಮಿತ್ರಪಕ್ಷ ನಾಯಕರ ಚರ್ಚೆ

ಹುಷಾರಾಗಿ ಹೆಜ್ಜೆ ಇಡಿ: ವಿಜಯೇಂದ್ರಗೆ ಸಚಿವ ಸತೀಶ ಜಾರಕಿಹೊಳಿ ಸಲಹೆ