ಒಂದು ತಿಂಗಳ ಹಿಂದೆ ನಮ್ಮ ಕರಾವಳಿ ಭಾಗದಿಂದ ನಾಪತ್ತೆಯಾದ ಸುವರ್ಣ ತ್ರಿಭುಜ ಯಾಂತ್ರೀಕೃತ ದೋಣಿ ಹಾಗೂ 7 ಮೀನುಗಾರರ ಸುಳಿವು ಇನ್ನೂ ಅಲಭ್ಯವಾಗಿದೆ. ನೌಕಾಪಡೆಯ ಹಡಗುಗಳು ಮಹಾರಾಷ್ಟ್ರ, ಗೋವಾ ಸೇರಿದಂತೆ ಸಮುದ್ರದ ತಳಮಟ್ಟದಲ್ಲೂ ಹಲವಾರು ದಿನಗಳಿಂದ ತೀವ್ರ ಶೋಧ ನಡೆಸಿದರೂ ಪ್ರಯೋಜನವಾಗಿಲ್ಲ. ಕಡಲ್ಗಳ್ಳರ ಹಾವಳಿ, ಉಗ್ರರ ಭೀತಿ ಜೊತೆಗೆ ಅಕ್ರಮ ನುಸುಳುವಿಕೆಗಳು ಪ್ರಮುಖವಾಗಿ ಸಮುದ್ರ ಮಾರ್ಗದಿಂದಲೇ ನಡೆದಿರುವ ಉದಾಹರಣೆಗಳಿವೆ. ಹೀಗಾಗಿ, ದೋಣಿ ಆಳ ಸಮುದ್ರದಲ್ಲಿ ಅವಘಡಕ್ಕೆ ತುತ್ತಾಗಿರುವ, ಇಲ್ಲವೇ ಉಗ್ರರು ಅಪಹರಿಸಿ ವಿಧ್ವಂಸಕ ಕೃತ್ಯಕ್ಕೆ ಬಳಸಿರುವ ಶಂಕೆಗಳು ಬಲವಾಗಿ ವ್ಯಕ್ತವಾಗುತ್ತಿವೆ.
