ಅಂಗವಿಕಲರು ಸಾಮಾನ್ಯರೊಂದಿಗೆ ಬೆರೆತು ಸಮಾಜದ ಮುಖ್ಯವಾಹಿನಿಗೆ ಬರಬೇಕೇ ವಿನಾ ಪ್ರತ್ಯೇಕಗೊಂಡು ಸಮಾಜದಲ್ಲಿ ಅಸ್ಪೃಶ್ಯರಾಗಬಾರದು. 2016ರ ಅಂಗವಿಕಲರ ಹಕ್ಕುಗಳು ನಿಗದಿಪಡಿಸಿರುವಂತೆ, ಈಗಿರುವ ವಿಶ್ವವಿದ್ಯಾಲಯಗಳಲ್ಲೇ ಮೀಸಲಾತಿ ಒದಗಿಸಿ, ಆರ್ಥಿಕ ಹೊರೆಯಾಗದಂತೆ ಕಲಿಕೆಗೆ ಪ್ರೋತ್ಸಾಹಿಸಿ ಪೂರಕ ವಾತಾವರಣ ನಿರ್ಮಾಣದ ವ್ಯವಸ್ಥೆಯೊಂದಿಗೆ ಸಕಲ ಸೌಲಭ್ಯಗಳು ಕೈಗೆಟುಕುವಂತೆ ಮಾಡಬೇಕು. ಪ್ರತೀ ಹಂತದಲ್ಲೂ ಮೊದಲ ಆದ್ಯತೆ ಆಧಾರದ ಮೇಲೆ ಗುರುತಿಸಬೇಕು. ಆಗಮಾತ್ರ ಅಂಗವಿಕಲರ ಸಬಲೀಕರಣ ಸಾಧ್ಯ. ಪ್ರತ್ಯೇಕಿಸಿದ್ದೇ ಆದಲ್ಲಿ ಸಮಾಜವು ಅಂಗವಿಕಲರು ಹಾಗೂ ಅವರಿಗಾಗಿ ಸ್ಥಾಪಿಸುವ ವಿಶ್ವವಿದ್ಯಾಲಯವನ್ನು ನೋಡುವ ದೃಷ್ಟಿಕೋನ ಮತ್ತಷ್ಟು ಹೀನಾಯ ಸ್ಥಿತಿ ತಲುಪುತ್ತದೆ. ಅಲ್ಲದೆ ಇಂತಹ ನಿರ್ಧಾರಗಳನ್ನು ತೆಗೆದುಕೊಳ್ಳುವಾಗ, ಅಂಗವಿಕಲರನ್ನು ಒಳಗೊಂಡ ಶೈಕ್ಷಣಿಕ ಹಾಗೂ ಕಾನೂನು ತಜ್ಞರೊಂದಿಗೆ ಸಮಾಲೋಚಿಸಿ ತೀರ್ಮಾನಿಸುವುದು ಸೂಕ್ತ.