ನವದೆಹಲಿ ಜುಲೈ 12 (ಪಿಟಿಐ)– ಇಂದ್ರಕುಮಾರ್‌ ಗುಜ್ರಾಲ್‌ ನೇತೃತ್ವದ ಸಂಯುಕ್ತ ರಂಗ ಸರ್ಕಾರದ ಆಡಳಿತ ವೈಖರಿ ಕುರಿತು ಕಾಂಗ್ರೆಸ್‌ ಇದೇ ಪ್ರಥಮ ಬಾರಿಗೆ ಅತೃಪ್ತಿ ವ್ಯಕ್ತ‍ಪಡಿಸಿದೆ. ಆದರೂ ಗುಜ್ರಾಲ್‌ ಸರ್ಕಾರಕ್ಕೆ ಹೊರಗಿನಿಂದ ನೀಡುತ್ತಿರುವ ಬೆಂಬಲವನ್ನು ಈ ಕಾರಣಕ್ಕೆ ವಾಪ‍ಸ್‌ ಪಡೆಯುವುದಿಲ್ಲ ಎಂದು ಇಂದು ನಡೆಸಿದ ಕಾಂಗ್ರೆಸ್‌ ಸಂಸದೀಯ ಪಕ್ಷದ ಸಭೆಯಲ್ಲಿ ಸ್ಪಷ್ಟಪಡಿಸಲಾಗಿದೆ.
ಕಾಂಗ್ರೆಸ್‌ ಸಂಸದೀಯ ಪಕ್ಷದ (ಸಿಪಿಪಿ) ಕಾರ್ಯಕಾರಿ ಸಭೆಯ‌ನ್ನು ಇಂದು ಉದ್ದೇಶಿಸಿ ಮಾತನಾಡಿದ ಅಧ್ಯಕ್ಷ ಸೀತಾರಾಂ ಕೇಸರಿ ಅವರು, ಗುಜ್ರಾಲ್‌ ನೇತೃತ್ವದ ಸರ್ಕಾರಕ್ಕೆ ‘ದೌರ್ಬಲ್ಯ’ಗಳಿವೆ; ಆದರೂ ಬೆಂಬಲವನ್ನು ಕಾಂಗ್ರೆಸ್‌ ಮುಂದುವರಿಸುವುದು ಎಂದರು.
ಸಂಸತ್‌ನ ಮುಂಗಾರು ಅಧಿವೇಶನ ಪ್ರಾರಂಭವಾಗಲು ಇನ್ನು ಕೇವಲ 10 ದಿನಗಳಿರುವಾಗ ಕಾಂಗ್ರೆಸ್‌ ತನ್ನ ಅತೃಪ್ತಿ ವ್ಯಕ್ತ ಪಡಿಸಿರುವುದು ಮುಖ್ಯ ಬೆಳವಣಿಗೆಯಾಗಿದೆ.
l ಆಲಮಟ್ಟಿ ಹಿನ್ನೀರು: ಸಜ್ಜಾಗಲು ಸೇನೆಗೆ ಸೂಚನೆ
ವಿಜಾಪುರ, ಜುಲೈ 12– ಕಳೆದ ಎರಡು ವಾರಗಳಿಂದ ಒಂದೇ ಸಮನೆ ಏರುತ್ತಿರುವ ಆಲಮಟ್ಟಿ ಜಲಾಶಯದ ಹಿನ್ನೀರಿನಿಂದಾಗಿ ಉಲ್ಬಣಿಸಬಹುದಾದ ತುರ್ತು ಪರಿಸ್ಥಿತಿ ಎದುರಿಸಲು ಸನ್ನದ್ಧವಾಗಿರುವಂತೆ ವಾಯುಸೇನೆ ಮತ್ತು ಭೂಸೇನೆಗೆ ಸೂಚನೆ ನೀಡಲಾಗಿದೆ. ಆಲಮಟ್ಟಿ, ಬೀಳಗಿ, ಬಾಗಲಕೋಟೆಗಳಲ್ಲಿ ಹೆಲಿಪ್ಯಾಡ್‌ಗಳನ್ನು ಸಿದ್ಧಪಡಿಸಲಾಗಿದೆ.
