ವಾಚಕರ ವಾಣಿ: ಯೋಜನೆಯ ಅರಿವು ಮೂಡಿಸಿ

ಲಾಕ್‌ಡೌನ್‌ ಸಮಯದಲ್ಲಿ, ಸರ್ಕಾರದ ಮಹತ್ವಾಕಾಂಕ್ಷೆಯ ಯೋಜನೆಯಾದ ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯ ಮೂಲಕ ಜನಸಾಮಾನ್ಯನ ತುತ್ತಿನ ಚೀಲ ತುಂಬಿಸಬಹುದಿತ್ತು. ಆದರೆ ಹೆಚ್ಚಿನವರಿಗೆ ಈ ಯೋಜನೆಯ ಮೂಲಕ ಕೆಲಸ ಪಡೆಯುವುದು ಹೇಗೆ, ಯಾವ ಯಾವ ಕೆಲಸಗಳು ಇದರ ವ್ಯಾಪ್ತಿಯಲ್ಲಿ ಬರುತ್ತವೆ, ಯಾರನ್ನು ಕೇಳಬೇಕು ಎಂಬ ಬಗ್ಗೆ ಅರಿವಿಲ್ಲದೆ ಯೋಜನೆಯಿಂದ ದೂರ ಉಳಿದಿದ್ದಾರೆ. ಸರ್ಕಾರ ಪ್ರತೀ ಹಳ್ಳಿಯಲ್ಲೂ ಪದವೀಧರ ನಿರುದ್ಯೋಗಿಗಳನ್ನು ಬಳಸಿಕೊಂಡು ಈ ಯೋಜನೆಯ ಕಾರ್ಯಕ್ರಮಗಳ ಬಗ್ಗೆ ತರಬೇತಿ ನೀಡಿ, ಜನರಿಗೆ ತಿಳಿವಳಿಕೆ ಹಾಗೂ ಕೆಲಸ ಮಾಡುವ ವಿಧಾನಗಳನ್ನು ಪರಿಚಯಿಸಬೇಕು. ಆಗ ಮಧ್ಯವರ್ತಿ
ಗಳ ಹಾವಳಿ ತಪ್ಪಿ ಜನಸಾಮಾನ್ಯರಿಗೆ ಮತ್ತು ಪದವೀಧರ ನಿರುದ್ಯೋಗಿಗಳಿಗೆ ಇಬ್ಬರಿಗೂ ಕೆಲಸ ದೊರೆಯುತ್ತದೆ.

-ಶಿವಕುಮಾರ್ ಯರಗಟ್ಟಿಹಳ್ಳಿ, ಚನ್ನಗಿರಿ