ಬಿ.ಎಸ್‌. ಯಡಿಯೂರಪ್ಪ ಹೆಜ್ಜೆಗುರುತು

‘ಕೊಟ್ಟ ಕುದುರೆಯ ಏರದವ ವೀರನೂ ಅಲ್ಲ, ಧೀರನೂ ಅಲ್ಲ, ಶೂರನೂ ಅಲ್ಲ’ ಎಂಬ ಮಾತನ್ನು ಬಿ.ಎಸ್. ಯಡಿಯೂರಪ್ಪ ಅವರು ಪದೇ ಪದೇ ಹೇಳುತ್ತಿದ್ದರು. ಅವಿರತ ಹೋರಾಟ, ಸಂಘಟನಾ ಚಾತುರ್ಯ, ಜಾತಿ ಬಲ ಎಲ್ಲವೂ ಇದ್ದರೂ ಅವರಿಗೆ ಯಾರೂ ಕರೆದು ಅಧಿಕಾರ ಕೊಟ್ಟಿದ್ದಿಲ್ಲ. ಬಿಡುಬೀಸಾಗಿ ಹೋಗುತ್ತಿದ್ದ ಕುದುರೆಯ ಮೂಗುದಾರ ಹಿಡಿದು, ಅದನ್ನು ಬಗ್ಗಿಸಿ ಮೇಲೇರಿ ಕುಳಿತಿದ್ದೇ ಅವರ ಕಾರ್ಯಶೈಲಿ. ಎರಡು ಬಾರಿ ವಾರದ ಅವಧಿ, ಎರಡು ಬಾರಿ ಅಲ್ಪಾವಧಿ ಮುಖ್ಯಮಂತ್ರಿಯಾದರೂ ಅದು ತಮ್ಮ ಛಲ, ಹಟ ಹಾಗೂ ತಂತ್ರಗಾರಿಕೆಯ ಫಲವಷ್ಟೆ. ಅವರೇ ಯಾವಾಗಲೂ ಹೇಳುತ್ತಿದ್ದಂತೆ ಅಧಿಕಾರ ಅವರಿಗೆ ‘ದೇವ ದುರ್ಲಭ’.

. ಚುನಾವಣಾ ರಾಜಕಾರಣದಲ್ಲಿ 50 ವರ್ಷ ಪೂರೈಸುತ್ತಿರುವ ಹೊತ್ತಿನೊಳಗೆ ‘ಬಿಎಸ್ವೈ ಅಭಿಮಾನೋತ್ಸವ’ ನಡೆಯುತ್ತಿದೆ. ಇಷ್ಟು ಸುದೀರ್ಘ ಅವಧಿ ಸಲೀಸಿನದ್ದಾಗಿರಲಿಲ್ಲ. ಕಲ್ಲು ಮುಳ್ಳು, ತಡೆಗೋಡೆಗಳ ದುರ್ಗಮ ದಾರಿಯಲ್ಲಿ ಪಯಣಿಸಿದ ಅವರು, ತಾವಂದುಕೊಂಡಂತೆ ಅಧಿಕೃತವಾಗಿ ಎರಡು ಬಾರಿ ವಿಧಾನಸೌಧದ ಮೂರನೇ ಮಹಡಿಯಲ್ಲಿ ಆಸೀನರಾಗಿ ಅಧಿಕಾರವನ್ನೂ ಅನುಭವಿಸಿದರು. ಬೀಳುಗಳನ್ನು ಬಿಳಲುಗಳಾಗಿ ಬಳಸಿಕೊಂಡು ಅಧಿಕಾರದ ಉನ್ನತ ಸ್ತರವನ್ನು ಏರಿದರು. ಅಭಿವೃದ್ಧಿಪರ ಧೋರಣೆ, ಜನಪರ ಕಾಳಜಿ ಆರಂಭದ ದಿನಗಳಿಂದಲೂ ಅವರ ಜತೆಗೂಡಿ ಬಂದಿವೆ.

. 1976ರಲ್ಲಿ ಶಿಕಾರಿಪುರ ಪುರಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಿ ಗೆದ್ದಿದ್ದರು. ಆ ಕಾಲದಲ್ಲಿ ಚುನಾವಣೆ ಪ್ರಚಾರಕ್ಕೆ ಗೋಡೆಗಳ ಮೇಲೆ ಬರೆಯುವ ಪರಿಪಾಟವಿತ್ತು. ಚುನಾವಣೆ ಪ್ರಚಾರಕ್ಕೆ ಗೋಡೆಗಳನ್ನು ಬಳಸಬಾರದು ಎಂದು ತಾಕೀತು ಮಾಡಿದ್ದ ಅವರು, ಪಟ್ಟಣದ ಸೌಂದರ್ಯ ಹಾಳಾಗದಂತೆ ಎಚ್ಚರಿಕೆ ವಹಿಸಿದ್ದರು. ಅಂದಿನ ಕಾಲದಲ್ಲಿ ಸಣ್ಣಪುಟ್ಟ ಪಟ್ಟಣಗಳಲ್ಲಿ ಬೀದಿ ದೀಪಕ್ಕೆ ಬಲ್ಬ್ ಬಳಸುತ್ತಿದ್ದರು. ಅವರು ಮೊದಲ ಬಾರಿ ಸದಸ್ಯರಾದಾಗ ಶಿಕಾರಿಪುರ ಪಟ್ಟಣದ ಬೀದಿಗಳಿಗೆ ಟ್ಯೂಬ್ ಲೈಟ್ ಬಂದವು. ಆಗ ಮನೆಗೊಂದು ನಲ್ಲಿ ನೀರಿನ ಸಂಪರ್ಕ ಎಂಬುದು ಕನಸಿನ ಮಾತಾಗಿತ್ತು. ಬೀದಿಗೊಂದು ಇದ್ದ ನಲ್ಲಿಯಿಂದಲೋ ಅಥವಾ ಬಾವಿಯಿಂದಲೋ ನೀರು ತರಬೇಕಿತ್ತು. ಮನೆಮನೆಗೂ ಆಗಲೇ ಅವರು ನಲ್ಲಿ ಹಾಕಿಸಿದ್ದರು.

. ಚುನಾವಣೆ ಎಂಬುದು ಮಹಿಳೆಯರಿಗೆ ಗಗನ ಕುಸುಮವಾಗಿತ್ತು. ಅವರ ಪತ್ನಿ ಮೈತ್ರಾದೇವಿ ಅವರು ಒಂದನೇ ಡಿವಿಜನ್ನಿಂದ ಗೆದ್ದು ಸದಸ್ಯರಾಗಿದ್ದರು. ಅವಧಿ ಮುಗಿದ ಬಳಿಕ ನಡೆದ ಚುನಾವಣೆ ವೇಳೆ ಅಲ್ಲಿ ನಿಲ್ಲುವುದು ಬೇಡ, ತಮ್ಮ ಎದುರಾಳಿಗಳು ಪ್ರಭಾವಿಗಳಾಗಿರುವ ಐದನೇ ಡಿವಿಜನ್ನಲ್ಲಿ ತಮ್ಮ ಪತ್ನಿಯನ್ನು ನಿಲ್ಲಿಸಿದ್ದರು. ಒಂದನೇ ಡಿವಿಜನ್ನಲ್ಲಿ ನಿಂತಿದ್ದರೆ ಸಲೀಲಾಗಿ ಗೆಲ್ಲಬಹುದಾದ ಅವಕಾಶವನ್ನು ಕೈಬಿಟ್ಟು, ಕ್ಷೇತ್ರ ಬದಲಿಸಿದ್ದರು. ಅಲ್ಲಿ ಗೆಲ್ಲಲಿಲ್ಲ. ಹೀಗೆ, ಸವಾಲು ಸ್ವೀಕರಿಸುವ ಗುಣ ಅವರಲ್ಲಿ ಮೈಗೂಡಿತ್ತು.

. ‘1994ರ ಚುನಾವಣೆ ಪೂರ್ವದಲ್ಲಿ ಪಕ್ಷ ಸಂಘಟನೆಗೆ ಹಣವೇ ಇರಲಿಲ್ಲ. ಮನೆಗಳಲ್ಲಿ ಇರುವ ಸ್ಥಿರ ದೂರವಾಣಿ ಸಂಖ್ಯೆಯ ವಿವರಗಳಿರುವ ಪುಸ್ತಕವನ್ನು ಟೆಲಿಕಾಂ ಇಲಾಖೆ ಮುದ್ರಿಸುತ್ತಿತ್ತು. ಅದನ್ನಿಟ್ಟುಕೊಂಡು ಒಂದೇ ಹೆಸರಿನಲ್ಲಿ ಆರೇಳು ಫೋನ್ಗಳಿರುವುದನ್ನು ಪತ್ತೆ ಮಾಡುತ್ತಿದ್ದೆವು. ಒಂದು ಫೋನ್ ಇಟ್ಟುಕೊಳ್ಳುವುದೇ ಶ್ರೀಮಂತಿಕೆಯ ಸೂಚಕವಾಗಿದ್ದಾಗ, ಅಷ್ಟು ಫೋನ್ ಸಂಪರ್ಕಗಳಿದ್ದವರು ಶ್ರೀಮಂತರು ಎಂದು ಭಾವಿಸಿ ಅವರನ್ನು ಸಂಪರ್ಕಿಸುತ್ತಿದ್ದೆವು. ಯಡಿಯೂರಪ್ಪ, ಅನಂತಕುಮಾರ್ ಅವರನ್ನು ಕರೆದುಕೊಂಡು ಹೋಗಿ ನೆರವು ಕೇಳುತ್ತಿದ್ದೆವು. ಒಂದಿಷ್ಟು ಹಣವನ್ನು ಕೆಲವರು ಕೊಟ್ಟಿದ್ದುಂಟು. ಆ ಹೊತ್ತಿಗೆ ಬಿಜೆಪಿಗೆ ಸೇರಿದ್ದ ಪ್ರಭಾವಿ ನಾಯಕರೊಬ್ಬರು ತಮಗಿರುವ ಸಂಪರ್ಕ ಬಳಸಿ, ನಾವು ಹೋಗುವ ಮೊದಲೇ ಅಂತಹ ಶ್ರೀಮಂತರನ್ನು ಭೇಟಿಯಾಗಿ ಹಣ ಪಡೆದಿರುತ್ತಿದ್ದರು. ನಿಮ್ಮ ಪಕ್ಷಕ್ಕೆ ಹಣ ಬೇಕೆಂದು ಅವರು ತೆಗೆದುಕೊಂಡು ಹೋದರಲ್ಲ ಎಂದು ತಾವು ಭೇಟಿಯಾಗಲು ಹೋದವರು ಹೇಳುತ್ತಿದ್ದರು. ಆದರೆ, ಅದು ಪಕ್ಷಕ್ಕೆ ಬರುತ್ತಿರಲಿಲ್ಲ. ನಮ್ಮ ಪಕ್ಷಕ್ಕೆ ಆಸ್ತಿ ಆಗುತ್ತಾನೆ ಎಂದು ಕರೆತಂದರೆ ನಮಗೆ ಬರಬೇಕಾದ ಹಣವನ್ನೆಲ್ಲ ಆತ ಪಡೆಯುತ್ತಿದ್ದಾನಲ್ಲ ಎಂದು ಯಡಿಯೂರಪ್ಪ ಅಕ್ಷರಶಃ ಕಣ್ಣೀರಿಟ್ಟಿದ್ದರು’ ಎಂದು ನೆನಪು ಮಾಡಿಕೊಳ್ಳುತ್ತಾರೆ ಅವರ ಒಡನಾಡಿಯಾಗಿದ್ದ ಬಿ.ಎಚ್. ಶ್ರೀಧರ.

. ಪಕ್ಷ ಸಂಘಟನೆಯ ಹೊಸ ಹೊಳಹುಗಳು ಯಡಿಯೂರಪ್ಪ ಅವರಿಗೆ ಹೊಳೆಯುತ್ತಿದ್ದವು. ಧರಣಿ, ಪಾದಯಾತ್ರೆ, ಚಳವಳಿ ಎಂದು ದಿಢೀರ್ ಘೋಷಿಸಿಬಿಡುತ್ತಿದ್ದರು. ಆದರೆ ಅದನ್ನು ಕಾರ್ಯರೂಪಕ್ಕೆ ಇಳಿಸುವ ದಾರಿಯ ಬಗ್ಗೆ ಅಷ್ಟು ಗಮನ ಹರಿಸುತ್ತಿರಲಿಲ್ಲ. ಈ ವಿಷಯದಲ್ಲಿ ಎಚ್.ಎನ್. ಅನಂತಕುಮಾರ್ ಒಂದು ಹೆಜ್ಜೆ ಮುಂದಿರುತ್ತಿದ್ದರು. ಈಗ ಬಿಜೆಪಿಯಲ್ಲಿರುವ ಎರಡನೇ ತಲೆಮಾರಿನ ಯುವ ಪಡೆಯನ್ನು ಮುಂದಿಟ್ಟು, ಹೋರಾಟಕ್ಕೆ ಬೇಕಾದ ತಳಹದಿಯನ್ನು ಅನಂತಕುಮಾರ್ ರೂಪಿಸುತ್ತಿದ್ದರು. ಇಬ್ಬರೂ ಕೂಡಿ ಆರಂಭದ ದಿನಗಳಲ್ಲಿ ಪಕ್ಷವನ್ನು ಹೀಗೆ ತಳಮಟ್ಟದಲ್ಲಿ ಸಂಘಟಿಸಿದರು.

. ಬ್ಯಾನರ್, ಬಂಟಿಂಗ್ಸ್, ಬಾವುಟಗಳ ಆಕರ್ಷಣೆಗಿಂತ ‘ಜನಾಲಂಕಾರ’ ಬೇಕು ಎಂಬುದು ಯಡಿಯೂರಪ್ಪನವರ ದೃಢ ನಿಲುವಾಗಿತ್ತು. ಜನರನ್ನು ಸೇರಿಸುವ ಸಾಮರ್ಥ್ಯ ಇರುವವರು ಜತೆಗಿರಬೇಕು ಎಂದು ಅವರು ಬಯಸುತ್ತಿದ್ದರು. 2007ರಲ್ಲಿ ಜೆಡಿಎಸ್–ಬಿಜೆಪಿಯ 20:20 ಸರ್ಕಾರ ಬರುವವರೆಗೂ ಅವರ ಜತೆಗಿದ್ದವರೆಲ್ಲ ಅಂತಹ ನಾಯಕರೇ ಆಗಿದ್ದರು. ಬಳಿಕ ಆಗಿದ್ದು ಬೇರೆ. ಹಣ ಬಲ ಇರುವವರು, ಕುಟುಂಬಸ್ಥರು ಜತೆಯಾದರು. ಬಳಿಕ ಚಿತ್ರಣವೇ ಬದಲಾಯಿತು.

. ಹೋರಾಟದ ಬೀದಿ: ಬಿಜೆಪಿ ಎಂದರೆ ಬಿಎಸ್ವೈ, ಬಿಎಸ್ವೈ ಎಂದರೆ ಬಿಜೆಪಿ ಎಂಬ ಅನ್ವರ್ಥ ಪದಗಳು ಚಾಲ್ತಿಯಾಗುವಷ್ಟು ಪಕ್ಷಕ್ಕೆ ದುಡಿದವರು. ಜೀತ ವಿಮುಕ್ತಿ, ನೀರಾವರಿಗಾಗಿ ಹೋರಾಟ, ಬಗರ್ಹುಕುಂ ರೈತರ ಪರ ಪಾದಯಾತ್ರೆ, ಮೆಕ್ಕೆಜೋಳ, ಹತ್ತಿಗೆ ಬೆಲೆ ಕುಸಿದಾಗ ಧರಣಿ, ಬಿತ್ತನೆ ಬೀಜ, ಗೊಬ್ಬರಕ್ಕಾಗಿ ಚಳವಳಿ, ಕೂಲಿಗಾಗಿ ಕಾಳು (ಈಗಿನ ನರೇಗಾ) ಯೋಜನೆಯಡಿ ಅಕ್ರಮದ ಕುರಿತು ಅವಿರತ ಹೋರಾಟವನ್ನು ನಡೆಸಿದರು. ಈಗಿನ ಬಿಜೆಪಿ ನಡೆಸುತ್ತಿರುವಂತೆ ಧಾರ್ಮಿಕ ಭಾವನೆಗಳನ್ನು ಪ್ರಚೋದಿಸುವ ಹೋರಾಟವನ್ನು ಯಡಿಯೂರಪ್ಪ ಮುನ್ನಡೆಸಿದವರಲ್ಲ. ಅದಕ್ಕೆ ಆಸ್ಪದವೂ ಇರಲಿಲ್ಲ. ಹೀಗಾಗಿ, ಎಲ್ಲ ಜಿಲ್ಲೆಗಳಲ್ಲಿ ನಿಧಾನವಾಗಿ ಬಿಜೆಪಿ ನೆಲೆಯೂರಲು ಆರಂಭಿಸಿತು.

. ವಿರೋಧ ಪಕ್ಷದ ನಾಯಕರಾಗಿದ್ದಾಗ ಸದನದಲ್ಲಿ ಮಾತಿಗೆ ನಿಂತು ತಮ್ಮ ಬಿಳಿ ಬಣ್ಣದ ಸಫಾರಿಯ ಎರಡು ಜೇಬುಗಳಿಂದ ಒಂದೊಂದೇ ಚೀಟಿಯನ್ನು ತೆಗೆದು ಅವರು ಸರ್ಕಾರದ ಬೆವರಿಳಿಸುತ್ತಿದ್ದರು.

. ಅಧಿಕಾರದ ಅಂಚು: 2004ರ ಚುನಾವಣೆ ವೇಳೆಗೆ ಎಸ್. ಬಂಗಾರಪ್ಪ ಅವರು ಬಿಜೆಪಿ ಸೇರಿದ್ದು ಆ ಪಕ್ಷದ ಬಲವನ್ನು ಹೆಚ್ಚಿಸಿತು. ಕಾಂಗ್ರೆಸ್–ಜೆಡಿಎಸ್ ಮೈತ್ರಿ ಸರ್ಕಾರ ಅಧಿಕಾರಕ್ಕೆ ಬಂತು. ಆ ಸರ್ಕಾರದಲ್ಲಿ ಜೆಡಿಎಸ್ನೊಳಗಿನ ಆಂತರಿಕ ಸಮರ ತೀವ್ರಗೊಂಡು, ಸಿಡಿದೆದ್ದ ಎಚ್.ಡಿ.ಕುಮಾರಸ್ವಾಮಿ ತಮ್ಮ ಬೆಂಬಲಿಗರ ಜತೆ ಧರ್ಮಸಿಂಗ್ ನೇತೃತ್ವದ ಕಾಂಗ್ರೆಸ್ನ ಮೈತ್ರಿ ಸರ್ಕಾರದಿಂದ ಹೊರಬಂದರು. ಬಳಿಕ ಜೆಡಿಎಸ್–ಬಿಜೆಪಿ ಕೂಡಿಕೆ ಸರ್ಕಾರ ಅಸ್ತಿತ್ವಕ್ಕೆ ಬಂದಿತು. ಅಲ್ಲಿಯವರೆಗೆ ಅಧಿಕಾರದ ರುಚಿ ನೋಡದೇ ಇದ್ದ ಯಡಿಯೂರಪ್ಪ ಮತ್ತು ಬಿಜೆಪಿಯ ಶಾಸಕರು ಮೊದಲ ಬಾರಿಗೆ ಸರ್ಕಾರಿ ಸೌಲತ್ತುಗಳ ಸೊಬಗು ನೋಡಿದರು. ಯಡಿಯೂರಪ್ಪ ಉಪಮುಖ್ಯಮಂತ್ರಿಯೂ ಆದರು. ಇದು ಅವರ ಮೊದಲ ಮಜಲು.

. 20:20 ಅವಧಿ ಮೈತ್ರಿಯನ್ನು ಮುರಿದ ಕುಮಾರಸ್ವಾಮಿ, ಅಧಿಕಾರವನ್ನು ಬಿಟ್ಟುಕೊಡಲಿಲ್ಲ. ವಿಶ್ವಾಸದ್ರೋಹ ಎಂಬ ಘೋಷಣೆ ಮುಂದಿಟ್ಟುಕೊಂಡು, ಅನುಕಂಪದ ಅಲೆ ಗಿಟ್ಟಿಸಿದ ಯಡಿಯೂರಪ್ಪ ಆ ಕಾಲದಲ್ಲಿ ವೀರಶೈವ–ಲಿಂಗಾಯತ ನಾಯಕರಾಗಿ ಹೊರಹೊಮ್ಮಿದರು. 2008ರಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಶಾಸಕರನ್ನು ಗೆಲ್ಲಿಸಲು ಸಾಧ್ಯವಾಯಿತಾದರೂ, ಅಧಿಕಾರ ಹಿಡಿಯಲು ಬೇಕಾದ ಸರಳ ಬಹುಮತ ಸಿಗಲಿಲ್ಲ. ಆಗ, ಐವರು ಪಕ್ಷೇತರ ಸದಸ್ಯರ ಬೆಂಬಲದೊಂದಿಗೆ ಯಡಿಯೂರಪ್ಪ ಮುಖ್ಯಮಂತ್ರಿಯಾದರು. ಆದರೆ, ಚುನಾವಣೆ ಪೂರ್ವದಲ್ಲಿ ಭಾರಿ ಪ್ರಮಾಣದಲ್ಲಿ ಹೂಡಿಕೆ ಮಾಡಿದ್ದ ಕೆಲವರು ಅಡ್ಡಗಾಲು ಹಾಕುತ್ತಲೇ ಬಂದರು. ಪಕ್ಷೇತರರನ್ನು ಸಹಿಸಿಕೊಳ್ಳುವುದು ಸುಲಭವಾಗಿರಲಿಲ್ಲ. ತಮ್ಮ ಅಧಿಕಾರ ಸ್ಥಿರಗೊಳಿಸಿಕೊಳ್ಳಲು ಆ ಕಾಲದಲ್ಲಿ ಯಡಿಯೂರಪ್ಪ ‘ಆಪರೇಷನ್ ಕಮಲ’ ಎಂಬ ಪ್ರಜಾಪ್ರಭುತ್ವಕ್ಕೆ ಮಾರಕವಾದ ಅಸ್ತ್ರ ಬಳಸಿ, ಯಶಸ್ವಿಯೂ ಆದರು.

. ಸಂಭ್ರಮ ಪೂರ್ಣಾವಧಿಗೆ ಉಳಿಯಲಿಲ್ಲ. ಚೆಕ್ನಲ್ಲಿ ಲಂಚ ಪಡೆದ ಆರೋಪಕ್ಕೆ ಯಡಿಯೂರಪ್ಪ ಗುರಿಯಾದರು. ಲೋಕಾಯುಕ್ತ ತನಿಖಾ ವರದಿ, ರಾಜಕೀಯದಲ್ಲಿ ಅಲ್ಲೋಲ ಕಲ್ಲೋಲ ಸೃಷ್ಟಿಸಿತು. ಅದನ್ನೇ ಮುಂದು ಮಾಡಿದ ಬಿಜೆಪಿ ವರಿಷ್ಠರು, ಅಧಿಕಾರದಿಂದ ಇಳಿಸಿದರು. ಬಳಿಕ, ಜೈಲಿಗೂ ಹೋಗಬೇಕಾಯಿತು.

. ಆದರೂ ಯಡಿಯೂರಪ್ಪ ಛಲ ಬಿಡಲಿಲ್ಲ. ಕೆಜೆಪಿ ಕಟ್ಟಿ, ಮತ್ತೊಂದು ಸಾಹಸಕ್ಕೆ ಮುಂದಾದರೂ, ಅದು ಫಲ ಕೊಡಲಿಲ್ಲ. 2014 ಲೋಕಸಭೆ ಚುನಾವಣೆ ಹೊತ್ತಿಗೆ ಬಿಜೆಪಿಗೆ ಮರಳಿದರು. 2018ರಲ್ಲಿ ಅಧಿಕಾರಕ್ಕೆ ಬರಲೇಬೇಕೆಂಬ ಹಟತೊಟ್ಟು ರಾಜ್ಯವಿಡೀ ಸುತ್ತಾಡಿದರು. ಅಷ್ಟೊತ್ತಿಗಾಗಲೇ ಲಿಂಗಾಯತರ ಅನಭಿಷಕ್ತ ನಾಯಕ ಎಂಬ ಬಿರುದು ಪಡೆದಿದ್ದರೂ ಬಹುಮತ ದಕ್ಕಲಿಲ್ಲ. 2008ರಲ್ಲಿ ಮಾಡಿದಂತೆ ಸಂಖ್ಯಾಬಲ ಕೂಡಿಸುವ ವಿಶ್ವಾಸದೊಂದಿಗೆ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿಯೇ ಬಿಟ್ಟರು. ಬಹುಮತ ಸಾಬೀತುಪಡಿಸಲಾಗದೇ, ಎರಡೇ ದಿನಕ್ಕೆ ರಾಜೀನಾಮೆ ನೀಡಿದರು.

. ಹೇಗಾದರೂ ಮಾಡಿ ಮುಖ್ಯಮಂತ್ರಿ ಪಟ್ಟ ಹಿಡಿದೇ ತೀರುವೆ ಎಂಬ ಛಲಕ್ಕೆ ನಿಂತರು.ಅಸಮಾಧಾನಿತರಾಗಿದ್ದ ಕಾಂಗ್ರೆಸ್, ಜೆಡಿಎಸ್ ಶಾಸಕರನ್ನು ‘ಆಪರೇಷನ್ ಕಮಲ’ದ ಬಲೆಗೆ ಕೆಡವಿದ ಯಡಿಯೂರಪ್ಪ,ಮತ್ತೆ ಮುಖ್ಯಮಂತ್ರಿ ಗದ್ದುಗೆಗೆ ಏರಿದರು. ಸಂಪುಟ ವಿಸ್ತರಣೆಗೆ ಅನುಮತಿಯನ್ನೇ ಕೊಡದ ಬಿಜೆಪಿ ವರಿಷ್ಠರು ತಿಂಗಳಿಗೂ ಹೆಚ್ಚು ಸತಾಯಿಸಿದರು. ಆ ವೇಳೆ, ಮಳೆ ಹಾಗೂ ಪ್ರವಾಹ ಕರ್ನಾಟಕವನ್ನು ಕಂಗೆಡಿಸಿದಾಗ ಏಕಾಂಗಿಯಾಗಿ ರಾಜ್ಯ ಸುತ್ತಿ, ಸಂತ್ರಸ್ತರ ಅಳಲು ಆಲಿಸಿದರು. ಅವಧಿ ಪೂರ್ಣಗೊಳಿಸಲು ಬಿಜೆಪಿ ವರಿಷ್ಠರು ಬಿಡಲಿಲ್ಲ. ಎರಡು ವರ್ಷವಾಗುತ್ತಲೇ ಅಧಿಕಾರವನ್ನು ಬಿಟ್ಟು ಕೆಳಗೆ ಇಳಿಯಲೇಬೇಕಾಯಿತು. ಇದು ಅವರ ರಾಜಕೀಯ ನಡಿಗೆಯ ಕತೆ–ವ್ಯಥೆ.

. ಸುಧಾರಣೆಯ ಹಾದಿ: ಯಡಿಯೂರಪ್ಪ ಎಂದೂ ಅಳುಕಿದವರಲ್ಲ. ಕರ್ನಾಟಕದಲ್ಲಿ ತಾವು ಹೇಳಿದ್ದೇ ನಡೆಯಬೇಕೆಂದು ಪ್ರತಿಪಾದಿಸಿ, ಅದನ್ನು ಸಾಧಿಸಿದವರು. ಎರಡನೇ ಅವಧಿಯಲ್ಲಿ ಮುಖ್ಯ ಮಂತ್ರಿಯಾಗಿದ್ದಾಗ ಕರ್ನಾಟಕದಲ್ಲಿ ಪ್ರವಾಹ ಎದುರಾಯಿತು. ಅದಕ್ಕೆ, ಕೇಂದ್ರದಿಂದ ಪರಿಹಾರ ಸಿಕ್ಕಿರಲಿಲ್ಲ. ಬಳ್ಳಾರಿಗೆ ಬಂದಿದ್ದ ಪ್ರಧಾನಿ ನರೇಂದ್ರ ಮೋದಿ ಅವರ ಎದುರೇ ಬಹಿರಂಗ ವೇದಿಕೆಯಲ್ಲಿ ರಾಜ್ಯಕ್ಕೆ ಅನ್ಯಾಯವಾಗಿದೆ ಎಂದು ಗುಡುಗಿದ್ದರು.

. ಯಡಿಯೂರಪ್ಪ ಕೋಮುವಾದಿ ರಾಜಕಾರಣ ಮಾಡಿದವರಲ್ಲ. ತಮ್ಮ ಬಜೆಟ್ನಲ್ಲಿ ಮುಸ್ಲಿಂ, ಕ್ರೈಸ್ತ ಸಮುದಾಯಕ್ಕೆ ಸಾಕಷ್ಟು ಅನುದಾನ, ಯೋಜನೆಗಳನ್ನೂ ಘೋಷಿಸಿದ್ದರು. ಕೋವಿಡ್ ಮಾರಿ ಆವರಿಸಿದಾಗ, ತಬ್ಲೀಗಿ ಜಮಾತ್ ಎಂಬ ಮುಸ್ಲಿಂ ಸಮುದಾಯದ ಸಂಘಟನೆ ದೆಹಲಿಯಲ್ಲಿ ಹಮ್ಮಿಕೊಂಡಿದ್ದ ಶಿಬಿರಕ್ಕೆ ಹೋಗಿದ್ದ ಕೆಲವರು ಕರ್ನಾಟಕಕ್ಕೆ ವಾಪಸ್ ಬಂದರು. ಅವರಲ್ಲಿ ಕೋವಿಡ್ ಇರುವುದು ಪತ್ತೆಯಾಗಿತ್ತು. ‘ಮುಸ್ಲಿಮರು ಕೋವಿಡ್ ಹರಡುತ್ತಿದ್ದಾರೆ’ ಎಂದು ಬಿಜೆಪಿಯ ಕೆಲವು ನಾಯಕರು ದೂರಿದ್ದರು. ಇದರಿಂದ ಸಿಟ್ಟಿಗೆದ್ದ ಯಡಿಯೂರಪ್ಪ, ಯಾರೊಬ್ಬರೂ ಇಂತಹ ಮಾತನ್ನು ಆಡಕೂಡದು ಎಂದು ಎಲ್ಲರ ಬಾಯಿ ಮುಚ್ಚಿಸಿದ್ದರು.

. ಕುಮಾರಸ್ವಾಮಿ ಸರ್ಕಾರದಲ್ಲಿ ಉಪಮುಖ್ಯಮಂತ್ರಿಯಾಗಿ ಹಣಕಾಸು ಖಾತೆ ಹೊಂದಿದ್ದ ಅವರು, ಸಾರಾಯಿ ಹಾಗೂ ಲಾಟರಿಯನ್ನು ಸಂಪೂರ್ಣ ನಿಷೇಧಿಸಿದರು. ರೈತರ ಸಾಲಮನ್ನಾ ಕೂಡ ಮಾಡಿಸಿದರು.

. ಯಡಿಯೂರಪ್ಪನವರು ಮೊದಲ ಬಾರಿ ಮುಖ್ಯಮಂತ್ರಿಯಾಗಿದ್ದಾಗಲೇ, ಜೈವಿಕ ಇಂಧನ ಅಭಿವೃದ್ಧಿ ಮಂಡಳಿ, ಸಾವಯವ ಕೃಷಿ ಮಿಷನ್ ಸ್ಥಾಪಿಸಿದ್ದರು. ಪಶ್ಚಿಮಘಟ್ಟದ ಅಭಿವೃದ್ಧಿಗೆ ಕಾರ್ಯಪಡೆಯನ್ನು ರಚಿಸಿದ್ದರು. ಈಗ ಕೇಂದ್ರದ ನೀತಿಯ ಆಯೋಗದ ಸದಸ್ಯರಾಗಿರುವ ಪ್ರೊ. ಕೆ.ವಿ. ರಾಜು ಅವರನ್ನು ಆಗಲೇ ಆರ್ಥಿಕ ಸಲಹೆಗಾರರನ್ನಾಗಿ ನೇಮಿಸಿಕೊಂಡಿದ್ದರು. ಯಡಿಯೂರಪ್ಪನವರದ್ದು ಪ್ರಶ್ನಾತೀತ ಕನ್ನಡ ಪ್ರೇಮ. ತಂತ್ರಾಂಶ ಅಭಿವೃದ್ಧಿಗೆ ಆದ್ಯತೆ ನೀಡಿದ್ದರು.

. ಕುಟುಂಬ ರಾಜಕಾರಣ, ಭ್ರಷ್ಟಾಚಾರದ ಆರೋಪಗಳು ಅವರ ಸುತ್ತ ಸುತ್ತಿಕೊಂಡವು. ಅದರಿಂದ ಹೊರಬರಲು ಅವರಿಗೆ ಸಾಧ್ಯವಾಗಲಿಲ್ಲ. ಇಳಿ ವಯಸ್ಸಿನಲ್ಲಿ ಪೋಕ್ಸೊ ಪ್ರಕರಣವೊಂದು ತಳಕು ಹಾಕಿಕೊಂಡಿತು. ದ್ರಷ್ಟಾರನಂತೆ ರಾಜ್ಯವನ್ನು ಮುನ್ನಡೆಸಬಹುದಾಗಿದ್ದ ಜನ ನಾಯಕರೊಬ್ಬರು, ತಮ್ಮದೇ ಆದ ಪ್ರಮಾದಗಳಿಂದ ತುಸು ಹಿನ್ನಡೆ ಅನುಭವಿಸಿದರು. ಹಾಗಿದ್ದರೂ, ಮಕ್ಕಳಿಗೆ ಬೈಸಿಕಲ್, ಭಾಗ್ಯಲಕ್ಷ್ಮಿ ಬಾಂಡ್, ಕೋವಿಡ್ ಕಾಲದಲ್ಲಿ ಉಚಿತ ಲಸಿಕೆ, ಹತ್ತು ಹಲವು ರೈತ ಪರ ಯೋಜನೆಗಳಿಂದ ಯಡಿಯೂರಪ್ಪ ಇನ್ನೂ ಜನಮಾನಸದಲ್ಲಿ ನಾಯಕರಾಗಿಯೇ ಉಳಿದಿದ್ದಾರೆ.