ಅರಸು ನಾಯಕತ್ವದಲ್ಲಿ ಸಂಸತ್ಸದಸ್ಯರ ಸಭೆಯ ಪೂರ್ಣ ನಂಬಿಕೆ
ಬೆಂಗಳೂರು, ಜೂನ್ 2– ಇಂದು ಇಲ್ಲಿ ನಡೆದ ರಾಜ್ಯದ ಸಂಸತ್ತಿನ ಸದಸ್ಯರ ಸಭೆ ಮುಖ್ಯಮಂತ್ರಿ ಶ್ರೀ ದೇವರಾಜ ಅರಸು ನಾಯಕತ್ವದಲ್ಲಿ ಪೂರ್ಣ ನಂಬಿಕೆಯನ್ನು ವ್ಯಕ್ತಪಡಿಸಿ, ಎಲ್ಲ ವಿಷಯಗಳಲ್ಲೂ ಸಹಕಾರದ ಭರವಸೆಯನ್ನು ನೀಡಿತು.
ಅಲ್ಲದೆ ಇನ್ನು ಮುಂದೆ ರಾಜ್ಯದ ಆಡಳಿತ ಹಾಗೂ ನೀತಿ ಕುರಿತು ಚರ್ಚಿಸ ಬಯಸಿದಲ್ಲಿ ಸಂಸತ್ ಸದಸ್ಯರ ಸಭೆಯ ವೇದಿಕೆಯನ್ನು ಉಪಯೋಗಿಸಿಕೊಳ್ಳದೆ ಮೊದಲು ಮುಖ್ಯಮಂತ್ರಿ ಹಾಗೂ ಪ್ರದೇಶ ಅಧ್ಯಕ್ಷರೊಡನೆ ಚರ್ಚಿಸಲೂ ಈ ಸಭೆ ನಿರ್ಧರಿಸಿತು.
ಸಂಸತ್ ಸದಸ್ಯರ ಇವೆರಡು ನಿರ್ಧಾರಗಳೂ ರಾಜ್ಯದ ರಾಜಕೀಯದಲ್ಲಿ ಒಂದು ಪ್ರಮುಖವಾದ ಬೆಳವಣಿಗೆ.
ಆಡಳಿತ ಹಾಗೂ ಕಾಂಗ್ರೆಸ್‌ ಸಂಸ್ಥೆ ಕುರಿತು ತೆರೆದ ಮನಸ್ಸಿನಿಂದ ಚರ್ಚೆ ಮುಂದುವರಿದ ಈ ಸಭೆಯಲ್ಲಿ 14 ಮಂದಿ ಸಂಸತ್ ಸದಸ್ಯರು ಹಾಜರಿದ್ದರು.
