ಭಾರತವು 130 ಕೋಟಿ ಜನಸಂಖ್ಯೆ ಇರುವ, ಅಭಿವೃದ್ಧಿ ಹೊಂದುತ್ತಿರುವ ದೇಶ. ಮತದಾನಕ್ಕೆ ಅರ್ಹರಾದವರೆಲ್ಲರಿಗೂ ಮತದಾರರ ಗುರುತಿನ ಚೀಟಿ ನೀಡಿದ್ದು, ಚುನಾವಣಾ ಆಯೋಗ ಒಂದೇ ದಿನದಲ್ಲಿ ಚುನಾವಣಾ ಮತ ಎಣಿಕೆ ನಡೆಸಿ ಫಲಿತಾಂಶವನ್ನು ಸಾರುತ್ತದೆ. ಅಮೆರಿಕ ಕೇವಲ 33 ಕೋಟಿ ಜನಸಂಖ್ಯೆ ಇರುವ, ಸುಶಿಕ್ಷಿತರೇ ಹೆಚ್ಚಾಗಿರುವ, ಅದಾಗಲೇ ಅಭಿವೃದ್ಧಿ ಹೊಂದಿರುವ ದೇಶವಾದರೂ ಅಲ್ಲಿ ಎಲ್ಲ ಮತದಾರರಿಗೂ ಇನ್ನೂ ಗುರುತಿನ ಚೀಟಿ ಇಲ್ಲ. ಅಲ್ಲಿ ಇನ್ನೂ ಮತಪತ್ರವನ್ನೇ ಬಳಸಲಾಗುತ್ತಿದ್ದು, ಮತ ಎಣಿಸಿ ಚುನಾವಣಾ ಫಲಿತಾಂಶವನ್ನು ಸಾರಲು ವಾರಗಟ್ಟಲೇ ಬೇಕು. ಬೇರೆ ವಿಚಾರದಲ್ಲಿ ಏನಾದರೂ ಇರಬಹುದು. ಆದರೆ, ಚುನಾವಣೆ ನಡೆಸುವ ಮತ್ತು ಫಲಿತಾಂಶವನ್ನು ಪ್ರಕಟಿಸುವ ವಿಷಯದಲ್ಲಿ ಅಮೆರಿಕವು ಭಾರತದಿಂದ ಕಲಿಯಬೇಕಾಗಿದೆ.