ಬೆಂಗಳೂರು, ಏ. 10– ಬಹುಮತ ಪಡೆದ 45 ವರ್ಷದ ಸಂಸ್ಥಾ ಕಾಂಗ್ರೆಸ್ಸಿನ ಸ್ಪರ್ಧಿ ಮಾಜಿ ಉಪಸಭಾಪತಿ ಶ್ರೀ ಎಸ್.ಡಿ. ಗಾಂವ್‌ಕರ್ ಅವರು ಇಂದು ವಿಧಾನ ಪರಿಷತ್ತಿನ ಸಭಾಪತಿಗಳಾಗಿ ಬಹುಮತದಿಂದ ಚುನಾಯಿತರಾದರು.
ಅವರ ಹೆಸರನ್ನು ಸೂಚಿಸಿದ ನಿರ್ಣಯವನ್ನು ಸಭಾಧ್ಯಕ್ಷತೆಯನ್ನು ವಹಿಸಿ, ಚುನಾವಣೆ ನಡೆಸಿದ ಉಪಸಭಾಪತಿ ಶ್ರೀ ಎಸ್.ಪಿ. ರಾಜಣ್ಣ ಅವರು, ಮತಕ್ಕೆ ಹಾಕಲಾಗಿ ಅವರ ಪರವಾಗಿ 32 ಮತಗಳೂ, ವಿರುದ್ಧವಾಗಿ 24 ಮತಗಳೂ ಬಂದವು.
ಶ್ರೀ ಗಾಂವ್‌ಕರ್ ಅವರು ಸಭಾಪತಿಗಳಾಗಿ ಆಯ್ಕೆಯಾದ ಪ್ರಯುಕ್ತ ಕಾಂಗ್ರೆಸ್ ಬೆಂಬಲದೊಡನೆ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಶ್ರೀ ಎಂ.ವಿ. ರಾಮರಾಯರ ಹೆಸರನ್ನು ಸೂಚಿಸಿದ ನಿರ್ಣಯವನ್ನು ಮತಕ್ಕೆ ಹಾಕಲಿಲ್ಲ.
ಗುರುವಿಗೆ ಪರಮಾನಂದ
ಬೆಂಗಳೂರು, ಏ. 10– ಶಿಷ್ಯ ಉನ್ನತ ಸ್ಥಾನವನ್ನಲಂಕರಿಸಿದ್ದನ್ನು ಕಂಡ ಗುರುವಿಗೆ ಪರಮಾನಂದ.
ಶ್ರೀ ಎಸ್.ಡಿ. ಗಾಂವ್‌ಕರ್ ನೂತನ ಸಭಾಪತಿಗಳಾಗಿ ಆಯ್ಕೆ ಆಗಿ ಆ ಸ್ಥಾನವನ್ನು ಅಲಂಕರಿಸಿದಾಗ, ವಿದ್ಯಾಗುರು ಶ್ರೀ ಎಂ.ಜಿ. ಹಂದ್ರಾಳ ಅವರಿಂದ ಆಶೀರ್ವಾದ.
ಶ್ರೀ ಗಾಂವ್‌ಕರ್ ಅವರು 10 ವರ್ಷದವರಿದ್ದಾಗ ಶ್ರೀ ಹಂದ್ರಾಳ ಅವರು ವಿದ್ಯಾಗುರುವಾಗಿದ್ದರು. ಶ್ರೀ ಗಾಂವ್‌ಕರ್ ಅವರು ಆಗಲೇ ಚೂಟಿಯಿಂದ ಇದ್ದುದನ್ನು ಗುರು ಕಂಡುಕೊಂಡಿದ್ದರು.
ವಿದ್ಯಾರ್ಥಿ ತಮ್ಮ ಮುಂದೆಯೇ, ಉನ್ನತ ಸ್ಥಾನಕ್ಕೆ ಏರಿರುವುದು ತಮಗೆ ಅಭಿಮಾನ, ಆನಂದ ಉಂಟಾಗಿದೆ ಎಂದರು.
