ಮೊಟ್ಟೆಗೆ ಸಂಬಂಧಿಸಿದಂತೆ ಸಿ.ಮುತ್ತುರಾಯಪ್ಪ ಅವರ ವಾದವನ್ನು (ವಾ.ವಾ., ಜ. 6) ಒಪ್ಪಲಾಗದು. ನೀವು ಮೊಟ್ಟೆ ಸೇವಿಸುವುದು ನಿಮ್ಮ ಆಹಾರದ ಹಕ್ಕು ಎಂದು ಹೇಗೆ ಪ್ರತಿಪಾದಿಸುತ್ತೀರೋ ಹಾಗೇ ಮೊಟ್ಟೆ ತಿನ್ನದೇ ಇರುವುದು ನಮ್ಮ ಆಹಾರದ ಹಕ್ಕು. ತಿನ್ನಲು ಒಲ್ಲದ ಕುಟುಂಬಗಳ ಮಕ್ಕಳಿಗೆ ಅರಿವಿನ ಕೊರತೆ ಇರುವಾಗ, ಶಾಲೆಗಳಲ್ಲಿ ಮೊಟ್ಟೆ ನೀಡಿ ಅವರಿಗೆ ತಿನ್ನಲು ಪ್ರಚೋದನೆ ನೀಡುವುದು ಎಷ್ಟು ಸರಿ? ಅಲ್ಲದೆ ಶಿಕ್ಷಕರು ಕೊಟ್ಟರು ಅಥವಾ ಹೇಳಿದರು, ಸ್ನೇಹಿತರು ಹೇಳುತ್ತಾರೆ, ತಿನ್ನುತ್ತಾರೆ ಎಂದು ಗೊತ್ತಿಲ್ಲದೇ ಮಕ್ಕಳು ತಿನ್ನುವುದು ಆ ಮಕ್ಕಳ ಕುಟುಂಬಗಳಿಗೆ ಮಾಡುವ ಮೋಸವಾಗಿದೆ. ಸಾಮೂಹಿಕ ಶಿಕ್ಷಣ ಪದ್ಧತಿಯಲ್ಲಿ ಮಕ್ಕಳಿಗೆ ಸರ್ವಸಮ್ಮತ ಆಹಾರವನ್ನು ನೀಡಲಿ.
