25 ವರ್ಷಗಳ ಹಿಂದೆ | 1998ರ ಜುಲೈ 29, ಬುಧವಾರ

ಬೆಲೆ ಏರಿಕೆಗೆ ಉಭಯ ಸದನಗಳಲ್ಲಿ ತರಾಟೆ; ಬಿಜೆಪಿ ವೈಫಲ್ಯ ಖಂಡಿಸಿ ಪ್ರತಿಪಕ್ಷ ಸಭಾತ್ಯಾಗ

ನವದೆಹಲಿ, ಜುಲೈ 28 (ಪಿಟಿಐ)– ಬೆಲೆ ಹತೋಟಿ ಹಾಗೂ ಕಾನೂನು ಶಾಂತಿ ಪರಿಸ್ಥಿತಿಯನ್ನು ಹತೋಟಿಗೆ ತರುವುದೂ ಸೇರಿದಂತೆ ಎಲ್ಲ ರಂಗಗಳಲ್ಲೂ ವಾಜಪೇಯಿ ನಾಯಕತ್ವದ ಸರ್ಕಾರ ವಿಫಲವಾಗಿದೆ ಎಂದು ಆಪಾದಿಸಿದ ಪ್ರತಿಪಕ್ಷಗಳು ಸಂಸತ್ತಿನ ಎರಡೂ ಸದನಗಳಲ್ಲಿ ಇಂದು ಸಭಾತ್ಯಾಗ ಮಾಡಿದವು.

ಈ ಸರ್ಕಾರ ‘ಎಷ್ಟುಬೇಗ ತೊಲಗಿದರೆ ದೇಶದ ಜನರಿಗೆ ಅಷ್ಟು ಒಳ್ಳೆಯದು’ ಎಂದು ಘೋಷಿಸುತ್ತ ಸದಸ್ಯರು ಹೊರನಡೆದರು.

ರಾಜಧಾನಿಯಲ್ಲಿ ಕಾಂಗ್ರೆಸ್‌ ಪಕ್ಷ ಸೋನಿಯಾ ಗಾಂಧಿ ನೇತೃತ್ವದಲ್ಲಿ ಸರ್ಕಾರದ ವಿರುದ್ಧ ಚಳವಳಿಯನ್ನು ಪ್ರಾರಂಭಿಸುತ್ತಿದ್ದಂತೆ ಸದನದ ಒಳಗೆ ಪ್ರತಿಪಕ್ಷ ನಾಯಕ ಶರದ್ ಪವಾರ್‌ ಅವರು ಶೂನ್ಯವೇಳೆಯಲ್ಲಿ ಸರ್ಕಾರದ ವೈಫಲ್ಯವನ್ನು ಪ್ರಸ್ತಾಪಿಸಿ ‘ಈ ಸರ್ಕಾರಕ್ಕೆ ಅಧಿಕಾರದಲ್ಲಿ ಮುಂದುವರಿಯಲು ನೈತಿಕ ಸಮರ್ಥನೆ ಇಲ್ಲ’ ಎಂದರು.